တစ်ဘဝစာ အကျိုးရှိချင်ရင် အိပ်ရေးဝဝ အိပ်ကြနော်

ညညဆို အိပ်စက်ရခက်ခဲ၊ မနက်မနက်ဆို အိပ်ယာထဖို့ မနည်းကြိုးစားနေရတဲ့ အခြေအနေကြီးနဲ့ ရင်ဆိုင်နေရပြီလား။ အိပ်စက်တယ်ဆိုတာက လူတစ်ယောက်ရဲ့ ရှင်သန်နေထိုင်မှုမှာ သိပ်ကိုအရေးကြီးတဲ့ ကိစ္စနော်။

ဒီတော့ ညည ကောင်းကောင်းမအိပ်နိုင်ဖြစ်နေရင် နောက်တစ်နေ့ကျ လေးလံထိုင်းမှိုင်းပြီး ငူငိုင်နေတော့မှာပေါ့။ နေ့စဉ်ဘဝမှာ တက်တက်ကြွကြွ လန်းလန်းဆန်းဆန်းနဲ့ရှိမနေရင် ဘဝက နေရထိုင်ရတာ မအီအသာနဲ့ ပျော်စရာကောင်းတော့မှာမဟုတ်ပါဘူး။

အရမ်းအိပ်တာ မကောင်းဘူး၊ ဒါပေမယ့် အိပ်ချိန်နည်းတာ၊ အိပ်ရေးမဝတာက လူကိုပိုပြီး အနှောင့်အယှက်ပြုတယ်။ လုံလုံလောက်လောက် အိပ်ထားတဲ့လူတွေကသာ နေ့စဉ်ကျန်းမာရွှင်လန်းနေမှာလေ။ အိပ်ရေးဝတဲ့အခါ အာရုံကြောတွေ အားကောင်းလာမယ်။ Multiple sclerosis လိုမျိုး auto immune disease တွေ မဖြစ်တော့ဘူး။

နောက်ပြီး အိပ်ရေးဝသူတွေဟာ ကိုယ်ခံအားကောင်းကြတယ်။ ဒါကြောင့် အအေးမိ၊ တုပ်ကွေးလို နာမကျန်းဖြစ်တာလောက်က မှုစရာမလိုတော့ဘူး။ နောက်ထပ် သိထားရတာက COVID-19 ကိုလည်း ကာကွယ်နိုင်ပါတယ်တဲ့။ အိပ်ရေးဝဝလို့ ကိုယ်ခံအားကောင်းမွန်နေတာက COVID-19 ကာကွယ်နည်း တစ်မျိုးဆိုတဲ့သဘောပေါ့။

ညက ကောင်းကောင်း အိပ်မပျော်ရင်တော့ မနက်ဆို စိတ်တွေတို၊ ဒေါသတွေထွက်၊ ဘာလုပ်လုပ် အဆင်မပြေ၊ စိတ်မကြည်မလင်တွေဖြစ်ပြီး အာရုံနောက်စရာတွေ ရင်ဆိုင်ရပါလိမ့်မယ်။ အိပ်ရေးမဝရင် ကျန်းမာရေးတင် ထိခိုက်တာမဟုတ်ပါဘူး။ Quality of Life ကိုပါ ထိခိုက်စေတာပါ။

အိပ်ရေးဝမှ တနေ့လုံးတက်ကြွလန်းဆန်းနေမယ်၊ အလုပ်တွေလုပ်ရင်လည်း သွင်လက်ချက်ခြာနေမယ်။ အချိန်တွေ အများကြီးအိပ်နေဖို့ မလိုအပ်ပါဘူး။ သာမန်အိပ်ရေးဝရုံ အိပ်စက်ဖို့ပဲ လိုအပ်တာပါ။

ဘဝအမောတွေနဲ့ အိပ်ပျော်ဖို့ ခက်နေရင် စိတ်မညစ်ပါနဲ့။ အိပ်ရေးဝဝအိပ်ချင်သူတွေအတွက် နည်းလမ်းကောင်းတွေ ရှိပါတယ်။ ရိုးရှင်းပြီး လွယ်ကူတဲ့ လမ်းညွှန်ချက်လေးတွေဟာ ညဘက်တွေမှာ အိပ်ရေးဝဝ အိပ်စက်နိုင်စေဖို့ အထောက်အကူတွေအများကြီးပေးနိုင်မှာပါ။ အိပ်ရေးဝဝ မအိပ်နိုင်ဘူးဖြစ်နေပြီဆိုရင် အောက်ကနည်းလမ်းတွေအတိုင်း လုပ်ကြည့်ပါ။

