ဆီးချိုသွေးချိုအမျိုးအစား ၂ နဲ ပတ်သက်ပြီး သင် အထင်မှားနေသော အချက်များ

ဆီးချိုက ကျန်းမာရေးနယ်ပယ်မှာ တဖြည်းဖြည်းနဲ့ ပိုပိုပြီးတော့ ဂရုစိုက်စရာ၊ အာရုံစိုက်စရာ ရောဂါဖြစ်လာပါတယ်။ ရှောင်ရှားလို့မရ၊ ကာကွယ်လို့မရတဲ့ ဆီးချိုအမျိုးအစား ၁ အပြင် ဆီးချို အမျိုးအစား ၂ဆိုတဲ့ အဖြစ်များတဲ့ ဆီးချိုတစ်မျိုးလည်း ရှိပါသေးတယ်။ ဒါပေမယ့် ကောလဟာလတွေနဲ့ ဇာတ်လမ်းတွေက သင့်ကိုဆီးချိုနဲ့ပတ်သက်ပြီး အထင်လွဲမှုတွေဖြစ်စေနိုင်ပါတယ်။ အောက်မှာဖော်ပြထားတာတွေကတော့ ဆီးချိုအမျိုးအစား ၂နဲ့ ပတ်သက်ပြီး အထင်လွဲမှားမှုတွေပါ။

ဆီးချိုရောဂါက ကြီးကြီးကျယ်ကျယ် မဟုတ်ပါဘူး၊ ငါ တစ်သက်လုံး ဒီရောဂါနဲ့ အေးဆေးနေလို့ရပါတယ်။

ဆီးချိုက သင်ထိန်းချုပ်နိုင်မယ်ဆိုရင်တော့ ဘာမှကြီးကျယ်တဲ့ရောဂါမဟုတ်တာ မှန်ပါတယ်။ သို့သော် ဒီနာတာရှည်ရောဂါက ထိန်းချုပ်လို့ရပေမယ့် သူ့ကြောင့် သေဆုံးတဲ့သူက AIDS နဲ့ ရင်သားကင်ဆာကြောင့် သေဆုံးရတဲ့သူတွေထက် ပိုများပါတယ်။ ဆီးချိုရှိတဲ့ သုံးယောက်မှာ နှစ်ယောက်က နှလုံးရောဂါသို့မဟုတ် လေဖြတ်ပြီး သေဆုံးကြပါတယ်။

ငါအဝလွန်နေရင် နောက်ဆုံးမှာဆီးချိုအမျိုးအစား ၂ ဖြစ်လာမှာပဲ။

ကိုယ်အလေးချိန်က ဆီးချိုဖြစ်စေတဲ့ အဓိကအကြောင်းအရင်းဆိုပေမယ့် တခြားဖြစ်စေတဲ့အကြောင်းအရင်းတွေ ရှိပါသေးတယ်။ ဥပမာ – မိသားစုမျိုးရိုးဖြစ်ပါတယ်။ အဝလွန်နေတဲ့သူ တော်တော်များများက ဆီးချိုလုံးဝမဖြစ်တာမျိုးလည်းရှိပြီး ပုံမှန်ကိုယ်အလေးချိန်ရှိသူတွေက ဆီးချိုအမျိုးအစား ၂ ဖြစ်တာတွေလည်း ရှိပါတယ်။

ငါလေ့ကျင့်ခန်းတွေ အရမ်းမလုပ်သင့်ဘူး၊ လုပ်ရင် သကြားဓါတ်ကုန်ခမ်းသွားလိမ့်မယ်။

တကယ်လို့ သင်ကအင်ဆူလင် ထုတ်လုပ်မှုပိုများစေတဲ့ ဆေးတွေ အသုံးပြုနေတယ် ဒါမှမဟုတ် အင်ဆူလင် ထိုးနေတယ်ဆိုရင် သင်အနေနဲ့ လေ့ကျင့်ခန်း၊ အင်ဆူလင်နဲ့ အစားအသောက်တွေကို ညီမျှအောင်လုပ်ရပါမယ်။ ဒါပေမယ့် ဆီးချိုအမျိုးအစား ၂ အတွက် အင်ဆူလင်ကို သုံးတာနည်းပါတယ်။ သောက်ရတဲ့ဆေးတွေ ဥပမာ metformin နဲ့ sitagliptin တွေက သင်ဘယ်လောက် လေ့ကျင့်ခန်းလုပ်လုပ် သွေးထဲကသကြားဓါတ်ကို အရမ်းကျသွားအောင်မလုပ်ပါဘူး။ အမှန်တကယ်တော့ လေ့ကျင့်ခန်းလုပ်ခြင်းက ဆီးချိုကိုထိန်းချုပ်ဖို့အပြင် ကိုယ်မလးချိန်ကျစေဖို့လိုကို လိုအပ်ပါတယ်။

