မိုးရာသီမှာ ကျန်းမာစေဖို့ ဘာတွေ စားသောက်ကြမလဲ

မိုးရာသီက တုပ်ကွေးရာသီဖြစ်တာကြောင့် အအေးမိ၊ ဖျားနာဖြစ်ကြတာတွေ များပါတယ်။ ဒါ့ပြင် ဝမ်းပျက်ဝမ်းလျှောလည်း ဖြစ်တတ်တော့ လူကြီးတွေက လမ်းဘေးစာတွေ မစားနဲ့။ ဟိုဟာ မစားနဲ့၊ ဒီဟာ မစားနဲ့ဆိုပြီး တားမြစ်တာတွေ ကြုံဖူးမှာပါ။ ဒီလိုနဲ့ ရှောင်ရင်း ရှောင်ရင်း စားစရာတောင် မကျန်တော့ဘူးဟုတ်။ ဒီလိုဆို မိုးရာသီမှာ ကျန်းမာစေဖို့ ဘာတွေ စားသောက်ကြမလဲ ။ အာဟာရလည်းရှိပြီး ဝမ်းပျက်ဝမ်းလျှော မဖြစ်တဲ့ စားစရာမျိုးပေါ့။

မိုးရာသီမှာ ဘယ်လိုအစားအစာတွေကို ဦးစားပေး စားသင့်သလဲ။

မိုးရာသီမှာဆိုရင် ရာသီဥတုအေးတာရယ်၊ လေထုစိုထိုင်းဆ များတာရယ်ကြောင့် တုပ်ကွေး အပါအဝင် အသက်ရှူလမ်းကြောင်း ပိုးဝင်တာတွေ ဖြစ်တတ်ပါတယ်။ ဒီတော့ ကိုယ်ခံအား ကောင်းစေဖို့ အစားအစာတွေကို ရွေးချယ်စားသောက်ရမှာပါ။ 

ဝမ်းပျက်ဝမ်းလျှောတွေလည်း ဖြစ်လွယ်တာကြောင့် အစာသန့်၊ ရေသန့်၊ လက်သန့် ဒီ၃ခုကိုလည်း ဂရုစိုက်ရမှာပါ။ တတ်နိုင်သမျှ အစိမ်းစားတာကို ရှောင်ကြဉ်ပြီး ပိုးသေအောင်လို့ ပူပူလောလော ချက်ပြုတ်စားသောက်သင့်ပါတယ်။

ဒီလို အကြမ်းဖျင်း သိသွားလောက်ပြီဆိုတော့ ဘာတွေစားသင့်တယ်ဆိုတာ ဥပမာလေးနဲ့ ပြောပြမယ်နော်။ 

မိုးရာသီမှာ ကျန်းမာစေဖို့ ဘာတွေ စားသောက်ကြမလဲ

• အသီးအနှံနဲ့ ဟင်းသီးဟင်းရွက်

မိုးရာသီမှာ ရာသီပေါ် သီးနှံတွေ များတာကြောင့် ကိုယ်နှစ်သက်ရာ အသီးအနှံကို စားလို့ရပါတယ်။ ထမင်းစားတဲ့အခါမှာလည်း ဟင်းရွက် ၁-၂မျိုးလောက် ပါအောင် စားပေးပါ။

အသီးအနှံနဲ့ ဟင်းသီးဟင်းရွက်တွေက ဗီတာမင်နဲ့ အန်တီအောက်ဆီဒင့်တွေ ကြွယ်ဝတာကြောင့် ခုခံအားကို တက်စေပါလိမ့်မယ်။

• အရည်များများသောက်ပါ

မိုးတွင်းမှာ ရာသီဥတု အေးတာကြောင့်ရော၊ အိမ်သာ ခဏခဏ သွားရမှာစိုးတာကြောင့်ရော ရေလျှော့သောက်တတ်ကြပါတယ်။ တကယ်က ရေကို ခန္ဓာကိုယ်လိုအပ်ချက်အတိုင်း သောက်ရမှာပါ။ 

သောက်တဲ့အခါမှာလည်း ရိုးရိုးရေအပြင် စွပ်ပြုတ်၊ သေသေချာချာပိုးသတ်ထားတဲ့နို့၊ ဓာတ်ဆားအားဖြည့်အချိုရည်၊ အုန်းရည်၊ ရေနွေးကြမ်း စသဖြင့် ကျန်းမာရေးနဲ့ ညီညွတ်တဲ့ သောက်စရာတွေကို သောက်ပေးနိုင်ပါတယ်။

ဒါ့ပြင် ရာသီဥတုအေးတဲ့အခါ ချင်းပြုတ်ရည်၊ ပျားသံပုရာရည်စတာတွေကို ပူပူနွေးနွေး ‌ဖျော်သောက်ပေးတာက ခံတွင်းရှင်းစေသလို ကိုယ်ခံအားကိုလည်း ကောင်းစေပါတယ်။

