ခုခေတ်မှာ အမျိုးသမီးတွေက အိမ်မှုကိစ္စအပြင် ပြင်ပအလုပ်တွေကို တွဲဖက်လုပ်လာရပါပြီ။ ကိုယ်ပိုင်လုပ်ငန်း၊ ကုမ္ပဏီဝန်ထမ်း စတဲ့ ပုံစံအမျိုးမျိုးနဲ့ နယ်ပယ်အသီးသီးမှာ အမျိုးသားတွေနဲ့ ရင်ပေါင်တန်းပြီး လုပ်ကိုင်လာကြပါပြီ။ ဒါပေမယ့် သူတို့ရဲ့ မူရင်းအလုပ်ဖြစ်တဲ့ အိမ်မှုကိစ္စ၊ ကလေးတွေ ကိစ္စစတာတွေကိုလည်း လက်လွှတ်လို့မရသေးပါဘူး။ ဘယ်လောက်ပဲ အမျိုးသားက ကူတယ်ပြောပြော အမျိုးသမီးတွေကပဲ ဦးဆောင်လုပ်ရတာပါ။ တစ်ကိုယ်တော် အမေတွေဆို ပိုပြီးအလုပ်များပါသေးတယ်။ ဒီလိုအမျိုးသမီးတွေအတွက် Work-Life balance ဆိုတာ လိုကို လိုအပ်လာပါပြီ။ ဒါကြောင့် အမျိုးသမီးများ Work-Life balance မျှစေဖို့ နည်းလမ်းကောင်းလေးတွေကို မျှဝေပေးလိုက်ပါတယ်။
Work-Life balanceဆိုတာ
အလုပ်ရယ် ကိုယ်ပိုင်ဘဝရယ်လို့ အလွယ်တကူ ပြောလို့ရပေမယ့် တကယ်က ဒီထက် နက်ရှိုင်းပါတယ်။ Balance ဖြစ်ဖို့ဆို ပိုတောင် ခက်ပါသေးတယ်။ အလုပ်မှာဆိုရင် ဝန်ထမ်းဆိုရင် ကိုယ့်လက်အောက်ငယ်သားတွေ၊ ကိုယ်ပိုင်အလုပ်ဆိုရင် ကိုယ့်ဝန်ထမ်းတွေ စသဖြင့် တစ်ကိုယ်ရည်စာ အလုပ်ဆိုတာထက် ပိုပါတယ်။
အိမ်မှာဆိုရင်လည်း ကလေးအလုပ်၊ အမျိုးသားအလုပ်၊ အိမ်မှုကိစ္စ၊ သာရေး နာရေးနဲ့ နှစ်ဖက်မိဘတွေ အရေး ဒါတွေကိုပဲ ဦးစားပေးနေရတာပါ။ ဒါကြောင့် သူတို့မှာ ကိုယ်ပိုင်အချိန်၊ ကိုယ်ပိုင်ဘဝဆိုတာ မရှိသလောက် ရှားပါတယ်။ Work-Life balance လို့ပြောရင် အလုပ်နဲ့ အိမ်ကိစ္စပဲ ရှိနေပါသေးတယ်။ တကယ်တော့ ကိုယ့်ရဲ့ ကိုယ်ပိုင်ဘဝကိုပါ ပါဝင်အောင် ထည့်တွက်သင့်ပါတယ်။
Work-Life balance ဆိုတာ . . .
အမျိုးသမီးများ Work-Life balance မျှစေဖို့
အမျိုးသမီးများ Work-Life balance မျှစေဖို့ ဆိုရင်
အလုပ်မှာဆိုရင်
- ကိုယ်ပျော်တဲ့ လုပ်ငန်းခွင်မှာ လုပ်ပါ။
လုပ်ငန်းခွင် စိတ်ဖိစီးမှုက ကိုယ့်ရဲ့ အိမ်အထိ လိုက်လာတတ်ပါတယ်။ ဒါကြောင့် ရွေးချယ်လို့ ရမယ်ဆို ကိုယ်ပျော်တဲ့၊ ကိုယ်နှစ်သက်တဲ့ အလုပ်ကိုပဲ လုပ်ပါ။ အလုပ်မှာ သက်သောင့်သက်သာနဲ့ အလုပ်လုပ်နိုင်တာက အိမ်ပြန်ချိန်တွေကို သာယာစေပါတယ်။
- တာဝန်ခွဲထားပါ။
နေရာတကာ ကိုယ်ဝင်ပါဖို့ မလိုအောင် တာဝန်တွေကို တိတိကျကျ ခွဲထားပါ။ အရေးကြီးတာကို ဦးစားပေးလုပ်ပါ။ အလုပ်များများ လုပ်တာထက် လုပ်သမျှအလုပ်က အရာထင်အောင် ကြိုးစားပါ။
- လုပ်ငန်းခွင် ညှိနှိုင်းမှု ရှိပါစေ။
