သွေးတွင်းကိုလက်စထရော ကျအောင် ဘာတွေစားရမလဲ

သွေးတွင်းကိုလက်စထရော ထဲမှာ အကျိုးပြု ကိုလက်စထရော ရှိသလို အကျိုးမပြုတဲ့ ကိုလက်စထရောလည်း ရှိပါတယ်။ ဒီကိုလက်စထရောပမာဏတွေက စားလိုက်တဲ့ အစားအစာတွေအပေါ်မှာ မူတည်ပြီး ပမာဏ ကွဲခြားတာတွေ ရှိနိုင်ပါတယ်။ နေ့စဉ် စားသောက်မှုတွေက ကိုလက်စထရောအပေါ်မှာ သက်ရောက်မှုတွေ ရှိနေပါတယ်။ ဒီတစ်ခေါက်တော့ သွေးတွင်းက အကျိုးမပြုတဲ့ ကိုလက်စထရော ကျအောင် ဘာတွေစားရမလဲ ဆိုတာကို ပြောပြပေးချင်ပါတယ်။

သွေးထဲမှာ မကောင်းတဲ့ ကိုလက်စထရေောတွေ များတာက သွေးကြောတွေထဲမှ အဆီအညစ်အကြေးတွေ များပြီး သွေးကြောကျဉ်းတာကနေတဆင့် နှလုံးရောဂါ ခံစားရတာမျိုး ဖြစ်နိုင်ပါတယ်။

သွေးတွင်းကိုလက်စထရော ကျအောင် ဘာတွေစားရမလဲ

အကျိုးပြုကိုလက်စထရော တိုးတက်စေဖို့အတွက် ကိုယ်လက်လေ့ကျင့်ခန်းတွေ လုပ်လို့ ရသလို မကောင်းတဲ့ သွေးတွင်းကိုလက်စထရော ကျအောင် လုပ်ဆောင်လို့ရတဲ့ နောက်ထပ် နည်းလမ်းတစ်ခုကတော့ အခုလို အစားအစာတွေကို နေ့စဉ် စားသုံးမှုမှာ ပါဝင်အောင် စားသုံးဖို့ လိုပါမယ်။ ကဲ …. သွေးတွင်းကိုလက်စထရော ကျအောင် ဘာတွေစားရမလဲ!

• အုတ်ဂျုံ နဲ့ နှံစားသီးနှံတွေ

အုတ်ဂျုံ နဲ့ နှံစားသီးနှံတွေမှာ အမျှင်ဓာတ်တွေ ကြွယ်ဝစွာ ပါဝင်နေပါတယ်။ အမျှင်ဓာတ်က အစာခြေစနစ်ကို ကျန်းမာစေသလို သွေးတွင်းကိုလက်စထရောကိုလည်း တိုးစေနိုင်ပါတယ်။ ဒါကြောင့် သွေးတွင်းက အကျိုးမပြုကိုလက်စထရောတွေ ကျဆင်းစေဖို့ဆိုရင်တော့ နေ့စဉ် စားသုံးမှုမှာ အုတ်ဂျုံ နဲ့ နှံစားသီးနှံတွေကို ကို တစ်ပန်းကန်စာလောက် ပါဝင်အောင် စားသုံးပေးဖို့ လိုပါမယ်။

• ပဲအမျိုးမျိုး

နောက်ထပ် ပျော်ဝင်လွယ်တဲ့ အမျှင်ကို ရရှိနိုင်တဲ့ အစားအစာ အရင်းအမြစ် တစ်ခုကတော့ ပဲအမျိုးမျိုးပါ။ ပဲအမျိုးမျိုးက ပရိုတင်း ကြွယ်ဝသလို သွေးတွင်းကိုလက်စထရော ကျဆင်းစေဖို့လည်း ထောက်ကူပေးပါတယ်။

နောက်တစ်ချက်က ပဲအမျိုးမျိုးက အခြားကာဗိုဟိုက်ဒရိတ် ကြွယ်ဝတဲ့ အစားအစာတွေလိုမျိုး သွေးတွင်းသကြားဓာတ်ကို မမြင့်တက်စေတာပါ။ ပဲအမျိုးမျိုးက သွေးတွင်းသကြားဓာတ်ကို ထိန်းညှိပေးသလို အကျိုးမပြုတဲ့ သွေးတွင်းကိုလက်စထရောကိုလည်း ကျဆင်းစေနိုင်ပါတယ်။

