ခုခေတ်က ဉာဏခေတ်လို့ ပြောရမလားပဲ။ တစ်ခုခုဆို အရင်ကလို ပင်ပင်ပန်းပန်း လုပ်စရာ မလိုတော့ပါဘူး။ တစ်နေရာက တစ်နေရာသွားချင်သလား။ ကား၊ ရထား၊ လေယာဉ် ကြိုက်တာစီးသွား။ ဝေးလို့လား ဖုန်းဆက်လိုက်၊ အီးမေးလ်ပို့လိုက်လေ။ အမြင့်မတက်ချင်ဘူးလား။ ဓာတ်လှေကားတွေ စက်လှေကားတွေ ရှိတယ်လေ။
ဒီလိုတီထွင်မှုတွေက လူသားတွေရဲ့ နေ့စဉ်လုပ်ဆောင်မှုကို လျင်မြန်လွယ်ကူစေတာ မှန်ပေမယ့် တစ်ဖက်မှာလည်း လူသားတွေကို ငပျင်းလေးတွေ ဖြစ်သွားစေပါတယ်။ တစ်ခုခုဆို လမ်းမလျှောက်ချင်တော့ဘူး။ ခြေထောက်မသုံးချင်တော့ဘူး။ ဒီလို ခန္ဓာကိုယ်က ကြွက်သားတွေကို အနားပေးတာ ကြာလာတဲ့အခါ လူက ကိုယ်အားရော စိတ်အားပါ ချိနဲ့လာပါတော့တယ်။
ခုခေတ်ဆို ပိုဆိုးတာပေါ့။ အများစုက ရုံးဝန်ထမ်းတွေ၊ တစ်နေ့ကို ၈နာရီလောက် ရုံးမှာ ပိတ်မိနေကြတဲ့သူတွေ။ ကျန်တဲ့ ၈နာရီက အိပ်ဖို့ ချန်ရသေးတယ်။ နောက်၈နာရီကျတော့လည်း တစ်ကိုယ်ရည် ကိစ္စတွေ လုပ်ရတဲ့ အချိန်တွေ၊ ကားစီးရတဲ့ အချိန်တွေ၊ သင်တန်းတွေ၊ ကျောင်းတွေ တက်ရတဲ့အချိန်တွေနဲ့ ဒီထဲမှာ လေ့ကျင့်ခန်း လုပ်ဖို့ အချိန်သီးသန့်ရှိမယ်လို့ မထင်ပါဘူး။
ထိုင်ခုံကနေ မလွတ်မြောက်တဲ့အခါ
အားလုံးသိတယ် တစ်နေကုန်ထိုင်နေရင် ဘာဖြစ်တတ်လဲဆိုတာ။ ဒါပေမယ့် မလွန်ဆန်နိုင်ဘူးလေ။ ကိုယ့်ဘဝပုံစံ၊ ကိုယ့်အလုပ်က ဒီလိုပဲ ဖြစ်နေတာကို။ သိသိရက်နဲ့ ဒီလိုပဲ နေနေရတာပဲ။ တစ်ရက် နှစ်ရက်က မသိသာပေမယ့် ၅နှစ်လောက်ဖြစ်လာပြီဆိုရင် ကိုယ်က သူများနဲ့မတူတော့တာကို သတိထားမိမှာပါ။
အရင်ကထက် နည်းနည်းလေးပိုဝလာမယ်။ ဗိုက်ကလေး ပူလာမယ်။ တော်ရုံဆို အမောမခံနိုင်တော့ဘူး။ အကြောအခြင်တွေ တောင့်နေမယ်။ ဒါအစပဲ ရှိပါသေးတယ်။ နောက်ပိုင်း အသက်လေးရလာရင် ဒူးတွေနာ၊ ရောဂါတွေ ဝင်လာတော့မှာပါ။
ခုနေပုံထိုင်ပုံကို ကြည့်ပြီး နောက်၁၀နှစ်လောက်နေရင် ဘာဖြစ်လာမလဲဆိုတာ မှန်းလို့ရပါတယ်။ ဒီလို ပြောတာ စိတ်ဓာတ်ကျဖို့ မဟုတ်ပါဘူး။ တို့တွေ အတူတူ ပြုပြင်လို့ရတယ်။ နည်းလမ်းတွေ ရှိတယ်လို့ ပြောတာပါ။
ဒါဆိုတော့ ခုပဲ အလုပ်တွေကို ပစ်ပြီး gymကို ပြေးသွားလိုက်ရမလား။ ဒီလောက်လည်း မဟုတ်ပါဘူး။ လုပ်နိုင်ရင်တော့ ကောင်းတာပေါ့။ ဒါပေမယ့် ကိုယ့်ကိုယ်ကိုလည်း ပြန်မေးကြည့်ပါဦး။ ဒါမျိုးက ရေရှည်လုပ်နိုင်မှ ကောင်းတာပါ။ အဲ့လိုမဟုတ်ဘဲ ကိုယ့်ရဲ့ sedentary lifestyleကနေပဲ ကျန်းမာအောင် နေမယ်ဆိုရင်ရော။
ထိုင်ခုံတွေက လွတ်မြောက်ဖို့ နည်းအသွယ်သွယ်
ပြဿနာတွေရဲ့ အစကတော့ ညစောစော မအိပ်တာက စတာပဲ။ စောစော မအိပ်တော့ စောစော မနိုး၊ စောစောမနိုးတော့ မနက်စာတောင် မစားနိုင်၊ ကျန်တဲ့ တစ်မှတ်တိုင်လောက်ဆင်းပြီး လမ်းလျှောက်မယ်တို့၊ ဓာတ်လှေကား မသုံးဘဲ ခြေလျင်တက်မယ်ဆိုတာက အလကားပါပဲ။ ဒီတော့ အရင်ဆုံး . . .
