သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

null

ဝက်ခြံဖြစ်လွယ်တဲ့ အသားအရေအတွက် မျက်နှာသစ်ဆေးဘယ်လိုရွေးမလဲ

    ဝက်ခြံဖြစ်လွယ်တဲ့ အသားအရေအတွက် မျက်နှာသစ်ဆေးဘယ်လိုရွေးမလဲ

    အသားအရေထိန်းသိမ်းမှုက လှပမှုအတွက်အရေးပါတဲ့အချက်တစ်ခုပါ။ အသားဖြူဝင်းလှပနေမယ်ဆိုရင် ကိုယ့်ကိုကိုယ် ယုံကြည်မှုတိုးစေမှာအမှန်ပါပဲ။ အသားအရေထိန်းသိမ်းတယ်ဆိုတဲ့နေရာမှာလည်း ကိုယ့်အသားအရေနဲ့လိုက်ဖက်တဲ့ အသားအရေထိန်းသိမ်းမှုနည်းလမ်းတွေကို ရွေးချယ်မိဖို့လိုပါတယ်။ မိမိအသားအရေနဲ့လိုက်ဖက်မယ့် အသားအရေထိန်းသိမ်းမှုလုပ်ဖို့ဆိုရင် အဓိကအကျဆုံးက ကိုယ်ဟာဘယ်လိုအသားအရေပိုင်ရှင်မျိုးလဲဆိုတာကို သိဖို့ပါပဲ။ အသားအရေအမျိုးအစားကိုလိုက်ပြီး ထုတ်လုပ်တဲ့ အသားအရေထိန်းသိမ်းမှုပစ္စည်းတွေရဲ့ပါဝင်ပစ္စည်းတွေက ကွဲပြားပါတယ်။

    အသားအရေအမျိုးအစားကို အကြမ်းဖျင်းအနေနဲ့

    • ခြောက်သွေ့တဲ့အသားအရေ
    • အဆီပြန်တဲ့ အသားအရေ
    • ပုံမှန်အသားအရေ
    • တုံ့ပြန်လွယ်တဲ့အသားအရေ (sensitive skin) နဲ့
    • ပေါင်းစပ်အသားအရေဆိုပြီး ခွဲခြားသတ်မှတ်ထားပါတယ်။ အသားအရေအမျိုးအစားကိုသေသေချာချာသိထားတာက အသားအရေထိန်းသိမ်းတဲ့ပစ္စည်းတွေဝယ်ယူတဲ့နေရာမှာ အထောက်အကူဖြစ်တဲ့အပြင် ဝက်ခြံတွေကို သက်သာအောင်လည်းအထောက်အပံ့ရစေမှာပါ။

    မိမိကဘယ်လိုအရေပြားပိုင်ရှင်လဲဆိုတာကို ဆုံးဖြတ်ရခက်နေမယ်ဆိုရင် အခုဖော်ပြပေးမယ့် ရိုးရှင်းတဲ့ နည်းလမ်းလေးသုံးပြီး အကဲဖြတ်ကြည့်လိုက်ပါ။

    • မျက်နှာကို ညင်ညင်သာသာသစ်ပြီးရေခြောက်အောင်သုတ်လိုက်ပါ။ ဘာမှထပ်မလူးပါနဲ့။
    • မျက်နှာသစ်ပြီး တစ်နာရီလောက်ကြာရင်မျက်နှာက မူလအခြေအနေအတိုင်းပြန်ဖြစ်သွားပါလိမ့်မယ်။ မျက်နှာကမူလအတိုင်းပြန်ဖြစ်သွားတဲ့အခါ မျက်နှာရဲ့ T-Zoneနေရာဖြစ်တဲ့ နဖူးနဲ့နှာခေါင်းကို တစ်သျှူးစနဲ့ဖိသုတ်လိုက်ပါ။
    • တစ်ရှူးမှာပါတဲ့ အဆီပမာဏကိုကြည့်ပြီး မိမိကဘယ်လိုအသားအရေပိုင်ရှင်လဲဆိုတာကို ဆုံးဖြတ်လို့ရပါပြီ။

    ပုံမှန်အသားအရေ- မျက်နှာအသားအရေကချောမွေ့နေပြီး အဆီတွေနဲ့အရေပြားအဖတ်လေးတွေမကွာနေပါဘူး။

    ခြောက်သွေ့တဲ့အသားအရေ – အဆီနည်းနည်းမှမရှိတဲ့အပြင် မျက်နှာအသားအရေက ခပ်တင်းတင်းဖြစ်နေပြီး အရေပြားအဖတ်လေးတွေလန်နေတတ်ပါတယ်။

