အသီးအနှံများကို လေ့လာကြည့်လျှင် အများစုမှာ ကျန်းမာရေး အတွက် အကျိုးပြုသည်ကို တွေ့ရပါမည်။ အရသာ ရှိရုံမျှမက ဗီတာမင် နှင့် အခြားသောအာဟာရဓာတ်များကိုလည်း ပေးစွမ်းနိုင်ပါသည်။ အသီးအနှံများကို စုံလင်စွာ စားသုံးပေးခြင်းဖြင့် ခန္ဓာကိုယ်ကို ကျန်းမာကြံ့ခိုင်စေပြီး ခန္ဓာကိုယ်၏ လုပ်ငန်းများကိုလည်း ပိုမို ကောင်းမွန်အောင် ပြုလုပ်စေနိုင်ပါသည်။ သို့သော်လည်း အသီးအနှံ အားလုံးတိုင်းမှာ သင်၏ ခန္ဓာကိုယ်ကို လှပစေနိုင်မည် မဟုတ်ပါ။ တချို့သီးနှံများမှာ လွန်ကဲစွာ စားသုံးပါက ကိုယ်အလေးချိန် တိုးစေနိုင်သော အာနိသင်လည်း ရှိပါသည်။ ကဲ …. ကိုယ်အလေးချိန် မြင့်တက်စေနိုင်သောအသီးအနှံ ၅ မျိုး က ဘာတွေ ဖြစ်မလဲ ကြည့်လိုက်ရအောင်နော်။
ကိုယ်အလေးချိန် မြင့်တက်စေနိုင်သောအသီးအနှံ ၅ မျိုး
ကိုယ်အလေးချိန် မြင့်တက်စေနိုင်သောအသီးအနှံ ၅ မျိုးကတော့
- ငှက်ပျောသီး
မနက်စာအဖြစ် ငှက်ပျောသီးကို နှစ်သက်စွာ စားလေ့ ရှိကြသည်။ အရသာ ရှိပြီး ဗိုက်ဝစေသည့် အသီးကို မည်သူက မနှစ်သက်ဘဲ နေလိမ့်မည်နည်း။ သို့သော် ငှက်ပျောသီးတွင် အမျှင်ဓာတ် ၊ ပိုတက်စီယမ် နှင့် ဗီတာမင် စီတို့ ပါဝင်သည့် အပြင် ကယ်လိုရီ (၁၈၀) အထိ ရှိသည်ကိုတော့ သတိပြုရပေမည်။ ထို့ကြောင့်ငှက်ပျောသီးကို များပြားစွာ စားသုံးလျှင် ကိုယ်အလေးချိန် တိုးလာနိုင်ပါသည်။
- ချယ်ရီသီး
အရည်ရွှမ်း၍ အရသာ ရှိသော ချယ်ရီသီးကို မည်သူမျှ ငြင်းမည် မဟုတ်ပေ။ လူအများစုက နှစ်သက်စွာပင် အခြား အသီးများထက် ပို၍ စားသုံးတတ်ကြသည်။ ချယ်ရီသီးတွင် ပါဝင်သော ပိုတက်စီယမ်ဓာတ်သည် ခန္ဓာကိုယ်တွင်းမှ ပိုလျှံသော ဆိုဒီယမ်ဓာတ်ကို စွန့်ထုတ်စေခြင်းဖြင့် သွေးပေါင်ချိန်ကို လျော့ကျစေနိုင်ပါသည်။ သို့သော်လည်း ချယ်ရီသီးတွင် သကြားဓာတ် များပြားစွာ ပါဝင်ခြင်းက ကိုယ်တွင်းသကြားဓာတ်ကို တိုးမြင့်စေနိုင်ပါသည်။
- ထောပတ်သီး
ထောပတ်သီးသည် ကျန်းမာစေသော အဆီဓာတ် ပါသည့် အသီးအနှံ ဖြစ်ပါသည်။ ကိုယ်အလေးချိန် မတက်လိုပါက သင့်တော်ရုံသာ စားပေးသင့်ပါသည်။ ခန္ဓာကိုယ်အတွက် အကျိုးပြုသော မိုနိုအဆီဓာတ်များ ပါဝင်သော်လည်း ကယ်လိုရီဓာတ်လည်း ပါဝင်သည့် အသီးဖြစ်ပါသည်။
- သဖန်းသီး
သဖန်းသီးတွင် အမျှင်ဓာတ် နှင့် ပိုတက်စီယမ်ဓာတ် ကြွယ်ဝစွာ ပါဝင်သည်။ ကျန်းမာရေး အတွက်ကောင်းသည်ဟု ယူဆပြီး အလွန်အမင်း စားသုံးပါကကျန်းမာရေး အတွက် မသင့်တော်သလို ခန္ဓာကိုယ်လည်း ဝဖြိုးလာစေနိုင်သည်။ သဖန်းသီးတွင် သကြားဓာတ် များပြားစွာ ပါဝင်သည့် အတွက် ကိုယ်အလေးချိန် လျှော့ချလိုသူများ သတိထား စားသင့်သည့် အသီးအနှံ ဖြစ်ပါသည်။
- သရက်သီး
သရက်သီးသည် အမျှင်ဓာတ် နှင့် ဗီတာမင်စီတို့ များစွာ ပါဝင်သော အသီး ဖြစ်သည်။ သို့သော် သကြားဓာတ်လည်း များစွာ ပါဝင်သည်ကို သတိပြုသင့်သည်။ ထိုမှတစ်ဆင့် သွေးတွင်းသကြားဓာတ်ကို မြင့်တက်စေနိုင်သည်။ ထို့ကြောင့် အသီး အလုံးလိုက် စားခြင်းထက် အချိုတည်းရုံ အနည်းငယ်သာ စားသုံးခြင်းက ပို၍ သင့်တော်ပါသည်။
အသီးအနှံများသည် ကျန်းမာရေးနှင့် ညီညွတ်သည် ဆိုသော်လည်း ကိုယ်အလေးချိန် ချနေသူများအဖို့ အထက်ပါ အသီးအနှံများကို သတိပြု စားသုံးသင့်ပါသည်။
ရေးသားသူ− Dr Ye Pyae Hein
[embed-health-tool-bmi]
