ရင်းနှီးဖော်ရွေစွာ နဲ့ ဆက်ဆံတတ်ခြင်းရဲ့ အကျိုးကျေးဇူး

လူတိုင်းကဖော်ရွေရင်းနှီးသူတွေပဲတော့မဟုတ်ပါဘူး။ လူအမျိုးမျိုးစိတ်အထွေထွေဆိုသလိုမျိုးပေါ့။ လူတွေမှာဖော်ရွေတတ်သူတွေရှိသလို လူတွေနဲ့ သိပ်ရင်းရင်းနှီးနှီးမနေကြသူတွေလည်းရှိပါတယ်။ ဒီတစ်ခေါက်တော့ လူတွေနဲ့ ရင်းနှီးဖော်ရွေစွာ ဆက်ဆံတတ်သူလေးတွေပဲရရှိနိုင်မယ့် အကျိုးကျေးဇူးလေးတွေအကြောင်းပြောပြပေးချင်ပါတယ်။

လူတိုင်းကို ဖော်ရွေရင်းနှီးစွာ ဆက်ဆံတတ်ခြင်းကနေရရှိမယ့် အကျိုးကျေးဇူးတွေက ဘာတွေဖြစ်မလဲ……….

လူတိုင်းကိုဖော်ရွေရင်းနှီးစွာဆက်ဆံတတ်မှုကလည်းကောင်းမွန်တဲ့ ကိုယ်ရည်ကိုယ်သွေးတစ်ခုပါ။ ဒီလိုပြောရတဲ့အကြောင်းက လူတိုင်းမှာ လူတွေကို ဖော်ရွေရင်းနှီးစွာဆက်ဆံတတ်တဲ့အရည်အသွေးမရှိပါဘူး။ အလွယ်တကူပြောရရင်တော့ ပေါင်းသင်းဆက်ဆံရေးကောင်းသူတွေပေါ့။ ဒီလိုမျိုးဖော်ရွေရင်းနှီးစွာ ဆက်ဆံတတ်မှုကြောင့်

• လူမှုဆက်ဆံရေးမှာ အလေ့အထကောင်းကိုပျိုးထောင်နိုင်လိမ့်မယ်

တစ်ခါတစ်လေ စိတ်အနှောင့်အယှက်ဖြစ်စရာ ကြုံတဲ့အခါမျိုးဆိုရင် လူတိုင်းက ရိုင်းစိုင်းလိုက်တာ၊ ဆက်ဆံရခက်လိုက်တာလို့ ခံစားမိနိုင်ပါတယ်။ ဒါပေမယ့် လူတိုင်းကတော့ အဆိုးမြင်သမားကြီးပဲမဟုတ်ပါဘူး။ သူတို့မှာလည်း သူတို့ကြုံတွေ့ခဲ့ရတဲ့ အခက်အခဲတွေရှိနေတာကြောင့်ဖြစ်နိုင်ပါတယ်။ ဒီကွင်းဆက်ကို အဆုံးသတ်ဖို့ဆိုရင် ကိုယ့်ဘက်ကဖော်ရွေရင်းနှီးစွာနဲ့ ဆက်ဆံလိုက်ပါ။ ဒီလိုဆက်ဆံမှုကြောင့် သူဘက်ကဆက်ဆံရေးကလည်းကောင်းလာပါလိမ့်မယ်။ ဒီတော့ ကိုယ်တိုင်မှာရော သူများမှာပါကောင်းမွန်စွာဆက်ဆံတတ်တဲ့ လူမှုဆက်ဆံရေး အလေ့အထတစ်ရပ်ကို ပျိုးထောင်ပေးပြီးသားဖြစ်သွားပါလိမ့်မယ်။

• နေ့ရက်တိုင်းမှာပျော်ရွှင်ရမယ်

ဖော်ရွေရင်းနှီးစွာ ဆက်ဆံတတ်တဲ့အလေ့အထက အခြားသူတွေကိုတင်ပျော်ရွှင်မှုပေးနိုင်တာမဟုတ်ဘဲ ကိုယ်တိုင်မှာလည်းပျော်ရွှင်မှုကို ခံစားရစေနိုင်ပါတယ်။ အပြန်အလှန်ဂရုစိုက်ပေးမှုရှိနေတဲ့ အသိုက်အဝန်းတစ်ရပ်ကို ဖန်တီးနိုင်ခွင့်ရရှိပြီး နေ့ရက်တိုင်းမှာ ဂရုစိုက်ပေးမှုတွေကြောင့်ပျော်ရွှင်မှုတွေ ပြည့်စုံနေစေမှာ အသေအချာပါ။

