မိန်းမကိုယ်ယားယံတာကို သက်သာစေဖို့

အရေပြားမှာယားယံမှုဖြစ်တာကတော်တော်လေး စိတ်မသက်မသာဖြစ်စေတဲ့ အကြောင်းအရင်းတစ်ခုပေါ့။ သာမန်အရေပြားပေါ်မှာဖြစ်တဲ့ယားယံမှုကတောင် ကသိကအောက်ဖြစ်စေနိုင်တယ်ဆိုရင် မိန်းမကိုယ် လိုမျိုးနေရာမှာ ယားယံမှုခံစားရရင်တော်တော် စိတ်ရှုပ်စရာကောင်းမယ်နော်။ ဒီလိုဖြစ်တဲ့အခါ မိန်းကလေးတော်တော်များများကရှက်တာကြောင့် ဆရာဝန်ပြဖို့ မလုပ်ကြသလို မိခင်၊ အမလိုမျိုး မိသားစုဝင်တွေကိုတောင် ဖွင့်ဟတိုင်ပင်ခဲကြပါတယ်။ ဒီဆောင်းပါးလေးမှာလေဒီလေးတို့သိထားသင့်တဲ့ မိန်းမကိုယ်ယားယံတာကို သက်သာစေဖို့ဘယ်လို လုပ်ရမလဲ ဆိုတာကို ပြောပြပေးမယ်နော်။

ဒီအချက်တွေကြောင့် မိန်းမကိုယ်ယားယံနိုင်ပါတယ်

• မိန်းမကိုယ်တဝိုက်မှာ ဘက်တီးရီးယားတွေပေါက်ဖွားလာမှုကြောင့်
• မှိုပိုးတွေဖြစ်ပေါ်လာမှုကြောင့်
• ကပ်ပါးပိုးတွေရှိနေတာ
• ကိုယ်တွင်းက အီစထရိုဂျင်ဟော်မုန်းပမာဏ ကျဆင်းနေမှုကြောင့် မိန်းမကိုယ်ကတစ်ရှုးတွေခြောက်သွေ့နေတာ
• သွေးဆုံးအကြိုလက္ခဏာ
• တင်းကျပ်လွန်းတဲ့ အတွင်းခံတွေဝတ်ဆင်တာတွေကြောင့် မိန်းမကိုယ်ယားယံနိုင်ပါတယ်။

မိန်းမကိုယ်ယားယံတာကို သက်သာစေဖို့

မိန်းမကိုယ်ယားယံတာကို သက်သာစေဖို့ ဆိုရင်

ရေများများသောက်ပေးပါ -ရေများများသောက်ပေးတဲ့အခါ မိန်းမကိုယ်မှာဖြစ်နေတဲ့ မှိုပိုးကူးစက်မှုကြောင့် ယားယံတာကို ခန္ဓာကိုယ်က မြန်မြန်တုံ့ပြန်ဖယ်ရှားနိုင်စေဖို့ အထောက်အပံ့ဖြစ်စေပါတယ်။ ရေကို အလွန်အကျွံမသောက်မိဖို့တော့ သတိထားပါ။

ဒိန်ချဉ်သောက်ပေးပါ –ဒိန်ချဉ်မှာ အကျိုးပြုဘက်တီးရီးယားဖြစ်တဲ့Lactobacillus acidophilus ပါဝင်နေတာကြောင့် ဘက်တီးရီးယားပေါက်ဖွားမှုကြောင့်ဖြစ်တဲ့ မိန်းမကိုယ် ယားယံတာကို သက်သာစေနိုင်မှာပါ။ အမျိုးသမီးတွေအနေနဲ့ ဒိန်ချဉ်ကို ပုံမှန်သောက်သုံးပေးမယ်ဆိုရင် မှိုပိုးကူးစက်ခံရမှုနဲ့ ဘက်တီးရီးယားကြောင့်ဖြစ်တဲ့ မိန်းမကိုယ်ယားယံမှုပြဿနာကို ကာကွယ်ပြီးသားဖြစ်စေမှာပါ။

ရေအေးအေးနဲ့ ဆေးကြောပေးပါ –မိန်းမကိုယ်ကိုရေအေးအေးနဲ့ ဆေးကြောသန့်စင်ပေးတာကလည်း ယားယံမှုကို သက်သာစေမှာပါ။ ရေနဲ့ဆေးကြောသန့်စင်တဲ့အခါ မိန်းမကိုယ်အတွင်းပိုင်းကို ဆေးကြောတာမျိုးမလုပ်မိဖို့တော့လိုပါတယ်။

ရေခဲဝတ်ကပ်ပေးပါ – မိန်းမကိုယ် အပြင်ဘက်ကို ရေခဲဝတ်နဲ့ ကပ်ပေးတာကလည်း မိန်းမကိုယ်ယားယံမှုကို သက်သာစေပါတယ်။ အဝတ်စသန့်သန့်ကို ရေခဲရေစွတ်ပြီး ၅ မိနစ် ကနေ ၁၀ မိနစ်အထိ ကပ်ပေးလို့ရပါတယ်။ ရေခဲအိတ်ကပ်ပေးလို့လည်းရပါတယ်။ ရေခဲအိတ်ကပ်တဲ့အခါမှာ တိုက်ရိုက်ကပ်တာမျိုးမလုပ်ဘဲရေခဲအိတ်ကို အဝတ်စသန့်သန့်လေးနဲ့ ထုပ်ပြီးမှ ကပ်ပေးပါ။