    အဆီပြန်တဲ့အသားအရေ- တစ်ရှူးမှာ အဆီတွေအများကြီးပေကျံလာပြီး မျက်နှာအရေပြားကပြောင်ချော်ချော်ဖြစ်နေတဲ့အပြင်ချွေးပေါက်တွေကျယ်နေတတ်ပါတယ်။

    ပေါင်းစပ်အသားအရေ –အတွေ့ရများတဲ့အသားအရေတစ်မျိုးပါ။ မျက်နှာရဲ့ T-Zone မှာ အဆီပြန်နေတတ်ပေမယ့် ကျန်နေရာတွေမှာခြောက်သွေ့ပြီး အရေပြားအဖတ်လေးတွေလန်နေတတ်ပါတယ်။

    တုံ့ပြန်လွယ်တဲ့အသားအရေ (Sensitive skin) – အရေပြားက ဓာတ်မတည့်တာတစ်ခုခုနဲ့ထိတွေ့တာနဲ့ နီမြန်းပြီး စပ်ဖျဉ်းဖျဉ်းဖြစ်လာတတ်ပါတယ်။ Sensitive Skin ပိုင်ရှင်တွေအနေနဲ့ အသားအရေထိန်းသိမ်းမှုပစ္စည်းတွေကို အထူးသတိထားရွေးချယ်ဖို့လိုပါတယ်။ ဘာလို့လဲဆိုတော့ ရွေးချယ်မှုမှားသွားတာနဲ့ ဆိုးကျိုးတွေတသီကြီးနဲ့ ဆက်လက်ကြုံတွေ့ရမှာဖြစ်ပြီး နောက်ဆက်တွဲပြုပြင်ထိန်းသိမ်းမှုတွေအများကြီးဆက်လုပ်ရပါတယ်။

    မျက်နှာအရေပြားပေါ်မှာ အဖြစ်အများဆုံး အသားအရေပြဿနာက ဝက်ခြံဖြစ်တာပါပဲ။ ဝက်ခြံဖြစ်တဲ့သူတွေအနေနဲ့ကတော့ ဝက်ခြံသက်သာစေဖို့အဓိက ထုတ်ထားတဲ့ အသားအရေထိန်းသိမ်းမှုပစ္စည်းတွေကိုရွေးချယ်ဝယ်ယူဖို့လိုအပ်ပါလိမ့်မယ်။ ဝက်ခြံသက်သာစေဖို့ ထုတ်ထားတဲ့အလှကုန်တော်တော်များများမှာ ဝက်ခြံတွေကို သက်သာစေပြီး အသားအရေကိုကောင်းမွန်စေတဲ့ ပစ္စည်းတွေကိုအဓိကထည့်သွင်းထုတ်လုပ်ထားလေ့ရှိပါတယ်။ ဝက်ခြံကိုသက်သာစေတဲ့ အသားအရေထိန်းသိမ်းတဲ့ ပစ္စည်းတွေထဲမှာbenzoyl peroxide နဲ့ salicylic acid လိုမျိုးအရာတွေကို ထည့်သွင်းထုတ်လုပ်ထားပါတယ်။benzoyl peroxide ကအရေပြားပေါ်က ဆဲလ်သေတွေကို ဖယ်ရှားပေးတာ၊ ဝက်ခြံဖြစ်စေတဲ့ ဘက်တီးရီးယားတွေကို သုတ်သင်ပေးတာမျိုးတွေအတွက် အထောက်အကူပြုပါတယ်။salicylic acid ကတော့မွေးညှင်းပေါက်တွေထဲမှာ ပိတ်ဆို့နေတဲ့အဆီတွေနဲ့ဆဲလ်သေတွေကိုဖယ်ရှားပေးပြီးရောင်ရမ်းတာနဲ့ နီမြန်းတာတွေကို သက်သာစေပါတယ်။

    မျက်နှာကိုဆပ်ပြာနဲ့သစ်တယ်၊ရေဆေးချတယ်၊မျက်နှာရေသုတ်တာကတော့ လူတိုင်းလုပ်နေကျ တစ်ကိုယ်ရည်သန့်ရှင်းရေး နည်းလမ်းတစ်ရပ်ပါ။ ဝက်ခြံရှိသူတွေကတော့ ဒီသမာရိုးကျလမ်းစဉ်အတိုင်းလုပ်လို့မရပါဘူး။ အချိန်နည်းနည်းပိုပေးပြီး ပုံမှန်ထက် ပိုဂရုစိုက်ပေးမှ ဝက်ခြံတွေကိုသက်သာစေနိုင်မှာဖြစ်ပါတယ်။