• ပရိုဘိုင်အိုတစ် ကြွယ်ဝတာတွေ စားပေးပါ

မိုးတွင်းက ပတ်ဝန်းကျင် မသန့်ရှင်းရင် ကိုယ်စားတဲ့ အစားအစာတွေထဲကို ပိုးတွေ အနည်းနဲ့ အများ ပါနိုင်ပါတယ်။ ဒီပိုးတွေကြောင့် ဝမ်းပျက်ဝမ်းလျှော မဖြစ်စေဖို့ဆိုရင် အူလမ်းကြောင်းထဲမှာ ကောင်းတဲ့ဘက်တီးရီးယားတွေ (ပရိုဘိုင်အိုတစ်) အများကြီး ရှိနေဖို့ လိုပါတယ်။ 

ဒီအတွက် ဒိန်ချဉ်၊ ကင်ချီ၊ ကြက်သွန်ဖြူ၊ ငှက်ပျောသီး စသဖြင့် ပရိုဘိုင်အိုတစ် ကြွယ်ဝတာတွေကို စားပေးဖို့ လိုပါတယ်။

ဘာတွေ ရှောင်ရမလဲ

အဓိကကတော့ အာဟာရတန်ဖိုးနည်းပါးပြီး ရောဂါပိုးတွေ ပါနိုင်တဲ့ အစားအစာတွေပါ။ ဥပမာ

• လမ်းဘေးစာ

လမ်းဘေးစာတိုင်းက မသန့်တာမျိုး မဟုတ်ပေမယ့် အများစုက သန့်ရှင်းမှု အားနည်းကြတော့ မတော်တဆ အစာအဆိပ်သင့်တာ၊ ဝမ်းလျှောတာတွေ ဖြစ်နိုင်ပါတယ်။

• အစပ်

ရာသီဥတုအေး‌အေးလေးနဲ့ အစပ်နဲ့က အင်မတန်မှ လိုက်ဖက်ပေမယ့် စားပြီးသွားရင် ရင်ပူတာ၊ အစာမကြေတာတွေ ဖြစ်နိုင်တာကို သတိရပါ။ မိုးတွင်းမှာ တတ်နိုင်သလောက် ကြေလွယ်တဲ့ အစားအစာတွေကို စားပေးပါ။

• ဆီကြော်

ဆီကြော်တွေကလည်း အလားတူပါပဲ။ အစာကြေခဲတာကြောင့် တတ်နိုင်သမျှ လျှော့စားသင့်ပါတယ်။ နေမကောင်းဖြစ်ပြီး ချောင်းဆိုးနေချိန်ဆို မသန့်တဲ့ဆီတွေက လည်ချောင်းယားယံမှုကို ပိုဆိုးစေတာကြောင့် မသက်မသာ ဖြစ်စေနိုင်ပါတယ်။

• မကျက်တကျက် အစားအစာတွေကို ရှောင်ပါ

ပင်လယ်စာ အစိမ်းသုပ်တွေ၊ မကျက်တကျက် ချက်ထားတဲ့အစားအစာတွေကို ရှောင်ပါ။ အကင်၊ ‌‌‌‌‌ဟော့ပေါ့တွေ စားမယ်ဆိုရင်လည်း ကျက်နေအောင် ကင်ပါ၊ ပြုတ်ပါ။ မကျက်တကျက် အစားအစာတွေမှာ ရောဂါပိုးတွေ ပါနိုင်တာကြောင့် ဝမ်းပျက်ဝမ်းလျှော ဖြစ်တတ်ပါတယ်။ 

• အသီးအရွက်တွေ၊ အသီးအနှံတွေကို အစိမ်းမစားပါနဲ့

တို့စရာအနေနဲ့ စားမယ်ဆိုရင်လည်း အသီးအရွက်တွေကို ရေနဲ့ ပြောင်နေအောင် ဆေးပါ။ သေချာပြုတ်ပြီးမှ စားရင် ပိုကောင်းပါတယ်။ အရွက်တွေမှာ ပိုးတွေ ကပ်နေနိုင်ပြီး စားမိရင် ဝမ်းလျှောနိုင်တာကြောင့်ပါ။

အသီးအနှံတွေဆိုရင်လည်း အပြင်အခွံကို လှီးပြီး အတွင်းထဲက အသားကိုပဲ စားသင့်ပါတယ်။

ခုဆိုရင် မိုးရာသီမှာ ကျန်းမာစေဖို့ ဘာစားသောက်ကြမလဲ ဆိုတာကို သိလောက်ပါပြီ။ ဒီလို အစားအစာတွေကို ရွေးချယ်စားသောက်တာအပြင် တခြားသတိထားသင့်တဲ့ အချက်တွေကတော့

• အစားအစာ သန့်ရှင်းရေးကို ဂရုစိုက်ပါ။
• ရေသန့်ရှင်းရေးကို ဂရုစိုက်ပါ။
• မကြာခဏ လက်ဆေးပါ။ အထူးသဖြင့် အစာမစားခင်နဲ့ အိမ်သာအဆင်းမှာ လက်သေချာဆေးပါ။
• အပြင်စာတွေကို တတ်နိုင်သမျှ ရှောင်ပါ။ စားမယ်ဆိုရင်လည်း သန့်ရှင်းတဲ့ ဆိုင်ကနေ ဝယ်ယူစားသောက်ပါ။
• အစားအသောက်တွေကို ပူပူလောလော စားပါလို့ အကြံပြုချင်ပါတယ်။