အိပ်-ဟောက်- အသက်ရှူပိတ်ရောဂါရှိသူတွေ သတိထားရမယ့် စားသောက်မှုပုံစံ

အိပ်-ဟောက်- အသက်ရှူပိတ်ရောဂါ ဆိုတာကို အရင်က တော်တော်များများက သတိမထားမိပါဘူး။ များသောအားဖြင့် သိလိုက်ကြတာက အိပ်ရင် ဟောက်တတ်တယ်လို့ပဲပေါ့။ တကယ်တော့ အိပ်ရင်း ဟောက်နေရင်းက ရုတ်တရက် ခဏတာ အသက်ရှူ ပိတ်သွားတာမျိုးရှိပါတယ်။ ဒီအခြေအနေကို အိပ်-ဟောက်- အသက်ရှူပိတ်ရောဂါလို့ ခေါ်တာပါ။

အိပ်-ဟောက်- အသက်ရှူပိတ်ရောဂါက အဝလွန်သူတွေမှာ အဖြစ်များသလို ကျန်းမာရေးပြဿနာတွေနဲ့လည်း ဆက်စပ်နေပါတယ်။ ဒါတွေတင်လားဆိုတော့ မဟုတ်သေးပါဘူး။ စားလိုက်တဲ့ အစားအစာတွေကလည်း အိပ်-ဟောက်- အသက်ရှူပိတ်ရောဂါ အပေါ်မှာ သက်ရောက်မှု ရှိနေပါတယ်။

ဒီတစ်ခေါက်တော့ အိပ်-ဟောက်- အသက်ရှူပိတ်ရောဂါရှိသူတွေ သတိထားရမယ့် စားသောက်မှုပုံစံ အကြောင်းလေး ပြောပြပေးချင်ပါတယ်။

အိပ်-ဟောက်- အသက်ရှူပိတ်ရောဂါရှိသူတွေ သတိထားရမယ့် စားသောက်မှုပုံစံ

ဝတဲ့ လူတိုင်းမှာ အိပ်-ဟောက်- အသက်ရှူပိတ်ရောဂါ မဖြစ်ပေမဲ့ အိပ်-ဟောက်- အသက်ရှူပိတ်ရောဂါဖြစ်တဲ့သူ အများစုက အဝလွန်တဲ့သူတွေပါ။ ဒါကြောင့် အလွယ်ပြောရရင် အဝမလွန်အောင် အစားအသောက်ကို သတိထား၊ ဝစေမဲ့ အစားအစာတွေကို ရှောင်လို့ ပြောချင်တာပါပဲ။

• သစ်သီးတွေနဲ့ ဟင်းသီးဟင်းရွက်တွေ

သစ်သီးတွေနဲ့ ဟင်းသီးဟင်းရွက်တွေက အာဟာရတွေ ကြွယ်ဝသလို အမျှင်ဓာတ်တွေလည်း ကြွယ်ဝစွာ ပါဝင်နေပါတယ်။ အမျှင်ဓာတ်တွေက အဆာခံနိုင်စေပြီး အလွန်အကျွံ မစားမိအောင် ကာကွယ်ပေးနိုင်ပါတယ်။ အဝမလွန်အောင်လည်း ကာကွယ်ပြီးသား ဖြစ်ပါတယ်။

• အဆီပါဝင်မှုနည်းတဲ့ နို့ထွက်ပစ္စည်းတွေ

ဗီတာမင် D၊ ပရိုတင်း၊ ကယ်လ်ဆီယမ်တို့ ကြွယ်ဝစွာပါဝင်နေတဲ့ အဆီထုတ်ထားတဲ့ နို့ ဒါမှမဟုတ် အဆီပါဝင်မှု နည်းတဲ့ နို့ထွက်ပစ္စည်းတွေက အဆာခံနိုင်စေပြီး ကျန်းမာတဲ့ ကိုယ်အလေးချိန် ရအောင် ထိန်းညှိပေးသလို အိပ်-ဟောက်- အသက်ရှူပိတ်ရောဂါ မဖြစ်အောင် ကာကွယ်ပေးပြီး ကိုယ်အလေးချိန် ထိန်းညှိခြင်းအားဖြင့် သက်သာလာစေဖို့လည်း ထောက်ကူပေးပါတယ်။