    သင်ကဝက်ခြံထွက်လွယ်တဲ့ အသားအရေပိုင်ရှင်မျိုးဖြစ်မယ်ဆိုရင် မှန်ကန်တဲ့ မျက်နှာသစ်ဆေးကိုရွေးချယ်ဝယ်ယူဖို့က အရေးကြီးပါတယ်။ မိမိအသားအရေနဲ့ကိုက်မယ့် မျက်နှာသစ်ဆေးကိုရွေးချယ်ဝယ်ယူမှသာ မျက်နှာအရေပြားပေါ်က ဘက်တီးရီးယားတွေကို သုတ်သင်ပေးနိုင်မှာဖြစ်တဲ့အပြင်မွှေးညှင်းပေါက်လေးတွေထဲက အဆီတွေနဲ့ အညစ်အကြေးတွေကို သန့်စင်စေမှာဖြစ်ပါတယ်။ မျက်နှာကို အဲဒီလို အသေအချာ အချိန်ပေးသစ်မှ မျက်နှာပေါ်က ဆဲလ်သေတွေနဲ့ ဘက်တီးရီးယားပိုးတွေကို ဖယ်ရှားပေးနိုင်မှာဖြစ်ပြီး ဝက်ခြံအတွက်လိမ်းပေးရတဲ့ဆေးတွေကို အရေပြားကပိုမိုစုပ်ယူနိုင်အောင်လည်း အထောက်အကူပြုပေးမှာပါ။

    ဝက်ခြံရှိတဲ့ အသားအရေပိုင်ရှင်တွေအနေနဲ့ အပြင်းစားမျက်နှာသစ်ဆေးတွေအသုံးပြုတာမျိုးမလုပ်သင့်ပါဘူး။ အပြင်းစားမျက်နှာသစ်ဆေးတွေက အရေပြားကို နီမြန်း၊နာကျင်စေနိုင်တဲ့အပြင် ရှိနေတဲ့ ဝက်ခြံတွေကို ပိုဆိုးသွားစေပါတယ်။ Garnier Pure Active Acne & Oil Clearing Foam လိုမျိုးSalicylic acid နဲ့ ဘလူးဘယ်ရီ အဆီအနှစ်ကို အခြေခံပြီးထုတ်ထားတဲ့ မျက်နှာသစ်ဆေးတွေကို အသုံးပြုပေးလို့ရပါတယ်။

    မသေချာရင်မိမိရဲ့အရေပြားဆရာဝန်နဲ့တိုင်ပင်ပြီး ဝက်ခြံဖြစ်လွယ်တဲ့ အသားအရေနဲ့ကိုက်ညီမယ့် မျက်နှာသစ်ဆေးကို ဘယ်လိုရွေးချယ်ဝယ်ယူရမလဲဆိုတာကို တိုင်ပင်ကြည့်ပါ။ ဝက်ခြံထွက်လွယ်တဲ့ အသားအရေပိုင်ရှင်တွေအတွက် မှန်ကန်တဲ့ မျက်နှာသစ်ဆေးရွေးချယ်ဝယ်ယူတဲ့နေရာမှာ အသုံးဝင်နိုင်မယ့် အချက်အချို့ကို မျှဝေပေးလိုက်ပါတယ်။

    မျက်နှာသစ်ဆေးဝယ်ယူတဲ့နေရာမှာဈေးနှုန်းက အရေးမပါလှပါဘူး။ ထိရောက်မှုရှိဖို့ကသာ အဓိကကျတာပါ။ မျက်နှာသစ်ဆေးအချို့က အရေပြားကိုခြောက်သွေ့နီမြန်းစေနိုင်တဲ့ alkaline pH ကိုအခြေခံပြီးထုတ်လုပ်ထားတာဖြစ်ပါတယ်။

