အထီးကျန်ခြင်းကပေးတဲ့ ကျန်းမာရေးဝေဒနာ

• ကိုယ်ခံအားစနစ်ကို ထိခိုက်ခြင်း 

• သွေးတိုးဖြစ်နိုင်ခြေ များခြင်း 

• ကိုယ်လက်လှုပ်ရှားမှု နည်းလာခြင်း 

လှုပ်လှုပ်ရှားရှားနေတတ်တဲ့နေထိုင်မှုပုံစံက စိတ်ရောကိုယ်ပါကျန်းမာစေနိုင်ပါတယ်။ အထီးကျန်တယ်လို့ ခံစားနေရတဲ့အခါ ဘာကိုမှမလုပ်ချင်တော့ဘဲ မှိုင်တွေတွေဖြစ်ပြီး အိမ်ထဲက အိမ်ပြင် မထွက်ချင်အောင် ဖြစ်နေမှာပါ။ ဒါက ကျန်းမာရေးကို ထိခိုက်စေနိုင်ပါတယ်။

ဒီလိုမလုပ်ဘဲ သူငယ်ချင်းတွေနဲ့ တွေ့ပါ၊ လမ်းလျှောက်ထွက်ပါ၊ ဂျင်မ်သွားပါ၊ အားကစားတစ်ခုခုသွားလုပ်ပါ။ တစ်ပတ်ကို အနည်းဆုံး ၂ နာရီခွဲလောက်တော့ လှုပ်ရှားမှုရအောင်လုပ်ပါ။

• စိတ်ပိုင်းဆိုင်ရာ စွမ်းရည်ကျဆင်းခြင်း

အထီးကျန်စိတ်နဲ့ ဖီးလ်နေပြီဆိုရင် ပြဿနာဖြေရှင်းနိုင်စွမ်း ကျဆင်းလာပါတယ်၊ မှတ်ဉာဏ်တွေထိခိုက်လာတယ်(ဖီးလ်ခဲ့ရတဲ့ အကြောင်းအရာတွေပဲ ကွက်မှတ်မိတတ်တာကလွဲလို့)၊ စိတ်ပိုင်းဆိုင်ရာစွမ်းရည်တွေ ဆုတ်ယုတ်လာစေနိုင်ပါတယ်။ နောက်ပြီး အထီးကျန်ဝေဒနာခံစားနေရသူတွေမှာ အယ်ဇိုင်းမားလို ဦးနှောက်ရောဂါဖြစ်နိုင်ခြေ ပိုများပါတယ်။

• စိတ်ကျရောဂါ ဖြစ်လာနိုင်ခြင်း 

စိတ်ထောင်းရင် ကိုယ်ကြေတာ သဘာဝပါပဲ။ တစ်ယောက်တည်းလို့ ခံစားရရင် ဘဝမှာ မကောင်းတာတွေပဲ ထိုင်တွေးပြီး စိတ်ဓာတ်ကျလာနိုင်ပါတယ်။ စိတ်ဓာတ်ကျလေ တစ်ယောက်တည်းသီးခြားဖြစ်လေဖြစ်ပြီး ပိုဆိုးစေပါလိမ့်မယ်။ စိတ်ကျရောဂါပိုဆိုးလာရင် ကိုယ့်အသက်အန္တရာယ်ကိုပါ ကိုယ်ရန်ရှာတဲ့အထိ အရာရာကို စိတ်ကုန်သွားနိုင်ပါတယ်။

• ကိုယ်အလေးချိန် တက်လာခြင်း 

စိတ်ပင်ပန်းနေတဲ့အချိန်မှာ ကိုယ်အလေးချိန် ပိုတိုးစေနိုင်ပါတယ်။ ဘာကြောင့်လဲ။ ကိုယ့်ကိုယ်ကိုယ်ဖြေသိမ့်ဖို့ ကျန်းမာရေးအတွက် ကောင်းတာရော၊ မကောင်းတာရော အကုန်လုံးကို ပုံမှန်ထက်ပိုပြီးစားမိပါရော။ စိတ်ဖိစီးမှုလေ ပိုစားလေ ပိုဝလေဖြစ်လာနိုင်ပါတယ်။

လူတစ်ယောက်နဲ့တစ်ယောက်တော့ ဘယ်တူမလဲ။ သိပ်မပွင့်လင်းတဲ့သူတွေဆို ပွင့်လင်းသူတွေထက် ပိုအချိန်ယူရပါလိမ့်မယ်။ တခြားသူတွေနဲ့ သီးခြား ကိုယ်တစ်ယောက်တည်းဖြစ်နေတယ်ဆိုတဲ့ ခံစားနေရတယ်ဆို ပြဿနာရှိနေပါတယ်။ အကောင်းဆုံးက အများနဲ့ကွဲထွက်ပြီး တစ်ယောက်တည်း သိပ်မနေပါနဲ့။ ကိုယ့်ပတ်ဝန်းကျင်က လူတွေနဲ့ လိုက်လျောညီထွေနေပါ။

လူတွေနဲ့ ဆက်သွယ်နိုင်ဖို့ နည်းလမ်းတွေ ရှာဖွေပါ။ ကိုယ့်ပတ်ဝန်းကျင်က လူတွေနဲ့ အဆင်မပြေရင် ပရဟိတလုပ်တာဖြစ်ဖြစ် အသင်းအဖွဲ့နဲ့ လုပ်ရတဲ့အလုပ်တွေဖြစ်ဖြစ် ပါဝင်ပါ။ မိသားစုနဲ့ စကားပြောပါ၊ အချိန်ပေးပြီး အတူဖြတ်သန်းပါ။ ယုံကြည်ရလောက်တဲ့ တစ်ယောက်ယောက်ကို ရင်ဖွင့်ပါ။

နောက်ဆုံး ဘယ်သူမှမရှိရင် တရားထိုင်၊ စိတ်ငြိမ်အောင်လေ့ကျင့်တာက အနည်းဆုံးတော့ အတွေးဆိုးတွေမဝင်တော့ဘူးပေါ့။ ပုံမှန်လှုပ်ရှားပါ၊ မှန်အောင်အိပ်ပါ၊ စိတ်အားတက်စေမယ့်အစားအစာတွေစားပါ။ အထီးကျန်စိတ်ကို အနိုင်ယူတိုက်ထုတ်ပစ်လိုက်ပါ။