အဝတ်အစားတွေကို တင်းတင်းကျပ်ကျပ်မဝတ်ပါနဲ့ – မိန်းကလေးတော်တော်များများ လုပ်မိနေတဲ့အရာတစ်ခုက ကိုယ်လုံးအလှပေါ်စေချင်တဲ့ဆန္ဒနဲ့ အဝတ်အစားတွေကို တင်တင်းကျပ်ကျပ်ဝတ်တာပါ။ အတွင်းခံကို တင်းတင်းကျပ်ကျပ်ဝတ်ဆင်မှုကလည်း မိန်းမကိုယ်ယားယံစေတဲ့ အချက်တွေထဲကတစ်ခုပါ။ လေဝင်လေထွက်မကောင်းစေတဲ့ အဝတ်အစားတွေက အနံ့အသက်ဆိုးတွေကို ဖြစ်စေသလို အရေပြားယားယံမှုကိုပါ ဖြစ်စေနိုင်ပါသေးတယ်။ ဒါကြောင့် အဝတ်အစားတွေကို တင်းတင်းကျပ်ကျပ်ဝတ်တာမျိုးကို တတ်နိုင်သမျှရှောင်ပါ။

ချည်သားကိုဝတ်ဆင်ပေးပါ – အတွင်းခံရွေးချယ်တဲ့အခါ နိုင်လွန်ပါတဲ့ အတွင်းခံမျိုးကို လုံးဝမရွေးချယ်ပါနဲ့။ ချည်သားစစ်စစ်နဲ့လုပ်ထားတဲ့ အတွင်းခံမျိုးကိုပဲရွေးချယ်ဝတ်ဆင်ပေးပါ။ ချည်သားကအရေပြားထိခိုက်မှုကို နည်းစေသလို လေဝင်လေထွက်ကောင်းတာကြောင့် အနံ့အသက်ဆိုးဖြစ်ပေါ်တာနဲ့ အရေပြားယားယံမှုတွေကို သက်သာစေမှာပါ။

ညအိပ်တဲ့အခါ အတွင်းခံမဝတ်ပါနဲ့ – မိန်းကလေးမို့ ကျစ်ကျစ်လျစ်လျစ်နေရမှာမှန်ပေမယ့် ညအိပ်တဲ့အချိန်မှာတော့ အတွင်းခံဝတ်အိပ်တာမျိုး မလုပ်ပါနဲ့။ ညအိပ်တဲ့အခါ ချည်သားဘောင်းဘီပွပွလေးဝတ်ဆင်တာလောက်နဲ့တင် အဆင်ပြေနေပါပြီ။ တစ်နေကုန်လုံး ဝတ်စုံအပြည့်အစုံဝတ်ဆင်ပြီးပြီမို့ ကျန်းမာလန်းဆန်းတဲ့လေဒီလေးဖြစ်စေဖို့ ညအိပ်ချိန်မှာတော့ သက်သောင့်သက်သာနေဖို့ မမေ့ပါနဲ့။

အစိုဓာတ်ထိန်းပစ္စည်းတစ်ခုခုသုံးပေးပါ – ဒါက သွေးဆုံးပြီးတဲ့ အမျိုးသမီးတွေမှာ တွေ့ရတတ်ပါတယ်။ မိန်းမကိုယ်ခြောက်သွေ့မှုကြောင့် ယားယံတာဆိုရင်တော့ မိန်းမကိုယ်အတွက် သီးသန့်ထုတ်ထားတဲ့ အစိုဓာတ်ထိန်းကရင်မ်ကို သုံးပေးနိုင်ပါတယ်။

တစ်ကိုယ်ရေသန့်ရှင်းရေး ဂရုစိုက်ပေးပါ – ဒါကတော့လေဒီလေးတွေအတွက် လိုလည်းလိုအပ်သလို ထိရောက်မှုလည်းရှိတဲ့ နည်းလမ်းတစ်ခုပါ။ မိန်းကလေးတစ်ယောက် စမတ်ကျကျလှပဖို့ဆိုတဲ့နေရာမှာ တစ်ကိုယ်ရေသန့်ရှင်းရေးကတော်တော်လေးအရေးပါပါတယ်။ ဒါပေမယ့် တစ်ကိုယ်ရေသန့်ရှင်းရေးကို အလွန်အကျွံမလုပ်မိဖို့လည်း လိုအပ်ပါသေးတယ်။

ရေချိုးတဲ့အခါတိုင်း မိန်းမကိုယ်ကို သန့်စင်ဆေးကြောပေးပါ။ လက်ကိုအရှေ့ဘက်ကနေ အနောက်ဘက်ကို ဆွဲယူတဲ့ ပုံစံနဲ့ သန့်စင်ပေးပါ။ ဆပ်ပြာတွေသုံးပြီး သန့်စင်တာမျိုး မလုပ်ပါနဲ့။ရေသန့်သန့်နဲ့သန့်စင်ပေးလို့ရပါတယ်။ တကယ်လို့ သင့်အနေနဲ့ရေကိုပဲအသုံးပြုတာက သန့်စင်မှုအားနည်းမှာကို စိုးရိမ်တယ်ဆိုရင်တော့ Feminine wash အသုံးပြုလို့ရပါတယ်။ အစိုဓာတ်ရှိအောင် လုပ်ဆောင်ပေးနိုင်သလို အနံ့အသက်ဆိုးတွေ ကင်းစင်စေတာကြောင့် တစ်နေ့တာလုံးလန်းဆန်းတက်ကြွပြီး ယုံကြည်မှုလည်း တိုးလာစေမှာ အသေအချာပါပဲ။