ရင်သားကင်ဆာခွဲစိတ်ပြီး လေ့ကျင့်ခန်းနှင့် အစာအာဟာရ

ရင်သားကင်ဆာခွဲစိတ်အပြီးမှာ ကျန်းမာရေးကို ဆက်လက်ပြီး ဂရုစိုက်ဖို့၊ စနစ်တကျ နေထိုင်စားသောက်တတ်ဖို့ အရေးကြီးပါတယ်။ သည်ဆောင်းပါးက ရင်သားကင်ဆာခွဲစိတ်ပြီး လေ့ကျင့်ခန်းနှင့် အစာအာဟာရ နဲ့ ပတ်သက်လို့ အကြံဉာဏ်ပေးသွားမှာ ဖြစ်ပါတယ်။

ရင်သားကင်ဆာခွဲစိတ်ပြီး လေ့ကျင့်ခန်းနှင့် အစာအာဟာရ

ရင်သားကင်ဆာခွဲစိတ်အပြီးမှာ လက်မောင်းနဲ့ ပုခုံးတို့ ပုံမှန်လှုပ်ရှားမှု ပြန်လုပ်နိုင်စေဖို့ မှန်ကန်တဲ့ လေ့ကျင့်ခန်းများ ပြုလုပ်သင့်ပါတယ်။ လေ့ကျင့်ခန်းများက ခွဲစိတ်ခြင်းရဲ့ ဘေးထွက်ဆိုးကျိုးများဖြစ်တဲ့ ပုခုံးတစ်ဝိုက်တောင့်တင်းပြီး လှုပ်ရှားရခက်တာ၊ ဖောရောင်တာတွေကို သက်သာစေပါတယ်။ ဆရာဝန်များက သင်နဲ့ သင့်တော်သော လေ့ကျင့်ခန်း အမျိုးအစားကို ရွေးချယ်ပေးနိုင်ပါတယ်။

-ခွဲပြီး ပထမနှစ်ပတ်တွင် ပုခုံးအထက် လက်ကို မြှောက်ခြင်း၊ အလေးအပင်မခြင်းများကို ရှောင်ကြဉ်ပါ။ ခွဲထားသောဘက်မှ လက်မောင်းကို အသုံးပြုပြီး တွန်းခြင်း၊ ဆွဲခြင်းများ မပြုလုပ်ပါနဲ့။

ဒီအချိန်မှာ ပုခုံးတွန့်ခြင်း၊ ပုခုံးကို စက်ဝိုင်းပုံလှုပ်ရှားခြင်း၊ ပုခုံးကို မခြင်း၊ လက်မောင်းလွှဲခြင်း၊ ခန္ဓာကိုယ်ကို လှည့်ခြင်းတို့ကို ခပ်ဖြည်းဖြည်း  လုပ်ပေးနိုင်ပါတယ်။ အသက်ပြင်းပြင်းရှူခြင်း၊ ခေါင်းဖီးခြင်း ၊ ရေချိုးခြင်း၊ အဝတ်လဲခြင်းလိုမျိုး ပုံမှန်လှုပ်ရှားမှုများကိုလည်း ပြုလုပ်နိုင်ပါတယ်။

-နောက်ထပ် ၂ ပတ်မှာ လေ့ကျင့်ခန်း အသစ် တစ်ခုကို အစပြုနိုင်ပြီး လုပ်လက်စ လေ့ကျင့်ခန်းကိုလည်း ဆက်လုပ်သင့်ပါတယ်။ ဒါမှ လက်မောင်းရဲ့ လှုပ်ရှားနိုင်စွမ်း အပြည့်အ၀ ရပါမယ်။ အခြား လေ့ကျင့်ခန်းများမှာ လက်ကို ခေါင်းပေါ်မြှောက်ခြင်း၊ ကွေးခြင်း၊ ရင်ဘတ်ကို ကျောဘက်သို့ လှန်ချခြင်း များ ဖြစ်ပါတယ်။

