ကိုယ်ဝန်ဆောင်ချိန်မှာ ဘာလို့ ကိုယ်လက်လှုပ်ရှားလေ့ကျင့်ခန်း လုပ်သင့်တာလဲ

ကိုယ်လက်လှုပ်ရှားလေ့ကျင့်ခန်းတွေဟာ ကျွန်တော်တို့ရဲ့ ကျန်းမာကြံ့ခိုင်မှုကို အားပေးထောက်ပံ့ပေးပါတယ်။ ကိုယ်ဝန်ဆောင်နေစဉ်ကာလမှာ လေ့ကျင့်ခန်းလုပ်တာဟာ အထူးပဲ အရေးကြီးပါတယ်။ လေ့ကျင့်ခန်းလုပ်ခြင်းအားဖြင့် ကိုယ်ဝန်ဆောင်ချိန်မှာ ခံစားရလေ့ရှိတဲ့ ကသိကအောင့်ဖြစ်မှု၊အဆင်မပြေမှု ဝေဒနာလေးတွေကို လျော့ပါးသက်သာစေတဲ့အပြင် ကလေးမီးဖွားချိန်အတွက်လည်း သင့်ခန္ဓါကိုယ်ကို ကူညီပြင်ဆင်ပေးပါသေးတယ်။

ကိုယ်လက်လှုပ်ရှားလေ့ကျင့်ခန်းတွေက ဗိုက်ထဲက ကလေးအတွက် အန္တရာယ်ရှိသလား။

ယေဘုယျအားဖြင့် မှန်ကန်သင့်တော်တဲ့ ကိုယ်လက်လှုပ်ရှားလေ့ကျင့်ခန်းတွေ လုပ်ပေးခြင်းဟာ သင့်ကိုယ်ဝန်အတွက် အန္တရာယ်လုံးဝ မရှိပါဘူး။ တကယ်လို့ သင်ဟာ ကိုယ်ဝန်မရှိစဉ်ကတည်းက လှုပ်လှုပ်ရှားရှားနေတတ်သူဆိုရင် ကိုယ်ဝန်ဆောင်ကာလမှာလည်း ဒီအတိုင်းပဲ ဆက်လက်လှုပ်ရှားပါ။ ထူးထူးခြားခြား နေမထိထိုင်မသာဖြစ်တာ၊ကသိကအောင့်ဖြစ်တာ စတဲ့လက္ခဏာတွေ ပေါ်ပေါက်မလာသေးသရွေ့၊အခြားသော ကျန်းမာရေးပြဿနာများ မရှိသေးသရွေ့ ကိုယ်လက်လှုပ်ရှားလေ့ကျင့်ခန်းတွေကို ဆက်လက်လုပ်ဆောင်ဖို့ ဆရာဝန်က ညွှန်ကြားအကြံပြုမှာ ဖြစ်ပါတယ်။

တခုသတိထားသင့်တာက ကိုယ်ဝန်ဆောင်ကာလဟာ ဝိတ်ကျအောင် လေ့ကျင့်ခန်းလုပ်ရမယ့် အချိန်တော့ မဟုတ်ပါဘူး။ ဒါပေမယ့် ကိုယ်ဝန်ဆောင်ကာလမှာ သင့်တော်မှန်ကန်တဲ့ ကိုယ်လက်လှုပ်ရှားလေ့ကျင့်ခန်းတွေ ပြုလုပ်မယ်ဆိုရင် ကလေးမွေးဖွားပြီးတဲ့အခါ လွယ်ကူစွာ ကိုယ်အလေးချိန်ကျစေနိုင်မှာ ဖြစ်ပါတယ်။ ပုံမှန်အားဖြင့် လေ့ကျင့်ခန်းလုပ်ခြင်းကြောင့် သားပျက်သားလျှောဖြစ်နိုင်ချေ လုံးဝမရှိပါဘူး။ ဒါပေမယ့် သတိဆိုတာ ပိုသည်မရှိတဲ့အတွက် လေ့ကျင့်ခန်းပုံစံအသစ်တမျိုး စလုပ်မယ်လို့ စဉ်းစားတိုင်း နားလည်တတ်ကျွမ်းတဲ့ ဆရာဝန်နဲ့ မေးမြန်းတိုင်ပင်ရမှာ ဖြစ်ပါတယ်။