- ညအချိန်မှန်မှန် အိပ်ပါ။
အချိန်မှန်မှန် အိပ်ရင် ကျင့်သားရလာပြီး မအိပ်နဲ့ဆိုတာတောင် အိပ်မှာပါ။ ညမအိပ်ခင် ဖုန်းမသုံးမိအောင် ဘယ်လိုနေမလဲဆိုတာတော့ နောက်ဆောင်းပါးမှပဲ ရေးပါ့မယ်။
- နည်းနည်းတော့ လှုပ်ပါ။
မနက်စောစော လေ့ကျင့်ခန်းလုပ်ဖို့ဆိုတာ အကြီးမားဆုံး စိန်ခေါ်မှုပါပဲ။ ဒါကြောင့် မနက်ကို ၅မိနစ် တရားထိုင်မလား၊ အကြောလျှော့မလား၊ ပေါ့ပေါ့ပါးပါး လေ့ကျင့်ခန်းတွေ လုပ်မလား။ တစ်ခုတော့ လုပ်ပါ။ ၅မိနစ်ကနေ စပါ။ နောက်ပိုင်း သင်ကိုယ်တိုင် လိုလိုလားလားနဲ့ ဆက်လုပ်ချင်ပါလိမ့်မယ်။
လုံးဝအချိန်မရဘူးလား။ ဒါဆို သွားတိုက်နေရင်လည်း squatထိုင်လို့ရပါတယ်။ ၁၀ခေါက်လောက်တော့ ပြီးမှာပါ။
- လမ်းလျှောက်ပါ။
မကြာခင် ရုံးမှာ အကြာကြီး ထိုင်ရတော့မှာဆိုတော့ ခုလောက်တည်းက လမ်းလျှောက်ထားပါ။ ကားဂိတ်နဲ့ အိမ်နဲ့ သိပ်မဝေးရင် လမ်းလျှောက်လိုက်ပါ။
အိမ်နဲ့ ရုံးနဲ့ သိပ်မဝေးရင် ကားပေါ်မှာ ဘတ်စ်ကားပေါ်မှာ ခုံလုမနေပါနဲ့တော့။ မတ်တပ်သာ ရပ်သွားပါ။ (ပြုတ်ကျမှာစိုးလို့၊ ခါးပိုက်နှိုက်ကြောက်လို့၊ လူကြပ်လို့ ဆိုရင်တော့ ထိုင်သာ စီးသွားပါ။ ဒါပေမယ့် နှစ်မှတ်တိုင်လောက်အလိုဆို ထလို့ အဆင်ပြေလောက်ပါပြီ။ )
ရုံးမှာလည်း ဓာတ်လှေကား မသုံးဘဲ ခြေထောက်နဲ့ တက်ဖို့ သိပ်တော့ အဆင်မပြေလောက်ပါဘူး။ ရုံးက ၈လွှာလောက်မှာဆို ဘယ်အဆင်ပြေပါ့မလဲ။ ဖြစ်နိုင်တာပဲ စဉ်းစားကြည့်ရအောင်။ ရုံးက ၈လွှာဆို ၇လွှာလောက်က ဆင်းပြီး တက်မယ်ဆိုရင်တော့ အဆင်ပြေလောက်မှာပါ။
အရေးကြီးဆုံးက မနက်ပိုင်းမှာ ရုံးချိန်လည်း မီချင်တယ်၊ ဒါတွေလည်း လုပ်မယ်ဆို မနက်စောစောထရမှာပါ။ စောစောထချင်ရင် စောစောအိပ်ပါ။
-
ရုံးမှာလည်း လှုပ်လို့ရသလောက် လှုပ်ပါ။
ရုံးမှာ အလှုပ်ဆုံးက လက်ချောင်းလေးတွေ ပါပဲ။ ကွန်ပြူတာနဲ့ တချောက်ချောက် ရိုက်နေရတာကိုး။ လက်ချောင်းလှုပ်ရုံနဲ့တော့ ဝိတ်မကျပါဘူး။ ဒါကြောင့် ရုံးမှာလည်း ရရင် ရသလို လှုပ်ပါ။
တစ်နာရီတစ်ခါ၊ နှစ်နာရီတစ်ခါ ကွန်ပျူတာ ရှေ့ကခွာပြီး ရေထသောက်ပါ။ ရှူးထပေါက်ပါ။ ဟိုဟိုဒီဒီလျှောက်ပါ။ မျက်လုံးလည်း အနားပေးပါ။ ခါးလေး ဘာလေး ဆန့်ပါ။ ဖုန်းလာရင် မတ်တပ်ရပ်၊ လမ်းလျှောက်ပြီးပြောပါ။