တကယ်လို့ မနက်မှာ ကလေးကျောင်းပို့ရမှာမို့လို့ နာရီဝက်နောက်ကျမယ်ဆိုရင် အလုပ်ဆင်းချိန်ကို နာရီဝက်နောက်ရွေ့ပေးမယ်လို့ ညှိနှိုင်းကြည့်ပါ။ ဒီလို လုပ်လို့ ကိုယ့်ရဲ့ လုပ်ငန်းခွင်နဲ့ အလုပ်ကို မထိခိုက်စေဘူးဆိုတာကိုတော့ အာမခံနိုင်ပါစေ။
- ငြင်းဆိုတတ်ပါစေ။
အလုပ်မှာပဲဖြစ်ဖြစ်၊ အိမ်မှာပဲဖြစ်ဖြစ် အလုပ်အားလုံးကို တစ်ယောက်တည်း သိမ်းကျုံးလုပ်စရာ မလိုပါဘူး။ မလုပ်နိုင်ရင် မလုပ်နိုင်ဘူးလို့ ငြင်းဆိုတတ်ပါစေ။ အခါအားလျော်စွာ အကူအညီတောင်းတတ်ပါစေ။
အိမ်မှာဆိုရင်
- ‘Me time’ ထားပါ။
‘Me time’ ဆိုတာက ကလေးနဲ့မဆိုင်၊ မိသားစုနဲ့ မဆိုင်ဘဲ ကိုယ့်ကိုယ်ကို အချိန်ပေးတာ၊ ဂရုစိုက်တာပါ။ မနက်စာ၊ နေ့လယ်စာ၊ ညစာကို ဖြစ်သလို မစားဘဲ သေချာပြင်ဆင်တာ၊ လေ့ကျင့်ခန်း လုပ်ဖို့ အချိန်ပေးတာ၊ ကိုယ့်ဝါသနာလေးတွေအတွက် အချိန်ပေးတာမျိုးပါ။ ပိတ်ရက်တွေမှာ သူငယ်ချင်းတွေနဲ့ အတူထွက်လည်တာကတည်း ‘Me time’ ပဲ ဖြစ်ပါတယ်။
- မိသားစုနဲ့ အလုပ်နဲ့ ခွဲခြားထားပါ။
ဒီလိုလုပ်ဖို့ဆိုရင် အလုပ်ကကိစ္စတွေကို အိမ်ကို သယ်မလာပါနဲ့။ မိသားစုနဲ့ နေရမယ့် အချိန်ကို ဖဲ့ပြီး အလုပ်အတွက် မသုံးပါနဲ့။ တတ်နိုင်ရင် အလုပ်ဖုန်းတွေ အီးမေးလ်တွေကို ကိုယ်ပိုင်ဖုန်းတွေနဲ့ မတူအောင် ခွဲထားပါ။ အိမ်ရောက်သွားရက်၊ ပိတ်ရက်ဆိုရင် အလုပ်ဖုန်းကို ပိတ်ထားလိုက်ပါ။
- အိမ်အလုပ်တွေကို တစ်ယောက်တည်း မလုပ်ပါနဲ့။
ရုံးမှာ ရုံးအလုပ်၊ အိမ်မှာ အိမ်အလုပ် တစ်ယောက်တည်း ကျုံးလုပ်နေရရင် စိတ်ပျော်မှာ မဟုတ်ပါဘူး။ ဒီလိုနဲ့ ငါပဲလုပ်နေရတယ်ဆိုပြီး ကြာလာရင် မိသားစုနဲ့ ဆက်ဆံရေး ထိခိုက်လာနိုင်ပါတယ်။ ဒီလိုမဖြစ်အောင် အိမ်မှာလည်း အလုပ်တာဝန်ခွဲထားပါ။ ကလေးတွေ လုပ်နိုင်တဲ့ အလုပ်ဆို ပေးလုပ်လိုက်ပါ။ ခင်ပွန်းသည်ကို အကူအညီတောင်းပါ။
- ကိုယ့်ကိုယ်ကို အပြစ်မတင်ပါနဲ့။
တစ်ခါတလေမှာ အလုပ်မှာဖြစ်ဖြစ်၊ အိမ်မှာဖြစ်ဖြစ် အမှားလုပ်မိတာ ရှိနိုင်ပါတယ်။ တစ်ဖက်ကို ဦးစားပေးလိုက်လို့ တစ်ဖက်မှာ လစ်ဟင်းသွားတာတွေ ရှိတတ်ပါတယ်။ ဒါနဲ့ပတ်သက်ပြီး ကိုယ့်ကိုယ်ကို အပြစ်မတင်ပါနဲ့။ ပြီးပြည့်စုံတဲ့သူဆိုတာ မရှိတာကြောင့် အလုပ်မှာရော၊ အိမ်မှာရော အပြစ်ကင်းအောင် နေဖို့ဆိုတာ ခက်မှာပါ။
အမျိုးသမီးများ Work-Life balance မျှတစေဖို့
အရေးကြီးဆုံးကတော့ အလုပ်လည်း မဟုတ်၊ အိမ်လည်း မဟုတ်ဘဲ မိမိကိုယ်ကို ဦးစားပေးဖို့ မမေ့ကြပါနဲ့။
[embed-health-tool-ovulation]
