ကျန်းမာတဲ့ နှလုံးလေးကို ပိုင်ဆိုင်နိုင်စေမယ့် ဘဝနေထိုင်မှုပုံစံဆီသို့ ၁၂ ပတ်တာ ခရီးစဉ်

နှလုံးရောဂါက လူတွေကို ဇီဝိန်ခြွေနေတဲ့ ထိပ်တန်း ကျန်းမာရေးပြဿနာ တစ်ရပ်ပါ။ လူတိုင်းလိုလိုဟာ နေ့စဉ်ဘဝမှာ နှလုံးရောဂါ ခံစားရနိုင်တဲ့ အလေ့အထတွေကို သိလို့ဖြစ်စေ၊ မသိလို့ဖြစ်စေ အကြောင်းအရင်း အမျိုးမျိုးနဲ့ လုပ်မိနေကြပါတယ်။ တကယ်ကတော့ နှလုံး ထိခိုက်စေနိုင်တဲ့ အနေအထားတွေကို လျှော့ချပစ်နိုင်လေလေ အသက်ရှည်လေလေပါ။

သုတေသနရလဒ်တွေအရ ဘဝနေထိုင်မှုပုံစံ ပြောင်းလဲတာက နှလုံးရောဂါ ခံစားရနိုင်ခြေကို လျှော့ချပေးနိုင်တယ်လို့ ဆိုပါတယ်။ ဒီတစ်ခေါက်တော့ ၁၂ ပတ်တာအတွင်း ကျန်းမာတဲ့ နှလုံးလေးကို ပိုင်ဆိုင်နိုင်စေမယ့် ဘဝနေထိုင်မှုပုံစံဆီသို့ ဘယ်လို ပြောင်းလဲရမလဲဆိုတာကို ပြောပြပေးသွားပါမယ်။ ပိုမို ကျန်းမာပြီး ပိုမိုပျော်ရွှင်တဲ့ နေ့စဉ်ဘဝကို စတင်ဖို့ အသင့်ပဲလား ……

ကျန်းမာတဲ့ နှလုံးလေးကို ပိုင်ဆိုင်နိုင်စေမယ့် ဘဝနေထိုင်မှုပုံစံဆီသို့ ၁၂ ပတ်တာ ခရီးစဉ်

ကျန်းမာတဲ့ နှလုံးလေးကို ပိုင်ဆိုင်နိုင်စေမယ့် ဘဝနေထိုင်မှုပုံစံဆီသို့ ၁၂ ပတ်တာ ခရီးစဉ် ကို အတူတူ ကြည့်လိုက်ကြစို့နော်။

• ရက်သတ္တပတ် ၁ – လေ့ကျင့်ခန်း လုပ်ပါ

နေ့စဉ်ပုံမှန် ကိုယ်လက်လေ့ကျင့်ခန်း မလုပ်တာက နှစ်စဉ် လူပေါင်းများစွာ အသက်ဆုံးရှုံးနေရတဲ့ အကြောင်းအရင်း တစ်ရပ်ပါ။ ဒါကြောင့် နှလုံး ကျန်းမာစေဖို့အတွက် တစ်ပတ်ကို ၃ ကြိမ်လောက်တော့ လေ့ကျင့်ခန်း လုပ်ဖို့လိုပါမယ်။ ဒီလိုကနေမှ တဖြည်းဖြည်းချင်း တိုးသွားဖို့ လိုပါမယ်။

လေ့ကျင့်ခန်းကို ပုံမှန် လုပ်ဖြစ်အောင် ကြိုးစားပါ။ ရက်သတ္တပတ်တိုင်းမှာ အေရိုးဗစ်လိုမျိုး ပေါ့ပေါ့ပါးပါး လေ့ကျင့်ခန်းကို မိနစ် ၁၅၀ လောက် လုပ်ပေးပါ။

တစ်နေ့ကို မိနစ် ၃၀ ကနေ ၄၀ လောက်နှုန်းနဲ့ တစ်ပတ်ကို ၄ ရက် ကနေ ၅ရက် လုပ်ပေးလို့လည်း ရပါတယ်။ လေ့ကျင့်ခန်းကို ပိုပြီး တိုးလုပ်နိုင်လေလေ ကျန်းမာရေးအတွက် အကျိုးများလေလေပါ။

• ရက်သတ္တပတ် ၂ – ဆေးလိပ်ဖြတ်ပါ

ဆေးလိပ်ဖြတ်တာက နှလုံးကျန်းမာစေဖို့ တော်တော်လေး ထောက်ကူပေးနိုင်ပါတယ်။ ဆေးလိပ်ဖြတ်ရတာက ခက်ခဲလှတဲ့ အပြောင်းအလဲတွေထဲက တစ်ရပ်ဖြစ်နိုင်ပါတယ်။

တကယ်လို့ ဆေးလိပ်မသောက်တတ်ဘူးဆိုရင်တော့ တစ်ဆင့်ခံ ဆေးလိပ်ငွေ့တွေကို ရှောင်ဖို့ လိုပါမယ်။