• အပင်အခြေခံ စားသုံးဆီ

အဝလွန်တာကို အကြောင်းအရင်း တစ်ချက်က ပြည့်ဝဆီတွေပါ။ တိရစ္ဆာန်ကနေ ရတဲ့ အဆီတွေပေါ့။ ဒါကြောင့် စားသုံးဆီ ရွေးတဲ့အခါ အပင်ကနေ အခြေခံပြီး ထုတ်ထားတဲ့ မပြည့်ဝဆီတွေကို ရွေးချယ်ဖို့ လိုပါမယ်။ ဥပမာ – နေကြာဆီ၊ သံလွင်ဆီ၊ နှမ်းကြတ်စေ့ဆီ၊ ကာနိုလာဆီ၊ ပဲပိစပ်ဆီ စတာတွေပါ။

• နှံစားသီးနှံတွေ 

နှံစားသီးနှံတွေကလည်း သစ်သီးတွေ ဟင်းသီးဟင်းရွက်တွေလိုပါပဲ အမျှင်ဓာတ် ကြွယ်ဝသလို အာဟာရလည်း ကြွယ်ဝပါတယ်။ အမျှင်ဓာတ် ကြွယ်ဝတာကြောင့် အဆာခံနိုင်စေပြီး အလွန်အကျွံ စားမိတာမျိုး မဖြစ်အောင် ကာကွယ်ပေးပါတယ်။ ဒါကြောင့် ဂျုံကြမ်းပေါင်မုန့်၊ အုတ်ဂျုံ၊ ဆန်လုံးညို စတာတွေကို စားသုံးပေးပါ။

အိပ်-ဟောက်- အသက်ရှူပိတ်ရောဂါရှိရင် ဒါတွေရှောင်ပါ

အိပ်-ဟောက်- အသက်ရှူပိတ်ရောဂါရှိသူတွေ အနေနဲ့ နေ့စဉ် စားသုံးမှုမှာ ဒါတွေ မပါအောင် ဂရုစိုက် စားသုံးဖို့ လိုပါမယ်။

• ငှက်ပျောသီး

ငှက်ပျောသီးက ကျန်တဲ့အချိန်မှာ စားလို့ရပါတယ်။ အိပ်ခါနီးမှာတော့ စားတာရှောင်သင့်ပါတယ်။ အထူးသဖြင့် အမှည့်လွန်တဲ့ အသီးတွေပါ။ လည်ချောင်းထဲမှာ အချွဲဖြစ်စေတာကြောင့် အိမ်နေတုန်း ဟောက်နိုင်ခြေရှိပါတယ်။

• အဆီများတဲ့ နို့ထွက်ပစ္စည်းတွေ

အဆီနည်းတဲ့ နို့ထွက်ပစ္စည်းတွေက စားသင့်တယ်ဆိုပေမယ့် အဆီများတဲ့ နို့ထွက်ပစ္စည်းတွေကိုတော့ ရှောင်ဖို့ လိုပါမယ်။ အကြောင်းအရင်းကတော့ ရှင်းပါတယ်။ အဆီများတာက အဝလွန်စေနိုင်ပြီး အိပ်-ဟောက်- အသက်ရှူပိတ်ရောဂါ ဖြစ်နိုင်ခြေ တိုးစေသလို ပိုဆိုးနိုင်ခြေလည်း များစေပါတယ်။

• အဆီများတဲ့ အသား

အဆီများတဲ့ အသားတွေ အထူးသဖြင့် အမဲသား၊ ဝက်သားတွေက အိပ်-ဟောက်- အသက်ရှူပိတ်ရောဂါ ကို ပိုဆိုးစေနိုင်ပါတယ်။ ဒါတင်လားဆိုတော့ မဟုတ်သေးပါဘူး။ ကြက်သားကို ကြော်စားတာ၊ ငါးကို ကြော်စားတာကလည်း အိပ်-ဟောက်- အသက်ရှူပိတ်ရောဂါ ကို ပိုဆိုးစေနိုင်ပါတယ်။ အဓိကကတော့ အဆီများတဲ့ အစားအစာတွေကို ရှောင်ဖို့ပါပဲ။

• သန့်စင်ထားတဲ့ ကာဗိုဟိုက်ဒရိတ်

သန့်စင်ထားတဲ့ ကာဗိုဟိုက်ဒရိတ်နဲ့ လုပ်ထားတဲ့ အစားအစာတွေမှာ သကြား ပါဝင်မှုကလည်း များပါတယ်။ ဒီလို အချိုပါဝင်မှု များတာက အဝလွန်စေနိုင်ပြီး အိပ်-ဟောက်- အသက်ရှူပိတ်ရောဂါ ဖြစ်နိုင်ခြေ များစေသလို အိပ်-ဟောက်- အသက်ရှူပိတ်ရောဂါကို ပိုဆိုးစေနိုင်ပါတယ်။ ဒါကြောင့် ပေါင်မုန့်အဖြူလိုမျိုး အစားအစာတွေကို လျှော့စားပါ။