သားဆက်ခြားတဲ့ကိစ္စမှာ အမျိုးသားတွေ ဘယ်လိုပါဝင်ကြမလဲ

သားဆက်ခြားတဲ့ကိစ္စမှာ အမျိုးသားတွေ ဘယ်လိုပါဝင်ကြမလဲ …… ရုတ်တရက်ကြည့်လိုက်ရင် သားဆက်ခြားတဲ့ကိစ္စဟာ အမျိုးသမီးတွေနဲ့ပဲ သက်ဆိုင်တယ်လို့ ထင်ချင်စရာပါ။ တကယ်တမ်း ကြည့်လိုက်ရင်လည်း အင်မတန် စိတ်ချရတဲ့ သားဆက်ခြားနည်း အများစုက အမျိုးသမီးတွေပဲ အသုံးပြုရတာဖြစ်သလို၊ ကိုယ်ဝန်ဆောင်၊ ကလေးမွေးရတာကလည်း အမျိုးသမီးတွေပါပဲ။ ဒါပေမယ့် အမျိုးသားတွေအနေနဲ့လည်း ဒီကိစ္စမှာ ပါဝင်ပေးဖို့ သိပ်ကိုလိုအပ်တဲ့အကြောင်း ပြောပြလိုပါတယ်။

သားဆက်ခြားတဲ့ကိစ္စမှာ အမျိုးသားတွေ ဘယ်လိုပါဝင်ကြမလဲ

သားဆက်ခြားတဲ့ကိစ္စမှာ အမျိုးသားတွေ ဘယ်လိုပါဝင်ကြမလဲ ဆိုတော့

၁။ အမျိုးသား ပါဝင်ပေးရမယ့် သားဆက်ခြားနည်းတွေ

သားဆက်ခြားနည်း အများစုက အမျိုးသမီးတွေပဲ သုံးလို့ရတာ ဆိုပေမယ့် အမျိုးသားဘက်က သုံးလို့ရတဲ့ သားဆက်ခြားနည်းတချို့လည်း ရှိပါတယ်။ အထူးသဖြင့် ဟော်မုန်းပါတဲ့ သားဆက်ခြားနည်းတွေဆို အသားအရေ ပြောင်းသွားမှာ၊ ကိုယ်အလေးချိန် တက်မှာ စတဲ့ ဘေးထွက်ဆိုးကျိုးတွေ ရှိတတ်တော့ တချို့ သတို့သမီးလောင်းတွေက မသုံးချင်ကြဘူး။ အလှအပပျက်မယ်ပေါ့လေ။ ဒီလိုအခါမှာ အမျိုးသားတွေအနေနဲ့ အသုံးပြုလို့ရတဲ့ သားဆက်ခြားနည်းတွေ ရှိပါတယ်။ အမျိုးသမီးသုံး နည်းတွေလောက်တော့ ထိရောက်မှု မကောင်းပေမယ့် ထည့်စဉ်းစားလို့တော့ ရပါတယ်။

ကွန်ဒုံးဆိုရင် အမျိုးသားသုံး၊ အမျိုးသမီးသုံးရယ်လို့ ရှိပေမယ့် လွယ်လွယ်ကူကူ ဝယ်လို့ရနေတာက အမျိုးသားသုံး ကွန်ဒုံးတွေပါ။ ဒီနည်းလမ်းက ကိုယ်ဝန်မရအောင် တားဆီးပေးသလို၊ လိင်ကတစ်ဆင့် ကူးစက်တဲ့ ရောဂါပိုးတွေ ကူးစက်မခံရအောင်လည်း ကာကွယ်ပေးပါတယ်။ ဘေးထွက်ဆိုးကျိုးလည်း မရှိတာကြောင့် အသုံးပြုသင့်တဲ့ ခေတ်ပေါ် သားဆက်ခြားနည်း တစ်ခု ဖြစ်ပါတယ်။ တကယ်လို့ အမျိုးသမီးတစ်ယောက်ဟာ ဒီနည်းလမ်းကို အသုံးပြုချင်တယ်ဆိုရင်တော့ အမျိုးသားရဲ့ ပူးပေါင်းပါဝင်မှု လိုအပ်ပါတယ်။ သုက်ရည် အပြင်စွန့်ထုတ်တဲ့နည်းလမ်းလို၊ ရက်ရှောင်နည်းလိုမျိုးတွေမှာလည်း အမျိုးသားတွေက အရေးပါတဲ့နေရာကနေ ပါဝင်ပါတယ်။

