Trichomoniasis (ထရိုင်ခိုမိုနီရေးစစ်)

အဓိပ္ပါယ်ဖွင့်ဆိုချက်

Trichomoniasis (ထရိုင်ခိုမိုနီရေးစစ်) ကဘာလဲ။

လိင်ဆက်ဆံရာမှတဆင့် ကူးစက်နိုင်သောရောဂါမျိုးဖြစ်ပြီး မိန်းမအင်္ဂါရှိ ထရိုင်ခိုမိုနပ်စ် ဟုခေါ်သော အကောင်ငယ်လေးမှ ဖြစ်ပွားသည်။ အများအားဖြင့် အမျိုးသမီးများတွင်သာ ဖြစ်ပွားတတ်သော်လည်း ရောဂါရှိသောလိင်ဆက်ဆံဘက်များကြောင့် ယောင်္ကျားများတွင်လည်းဖြစ်ပွားတတ်သည်။ ထိုရောဂါဖြစ်ပါက မိန်းမအင်္ဂါမှ အနံ့ဆိုးဆိုးအရည်များကျဆင်းခြင်း၊ဆီးသွားရာတွင်နာကျင်ခြင်း၊မိန်းမကိုယ်ယားယံခြင်းတို့

ဖြစ်ပွားနိုင်ပါသည်။ ထိုရောဂါဖြစ်သော အမျိုးသားများတွင်ကား လက္ခဏာမပြတတ်ပေ။

ထရိုင်ခိုမိုးနပ်စ်ရောဂါရှိသော ကိုယ်ဝန်ဆောင်မိန်းမသည် ကလေးကို လမစေ့ပဲစောစီးစွာမွေးဖွားရန်အလားအလာကောင်းနေတတ်သည်။

Trichomoniasis (ထရိုင်ခိုမိုနီရေးစစ်) က ဘယ်လောက်အဖြစ်များသလဲ

အဖြစ်များဆုံးသော ကုသ၍ပျောက်ကင်းနိုင်သည့် လိင်ဆက်ဆံရာမှ ကူးစက်နိုင်သည့်ရောဂါတမျိုးဖြစ်သည်။ အမေရိကန်နိုင်ငံတွင် 3.7သန်းသော လူဦးရေသည် ထိုရောဂါရှိနေကြောင်းသိရသည်။ သို့သော်လည်း 30%သာ လက္ခဏာများပြတတ်ကြသည်။ အသက်အရွယ်ကြီးရင့်သောအမျိုးသမီးများသည် ငယ်ရွယ်သောအမျိုးသမီးများထက်စာလျှင်ပိုမို၍ ဖြစ်ပွားနိုင်ချေရှိကြောင်းသိရှိရသည်။ ထပ်မံသိရှိလိုပါက ဆရာဝန်ှနှင့် ဆက်သွယ်မေးမြန်းပါ။

လက္ခဏာများ

Trichomoniasis (ထရိုင်ခိုမိုနီရေးစစ်) ရဲ့လက္ခဏာတွေကဘာတွေလဲ

ကူးစက်ခံရပြီး 5 ရက် မှ 28 ရက်အတွင်း လက္ခဏာများ ဖြစ်ပေါ်လာနိုင်သည်။ အချို့သောသူများတွင်လက္ခဏာပြရန် ပို ၍အချိန်ကြာမြင့်နိုင်သည်။

အများဆုံးတွေ့ရသော လက္ခဏာများမှာ

• အဖြူ၊မီးခိုးရောင်၊အဝါရောင် (သို့) အစိမ်းရောင်ရှိသော အနံ့ဆိုး၍ အမြှုပ်ထသောအရည်များ မိန်းမကိုယ်မှထွက်ခြင်း
• မိန်းမကိုယ်မှ သွေးဆင်းခြင်း
• မိန်းမကိုယ်တွင် ပူလောင်ခြင်း၊ယားယံခြင်း
• မိန်းမကိုယ်တွင် နီရဲနေခြင်း ရောင်ရမ်းခြင်း
• ဆီးခဏဏသွားချင်နေခြင်း
• ဆီးသွားသည့်အခါဖြစ်စေ လိင်ဆက်ဆံသည့်အခါဖြစ်စေ မိန်းမကိုယ်မှ နာကျင်ခြင်း စသည်ဖြင့်ဖြစ်သည်။

အမျိုးသားများတွင် အများဆုံးတွေ့ရသော လက္ခဏာများမှာ

• ဆီးပြွန်မှ ဆီးနှင့် သုက် မဟုတ်သော အရည်များဆင်းခြင်း
• ဆီးသွားစဉ်ဖြစ်စေ သုက်လွှတ်သည့်အခါဖြစ်စေ ပူလောင်ခြင်း
• ဆီးခဏဏသွားချင်နေခြင်း
• လိင်တံထဲတွင် ရောင်ရမ်းနာကျင်သကဲ့သို့ဖြစ်ခြင်း

