ထိခိုက်ဒဏ်ရာရတဲ့အခါ ဘယ်လိုပြုစုစောင့်ရှောက်မလဲ

ထိခိုက်ဒဏ်ရာမရဘူးသူရယ်လို့ မရှိလောက်ပါဘူး။ ထိခိုက်ဒဏ်ရာရရင် ဘယ်လိုမျိုး ထိန်းသိမ်းစောင့်ရှောက်ရမလဲဆိုတာကိုလည်း တော်တော်များများက သိသင့်သလောက် သိပြီးသားဖြစ်မှာပါ။ ထိခိုက်ဒဏ်ရာရရင် ကိုယ်လုပ်နေကျလုပ်ရပ်တွေက မှန်ကန်ရဲ့လားဆိုတာနဲ့ ဒဏ်ရာထိန်းသိမ်းနည်းကို ဘယ်လောက်ထိသိထားလဲဆိုတာကို နည်းနည်းလောက်စစ်ဆေးကြည့်ရအောင်လား။

(၁) ထိခိုက်ဒဏ်ရာရရင် အရင်ဆုံးလုပ်သင့်တာက

(က) ဒဏ်ရာကို အရင်ဆုံး ဆေးကြောမယ်

(ခ) ဒဏ်ရာကို ကိုင်မယ့်လက်ကိုဆေးကြောမယ်

(ဂ) ထိခိုက်မိတဲ့အရာကို စစ်ဆေးမယ်

အဖြေ – (ဂ) ထိခိုက်မိတဲ့အရာကို စစ်ဆေးမယ်။ အနာတရဖြစ်အောင်ထိခိုက်မိတဲ့ အရာက ညစ်ပေနေသလားဆိုတာကို အရင်ဆုံးစစ်ဆေးရပါမယ်။

(၂) အနာတိုင်းကို အရက်ပြန်နဲ့ဆေးဖို့လိုတယ်။

မှန်/ မှား

အဖြေ – မှားပါတယ်။ အနာတိုင်းကို အရက်ပြန်နဲ့ ဆေးကြောဖို့မလိုပါဘူး။ တစ်ရှုးတွေထိခိုက်ပျက်စီးတာမျိုးဖြစ်စေနိုင်တာကြောင့်ပါ။ အနာကိုရေသန့်သန့်လေးသုံးပြီးသေချာဆေးကြောပေးရင်ရပါတယ်။

(၃) ထိခိုက်ဒဏ်ရာရတဲ့အခါ အနာကို မသန့်စင်ခင် သွေးတိတ်အောင်အရင်လုပ်သင့်ပါတယ်။

မှန်/ မှား

အဖြေ – မှန်ပါတယ်။ ထိခိုက်ဒဏ်ရာရတဲ့ အခါ အနာကိုအဝတ်စသန့်သန့်လေးနဲ့ခပ်ဖွဖွလေး ဖိထားပြီး သွေးတိတ်အောင်အရင်လုပ်ရပါမယ်။

(၄) အနာကိုဆေးကြောတဲ့အခါ ရေနဲ့ဆပ်ပြာသုံးပြီး

(က) အနာတစ်ဝိုက်ကိုပဲဆေးကြောသင့်တယ်

(ခ) အနာမျက်နှာပြင်ပေါ်ကိုပါဆေးကြောသင့်တယ်

(ဂ) အနာ တစ်ဝိုက်ကိုရော အနာမျက်နှာပြင်ကိုပါဆေးကြောပေးသင့်ပါတယ်

အဖြေ – (က) အနာတစ်ဝိုက်ကိုပဲ ဆေးကြောပေးရပါမယ်။ အနာပေါ်ကိုဆေးတဲ့အခါ အရေပြားကျိန်းစပ်တာမျိုးဖြစ်စေနိုင်တာကြောင့်ပါ။

(၅) ထိခိုက်ဒဏ်ရာရတဲ့အခါ အနာထဲမှာ ကပ်ငြိနေတဲ့ ဖုန်မှုန့်တွေ၊အညစ်အကြေးတွေရှိနေရင် ဖယ်ရှားရပါမယ်။