အချိန်မှန် အိပ်ရာဝင် – အိပ်ချိန်ရော၊ အိပ်ရာထချိန်ကိုရော ပုံမှန်အလေ့အကျင့်တစ်ခုဖြစ်လာတဲ့အထိ သေသေချာချာ သတ်မှတ်ထားဖို့ လိုပါတယ်။ ဒီအချက်က အိပ်ရေးဝဝ အိပ်စက်နိုင်ဖို့ ကူညီနိုင်ပါတယ်။

နေ့ခင်းနေ့လယ် အိပ်တာလျှော့ – နေ့ခင်းနေ့လယ်မှာ တရေးတမော အိပ်စက်မိရင် ညဘက်ကျ အိပ်ရခက်တာမျိုးဖြစ်လာတတ်တယ်လေ။ ဒီတော့ တတ်နိုင်သမျှ နေ့ခင်းနေ့လယ်တွေမှာ မအိပ်ပါနဲ့။

အိပ်ခန်းကို တိတ်ဆိတ်အောင်ထား – ကိုယ့်အိပ်ခန်းကို တိတ်ဆိတ်ပြီး အေးချမ်းတဲ့အသွင်အပြင်မျိုးဖြစ်အောင် ပြင်ထားနိုင်ရင် အကောင်းဆုံးပေါ့။

နည်းပညာထုတ်ကုန်တွေ ပိတ်ထား – အိပ်တော့မယ်ဆိုရင် အနီးနားမှာရှိသမျှ အီလက်ထရွန်နစ် ထုတ်ကုန်တွေ၊ ဖုန်း၊ ကွန်ပြူတာ၊ တက်ဘလက်၊ တီဗီတွေအားလုံးကို ပိတ် သာထားလိုက်ပါ။ ခပ်ဝေးဝေးမှာ ထားရင်တော့ အကောင်းဆုံးပါပဲ။

အိပ်ရာမဝင်ခင် ဘာမှမစားနဲ့ – တစ်ချို့က အိပ်ခါနီး အစာပိတ်လေးစားတတ်ကြတယ်၊ တစ်ချို့ကျ အဖျော်ယမကာလေး မှီဝဲလိုက်မှ အိပ်ပျော်တယ်ဆိုပြီး သောက်ကြစားကြပြန်ရော။ ကောင်းကောင်းအိပ်ပျော်ချင်တယ်ဆိုရင် အိပ်ယာဝင်ခါနီး ၃ နာရီအလိုမှာ ဘာမှမစားပါနဲ့တော့။

လေ့ကျင့်ခန်း ပုံမှန်လုပ် – နေ့စဉ် ကိုယ်လက်လေ့ကျင့်ခန်း ပုံမှန်လုပ်တာက နှလုံးရောဂါ၊ သွေးတိုး၊ ဆီးချို ရောဂါတွေကို ကာကွယ်တားဆီးနိုင်တဲ့အပြင် ကောင်းကောင်းအိပ်ပျော်အောင်လည်း ကူညီပေးပါတယ်။ မယုံရင် လေ့ကျင့်ခန်းလုပ်ကြည့်ပါ။ ညဘက်တွေမှာ ပိုပြီး အိပ်လို့ကောင်းနေပါလိမ့်မယ်။

စိတ်ကြည်လင်အောင်နေ – ညဘက် ညဘက် ပူပင်စရာတွေ၊ သောကတွေကို တွေးပြီးလောင်မြိုက်နေမယ်ဆိုရင် အိပ်ရခက်နေမှာ အမှန်ပါပဲ။ စိတ်တည်ငြိမ်အောင် စိတ်ငြိမ်းချမ်းအောင်နေပါ။ စိတ်ကြည်နေရင်၊ စိတ်ချမ်းသာနေရင် ပေါ့ပါးပြီး အိပ်လို့ပိုကောင်းပါတယ်။

ခုပြောခဲ့တဲ့ နည်းလမ်းတွေက အိပ်ရေးဝဝအိပ်ချင်သူတွေ လိုက်နာသင့်တဲ့ အချက်လေးတွေပါ။ ရိုးရှင်းပြီး ထိရောက်တဲ့ နည်းလမ်းတွေလို့ ဆိုနိုင်ပါတယ်။ လိုက်နာကြည့်ပါ။ အကျိုးထူးမှာ သေချာပါတယ်။