အင်ဆူလင်ကသင့်ကိုဆိုးကျိုးပေးလိမ့်မယ်။

အင်ဆူလင်က မရှိမဖြစ်လိုအပ်ပေမယ့် တချို့သူတွေအတွက်တော့ အခက်အခဲဖြစ်စေပါတယ်။ သင့်အနေနဲ့ အင်ဆူလင်သုံးထားတယ်ဆိုရင် သကြားဓါတ်ခမ်းခြောက်ခြင်း မဖြစ်အောင် သွေးတွင်းသကြားဓါတ်ကို ခဏခဏ တိုင်းနေဖို့တော့ လိုပါလိမ့်မယ်။

ဆီးချိုဆိုတာ သင့်ကိုယ်က အင်ဆူလင် လုံလုံလောက်လောက်မထုတ်လို့ဖြစ်လာတာပါ။

ဒါက ဆီးချို အမျိုးအစား ၁ မှာတော့ မှန်ပါတယ်။ မုန့်ချိုအိတ်က အင်ဆူလင် ထုတ်လုပ်ခြင်းကို လုံးဝရပ်လိုက်လို့ပါ။ ဆီးချို အမျိုးအစား ၂ ဖြစ်တဲ့သူတွေမှာတော့ အင်ဆူလင် လုံလုံလောက်လောက် ထုတ်လုပ်ပါတယ်။ သူတို့ရဲ့ပြဿနာကတော့ အင်ဆူလင် တွေက သေချာအလုပ်မလုပ်တော့တာပါ။ အဲဒီ အင်ဆူလင်တွေက လူကိုယ်ရဲ့ ဆဲလ် တွေကို အစားအစာကရတဲ့ glucose (ဂလူးကိုစ့်) တွေကို စုပ်ယူစေဖို့ မစွမ်းဆောင်နိုင်တော့တာပါ။ နောက်ဆုံးမှာ မုန့်ချိုအိတ်က အင်ဆူလင် လုံလုံလောက်လောက် မထုတ်ခဲ့တဲ့အတွက် အင်ဆူလင်တွေ ထိုးသွင်းဖို့ လိုလာပါလိမ့်မယ်။

အချိုများများစားတာက ဆီးချိုဖြစ်စေတယ်။

အချိုရည်တွေ အများအပြားသောက်သုံးခြင်းက ဆီးချိုအန ္တရာယ်ရှိပြီးသားလူမှာ ဆီးချိုဖြစ်လာနိုင်ချေ နှုန်းမြင့်စေတယ်လို့မကြာသေးခင်က လေ့လာချက်များအရ ဆိုကြသော်လည်း အစားအသောက်က ဆီးချိုမဖြစ်စေပါဘူး။ ဒါ့အပြင် သကြားသက်သက်က ဆီးချိုမဖြစ်စေပါဘူး။ သူကဆီးချိုဖြစ်စေတဲ့ အကြောင်းအရင်းဖြစ်တဲ့ အဝလွန်ခြင်းကိုဖြစ်စေတာပါ။ အဝလွန်သူတွေက အချိုစားများကြပါတယ်။ သူတို့တွေက ကယ်လိုရီတက်စေတဲ့ အသင့်စားအစားအစာတွေ အရမ်းစားပါတယ်။ အချိုတွေက သွေးချိုတက်စေတဲ့အတွက် မကောင်းပါဘူး။ ဒါ့အပြင်glucose (ဂလူးကိုစ့်)အဖြစ် မြန်မြန်ပြိုကွဲသွားတဲ့စားစရာတွေ ဖြစ်တဲ့ပါစတာအလွတ်၊ ပေါင်မုန့်ဖြူ၊ ခေါက်ဆွဲနဲ့ ထမင်းတို့ကလည်း ဆီးချိုအတွက်မကောင်းပါဘူး။

