ဇင့်ဓါတ်နဲ့ အမျိုးသားကျန်းမာရေး

    ဇင့်ဓါတ်နဲ့ အမျိုးသားကျန်းမာရေး

    ကျွန်တော်တို့ ခန္ဓါကိုယ်ရဲ့ ခုခံအားစနစ်၊အင်မ်ဇိုင်းတွေ ပုံစံတမျိုးမှ တမျိုး ပြောင်းလဲခြင်း၊ဆဲလ်အတွင်းသို့ အစာအာဟာရများစုပ်ယူခြင်း နဲ့ ပရိုတင်းဓါတ်ကို ဖြိုခွဲခြင်း အစရှိတဲ့ လုပ်ငန်းဆောင်တာတွေမှာ ဇင့်ဓါတ်ဟာ အရေးကြီးတဲ့ အခန်းကဏ္ဍကနေ ပါဝင်ပါတယ်။ ဇင့်ဟာ အမျိုးသားအားကို တိုးပွားစေပြီး မျိုးအောင်မှုကို အားပေးကူညီပေးပါသေးတယ်။

    ကျွန်တော်တို့ ခန္ဓါကိုယ်အတွင်းမှာ ဇင့်ဓါတ်ကို သိုမှီးထားနိုင်ခြင်းမရှိတဲ့အတွက် နေ့စဉ်လိုအပ်တဲ့ ဇင့်ဓါတ်ပမာဏကို ပြည့်မှီစွာ ရရှိနိုင်ဖို့ အစားအစာ ဒါမှမဟုတ် ဖြည့်စွက်စာတွေကတဆင့် ဖြည့်တင်းပေးရမှာ ဖြစ်ပါတယ်။ မြေပဲ၊ကမာ၊ချောကလက်အမည်း၊အနီရောင်အသားတွေနဲ့ ကိုကာအမှုန့်တွေဟာ ဇင့်ဓါတ်ကြွယ်ဝတဲ့ အစားအစာတွေ ဖြစ်ပါတယ်။

    သုတ်ကောင်တွေအပေါ်မှာ ဇင့်ဓါတ်က ဘယ်လိုအကျိုးသက်ရောက်မှု ရှိသလဲ။

    အမျိုးသမီးတွေရဲ့ ခန္ဓါကိုယ်အတွင်းရှိ မျိုးပွားဟော်မုန်းတွေ ဖြစ်တဲ့ estrogen နဲ့ progesterone တို့ကို သုံးစွဲဖြိုခွဲပစ်ဖို့ ဇင့်ဓါတ်က ကူညီပေးပါတယ်။ ဇင့်ဓါတ်ချို့တဲ့ တဲ့အခါ ခန္ဓါကိုယ်အတွင်းမှာရှိတဲ့ ဟော်မုန်းပမာဏတွေ မညီမမျှဖြစ်လာစေတဲ့အတွက် အကျိုးဆက်အနေနဲ့ သားဥအိမ်မူမမှန်စွာ ဖွံ့ဖြိုးလာတာမျိုး ဒါမှမဟုတ် ဓမ္မတာ ပုံမမှန်တာမျိုးတွေ ဖြစ်လာနိုင်ပါတယ်။ အမျိုးသမီးတွေရဲ့ ခန္ဓါကိုယ်အတွင်းမှာ ဇင့်ဓါတ်နည်းပါးတဲ့အခါ ပရိုတင်းဓါတ်ကို ခန္ဓါကိုယ်ကနေ စုပ်ယူမှုနည်းပါးလာတဲ့အတွက် သားဥတွေရဲ့ အရည်အသွေးကို လျော့ကျစေပါတယ်။