• ကစီဓာတ် မပါတဲ့ ဟင်းသီးဟင်းရွက်တွေ

ကစီဓာတ် မပါတဲ့ ဟင်းသီးဟင်းရွက်တွေ ဖြစ်တဲ့ ကညွတ်၊ ဂေါ်ဖီထုတ်၊ ပန်းဂေါ်ဖီစိမ်း၊ ခရမ်းချဉ်သီး၊ ငရုတ်ပွ၊ တရုတ်နံနံ၊ မုန်လာဥနီ၊ ကြက်သွန်နီ၊ အစိမ်းရောင် ဟင်းသီးဟင်းရွက်တွေကို စားပေးတာကလည်း သွေးတွင်းကိုလက်စထရောကို ကျဆသ်းစေနိုင်ပါတယ်။

ဒီအသီးအရွက်တွေက အမျှင်ဓာတ်​တွေ ကြွယ်ဝစွာ ပါဝင်နေသလို ပရိုတင်းတွေလည်း ပါဝင်နေပါတယ်။ ဒီအသီးအရွက်တွေက မကောင်းတဲ့ သွေးတွင်းကိုလက်စထရောကို ကျဆင်းစေပြီး နှလုံးရောဂါ မဖြစ်အောင် ကာကွယ်ပေးနိုင်ပါတယ်။

• အခွံမာသီးတွေနဲ့ အစေ့အဆန်တွေ

မကောင်းတဲ့ သွေးတွင်းကိုလက်စထရောကျအောင် စားပေးရမယ့် နောက်ထပ် စားစရာ တစ်ခုကတော့ အခွံမာသီးတွေ၊ အယ်လ်မွန်စေ့၊ နှမ်းကြတ်စေ့စတာတွေကို လက်တစ်ဆုပ်စာလောက် ပုံမှန် စားပေးတာက သွေးတွင်းကိုလက်စထရောကို ကျဆင်းစေဖို့ ထောက်ကူပေးနိုင်ပါတယ်။ ဒီအစေ့အဆန်တွေနဲ့ အခွံမာသီးတွေက နှလုံးရောဂါ ဖြစ်နိုင်ခြေကိုလည်း လျှော့ချပေးနိုင်ပါတယ်။

• သစ်သီးတွေ

ဘယ်ရီသီးတွေဖြစ်ကြတဲ့ ဘရက်စ်ဘယ်ရီ၊ ရက်စ်ဘယ်ရီ၊ သလဲသီး၊ စတော်ဘယ်ရီတွေက ပျော်ဝင်လွယ်တဲ့ အမျှင်ဓာတ် များစွာပါဝင်ပြီး သကြားဓာတ် ပါဝင်မှုလည်း နည်းပါတယ်။

ဒါ့ပြင် တခြား အမျှင်ဓာတ်များတဲ့ အသီးအနှံတွေကိုလည်း စားပေးသင့်ပါတယ်။ ဒါကြောင့် သွေးတွင်းကိုလက်စထရော ကျဆင်းစေဖို့ဆိုရင် အမျှင်ဓာတ်များတာတွေကို စားပေးလို့ ရပါတယ်။

• ပဲပိစပ်

အပင်အခြေခံထားတဲ့ အစားအစာတွေက အာဟာရ ပြည့်ဝသလို ကျန်းမာရေးနဲ့ အတော်လေး ညီညွတ်ပါတယ်။ ဒါကြောင့် နေ့စဉ် စားသုံးမှုမှာ ပဲပိစပ် နဲ့ ပဲပိစပ်ကနေ ထုတ်ထားတဲ့ ပဲပြား၊ တို့ဟူးစတာတွေကို စားပေးတာကလည်း ကျန်းမာစေဖို့ နည်းလမ်းကောင်းပါ။ အကျိုးမပြုတဲ့ သွေးတွင်းကိုလက်စထရော ကျဆင်းစေဖို့ ပဲပိစပ်ကို စားပေးလို့ ရပါတယ်။

• ငါး

တူနာငါးတွေ နဲ့ ဆယ်လ်မွန်ငါးတွေက နှလုံးကျန်းမာစေပြီး omega-3 fatty acids ပါဝင်နေတာက သွေးတွင်းကိုလက်စထရောကျအောင် ထောက်ကူပေးနိုင်ပါတယ်။ နေ့စဉ် စားသုံးမှုမှာ omega-3 fatty acids ကြွယ်ဝတဲ့ ပင်လယ်ငါးတွေကို စားသုံးပေးတာက သွေးတွင်းကိုလက်စထရော ကျဆင်းစေဖို့ ထောက်ကူပေးနိုင်ပါတယ်။

အခုပြောခဲ့တဲ့ အစားအစာတွေကို နေ့စဉ်စားသုံးမှုမှာ ပါဝင်အောင် စားသုံးပေးတာက သွေးတွင်းက အကျိုးမပြုတဲ့ ကိုလက်စထရောတွေကို ကျဆင်းစေဖို့ ထောက်ကူပေးနိုင်မှာပါ။