ဆေးလိပ်သောက်တာကတင် နှလုံး ကျန်းမာရေးကို ထိခိုက်စေတာ မဟုတ်ဘဲ တဆင့်ခံ ဆေးလိပ်ငွေ့ကလည်း နှလုံးကျန်းမာရေးကို ထိခိုက်စေနိုင်ပါတယ်။

• ရက်သတ္တပတ် ၃ – အဆီနည်းနည်းပဲ စားပါ

အဆီက ခန္ဓာကိုယ်အတွက် ထိခိုက်မှုတွေ ဖြစ်စေနိုင်ပါတယ်။ အထူးသဖြင့် ပြည့်ဝဆီတွေ၊ အသွင်ပြောင်းဆီတွေကို တတ်နိုင်သမျှ လျှော့တာက ကိုယ်အလေးချိန်ကို ထိန်းညှိနိုင်သလို နှလုံးရောဂါ နဲ့ ကင်ဆာရောဂါတွေ ဖြစ်နိုင်ခြေကို လျှော့ချပေးနိုင်ပါတယ်။

• ရက်သတ္တပတ် ၄ – ပြည့်ဝဆီတွေနဲ့ အသွင်ပြောင်းဆီ စားသုံးမှုကို ကန့်သတ်ပါ

ပြည့်ဝဆီနေရာမှာ မပြည့်ဝဆီကို အစားထိုး စားသုံးတာက အကျိုးမပြု ကိုလက်စထရော ပမာဏကို ကျဆင်းစေပြီး နှလုံးသွေးကြောဆိုင်ရာ ရောဂါတွေ ခံစားရနိုင်ခြေကို သိသိသာသာ လျှော့ချပေးနိုင်ပါတယ်။

ပြည့်ဝဆီတွေကို ပြုပြင်ထားတဲ့အစားအစာတွေဖြစ်ကြတဲ့ မာဂျရင်း၊ အသင့်စား အစားအစာတွေ၊ ပြုပြင်ထားတဲ့ အမြန်စား အစားအစာတွေ၊ သရေစာတွေမှာ ပါဝင်ပါတယ်။

အချိုပွဲတွေမှာလည်း ပါဝင်ပါတယ်။ အဆီမပါတဲ့ အသား၊ အဆီထုတ်နို့တွေကို စားသုံးပေးလို့ရပါတယ်။ ဆီကြော်စာတွေနဲ့ ပြုပြင်ထားတဲ့ အသားတွေကို ရှောင်ပါ။

• ရက်သတ္တပတ် ၅ – ကိုလက်စထရောပမာဏ ထိန်းညှိပါ

နေ့စဉ်စားသုံးမှုမှာပါဝင်တဲ့ ကိုလက်စထရောပမာဏကို တတ်နိုင်သမျှ လျှော့ချပါ။ နေ့စဉ်စားသုံးမှုမှာ ကိုလက်စထရော ပါဝင်မှု နည်းလေလေ နှလုံးသွေးကြောရောဂါတွေ ခံစားရနိုင်ခြေ နည်းလေလေပါ။

ဒါကြောင့် နေ့စဉ် စားသုံးမှုမှာ ဟင်းသီးဟင်းရွက်တွေ၊ သစ်သီးတွေ၊ ကောက်နှံတွေ၊ အဆီထုတ် နို့ထွက်ပစ္စည်းတွေ ထည့်သွင်း စားသုံးပေးပါ။ အနီရောင် အသားတွေအစား ငါးနဲ့ အရေခွံ မပါတဲ့ ကြက်သားတွေကို ရွေးစားပါ။ ပဲအမျိုးမျိုးကို စားပါ။ အချိုရည်လျှော့သောက်ပါ။

• ရက်သတ္တပတ် ၆ – ဆားလျှော့စားပါ

ဆားနဲ့ အငန်လွန်ကဲတာတွေစားတာ ပြုပြင်ထားတဲ့ အစားအစာတွေ စားသုံးတာက ဆိုဒီယမ် စားသုံးမှု များစေပြီး နှလုံး ကျန်းမာရေးကို ထိခိုက်စေနိုင်ပါတယ်။ ဒါကြောင့် တစ်နေ့တာရဲ့ ဆား စားသုံးမှုကို ကန့်သတ်ပါ။

• ရက်သတ္တပတ် ၇ – အမျှင်ဓာတ် များများစားပါ

သစ်သီးတွေ၊ ဟင်းသီးဟင်းရွက်တွေ၊ နှံစားသီးနှံတွေက အမျှင်ဓာတ် ကြွယ်ဝပါတယ်။ အမျှင်ဓာတ်ကြွယ်ဝတာက သွေးတွင်းကိုလက်စထရော ကျဆင်းစေဖို့ ထောက်ကူပေးနိုင်ပါတယ်။

