စိတ်ကောင်းနှလုံးကောင်းထားနိုင်ဖို့ နည်းလမ်း ၅ သွယ်

သင့်အနေနဲ့ ဖော်ရွေကြင်နာတတ်တဲ့ စိတ်ကောင်းနှလုံးကောင်းကို ဖော်ပြဖို့ အခက်အခဲဖြစ်နေတယ်ဆိုရင် နောက်ကိုခြေတစ်လှမ်းသာဆုတ်ပေးလိုက်ပါ။ အခြားသူတွေအပေါ် ချစ်ခင် ကြင်နာစိတ်ရှိကြောင်းဖော်ပြနိုင်ဖို့ အရေးကြီးပါတယ်။ သူတို့တွေ ဘဝမှာပိုအဆင်ပြေသွားမယ်ဆိုရင် သင်လည်းချစ်ခင်ကြင်နာမှုကိုရောင်ပြန်ရရှိနိုင်မှာပါ။

သင့်ရဲ့စိတ်နှလုံးကောင်းကိုဖော်ပြနိုင်မယ့် နေ့စဉ်လေ့ကျင့်ခန်း ၅ခုရှိပါတယ်-

၁) မီးနီအဆင့်မှာရပ်လိုက်ပါ

သင့်စိတ်ကမီးနီအဆင့်(ဘာကိုမှဆက်မကြားလို၊မပြောလို၊ အားလုံးရပ်တန့်သွားစေလိုတဲ့ စိတ်မကျေနပ်မှုအခြေအနေ) ကိုရောက်နေတဲ့အချိန်တိုင်း အသက်ကိုပြင်းပြင်းရှူပြီး ကိုယ်ဘယ်လိုခံစားနေရသလဲဆိုတာကို သတိထားတွေးကြည့်ပြီးမှ ကိုယ့်အတွက်ရော၊ တခြားသူအတွက်ပါ အဆင်ပြေစေဖို့ဆုတောင်းပေးပါ။ “ပျော်ရွှင်ပါစေ။ အဆင်ပြေပါစေ”ဆိုတဲ့ စကားတွေကို စိတ်မပြေမချင်းစိတ်ထဲကနေပြောနေပါ။ နောက်တစ်ကြိမ် မီးနီအဆင့် ရောက်ပြန်ရင်လည်းဒီအတိုင်းထပ်လုပ်ပါ။ လုံလောက်တဲ့အထိအကြိမ်ကြိမ်လုပ်ဆောင်ပြီးတဲ့အခါ မီးနီအဆင့်က စိတ်ကောင်းနှလုံးကောင်းမွေးမြူရာမှာ သဲလွန်စတစ်ခုဖြစ်လာပြီး စိတ်နှလုံးကောင်းထားရှိတဲ့အလေ့အကျင့်ကို ဖြစ်တည်စေပါတယ်။

၂) ကုန်စုံဆိုင် အရောင်းဝန်ထမ်းတွေနဲ့ ခင်မင်အောင် ပေါင်းထားပါ

ကုန်စုံဆိုင်သွားတဲ့အခါ ၊ ရုပ်ရှင်လက်မှတ်ဝယ်ဖို့ တန်းစီတဲ့အခါ၊ ဒါမှမဟုတ် ဓါတ်ဆီဆိုင်မှာဆီထည့်ချိန်မှာ တခြားလူတွေနဲ့ ချိတ်ဆက်ပေါင်းသင်းပါ။ စိတ်ထဲကနေလည်းသူတို့အတွက် ကောင်းကျိုးကို ဆန္ဒပြုထားပါ။ သူတို့ စကားပြောတဲ့အခါ နားထောင်ပေးပြီး နူးညံ့တဲ့အပြုံးနဲ့ဆက်ဆံပါ။ အသေးအဖွဲအမူအရာလေးတချို့ကလည်းလူတွေကိုပွင့်လင်းမှုပိုရှိစေပြီးေ ဖာ်ရွေကြင်နာစိတ်ဖြစ်စေဖို့ လုံလောက်ပါတယ်။ သူတို့နဲ့ ပေါင်းသင်းဆက်ဆံရင်း ကိုယ့်ကိုယ်ကိုယ် အကောင်းဆုံးပေါင်းသင်းနိုင်တာပါပဲ။

၃) ကိုယ့်ခရီးဖော်တွေအပေါ် သဘောကောင်းပေးလိုက်ပါ

သင်ဟာဘတ်စ်ကား၊ ရထား ဒါမှမဟုတ် လေယာဉ်ကိုပုံမှန်စီးနေကျလူတစ်ယောက်ဖြစ်ခဲ့ရင် ထိုင်ခုံနေရာယူတဲ့အခါမှာလည်း ကိုယ့်ရဲ့ခရီးဖော်တွေအပေါ် ဖော်ရွေတဲ့စိတ်သဘောကောင်းတွေ၊ စာနာရိုင်းပင်းမှုတွေထားရှိပေးဖို့ လေ့ကျင့်နိုင်တဲ့အခွင့်အရေးတွေပါပဲ။ ကိုယ်နဲ့အတူခရီးသွားသူတွေအားလုံးကို သိရှိအောင်လုပ်ပြီး သူတို့ရဲ့ ပျော်ရွှင်စရာတွေ၊ ဝမ်းနည်းစရာတွေ ၊ စိတ်ချမ်းသာချင်နေတာတွေ၊ အေးချမ်းချင်တာ၊ ဒုက္ခတွေကနေလွတ်မြောက်ချင်တာတွေအကြောင်း သူတို့မျှဝေသမျှကို တုံ့ပြန်ဖလှယ်ပါ။ သူတို့ကိုပျော်ရွှင်စေလိုတဲ့ ဆန္ဒရှိနေကြောင်းကို ကိုယ့်ဘက်ကဖော်ပြပါ။ “ပျော်ရွှင်ပါစေ။ ဘေးကင်းပါစေ။ ထိခိုက်နစ်နာမှုမှကင်းလွတ်ပါစေ။ ဘဝမှာအဆင်ပြေပါစေ” လို့ပေါ့။