    ဝက်ခြံထွက်လွယ်သူတွေအနေနဲ့ မျက်နှာသစ်ဆေးဝယ်ယူတော့မယ်ဆိုရင်-

    • သိပ်မပြင်းဘဲ အယ်လ်ကိုဟောမပါဝင်တာမျိုးကိုရွေးချယ်ပါ။
    • အရေပြားဆရာဝန်နဲ့အရင်တိုင်ပင်ကြည့်ပါ။ မိမိအသားအရေအမျိုးအစားနဲ့ကိုက်မယ့် မျက်နှာသစ်ဆေးကိုရွေးချယ်ဝယ်ယူပေးပါ။
    • အချို့ ဝက်ခြံသက်သာစေတဲ့ မျက်နှာသစ်ဆေးတွေနဲ့ မျက်နှာတိုက်ဆပ်ပြာတွေမှာ ဝက်ခြံကို သက်သာစေပြီး မျက်နှာအသားအရေကိုကောင်းမွန်စေတဲ့ အရာတွေပါဝင်နေတတ်ပါတယ်။ များသောအားဖြင့် ဝက်ခြံတွေကို သက်သာစေပြီး အရေပြားကို ကောင်းမွန်စေနိုင်တဲ့ salicylic acid၊ sodium sulfacetamide နဲ့ benzoyl peroxide တို့ပါဝင်နေတတ်ပါတယ်။Benzoyl peroxide ကအရေပြားပေါ်က ဆဲလ်သေတွေကို ဖယ်ရှားပေးပြီး ဘက်တီးရီးယားတွေကို တိုက်ဖျက်ပေးပါတယ်။Salicylic acid ကမွှေးညှင်းပေါက်တွေကို သန့်စင်စေပြီး ဝက်ခြံကြောင့် နီမြန်းရောင်ရမ်းတာကို သက်သာစေပါတယ်။Sodium sulfacetamide ကတော့ ဘက်တီးရီးယားတွေ ထပ်မံမပေါက်ဖွားနိုင်အောင် ဟန့်တားပေးပါတယ်။
    • အရေပြားကိုရေဓါတ်ပြည့်ဝအောင်ထားပါ။ သဘာဝပစ္စည်းတွေကနေ အခြေခံပြီးထုတ်ထားတဲ့ မျက်နှာသစ်ဆပ်ပြာမျိုးကိုရွေးချယ်အသုံးပြုပေးပါ။ အစိုဓါတ်ထိန်းပေးနိုင်မယ့် ခရင်ခ်မျိုးလိမ်းပေးလို့လည်းရပါတယ်။

    ဝက်ခြံထွက်လွယ်တဲ့အသားအရေပိုင်ရှင်တွေအနေနဲ့ မနက်တစ်ကြိမ် ၊အိပ်ရာဝင်ခါနီးတစ်ကြိမ်မျက်နှာသစ်ပေးရုံနဲ့လုံလောက်ပါတယ်။ မျက်နှာသစ်တဲ့အခါ မျက်နှာသစ်ဆေးကို လက်ညှိုးထိပ်လေးနဲ့ယူပြီး မျက်နှာပေါ်မှာ ညင်ညင်သာသာပွတ်ပေးပါ။သွေးလည်ပတ်မှုကောင်းစေဖို့ မျက်နှာကို လက်ချောင်းလေးတွေအသုံးပြုပြီး စက်ဝန်းသဏ္ဍန်နှိပ်ပေးပါ။ ခဏလောက်ထားပြီးရေခပ်နွေးနွေးလေးနဲ့ ဆေးချပေးလိုက်ပါ။ အရေပြားကိုကြမ်းကြမ်းတမ်းတမ်းပွတ်တိုက်တာမျိုးမလုပ်ပါနဲ့။ နေရောင်နဲ့တိုက်ရိုက်ထိတွေ့တာမျိုးမလုပ်ပါနဲ့။နေရောင်အောက်ထွက်တဲ့ အခါ ထီးတွေ ဦးထုပ်တွေဆောင်းသွားဖို့လည်း သတိရပါ။

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    ရင်းမြစ်များ

    Safe Soaps and Cleansers for Acne https://www.webmd.com/skin-problems-and-treatments/acne/cleansers#2 Accessed Date Oct 10, 2017

    How to Determine your Skin Type! https://aadermatology.com/determine-skin-type/ Accessed Date Oct 10, 2017

    10 SKIN CARE HABITS THAT CAN WORSEN ACNE https://www.aad.org/public/diseases/acne/skin-care/habits-stop#:~:text=What%20to%20do%20instead%3A%20Be,water%2C%20using%20only%20your%20fingers. Accessed Date Oct 10, 2017

    How Often You Should Wash Your Face if You Have Acne https://www.verywellhealth.com/how-often-should-i-wash-my-face-15734 Accessed Date Oct 10, 2017

    How to Choose the Right Acne Cleanser for Yourself https://www.verywellhealth.com/choose-the-right-acne-cleanser-15744 Accessed Date Oct 10, 2017

     

     

    စာရေးသူ ဓာတ်ပုံbadge
    Aye Thi Mon မှ ရေးသားသည်။ 27/05/2022 တွင် ပြန်လည်ပြင်ဆင်ခဲ့သည်။
    Dr. Thurein Hlaing Win မှ အချက်အလက် စစ်ဆေးထားပါသည်။