    အမျိုးသားတွေမှာ ဇင့်ဓါတ်ဟာ သုတ်ကောင်ပမာဏအပေါ် လွှမ်းမိုးမှုရှိတယ်လို့ ယုံကြည်ရပါတယ်။ ဘာလို့လဲဆိုတော့ သုတ်ရည်ထဲမှာ ဇင့်ဓါတ်များပြားစွာ ပါဝင်တဲ့အတွက် ဖြစ်ပါတယ်။ ဒါ့အပြင် သုတ်ကောင်ရဲ့ အပြင်ဖက်အလွှာနဲ့ အမြီးကို တည်ဆောက်ဖွဲ့စည်းဖို့အတွက် ဇင့်ဓါတ်ကို မရှိမဖြစ် လိုအပ်ပါသေးတယ်။ ဒါကြောင့် အမျိုးသားတယောက်အနေနဲ့ ဇင့်ဓါတ်ချို့တဲ့နည်းပါးနေပြီဆိုရင် သုတ်ကောင်ရဲ့ အရည်အတွက်နဲ့ အရည်အသွေးကို ဆိုးရွားစွာ ထိခိုက်စေပါလိမ့်မယ်။

    ဇင့်ဓါတ်သာ မရှိခဲ့ဖူး၊မလုံလောက်ခဲ့ဖူးဆိုရင် သုတ်ကောင်လေးတွေအနေနဲ့ ယောနိ နဲ့ သားအိမ်ခေါင်းတို့ကို ဖြတ်ပြီး သားအိမ်ထဲဝင်ရောက်ကာ မျိုးအောင်ခြင်းလုပ်ငန်းကို ဆက်လက်လုပ်ဆောင်ဖို့ အင်အားနဲ့ လှုပ်ရှားနိုင်စွမ်းလည်း ရှိလာမှာ မဟုတ်ပါဘူး။ ဇင့်ဓါတ်ချို့တဲ့ခြင်းဟာ သုတ်ကောင်မှာ ခရိုမိုဆုမ်းမူမမှန်ခြင်း အပြစ်အနာအဆာကိုပါ ဖြစ်စေတဲ့အတွက် မျိုးအောင်ခြင်းနဲ့ သန္ဓေသားကပ်တွယ်ခြင်းတို့ ဖြစ်ပေါ်ခဲ့မယ်ဆိုရင်တောင် သားပျက်သားလျှောဖြစ်ဖို့ အခွင့်အလမ်းတွေကို များစေပါတယ်။ တနေ့ကို ဇင့်ဓါတ် ၁၅ မီလီဂရမ်လောက် စားသုံးပေးရင်ပဲ ပတ်ဝန်းကျင်ကနေ စုပ်ယူထားတဲ့ အန္တရာယ်ရှိ ဓါတုပစ္စည်းတွေကြောင့် ဖြစ်ပေါ်လာတဲ့ သုတ်ကောင်ထိခိုက်ပျက်စီးမှုတွေကို ပြန်လည်ပြုပြင်ပေးနိုင်တယ်လို့ အာဟာရပညာရှင်တွေက ဆိုပါတယ်။