ကိုယ်ဝန်ဆောင်ကာလမှာ ကိုယ်လက်လှုပ်ရှားလေ့ကျင့်ခန်းလုပ်ခြင်းက ဘာအကျိုးရှိသလဲ။

နေ့တိုင်း ဒါမှမဟုတ် နေ့တိုင်းနီးပါး တနေ့ကို နာရီဝက်လောက် လေ့ကျင့်ခန်း လုပ်ပေးခြင်းဟာ ကိုယ်ဝန်ဆောင်နေစဉ်ကာလမှာ သင့်ကျန်းမာရေးကို အထူးပဲ ကောင်းမွန်စေပါတယ်။ တနေ့ကို မိနစ်နှစ်ဆယ်နှုန်းနဲ့ တပတ်ကို သုံးလေးရက်လောက် လေ့ကျင့်ခန်းလုပ်ခြင်းဟာလည်း အကျိုးရှိပါတယ်။

အရေးကြီးဆုံးအချက်ကတော့ တက်ကြွလှုပ်ရှားနေဖို့နဲ့ သွေးလည်ပတ်မှုကောင်းမွန်စေဖို့ပဲ ဖြစ်ပါတယ်။ လေ့ကျင့်ခန်းလုပ်တဲ့အခါ စနစ်တကျဖြစ်စေဖို့အတွက် သင်တနေ့တာ လေ့ကျင့်ခန်းလုပ်မယ့်အချိန်တွေကိုသာမက တပတ်မှာ ဘယ်နှရက်လေ့ကျင့်ခန်းလုပ်မယ်ဆိုတာတွေကိုပါ ရေးမှတ်ထားရပါမယ်။ အစီအစဉ်ဆွဲထားရပါမယ်။ ယောဂကျင့်ခြင်းဟာ အရမ်းကြီးအားစိုက်စရာမလိုတဲ့အပြင် ကိုယ်ဝန်ဆောင်မိခင်တွေအတွက် အထူးအကျိုးရှိတဲ့ လေ့ကျင့်ခန်းတမျိုးပဲ ဖြစ်ပါတယ်။

ကိုယ်ဝန်ဆောင်ချိန်မှာ လေ့ကျင့်ခန်းလုပ်ခြင်းအားဖြင့် ရရှိနိုင်မယ့် အကျိုးကျေးဇူးအချို့ကို အောက်မှာဖော်ပြထားပါတယ်။

ကျောနာခြင်း၊ခါးနာခြင်း၊လေပွခြင်း၊ဝမ်းချုပ်ခြင်း၊ဖောရောင်ခြင်းတို့ကို သက်သာစေနိုင်ခြင်း။

ကိုယ်ဝန်ဆောင်ချိန် ဆီးချိုတက်ခြင်းကို ကာကွယ်၊ကုသပေးခြင်း။

ကိုယ်ဝန်ဆောင်အမျိုးသမီးကို အားအင်တိုးစေခြင်း။

အမျိုးသမီးတယောက်၏ စိတ်ဓါတ်အားအင်ကို တက်ကြွစေခြင်း။

အမျိုးသမီး၏ ကိုယ်နေဟန်ထားကို မှန်ကန်ကောင်းမွန်စေခြင်း။

ကြွက်သားများကို သန်မာစေခြင်း၊ခံနိုင်ရည်တိုးတက်စေခြင်း။

ကောင်းမွန်စွာ အိပ်စက်စေခြင်း စတာတွေပဲ ဖြစ်ပါတယ်။

သားအိမ်အတွင်းရှိ ရေမွှာရေအပြည့်ဖြည့်ထားတဲ့ ရေမွှာအိတ်၊သားအိမ်မှာရှိတဲ့ ကြွက်သားတွေ၊ဘေးနားက အရွတ်ကြောတွေနဲ့ အခြားသော အင်္ဂါတွေက သားအိမ်ရဲ့ ပတ်ပတ်လည်မှာ ကာကွယ်ပေးထားတဲ့အတွက် သင့်ဗိုက်ထဲက သန္ဓေသားလေးဟာ လုံခြုံတဲ့ ပတ်ဝန်းကျင်မှာ ရှိနေပါတယ်။ ဒါပေမယ့်လည်း သင့်အနေနဲ့ ပြင်းထန်ကြမ်းတမ်းတဲ့ လေ့ကျင့်ခန်းတွေကိုတော့ မပြုလုပ်သင့်ပါဘူး။