အခြားသောလက္ခဏာရပ်များကျန်ရှိနိုင်သေးသည်။ ဆရာဝန်နှင့် တွေ့ဆုံပြသမေးမြန်းခြင်းသည်သာ အကောင်းဆုံးဖြစ်သည်။

ဘယ်အချိန်မှာ ဆရာဝန်နဲ့ သွားရောက်တွေ့ဆုံသင့်သလဲ

မိန်းမကိုယ်မှ အနံ့ဆိုးဆိုးအရည်များ ထွက်သည်ဖြစ်စေ ဆီးသွားခြင်းနှင့် လိင်ဆက်ဆံရာတွင်

နာကျင်နေသည်ဖြစ်စေ ဆရာဝန်နှင့် တွေ့ဆုံပြသသင့်ပါသည်။

အကြောင်းရင်းများ

Trichomoniasis (ထရိုင်ခိုမိုနီရေးစစ်) ကိုဘာတွေကဖြစ်စေသလဲ

• ဆဲလ်တစ်လုံးသာရှိသော အဏုဇီဝပိုးငယ် ပရိုတိုဇိုးဝါး တခုဖြစ်သည့် ထရိုင်ခိုမိုးနပ်စ် ဗဂျိုင်နယ်လစ် အမည်ရှိသော အကောင်ကြောင့်ဖြစ်ပွားရခြင်းဖြစ်သည်။ ထိုအကောင်သည် လူတစ်ဦးနှင့်တစ်ဦးကြား လိင်ဆက်ဆံရာမှ ကူးစက်သည်။
• အမျိုးသမီးများတွင် ထိုပိုးငယ်သည် မိန်းမကိုယ်နှင့်ဆီးပြွန် (သို့) နှစ်ခုစလုံးတွင် ဝင်ရောက်ပေါက်ပွားနိုင်သည်။ အမျိုးသားများတွင်ကား ဆီးပြွန်မှာသာ ဖြစ်ပွားလေ့ရှိသည်။ မည်ကဲ့သို့ဖြစ်ပွားသည်ဖြစ်စေ ထိုမှ တဆင့် လိင်ဆက်ဆံပါက အခြားသူများကို လွယ်ကူစွာ ကူးစက်နိုင်ပါသည်။
• အချို့သောသူများသည် ပွေ့ဖက်ခြင်း၊နမ်းခြင်း၊ ထမင်းပန်းကန်များကိုမျှဝေအသုံးပြုခြင်း၊(သို့) တူညီသော အိမ်သာခုံတွင်ထိုင်၍အသုံးပြုခြင်းအစရှိသော ပုံမှန်ထိတွေ့မှုနှင့် ကူးစက်မည်ကို စိုးရိမ်တတ်ကြသည်။ သို့သော် ထရိုင်ခိုမိုးနပ်စ်မှာ ထိုသို့သာမာန်ထိတွေ့မှုများဖြင့် မကူးစက်စေနိုင်ပါ။ လိင်ဆက်ဆံခြင်းဖြင့်သာ လိင်အင်္ဂါများ၏အထိအတွေ့များမှ တဆင့်ကူးစက်စေပါသည်။

ဖြစ်နိုင်ခြေများ

ငါ့ဆီမှာ Trichomoniasis (ထရိုင်ခိုမိုနီရေးစစ်) ဖြစ်နိုင်ခြေကိုဘာ်တွေက မြင့်တက်စေသလဲ

• များပြားသော လိင်ဆက်ဆံဖော်များရှိခြင်း
• အခြားသော လိင်မှတဆင့်ကူးစက်နိုင်သည့် ရောဂါများရှိခြင်း
• ထရိုင်ခိုမိုနီရေးစစ် ဖြစ်ဖူးခြင်း
• ကွန်ဒုန်းမပါပဲ လိင်ဆက်ဆံခြင်း စသည်ဖြင့်ဖြစ်သည်။

ရောဂါအဖြေရှာခြင်းနှင့် ကုသမှု

ယခုဖော်ပြထားသော အချက်အလက်များကို ဆေးပညာအကြံပေးမှုနေရာတွင် အစားထိုးရန်မသင့်တော်ပါ။ ပိုမိုသောအချက်အလက်များရရှိရန်အတွက် ဆရာဝန်နှင့် အမြဲတမ်းတိုင်ပင်ပါ.