    ဇင့်ဓါတ်ရရှိအောင် ဘယ်လိုစားရမလဲ။

    ဇင့်ဓါတ်ကြွယ်ဝစွာ ပါဝင်တဲ့ အစားအစာတွေကတော့ ပင်လယ်စာတွေ (အထူးသဖြင့် ကမာကောင်များ ဖြစ်ပြီး သူတို့ဟာ ကာမအားတိုးဆေးအဖြစ် ကျော်ကြားပါတယ်)၊အနီရောင်အသားများ၊အစေ့အဆံများ၊ပဲပြုတ်အမျိုးမျိုး စတာတွေပဲ ဖြစ်ကြပါတယ်။ ဒိန်ခဲကဲ့သို့သော နို့နဲ့ နို့ထွက်ပစ္စည်းတွေမှာလည်း ဇင့်ဓါတ်ပမာဏ အနည်းငယ် ပါဝင်ပါသေးတယ်။ မီးအပူနဲ့ ချက်ပြုတ်ခြင်း၊အပူပေးခြင်းတို့ဟာ အစားအစာမှာ ပါဝင်တဲ့ ဇင့်ဓါတ်ပမာဏကို တဝက်လောက်လျော့ကျစေပါတယ်။ ဒါကြောင့် ဇင့်ဓါတ်ကြွယ်ဝတဲ့ အစားအစာတွေကို စားတဲ့အခါ အစိမ်းစားဖို့ အလွန်ပဲ အရေးကြီးပါတယ်။ ဇင့်ဓါတ်ကြွယ်ဝတဲ့ အစားအစာတွေကို မစားတာတမျိုးတည်းကြောင့် ဇင့်ဓါတ်ချို့တဲ့ရတာ မဟုတ်ပါဖူး။ ကျွန်တော်တို့ရဲ့ နေ့စဉ်နေထိုင်သွားလာမှုပုံစံကလည်း များစွာ အကျိုးသက်ရောက်မှုရှိနေပါတယ်။

    စိတ်ဖိစီးမှု များပြားခြင်း၊လေထုညစ်ညမ်းခြင်း၊ဆေးလိပ်အရက်သောက်ခြင်း စတာတွေကြောင့်လည်း ခန္ဓါကိုယ်မှာ ဇင့်ဓါတ်လုံလောက်စွာ မရရှိတာမျိုး ဖြစ်ပေါ်လာနိုင်ပါတယ်။ တကယ်လို့ သင့်အနေနဲ့ ဇင့်ဓါတ်ဖြည့်စွက်အားဆေးတွေ အသုံးပြုမယ်ဆိုရင် တနေ့ကို ၃၀ မီလီဂရမ်ထက် ပိုပြီး သုံးစွဲခြင်း မပြုဖို့ ကျန်းမာရေးဆိုင်ရာကျွမ်းကျင်သူတွေက အကြံပြုပါလိမ့်မယ်။ ဒါ့အပြင် ကော့ပါးဓါတ်ဖြည့်စွက်ဆေးနဲ့လည်း တွဲဖက်ပြီး သုံးစွဲသင့်ပါတယ် (တနေ့ကို ၁.၅ မီလီဂရမ်လောက် သုံးစွဲရလေ့ရှိပါတယ်)။ တချို့ ဇင့်ဓါတ်ဆေးပြားတွေမှာ ကော့ပါးဓါတ်ပါ တခါတည်း ပါဝင်ပြီးသားဖြစ်တဲ့အတွက် သုံးစွဲဖို့ အင်မတန်လွယ်ကူအဆင်ပြေပါလိမ့်မယ်။

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    ရင်းမြစ်များ

    The Role of Zinc in Male Fertility  https://www.ncbi.nlm.nih.gov/pmc/articles/PMC7589359/ Accessed Date November 29,2016.

    Natural Fertility and Wellness. Natural Fertility and Zinc. http://naturalfertilityandwellness.com/zinc-and-your-fertility/Accessed November 29, 2016.
    10 Best Food Sources of Zinc https://www.everydayhealth.com/pictures/best-food-sources-zinc/ Accessed DateNovember 2016

    Natural Fertility Info. Zinc: How Essential Is It to Your Fertility? http://naturalfertilityinfo.com/zinc-fertility.html. Accessed Date November 29, 2016.

    Zinc, folic acid supplement does not improve male fertility, NIH study suggests https://www.nih.gov/news-events/news-releases/zinc-folic-acid-supplement-does-not-improve-male-fertility-nih-study-suggests Accessed Date November 29, 2016.

    စာရေးသူ ဓာတ်ပုံbadge
    Dr. Thiha Phyo Myint မှ ရေးသားသည်။ 27/05/2022 တွင် ပြန်လည်ပြင်ဆင်ခဲ့သည်။
    Dr. Kaung Thar မှ အချက်အလက် စစ်ဆေးထားပါသည်။