• ဘဝအဓိပ္ပာယ်ပြည့်စုံစေနိုင်တယ်

ဖော်ရွေရင်းနှီးစွာဆက်ဆံတတ်မှုက လူတစ်ယောက်နဲ့တစ်ယောက်ကြားက ခင်မင်မှုရဲ့ မြစ်ဖျားခံရာအချက်တစ်ခုပါ။ လူတိုင်းနဲ့ကောင်းမွန်တဲ့ ဆက်ဆံရေးကိုဖန်တီးနိုင်မှုကပျော်ရွှင်မှုကိုရရှိစေပြီး အပြန်အလှန်ဂရုစိုက်မှုတွေ၊ ကူညီစောင့်ရှောက်မှုတွေကပဲ ဘဝကို ပိုမိုအဓိပ္ပာယ်ရှိလာစေမှာပါ။

• အထီးကျန်မှုကင်းမယ်

ခင်မင်ရင်နှီးစွာဆက်ဆံတတ်မှုကြောင့် သူယ်ချင်းမိတ်ဆွေပေါများနေမယ်ဆိုတာ ပြောနေစရာတောင်မလိုပါဘူး။ ဒီလိုမိတ်ဆွေသူငယ်ချင်းကောင်းတွေ ပေါနေသူတစ်ယောက်အဖို့ အထီးကျန်မှုဆိုတာနဲ့ ခပ်ကင်းကင်းမှာနေနိုင်မယ်ဆိုတာအသေအချာပါ။

ရန်သူမရှိ မိတ်ဆွေပေါသူတစ်ယောက်အဖို့ ဆက်ဆံရေးမှာ စိုးရိမ်စိတ်ကင်းနေမှာ အသေအချာပါ။ ဒီလို စိုးရိမ်စိတ်ကင်းစင်မှုကပဲ စိတ်ခံစားမှုကောင်းအောင်ထောက်ပံ့ပေးမှာပါ။ စိတ်ဓာတ်ကျတာကို ကင်းစေနိုင်ပြီး အမြဲတမ်းတက်ကြွလန်းဆန်းနေစေပါတယ်။

• တီထွင်ဖန်တီးမှုကောင်းစေနိုင်တယ်

စိတ်ခံစားမှုကောင်းမယ်၊ စိတ်ဖိစီးမှုကင်းနေတဲ့သူတစ်ယောက်က အာရုံစူးစိုက်နိုင်စွမ်းပိုကောင်းနိုင်ကြပါတယ်။ ပူပန်မှုကင်းနေတဲ့စိတ်ကပဲ တီထွင်ဖန်တီးမှုကောင်းစေမှာပါ။

စိတ်ဓာတ်ကြံ့ခိုင်စေနိုင်တယ်

ရင်းနှီးဖော်ရွေသူတွေက ဆက်ဆံရေးကောင်းကြသလို လူတိုင်းနဲ့ အဆင်ပြေပြေဆက်ဆံတတ်ကြပါတယ်။ တစ်ဖက်က ခက်ထန်စွာနဲ့ပြုမူရင်တောင်မှ အဆင်ပြေဆုံးပြန်ဆက်ဆံပေးတတ်ကြတဲ့အလေ့အထကြောင့်ပဲ သူတို့ဟာ အခြေအနေအရပ်ရပ်ပေါ်မှာ အကောင်းဆုံးတုံ့ပြန်နိုင်တဲ့သူတွေဖြစ်လာတာပါ။ အဆိုးဆုံးအခြေအနေကို အကောင်းဆုံးကျော်လွှားနိုင်ဖို့က စိတ်ဓာတ်ကြံ့ခိုင်သူတွေပဲ တတ်နိုင်မယ့် အခြေအနေတစ်ရပ်ပါ။

• နာတာရှည်ရောဂါတွေ ကင်းစေနိုင်တယ်

ခန္ဓာကိုယ်မှာ နာတာရှည်ရောဂါတော်တော်များများ ခံစားရတာက စိတ်ဖိစီးတာကြောင့်ပါ။ ဆီးချို၊ သွေးတိုး၊ နှလုံးရောဂါတွေကိုဖြစ်စေတဲ့အကြောင်းအရင်းခံထဲမှာ စိတ်ဖိစီးမှုကလည်း တစ်ထောင့်တစ်နေရာကနေ ပါဝင်နေတယ်ဆိုတာက အသေအချာပါ။ ပေါင်းသင်းဆက်ဆံရေးကောင်းတဲ့သူတွေကတော့ စိတ်ဖိစီးမှုကင်းကြတာကြောင့် နာတာရှည်ရောဂါတွေခံစားရနိုင်ခြေကလည်းတော်တော်လေးနည်းသွားမှာပါ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။