အာထရာဆောင်းဆိုတာ ဘာလဲ ။ ။

Ultrasound ( အာထရာဆောင်း ) ဆိုတာဘာလဲ ။ ။

Ultrasound ဆိုတာ သူ့နာမည်အတိုင်းပဲ ultra အဆင့်မြင့်နည်းပညာနဲ့ sound အသံလှိှုင်းတွေကို သုံးထားတဲ့ ပုံရိပ်ဖော်နည်းပညာ ဖြစ်ပါတယ်။

အာထရာဆောင်းကို ဘာအတွက် အသုံးပြုကြတာလဲ ။ ။

ဓါတ်မှန်ရိုက်လို့မရတဲ့ ကိုယ်ဝန်သည်တွေ ကိုယ်ဝန်ဆောင်တွေ ဗိုက်ထဲက ရင်သွေးလေး ဘယ်နှစ်ပတ်ရှိပြီလဲဆိုတာသိဖို့၊ ကလေးဖွံ့ဖြိုးမှုကို သိဖိုနဲ့ ယောက်ျားလေးလား၊ မိန်းကလေးလားဆိုတာကို သိဖို့အတွက် အာထရာဆောင်းကို သုံးကြပါတယ်။ ကိုယ်ဝန်သည်တွေ အတွက် အာထရာဆောင်းက စိတ်အချရဆုံးပါ။

ဒါ့အပြင်

• အသည်းရောဂါ၊
• အူလမ်းကြောင်းဆိုင်ရာရောဂါ၊
• ကျောက်ကပ်ရောဂါတွေ
• ဆီးလမ်းကြောင်း နဲ့
• မျိုးပွားအဂါၤဆိုင်ရာ ရောဂါတွေကို အာထရာဆောင်း နဲ့ စမ်းသပ်စစ်ဆေးကြည့်လို့ရပါတယ်။

အာထရာဆောင်းက ပုံရိပ်ကို ဘယ်လိုပုံဖော်ပေးတာလဲ ။ ။

အဆင့်မြင့် အသံလှိုင်းတွေကိုယ်တွင်းကိုဖြတ်တဲ့အခါ လမ်းမှာရှိတဲ့ ကိုယ်တွင်းကလီစာ တစ်ခုခုကို ထိသွားမိပြီး ထွက်လာတဲ့ အသံပဲ့တင်သံတွေကနေ ပုံရိပ်ဖော်ထားတာဖြစ်ပါတယ်။

ဥပမာ – သည်းခြေလမ်းကြောင်းကို ဖြတ်သွားတဲ့အခါ သည်းခြေကပုံမှန်ဖြစ်နေရင် ပုံမှန် အတိုင်းပဲ ပေါ်မှာဖြစ်ပြီး သည်းခြေမှာ ကျောက်တည်ေနရင်တော့ ကျောက်ရှိနေကြောင်းကို ထိမိတဲ့ အသံပဲ့တင်လှိုင်းတွေကနေတဆင့် သိရှိနိုင်မှာပါ။ ထိမိတဲ့ ပစ္စည်းတွေက သိပ်သည်းလေလေ အသံပဲ့တင်သံပြင်းပြီး ပုံရိပ်ပိုပေါ်လေလေပါ။

အာထရာဆောင်း ဘယ်လိုရိုက်ကြသလဲ ။ ။

အာထရာဆောင်း ရိုက်ဖို့အတွက်ဆို လူနာဘက်ကကြိုတင်ပြင်ဆင်ရမှာတွေရှိပါတယ်။

• အာထရာဆောင်း မရိုက်ခင် ၁ နာရီအလိုမှာ ရေတစ်ပုလင်းသောက်ထားရမှာဖြစ်ပြီး အာထရာဆောင်း မရိုက်ပြီး မချင်း ဆီးသွားခွင့်မရှိပါဘူး။ ဘာကြောင့်လဲဆိုတော့ ဆီးအိမ်တင်းနေမှ သင့် ဆီးခုံရိုးအနားမှာရှိနေတဲ့ ကလီစာတွေကို ကောင်းကောင်းမြင်နိုင်တာကြောင့်ပါ။
• အာထရာဆောင်းရိုက်ပေးမယ့် ကျွမ်းကျင်ပညာရှင်တွေကနေပြီးတော့ အာထရာဆောင်းရိုက်ချင်တဲ့ နေရာက အရေပြားပေါ်မှာ ဂျယ်လီလိုမျိုး အရည်တွေ သုတ်လိမ်းပေးပါတယ်။ ဒီ ဂျယ်လီပုံစံရှိတဲ့ အရည်တွေက အသံလှိုင်းဖြတ်လို့ကောင်းအောင် ကြားခံနယ်တစ်ခု အနေနဲ့ လုပ်ပေးတာဖြစ်ပါတယ်။
• ဒါ့အပြင် အာထရာဆောင်ရိုက်တာရဲ့ အဓိက ဇာတ်လိုက်ကတော့ Ultrasound transducers လို့ခေါ်တဲ့ အသံလှိုင်းထုတ်ပေးတဲ့ ကိရိယာလေးပဲ ဖြစ်ပါတယ်။

Ultrasound transducers ၃ မျိုးရှိပါတယ် ။ ။

၁ ။ an endovaginal transducer – မိန်းမကိုယ်တွင်းထည့် အာထရာဆောင်းကိရိယာ

၂ ။ an endorectal transducer – စအိုတွင်းထည့် အာထရာဆောင်းကိရိယာ

၃ ။ a transesophageal transducer – အစာရေမျိုပြွန်တွင်းထည့် အာထရာဆောင်းကိရိယာ ဆိုပြီး သူ့နေရာနဲ့သူသုံးလို့ရတဲ့ ကိရိယာ ၃ မျိုးရှိပါတယ်။

အာထရာဆောင်းကြောင့် ရနိုင်တဲ့ ဆိုးကျိုးတွေက ဘာတွေလဲ ။ ။

အသံလှိုင်းကို အသုံးပြုပြီး ဓါတ်ရောင်ခြည် လှိုင်းတွေ မရှိတာကြောင့် အာထရာဆောင်းကြောင့်ရနိုင်တဲ့ ဆိုးကျိုးတွေက မရှိသလောက်ရှားပါတယ်။ ဒါကြောင့် အာထရာဆောင်းကို ကိုယ်ဝန်သည် တွေမှာ သုံးကြတာဖြစ်ပါတယ်။

Hello Health Group သည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။