၄) အချက်ပေးသံကိုနားစွင့်ပါ

ကျွန်ုပ်တို့မှာ နေ့တိုင်းအီးမေးလ်တွေနဲ့ ပြက္ခဒိန်အချက်ပေးစာတွေ အများကြီးလက်ခံရရှိတတ်ပါတယ်။ သူတို့ကို သတိပေးအချက်ပြတဲ့အရာတွေအဖြစ် အသုံးချပါ။ ကွန်ပျူတာတွေ အတော်များများမှာတော့ တရားထိုင်အချိန်မှတ် ခေါင်းလောင်းသံမျိုးလိုတောင် အချက်ပေးသံထားရှိလို့ရနေပါပြီ။ အချက်ပေးသံကိုကြားမိတိုင်း ဒါမှမဟုတ် အချက်ပေးစာကိုမြင်မိတိုင်း ခဏလေးရပ်ပြီး အသက်ကိုတစ်ချက်နှစ်ချက်ရှိုက်ရှူကာ စိတ်နှလုံးကောင်းမွေးဖို့အတွေးတွေ စတင်ပါ။ ရေချိုးရင်းနဲ့လည်းဒီလိုမျိုးလုပ်နိုင်ပါတယ်။ သင့်ခန္ဓါကိုယ်ပေါ်မှာ ရေတွေကျလာတာကိုခံစားကြည့်ရင်းနဲ့လည်း ခဏလေးရပ်ပြီး အသက်ကိုရှိုက်ရှူကာ ကိုယ့်ကိုယ်ကိုယ်နဲ့ တခြားသူတွေအတွက် ကောင်းစေလိုတဲ့စိတ်ထားလေးမေတ္တာပို့ကြည့်ပါ။

၅) အကူအညီလိုအပ်နေသူတစ်ယောက်ယောက်နဲ့ ဆက်သွယ်ပါ

လမ်းမှာ အကူအညီလိုအပ်နေသူ တစ်ယောက်ယောက်နဲ့ ဆုံတဲ့အခါတိုင်း သဘောထားကြီးကြီး၊ ကြင်နာသနားစိတ်တို့နဲ့ တုံ့ပြန်ကူညီပေးဖို့ သင့်စိတ်ထဲမှာရည်ရွယ်ချက်တစ်ခုတည်ဆောက်ပါ။ ခဏလေးရပ်ပြီး သူ သို့မဟုတ် သူမနဲ့ စကားပြောကြည့်၊ ဘာတွေဖြစ်နေလဲမေးမြန်း၊ ဆန္ဒရှိရင် ငွေတချို့ပေးခဲ့လိုက်ပါ။ ဒါမှမဟုတ် အိမ်ရာမဲ့တွေကိုထောက်ပံ့နေတဲ့အဖွဲ့တစ်ခုခုဆီကို ငွေလှူတာက ပိုအထောက်အကူဖြစ်စေမယ်လို့ယူဆရင်တော့ သီတင်းပတ်အကုန် ဒါမှမဟုတ် လကုန်တဲ့အခါ ချက်လက်မှတ်တစ်စောင်လောက်ရေးပေးလိုက်ဖို့ ကတိပြုခဲ့ပါ။

စေတနာမေတ္တာထားပေးတဲ့ ဒီနည်းလမ်းတွေကို အလုပ်ထဲမှာ၊ အိမ်မှာ၊ လမ်းမှာ၊ ခရီးသွားတဲ့လမ်းမှာ၊ စတိုးဆိုင်မှာ၊ သူငယ်ချင်းအိမ်မှာ၊ ဒါမှမဟုတ် မိသားစုဝင် တစ်ယောက်ယောက်ရဲ့ အိမ်မှာနေရာမရွေးအချိန်မရွေး လုပ်ဆောင်လို့ရပါတယ်။ သင်ဟာတစ်နေ့တာတလျှောက်မှာ ဒါမျိုးတွေကို အလေ့အကျင့်လုပ်ရင်းနဲ့ စတင်နိုင်ပြီးသင့်ဘဝတလျှောက်မှာပါ လုပ်ဆောင်နိုင်ပါတယ်။ အထက်ပါအချက်တွေ အားလုံးဟာသင့်ဘဝအတွက်တင်မကဘဲ သင့်ပတ်ဝန်းကျင်က လူတွေအတွက်ပါ ပျော်ရွှင်မှုကိုဆောင်ကြဉ်းပေးနိုင်ပါတယ်။