မှန်/ မှား

အဖြေ – မှန်ပါတယ်။ ထိခိုက်ဒဏ်ရာရတဲ့အခါ ဒဏ်ရာထဲမှာ ဖုန်မှုန့်တွေ၊ အညစ်အကြေးတွေရှိနေရင် ဇာဂနာလေးကို အရက်ပြန်စွတ်ပြီး တစ်ခုချင်းဖယ်ပေးရပါမယ်။ မလိုလားအပ်ဘဲ ပိုးဝင်တာမျိုးမဖြစ်စေဖို့ပါ။

(၆) အသေးစားထိခိုက်ဒဏ်ရာတွေကနေလည်း ပိုးဝင်တာမျိုးဖြစ်နိုင်ပါတယ်။

မှန်/ မှား

အဖြေ – မှန်ပါတယ်။ အသေးစားဒဏ်ရာလေးတွေဆိုပေမယ့်လည်း သေချာဂရုမစိုက်ရင် ပိုးဝင်ကူးစက်တာမျိုးဖြစ်နိုင်ပါတယ်။

(၇) ကုတ်ခြစ် ဒဏ်ရာတွေကို hydrogen peroxide၊ အိုင်အိုဒင်းတို့နဲ့ဆေးကြောတာမျိုးလုပ်ရင် အနာကျက်နှေးစေတယ်။

မှန်/ မှား

အဖြေ – မှန်ပါတယ်။ ကုတ်ခြစ်မိတဲ့ဒဏ်ရာတွေကို ရေစိုဝတ်သန့်သန့်လေးနဲ့ သုတ်ပေးရင်ကိုလုံလောက်ပါပြီ။ hydrogen peroxide၊ အိုင်အိုဒင်း တို့နဲ့ဆေးကြောပေးစရာမလိုပါဘူး။ အနာကျက်နှေးစေနိုင်သလို အရေပြားတစ်ရှုးတွေထိခိုက်စေနိုင်တာကြောင့်ပါ။

(၈) အနာဖြစ်တဲ့အခါ ပလာစတာကပ်ပေးရမယ်ဆိုတာကိုတော့ လူတိုင်းသိမှာပါ။ ဒါပေမယ့် ပလာစတာကို ဘယ်လိုလဲလှယ်ပေးရမလဲ။

(က) နေ့တိုင်းလဲလှယ်ပေးရမယ်

(ခ) နှစ်ရက် တစ်ကြိမ်လဲလှယ်ပေးရမယ်

(ဂ) တစ်ပတ်တစ်ကြိမ်လဲလှယ်ပေးရပါမယ်

အဖြေ – (က) နေ့တိုင်းလဲလှယ်ပေးရမယ်။ ပလာစတာက ညစ်ပေနေခဲ့ရင်ဖြစ်ဖြစ်၊ ရေစိုသွားရင်ပဲဖြစ်ဖြစ် ချက်ချင်းလဲလှယ်ပေးရပါမယ်။

(၉) အနာကို နေ့စဉ်စစ်ဆေးဖို့လိုတယ်။

မှန်/မှား

အဖြေ – မှန်ပါတယ်။ အနာကိုနေ့စဉ်ကြည့်ရှု့စစ်ဆေးပေးပြီး ပုံမှန်ဆေးထည့်ပေးဖို့လိုပါတယ်။

(၁၀) ဒဏ်ရာအရမ်းနက်ရင် မေးခိုင်ကာကွယ်ဆေးထိုးဖို့လိုပါတယ်။

မှန်/မှား

အဖြေ – မှန်ပါတယ်။ ဒဏ်ရာကအရမ်းနက်တဲ့အခါမျိုး၊ ညစ်ပေတဲ့အရာတွေနဲ့ ထိမိတဲ့အခါမျိုးမှာ မေးခိုင်ကာကွယ်ဆေးထိုးဖို့ လိုပါတယ်။

Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။