ကျွန်တော့် ဆီးချိုတက်မတက် ကျွန်တော် သိတယ်။

သင့်အနေနဲ့ သင်ဘယ်လိုခံစားရလဲအပေါ် မူတည်ပြီး သင့် သွေးတွင်းသကြားဓါတ်နှုန်းကိုမသိနိုင်ပါဘူး။

သင့်ရဲ့ ဆီးချိုကျနေရင် (သွေးတွင်းသကြားဓါတ်နည်းနေရင်)သင်ဟာကတုန်ကရင်ဖြစ်ခြင်း၊ မိုက်ခနဲဖြစ်ခြင်း၊ ခေါင်းမူးခြင်းတွေဖြစ်နိုင်ပါတယ်။ ဒါပေမယ့် ဒါကအဖျားကြောင့်လည်းဖြစ်နိုင်ပါတယ်။ သင်ဆီးခဏခဏသွားတာက သင့်ရဲ့ glucose ( သွေးတွင်းသကြားဓါတ်) ကမြင့်နေလို့ဖြစ်နိုင်သလို သင့်ဆီးအိမ်ပိုးဝင်လို့လည်း ဖြစ်နိုင်ပါတယ်။ သင့်မှာဆီးချိုရှိတာ ကြာလေသင့်ရဲ့အပေါ်က ခံစားချက်တွေက မတိကျလေဖြစ်ပါတယ်။ အတိကျဆုံးတစ်ခုတည်းသောနည်းက သွေးတွင်းသကြားဓါတ်စစ်ဖို့ပါပဲ။

ဆီးချိုရှိသူတွေက အချိုမစားရဘူး။

ဆီးချိုရှိသူတွေက အချိုစားလို့ မရစရာအကြောင်းမရှိပါဘူး။ ပမာဏခပ်နဲနဲပဲဆိုဘာစားစားရပါတယ်။ ပြဿနာက ကျွန်တော်တို့အများစုက ကိုယ်ကြိုက်တာတွေဆို အများကြီးစားတာပါ။ ဆီးချိုရှိတာက သင်ကိတ်မုန့်ကို လုံးဝမစားရတော့ဘူးလို့မဆိုလိုပါဘူး။ တစ်စိတ်လောက်ဆိုရပါတယ်။ သတိထားရမှာက ဘာနဲ့တွဲစားမလဲဆိုတာပါပဲ။ တစ်လကို အချိုပွဲနည်းနည်းစီစားလို့ရပေမယ့် ညတိုင်းတော့မရပါဘူး။

သင့်မှာဆီးချိုရှိရင်ဖျားနာဖို့တုပ်ကွေးဖြစ်ဖို့လွယ်ပါတယ်။

ဆီးချိုက သင့်ကိုအဲဒီလိုကူးစက်တတ်တဲ့ဖျားနာမှုတွေကို ပိုမဖြစ်စေနိုင်ပါဘူး။ ဒါပေမယ့် သင့်အနေနဲ့ တုပ်ကွေးကာကွယ်ဆေးထိုးထားတာကပိုကောင်းပါတယ်။ အကြောင်းက တုပ်ကွေးရောဂါကြောင့် သင့်ဆီးချိုပိုဆိုးနိုင်လို့ပါ။

အကယ်၍ သင်ဟာအင်ဆူလင်ထိုးနေရပြီရင် သဘောက သင့်ဆီးချိုကို သင်သေချာဂရုမစိုက်ဘူးဆိုတဲ့ သဘောပါ။ သင်ဆီးချိုစဖြစ်တဲ့အချိန်မှာ အစားအစာ၊ လေ့ကျင့်ခန်း၊ ဂလူးကိုစ့်ကို စုပ်ယူဖို့ကူညီတဲ့ဆေးတွေ နဲ့သင့်သွေးတွင်း သကြားဓါတ်ကို ထိန်းနိုင်ပါတယ်။ ဒါပေမယ့် အဆုံးမှာ သင့်ရဲ့မုန့်ချိုအိတ်က အင်ဆူလင်ကို လုံးဝမထုတ်တဲ့ထိဖြစ်နိုင်ပါတယ်။ ထိုအချိန်မှာ သင် အင်ဆူလင်ထိုးဆေး လိုအပ်လာပါပြီ။ ဒါက သင့်အမှားမဟုတ်ပါဘူး။ ရောဂါရဲ့အဆင့်တိုးလာတဲ့ အခြေအနေတစ်ရပ်သာ ဖြစ်ပါတယ်။

[embed-health-tool-bmi]