Trichomoniasis (ထရိုင်ခိုမိုနီရေးစစ်) ကို ဘယ်လိုအတည်ပြုပါသလဲ

• ဆဲလ်များအား နမူနာယူ၍ ပိုးမွေးကြည့်ခြင်း
• အန်တီဂျင်စစ်ဆေးခြင်း
• ထရိုင်ခိုမိုးနပ်စ် ပိုး၏ ဒီအင်န်အေကိုရှာဖွေစစ်ဆေးခြင်း

– မိန်းမကိုယ်မှ အရည်တို့ကို စစ်ဆေးခြင်း (သို့) အမျိုးသားများတွင် ဆီးပြွန်မှ အရည်တို့ကို နမူနာယူ၍ အနုကြည့်မှန်ပြောင်း မိုက်ခရိုစကုပ်ဖြင့် စစ်ဆေးခြင်း စသည်တို့ပြုလုပ်နိုင်ပါသည်။

Trichomoniasis (ထရိုင်ခိုမိုနီရေးစစ်) ကို ဘယ်လိုကုသပါသလဲ

• ပိုးသတ်ဆေးများဖြင့် ကုသနိုင်ပါသည်။ မက်ထရိုနီဒါဇိုး (သို့) တင်နီဒါဇိုး ကဲ့သို့သော ပိုးသတ်ဆေးများကို သောက်သုံးရန် ဆရာဝန်မှ ညွှန်းတတ်သည်။ မက်ထရိုနီဒါဇိုး သောက်အပြီး 24 နာရီအတွင်း ဖြစ်စေ တင်နီဒါဇိုးသောက်အပြီး 72 နာရီအတွင်းဖြစ်စေ အရက်လုံးဝမသောက်သုံးသင့်ပါ။ ပြင်းထန်ဆိုးဝါးသည့် ပျို့ခြင်း အန်ခြင်းများဖြစ်ပွားစေနိုင်၍ဖြစ်သည်။
• မိမိ၏ လိင်ဆက်ဆံဖော်များသည်လည်း သင့်လျော်စွာ စစ်ဆေးစမ်းသပ်ခံထား၍ ဆေးကုသမှုခံယူထားရန် အရေးကြီးပါသည်။ လက္ခဏာရပ်များမပြခြင်းကို ရောဂါမရှိဟုမဆိုနိုင်ပါ။ မိမိနှင့်အတူ လိင်ဆက်ဆံဖော်များအားလုံး ဆေးကုသပျောက်ကင်းပြီးသည်အထိ ထပ်မံ၍ လိင်မဆက်ဆံမိစေရန် ရှောင်ကြဉ်ရပါမည်။

မည်ကဲ့သို့သော အပြုအမူအနေအထိုင်ကောင်းများက သက်သာပျောက်ကင်းရန် အထောက်အကူပြုသနည်း

• ကွန်ဒုံးကို လိင်ဆက်ဆံတိုင်း စနစ်တကျ အသုံးပြုခြင်း
• လိင်ဆက်ဆံဖော်အရည်အတွက်ကို တတ်နိုင်သမျှလျော့ချခြင်း၊မျက်နှာမများခြင်း
• ရောဂါပိုးရှိနေသူနှင့် လိင်ဆက်ဆံမှုအား ရှောင်ကြဉ်ခြင်း
• မိမိမှာ ပိုးရှိနေသည်ဟုယူဆပါက လိင်ဆက်ဆံမှုအား ရှောင်ကြဉ်ပြီး ဆရာဝန်နှင့် ပြသခြင်း စသည်ဖြင့်ဖြစ်သည်။
• အရည်များထွက်ခြင်း၊ပူစပ်ပူလောင်ဖြစ်ခြင်းနှင့် အနီစက်များပေါ်ခြင်း၊အနာပေါက်ခြင်းတို့မိမိလိင်အင်္ဂါများတွင် ဖြစ်ပွားလာခြင်းသည် လိင်ဆက်ဆံရန်ခေတ္တေရှောင်ကြဉ်ပြီး ဆရာဝန်အားအမြန်ဆုံးပြသသင့်သည့် လက္ခဏာရပ်များဖြစ်သည်။ မိမိတွင် ယခုရောဂါအတွက်ဖြစ်စေ အခြားလိင်ဆက်ဆံခြင်းမှ ကူးစက်နိုင်သည့် ရောဂါများကြောင့်ဖြစ်စေကုသမှုခံယူနေပါက မိမိ၏လိင်ဆက်ဆံဖော်များအားလုံးကို အသိပေးအကြောင်းကြားထားသင့်ပြီး ထိုသူအားလုံးကိုပါ ဆရာဝန်မဖြစ်မနေပြသရန် အသိပညာပေးရပါမည်။

ကျန်ရှိသော သိကောင်းစရာများအား ဆရာဝန်များနှင့် တိုင်ပင်ခြင်းသည်သာအကောင်းဆုံးဖြစ်သည်။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