-၆ပတ်မြောက်မှာ ပုံမှန် လှုပ်ရှားမှုများ လုပ်နိုင်ပါပြီ။ ဒါပေမဲ့ အလေးအပင်တွေတော့ မမပါနဲ့ဦး။ ပုခုံးက ပုံမှန်အတိုင်း လှုပ်ရှားနိုင်ပြီဖြစ်သော်လည်း အချို့လေ့ကျင့်ခန်းများကို ဆက်လုပ်သွားသင့်ပါတယ်။

ခွဲစိတ်မှုကနေ နာလတ်ထလာရင်တောင် လေ့ကျင့်ခန်းတွေကို ဆက်လုပ်ပေးသင့်ပါတယ်။ လေ့ကျင့်ခန်းများက ရင်သားကင်ဆာပြန်ဖြစ်နိုင်ခြေကို လျှော့ချပေးနိုင်ပါတယ်။

• အာဟာရ

အာဟာရကလည်း ရင်သားကင်ဆာရောဂါသည်များအတွက် အရေးကြီးပါတယ်။ ခွဲစိတ်အပြီးမှာ သင့်တော်တဲ့ စားသောက်ပုံကို ထားရှိသင့်ပါတယ်။

-ခွဲစိပ်အပြီးမှာ ခန္ဓာကိုယ်က ဆဲလ်များ ပြန်တည်ဆောက်ရန်နဲ့ ခွဲစိတ်အနာများ ကျက်ရန် အသားဓာတ်များ ပိုလိုအပ်ပါတယ်။ အသားအမျိုးမျိုး၊ ပဲ၊ ကြက်ဥ၊ နို့ စတာတွေကို တိုးပြီး စားသုံးသင့်ပါတယ်။

-အပင်များမှရသော ဖိုင်တိုဓာတ်များသည် ကင်ဆာပြန်ဖြစ်နိုင်ချေကို နည်းစေပြီး ကောင်းကျိုးများကို ဖြစ်စေသည်ဟု လေ့လာချက်များအရ သိရပါတယ်။ ဒါကြောင့် အသီးအရွက်၊ အသီးအနှံများ စားပေးပါ။

–ပဲနို့မှာ ဖိုင်တိုအီစထရိုဂျင် ဟော်မုန်း ပါဝင်သောကြောင့် ရင်သားကင်ဆာဖြစ်နိုင်ချေကို နည်းစေပါတယ်။ ဖိုင်တိုအီစထရိုဂျင် ဟော်မုန်းက ခန္ဓာကိုယ်ထဲရှိ အီစထရိုဂျင် ဟော်မုန်းနဲ့ ဆင်တူပါတယ်။

-အသီးအရွက်အတော်များများနဲ့ ပဲများမှာ တွေ့ရတဲ့ ကင်ဆာကာကွယ်တဲ့ အင်တီအောက်စီးဒင့်ဓာတ်များက ဆဲလ်များ ပျက်စီးခြင်းကို ကာကွယ်ပေးပါတယ်။ အသီးတွေမှာ အနီရောင်၊ ပန်းရောင် ဖြစ်စေတဲ့ လိုင်ကိုပင်းဓာတ်က အင်တီအောက်စီးဒင့်တစ်မျိုး ဖြစ်ပါတယ်။ ရင်သားကင်ဆာကို ကူညီတိုက်ခိုက်ပေးပါတယ်။ ကျွဲကောသီး၊ ခရမ်းချဉ်သီးတို့ကနေ ရနိုင်ပါတယ်။

-ဘီတာ ကရိုတင်းပါသော အစားအစာများ ဖြစ်တဲ့ မုန်လာဥနီ၊ သစ်ကြားသီးနဲ့ ကန်စွန်းဥများကလည်း ရင်သားကင်ဆာ ပြန်ဖြစ်ခြင်းမှ ကာကွယ်ပေးနိုင်ပါတယ်။

ရင်သားကင်ဆာ ခွဲစိတ်မှု အပြီးမှာ မြန်မြန် နာလန်ထနိုင်ဖို့၊ ရင်သားကင်ဆာ နောက်ထပ် ပြန်ဖြစ်ခြင်းကို လျှော့ချနိုင်ဖို့ သင့်တော်တဲ့ လေ့ကျင့်ခန်းနဲ့ အာဟာရများ လိုအပ်ပါတယ်။

ရေးသားသူ- Dr Nyan Linn