၂။ အမျိုးသမီးအပေါ် လေးစားမှုပေးဖို့

အမျိုးသမီးတွေပဲ အသုံးပြုဖို့လိုတဲ့ နည်းလမ်းတွေနဲ့ပတ်သက်လာရင်လည်း အမျိုးသားတွေရဲ့ အခန်းကဏ္ဍဟာ အရေးပါတာပါပဲ။ ဟိုတစ်လောကဆို အမျိုးသမီးတစ်ယောက် လာတိုင်ပင်တယ်။ ကလေးပျက်ကျသွားတာ ၂လပဲ ရှိသေးတာကို ကိုယ်ဝန်ထပ်ယူနေတာ မရသေးလို့တဲ့။ ကျွန်တော့်မှာ အသည်းအသန် ပြောရတယ်။ ကလေးပျက်ကျပြီးရင် အနည်းဆုံး ၆ လကတော့ ကိုယ်ဝန်မဖြစ်မနေ တားရတယ်။ မဟုတ်ရင် ကလေးအတွက်ရော မိခင်အတွက်ပါ အန္တရာယ်များတယ် ဆိုတော့ သူက ပြန်ဖြေတယ်။ ကျွန်မယောကျာ်းက အတင်းပြောနေလို့ ဆရာရေ တဲ့။

အမျိုးသားကို အမျိုးသမီးထက်စာရင် တန်ဖိုးပိုထားတတ်တဲ့ မြန်မာ့အသိုင်းအဝိုင်းမှာ ဒါဟာ သိပ်အရေးကြီးပါတယ်။ ဘယ်တော့ကလေးယူမယ်၊ ဘယ်လိုသားဆက်ခြားနည်းကို ရွေးချယ်မယ် ဆိုတဲ့ အမျိုးသမီးရဲ့ ကိုယ်ပိုင်ဆုံးဖြတ်ချက်ကို အမျိုးသားဘက်က လေးစားပေးဖို့ လိုပါမယ်။ မိန်းကလေး မပါသေးလို့၊ ယောကျာ်းလေး မပါသေးလို့ဆိုပြီး မပါမချင်း မွေးခိုင်းနေတာမျိုးတွေ၊ ကိုယ့်မိန်းမကို ကလေးမွေးတဲ့စက်လို သဘောထားနေတာမျိုးတွေ မလုပ်သင့်ပါဘူး။ တစ်နည်းအားဖြင့် ပြောရရင် ဒါဟာ ကိုယ့်အမျိုးသမီးကို ပါရမီဖြည့်ပေးခြင်းတစ်မျိုးပါပဲ။

၃။ အမျိုးသမီးကို အားပေးနှစ်သိမ့်ဖို့

သားဆက်ခြားနည်းတွေ သုံးတဲ့အခါ ဘေးထွက်ဆိုးကျိုး ခံစားရတာမျိုးတွေ အနည်းအပါး ရှိတတ်ပါတယ်။ ဒီအခါမှာ အမျိုးသားရဲ့ အားပေးစကားတွေ၊ နှစ်သိမ့်မှုတွေဟာ ဆရာဝန်၊ ဆရာမတွေရဲ့ ဆွေးနွေးမှုနဲ့ထပ်တူပဲ ခံစားနေရသူ အမျိုးသမီးကို စိတ်ပိုင်းဆိုင်ရာအရ လုံခြုံမှုရှိစေပါတယ်။ ဒီအတွက် (ဆေးခန်းသွားရင် အမျိုးသမီးနဲ့အတူ လိုက်သွားပြီး) သားဆက်ခြားနည်းလမ်းတစ်ခုချင်းစီရဲ့ ဘေးထွက်ဆိုးကျိုးတွေအကြောင်းကို လေ့လာထားတာ၊ မေးမြန်းထားတာ၊ ကိုယ့်အမျိုးသမီးနဲ့ဆို ဘယ်နည်းလမ်းက အသင့်တော်ဆုံးဖြစ်မယ်လို့ ဝိုင်းဝန်းအကြံပေးတာမျိုးတွေ လုပ်ပေးလို့ ရပါတယ်။

ကိုယ်နဲ့မဆိုင်ဘူးဆိုပြီး ဆေးခန်းကို လိုက်မလာ၊ ဒီအကြောင်းတွေကို မလေ့လာထားတဲ့အခါ ဘာဆိုဘာမှမသိဘူး။ ဒီတော့ အမျိုးသမီးက နည်းနည်းလေး ဘေးထွက်ဆိုးကျိုး ခံစားလိုက်ရတာနဲ့ မင်း ဒါတွေမသုံးနဲ့တော့၊ ရောဂါဖြစ်မယ်ဆိုပြီး ပြောရော။ အဲဒီတော့ အမျိုးသမီးအနေနဲ့လည်း ဒါတွေကို ဆက်သုံးဖို့ မဝံ့ရဲတော့ဘူး။ ဒီအခါ မလိုချင်ဘဲ ကိုယ်ဝန်တွေရရရော။ ဒါကြောင့်မို့ အမျိုးသားရဲ့ ပူးပေါင်းပါဝင်ပေးမှု သိပ်အရေးကြီးတယ် ပြောရတာပါ။