တစ်နေ့တာ စားသုံးမှုမှာ နှံစားသီးနှံ ၃ အောင်စ၊ သစ်သီး ၂ ခွက်စာ၊ အသီးအရွက် ၂ ခွက်ခွဲစာလောက် ပါဝင်အောင် စားသုံးပေးတာက ရေများများသောက်ပေးတာကက အစာခြေစနစ်ကို ကျန်းမာစေပြီး သွေးတွင်းကိုလက်စထရောကို ကျဆင်းစေနိုင်ပါတယ်။

• ရက်သတ္တပတ် ၈ – စိတ်ဖိစီးမှု ဖြေလျှော့ပါ

စိတ်ဖိစီးမှု များတာက နှလုံးရောဂါ ဖြစ်နိုင်ခြေကို တိုးစေနိုင်ပါတယ်။ ဒေါသကြီးတာ၊ စိတ်ဖိစီးလွန်းတာက သွေးပေါင်ချိန်ကို မြင့်တက်စေပြီး နှလုံးကို အနားမရစေဘဲ ပျက်စီးစေနိုင်ပါတယ်။

ဒါကြောင့် နှလုံး ကျန်းမာစေဖို့ စိတ်ဖိစီးမှုကို ဖြေလျှော့ပါ။ လေ့ကျင့်ခန်း လုပ်တာ၊ ယော့လေ့ကျင့်တာ၊ တရားထိုင်တာတွေက စိတ်ဖိစီးမှုကို ထိန်းချုပ်ပေးနိုင်ပြီး နှလုံး၊ အဆုတ်နဲ့ ခန္ဓာကိုယ်ကို ကျန်းမာစေနိုင်ပါတယ်။

• ရက်သတ္တပတ် ၉ – အစားအစာတွေကို သေချာလေး ရွေးချယ်ပါ

အစားအစာတွေကို ရွေးချယ်တဲ့အခါ အာဟာရတန်ဖိုး ကြွယ်ဝတာကို ရွေးချယ်ပေးတာက နှလုံးကျန်းမာရေးကို ထောက်ကူပေးနိုင်ပါတယ်။ အဆီ၊ အချိုဓာတ် နဲ့ ဆားပါဝင်မှုတွေကို သေချာလေး ဂရုစိုက် ရွေးချယ်ပါ။

• ရက်သတ္တပတ် ၁၀ – ကိုယ်လက်လှုပ်ရှားမှု အသစ်တွေ လုပ်ဆောင်ပါ

လုပ်ဆောင်နေကျ ကိုယ်လက်လေ့ကျင့်ခန်းတွေအပြင် အသစ်အသစ်သော ကိုယ်လက်လှုပ်ရှားမှုတွေကို လုပ်ဆောင်ပေးပါ။ ယောဂ အပြင် ထိုက်ချိပါ တိုးကစားတာ၊ ရေကူးတာကိုပါ ထပ်ဆောင်း လုပ်တာမျိုးပါ။

• ရက်သတ္တပတ် ၁၁ – စားသောက်မှုပုံစံကို သိပါစေ

အစားအစာတွေ စားတဲ့အခါ အိမ်မှာပဲ စားစား၊ အပြင်မှာပဲ စားစား ကျန်းမာရေးနဲ့ ညီညွတ်တဲ့ စားသောက်မှုပုံစံထဲကနေ သွေဖည်သွားတာမျိုး မဖြစ်အောင် ဂရုစိုက်ပါ။

အကြော်အလှော်တွေအစား ပေါင်းထားတာ ပြုတ်ထားတာမျိုးကို စားပေးတာမျိုးပါ။

• ရက်သတ္တပတ် ၁၂ – မနက်စာ နေ့တိုင်း စားပါ

မနက်တိုင်းမှာ တစ်နေ့တာအတွက် အင်အားပြည့်ဝနေစေဖို့အတွက် မနက်စာ စားဖို့ လိုပါမယ်။ လူတော်တော်များများက မနက်စာကို မစားဘဲ ကျော်သွားတတ်ကြပါတယ်။

တကယ်ကတော့ ကျန်းမာတဲ့ အစားအစာတွေကို မနက်စာ အဖြစ် စားသုံးဖို့ လိုပါမယ်။ ဒါမှ ခန္ဓာကိုယ်ရော နှလုံးပါ ကျန်းမာမှာပါ။

အခုပြောခဲ့တဲ့ အချက်လေးတွေကို တစ်ပတ်ကို ၁ ချက်နှုန်းနဲ့ သေချာစွာ ပြောင်းလဲပြီး ကျန်းမာတဲ့ နှလုံးလေးကို ပိုင်ဆိုင်နိုင်စေမယ့် ဘဝနေထိုင်မှုပုံစံဆီသို့ ၁၂ ပတ်တာ ခရီးစဉ်ကို အောင်အောင်မြင်မြင် ကျော်ဖြတ်ရင်း အသက်ရှည်ရှည် ကျန်းမာပျော်ရွှင်စွာ နေထိုင်နိုင်ကြပါစေကြောင်း ………