အောက်ဖော်ပြပါ လေ့ကျင့်ခန်းတွေကိုတော့ ကိုယ်ဝန်ဆောင်ကာလမှာ မပြုလုပ်သင့်ပါဘူး။

· အမြင့်က ပြုတ်ကျနိုင်ချေရှိတဲ့ လေ့ကျင့်ခန်းတွေ။

· ဝမ်းဗိုက်ပိုင်းကို ထိခိုက်ဒါဏ်ရာရစေနိုင်တဲ့ လေ့ကျင့်ခန်းတွေ (ဥပမာ ခန္ဓါကိုယ်ကို လှုပ်ခါရတဲ့ လေ့ကျင်ခန်းတွေ၊တဦးနဲ့တဦး ထိမိခိုက်မိနိုင်တဲ့ လေ့ကျင့်ခန်းတွေ၊ရုတ်တရက် ဦးတည်ချက်လားရာပြောင်းလဲရတဲ့ လေ့ကျင့်ခန်းတွေ စသဖြင့်)။

· အလွန်မင်း ခုန်ရတဲ့ လေ့ကျင့်ခန်းတွေ။

· ခန္ဓါကိုယ်ကို အလွန်အမင်း ဆန့်တန်းဖြေလျှော့ရတဲ့ လေ့ကျင့်ခန်းတွေ။

· မတ်တပ်ရပ်ရင်း ခါးကို လှည့်ရတဲ့ လေ့ကျင့်ခန်းတွေ။

· အပြင်းအထန် လုပ်ရပြီး ကာလကြာရှည်စွာ အနားယူရတဲ့ လေ့ကျင့်ခန်းတွေ။

· ပူပြင်း၊စိုစွတ်တဲ့ ရာသီဥတုမှာ ပြုလုပ်ရတဲ့ လေ့ကျင့်ခန်းတွေ။

· အချိန်ကြာမြင့်စွာ အသက်ရှုအောင့်ရတဲ့ လေ့ကျင့်ခန်းတွေ။

· မောပန်းတကြီးဖြစ်တဲ့အထိ ပြုလုပ်ရတဲ့ လေ့ကျင့်ခန်းတွေ။

ကိုယ်ဝန်ဆောင်စဉ် လေ့ကျင့်ခန်းပြုလုပ်ဖို့ အစီအစဉ်ဆွဲတဲ့အခါ လိုက်နာသင့်တဲ့ အချက်လေးတွေက အောက်ပါအတိုင်း ဖြစ်ပါတယ်။

· သက်တောင့်သက်သာရှိပြီး ချောင်ချိတဲ့ အဝတ်အစားတွေနဲ့ ရင်သားကို ကောင်းစွာ အထောက်အပံ့ပေးတဲ့ ဘရာစီယာတို့ကို ဝတ်ဆင်ရမှာ ဖြစ်ပါတယ်။

· သင်ပြုလုပ်မယ့် လေ့ကျင့်ခန်းပုံစံအတွက် အထူးပြုလုပ်ထားတဲ့ ဖိနပ်ကို ရွေးချယ်ရမှာဖြစ်ပြီး ဆိုဒ်ကလည်း သင့်ခြေထောက်နဲ့ အတိအကျ ဖြစ်နေသင့်ပါတယ်။

· ထိခိုက်ဒါဏ်ရာ ရရှိခြင်းတွေကို ကာကွယ်နိုင်ဖို့အတွက် ပြန့်ပြူးညီညာတဲ့ မျက်နှာပြင်မှာ လေ့ကျင့်ခန်းလုပ်ပါ။

· ကိုယ်ဝန်အတွက်ရော၊လေ့ကျင့်ခန်းလုပ်ဆောင်ဖို့အတွက်ပါ သင့်တော်လုံလောက်တဲ့ ကယ်လိုရီပမာဏကို စားပေးရပါမယ်။

· လေ့ကျင့်ခန်းမလုပ်မီ၊လုပ်နေစဉ်နဲ့ လုပ်ပြီးတဲ့အချိန်တွေမှာ ရေများများသောက်ရပါမယ်။

· ပက်လက်လှန်တဲ့ အနေအထားနဲ့ လေ့ကျင့်ခန်းလုပ်ပြီး ထတဲ့အခါ မိုက်ခနဲ ဖြစ်သွားတာမျိုးကို ရှောင်ရှားနိုင်ဖို့အတွက် ဖြည်းညင်းစွာ ထရပါမယ်။