၄။ မိသားစုစီမံကိန်းအတွက် ကူညီပါဝင်ပေးဖို့

အမျိုးသမီး ရွေးချယ်ထားတဲ့ သားဆက်ခြားနည်းလမ်းကို မှန်မှန်ကန်ကန်နဲ့ အသုံးပြုနိုင်အောင်လို့လည်း အမျိုးသားတစ်ယောက်အနေနဲ့ ကူညီပေးလို့ရပါတယ်။ နေ့စဉ်သောက်ဆေးကဒ် သောက်နေတယ်ဆို ဆေးသောက်ဖို့ မမေ့အောင် သတိပေးတာမျိုး၊ (ညအိပ်ခါနီးတိုင်း ဖန်ခွက်လေးနဲ့ ရေထည့်လာမယ်၊ ဆေးကဒ်လေးလည်း ယူလာမယ်၊ ပြီးရင် ကိုယ်တိုင်ကိုယ်ကျ အမျိုးသမီးကို ဆေးတိုက်မယ်၊ ဒါမျိုး ရိုမန်တစ်ဆန်ဆန်လေးတွေလည်း လုပ်နိုင်ပါတယ်)၊ (၃)လတစ်ကြိမ် ဆေးထိုးနေတယ်ဆိုလည်း (၃)လပြည့်တဲ့နေ့မှာ ဆေးခန်းသွားဖို့ သတိပေးတာ၊ ကလေးကျောင်းကြိုကျောင်းပို့ ကိစ္စတွေနဲ့ တိုက်နေရင်လည်း ဝိုင်းကူပေးတာမျိုး၊ နောက်ပြီး သားအိမ်ထဲပစ္စည်း ထည့်တယ်ဆိုရင် ပုံမှန်ဆို ဒီပစ္စည်းက အတူနေတဲ့အခါမှာ အနှောင့်အယှက် မဖြစ်စေပါဘူး။ ဒါပေမယ့် ထည့်ပြီးနောက်ပိုင်း ကာလတစ်ခုကြာလာတဲ့အခါ ဒီပစ္စည်းကို အတူနေတိုင်း ခံစားမိနေတယ်ဆိုရင် နေရာမကျတော့လို့လား၊ ထွက်ကျလာတာလား စသဖြင့် ပြောပြပြီး ဆေးခန်းပြဖို့ အကြံပေးတာမျိုးတွေ လုပ်လို့ရနိုင်ပါတယ်။

တကယ်တော့ မိသားစုတစ်စုရဲ့ ယောကျာ်းနဲ့ မိန်းမဆိုတာ တောင်ပံတစ်စုံနဲ့ တူပါတယ်။ တစ်ဖက်က ဘယ်လောက်ပဲ သန်စွမ်းနေပါစေ၊ တစ်ဖက်က ကျိုးနေတယ်ဆိုရင် ဘယ်လိုခရီးကိုမှ နှင်နိုင်မယ် မဟုတ်ပါဘူး။ ဒါကြောင့် တောင်ပံနှစ်ဖက် တစ်ဖက်ကိုတစ်ဖက် အပြန်အလှန်လေးစားရင်း ပါရမီဖြည့်ပေးရင်းနဲ့ ဘဝခရီးကို အတူဖြတ်သန်းနိုင်ကြဖို့ လိုပါတယ်။

အောင်မြင်တဲ့ ယောကျာ်းတစ်ယောက်ရဲ့ နောက်ကွယ်မှာ သိပ်တော်တဲ့ မိန်းမတစ်ယောက် ရှိနေတတ်တယ် ဆိုတဲ့စကားလိုပါပဲ၊ အောင်မြင်တဲ့ မိန်းမတစ်ယောက်ရဲ့ နောက်ကွယ်မှာလည်း သိပ်တော်တဲ့ ယောကျာ်းတစ်ယောက် ရှိနေတတ်ပါတယ်။ ဒါကြောင့်မို့ အမျိုးသားတွေအနေနဲ့ သာယာပျော်ရွှင်တဲ့ မိသားစုဘဝကို တည်ဆောက်ဖို့အတွက် တကယ့်ကို အခြေခံအကျဆုံးလို့ ပြောလိုရတဲ့ မိသားစုစီမံကိန်း ကိစ္စမှာ တက်တက်ကြွကြွ ပါဝင်ပြီး ကိုယ့်လက်တွဲဖော်ကို အကောင်းဆုံး ပါရမီဖြည့်ပေးလိုက်ပါ။

[embed-health-tool-ovulation]