ထမင်းစားချိန်ကျရင်လည်း စားပြီးရင် ခဏမှေးပါ။ မိနစ်၂၀ထက် မပိုပါစေနဲ့။ ဒါမှ ညနေထိတောင့်ခံနိုင်မှာပါ။ မမှေးချင်ရင် ရုံးအပြင်ဘက် ဟိုနား ဒီနား လျှောက်ပါ။ တစ်နေကုန် အဲကွန်းခန်းထဲမှာ လေကောင်းလေသန့်မရပါဘူး။ နေမထိ လေမထိနေရတာပါ။
အပြင်ထွက်ပြီးလေရှူပါ။ နေရောင်လည်း နည်းနည်းပါးပါး ထိပါ။ နေသိပ်မပြင်းရင်ပေါ့။
အပြန်ဆိုရင်လည်း အလာတုန်းကလိုပဲ အောက်ဆုံးထပ်မရောက်ခင် တစ်ထပ်ကြိုဆင်းပါ။ ဆင်းရမယ့် မှတ်တိုင်မရောက်ခင် နှစ်မှတ်တိုင်လောက် ကြိုမတ်တပ်ရပ်ပါ။
ရုံးအပြန်gym ဆော့နိုင်ရင် ဆော့ပါ။
- အိမ်ပြန်ရောက်လည်း လှုပ်ပါ။
အများစုက အိမ်ပြန်ရောက်ရင် မလှုပ်ချင်တော့ပါဘူး။ စားပြီး သောက်ပြီး အိပ်ရာထဲမှာပဲ ဖုန်းလေးပွတ်၊ တီဗွီကြည့်ချင်တာပါ။ ဒီအချိန် ထ လေ့ကျင့်ခန်းလုပ်ဆို လုပ်ချင်မှာ မဟုတ်ပါဘူး။
ဒါကြောင့် အိမ်မှာလည်း တတ်နိုင်သမျှ လှုပ်ရှားဖို့ နည်းလမ်း ရှာကြည့်ရအောင်။ တီဗွီကြည့်ရင်း ကြော်ငြာလာရင် လေ့ကျင့်ခန်း တစ်ခုလုပ်ပါ။ ဖုန်းသုံးမယ်ဆိုလည်း ဆက်တိုက်မသုံးဘဲ နာရီဝက်တစ်ခါလောက် နားပြီး အိမ်ထဲမှာ ဟိုလျှောက် ဒီလျှောက်လုပ်ပါ။
အိမ်မှာ ပင်ပန်းလို့ လေ့ကျင့်ခန်း မလုပ်နိုင်ဘူးဆိုရင်တောင်မှ ၅မိနစ် ၁၀မိနစ်လောက် အကြောလျှော့ပေးပါ။ ဒါက ညဘက်လည်း ကောင်းကောင်း အိပ်ပျော်စေပါတယ်။
ကဲ တစ်နေကုန် ဘယ်လောက်လှုပ်ထားလဲ ကြည့်ရအောင်။
- မနက်စောစောထပြီး လေ့ကျင့်ခန်း ၅မိနစ်လောက် ထလုပ်တယ်။
- မှတ်တိုင်ကို လမ်းလျှောက်သွားတယ်။
- ကားပေါ်မှာ မတ်တပ်ရပ်တယ်။
- အမြင့်တစ်ထပ်လောက်ကို ခြေလျင်တက်တယ်။ အပြန်လည်း ဒီလိုပဲ။
- ရုံးမှာလည်း ရရင် ရသလို လှုပ်တယ်။
- အိမ်ပြန်ရောက်ရင်လည်း ၅မိနစ် ၁၀မိနစ်လောက် အကြောလျှော့သေးတယ်။
ဒီလောက်ဆို မဆိုးဘူးလို့ ပြောလို့ရပါတယ်။ ဒါက အချိန်လုံးဝမရှိလို့ လေ့ကျင့်ခန်းကို လုံးဝမလုပ်နိုင်ပါဘူး ဆိုတဲ့ လူတွေ အတွက်ပါ။ ဒါက အစပဲ ရှိပါသေးတယ်။ နောက်ပိုင်းကျရင် အားရင် အားသလို တိုးသွားလို့ရပါတယ်။
နောက်ပြီးတော့ fitness tracker လေးသုံးပါ။ ဥပမာ ဒီနေ့ ခြေလှမ်းဘယ်နှလှမ်း လှမ်းခဲ့တယ်။ အမြင့် ဘယ်နှထပ် တက်ခဲ့တယ်ကို ပြတဲ့ဟာလေးပေါ့။ ဒီဂဏန်းလေးတွေက သင့်ကို motivate ဖြစ်စေလို့ တစ်နေ့ထက် တစ်နေ့ ကြိုးစားချင်စိတ် ပိုတိုးလာမှာပါ။
[embed-health-tool-bmi]
