လေဒီတို့အတွက် ဗိုက်အဆီကျစေမယ့် လေ့ကျင့်ခန်း (၅) ခု

လူတစ်ယောက်ရဲ့ အသွင်အပြင်က အဲ့လူရဲ့ ကျန်းမာရေးကို ထင်ဟပ်သလို သွင်ပြင်ပေါ်မှာလည်း အများကြီး သက်ရောက်လို့နေပါတယ်။ ဗိုက်ကအဆီများနေတာက ဗိုက်ကိုပူလို့ အလှတင် ပျက်စေတာ မဟုတ်ဘဲ ကျန်းမာရေးကိုပါ ထိခိုက်စေတာပါ။ ဒီလိုမျိုး ဗိုက်အဆီများနေပြီဆိုရင်တော့ ဘာဝတ်ဝတ် မလှသလို နေရတာလေး လေးကန်ကန် နိုင်လှပါတယ်။ ဒါကြောင့် ဗိုက်ပူနေလို့ဆိုပြီး စိတ်ညစ်နေတဲ့ လေဒီတို့အတွက် ဗိုက်အဆီကျစေမယ့် လေ့ကျင့်ခန်း (၅) ခုကို ပြောပြပေးလိုက်ပါတယ်။

ဗိုက်မှာ အဆီများတာက ဘာဖြစ်နိုင်လဲ!

လေ့လာမှုတွေအရ ဗိုက်မှာ အဆီများတာက နှလုံးရောဂါ ဖြစ်နိုင်ခြေ များသလို အမျိုးအစား – ၂ ဆီးချိုရောဂါ ဖြစ်နိုင်ခြေလည်း များပါတယ်။ အဝလွန်တာနဲ့ နာတာရှည် ကျန်းမာရေးပြဿနာတွေ ဖြစ်နိုင်ခြေလည်း များစေသလို သည်းခြေအိတ်ကျောက်တည်တာ၊ အသည်းအဆီဖုံးတာတွေလည်း ခံစားရနိုင်ခြေ များပါတယ်။ 

အချုပ်အားဖြင့် ပြောရရင်တော့ ဗိုက်အဆီများတာက အသက်တိုစေနိုင်ပါတယ်။ ဒါကြောင့် ဗိုက်အဆီများနေပြီဆိုရင်တော့ ဗိုက်အဆီကျစေဖို့ လုပ်ဆောင်ပါ။ 

လေဒီတို့အတွက် ဗိုက်အဆီကျစေမယ့် လေ့ကျင့်ခန်း (၅) ခု

လေဒီတို့အတွက် ဗိုက်အဆီကျစေမယ့် လေ့ကျင့်ခန်း (၅) ခု ကတော့ – 

၁ – လမ်းလျှောက်တာ 

လမ်းလျှောက်တာ တစ်နေ့ကို အနည်းဆုံး ၁၅ မိနစ် ကနေ နာရီဝက်လောက်အထိ ပုံမှန်လေး လမ်းလျှောက်ပေး တာက စိတ်ရောကိုယ်ပါ ကျန်းမာစေသလို ဗိုက်ကအဆီတွေကို ကျစေဖို့လည်း ထောက်ကူပေးနိုင်ပါတယ်။ ဗိုက်အဆီကျစေဖို့ဆိုရင်တော့ လမ်းကို ခပ်သွက်သွက်လေး လျှောက်ပေးဖို့တော့ မမေ့ပါနဲ့။

၂ – ပြေးတာ

တစ်နေ့ကို ၁ မိုင်ခွဲလောက် ပြေးတာက စိတ်ရောကိုယ်ပါ ကျန်းမာစေနိုင်သလို ဗိုက်အဆီကျစေဖို့ရော ကြွက်သားတွေ သန်မာစေဖို့ပါ ထောက်ကူပေးနိုင်ပါတယ်။ ဒါကြောင့် ဗိုက်အဆီကျစေချင်တယ်ဆိုရင်တော့ ပုံမှန်လေး ပြေးပေးပါ။

၃ – Plank ထောက်ပါ

Plank ထောက်တာက ခန္ဓာကိုယ် အချိုးအစားကို ဟန်ချက်ညီစေသလို ဗိုက်ချပ်စေဖို့လည်း ထောက်ကူ ပေးပါတယ်။ Plank ထောက်တာက လက်ပျဉ်ကိုင်းတာကို သက်သာစေသလို ရင်သားတွေနဲ့ တင်သားတွေကိုလည်း သူ့နေရာနဲ့သူ ကောင်းစွာ ဖွံ့ဖြိုးစေပြီး ဗိုက်ချပ်စေဖို့လည်း ထောက်ကူပေးနိုင်ပါတယ်။ 

၄ – Cobra ပို့စ် လုပ်ပါ

Cobra ပို့စ်ဆိုတာက ယောဂပို့စ် တစ်ခုပေါ့။ ဒီပို့စ်လုပ်ဖို့ ကြမ်းပြင်မှာ မှောက်ရက်အနေအထား နေပြီး ခါးရဲ့ ဘေးတစ်ဖက်တစ်ချက်မှာ လက်ကို ထောက်လို့ ခါးအထက် အပေါ်ပိုင်းကို တောင့်နိုင်သမျှတောင့်ပြီး အပေါ်ပိုင်းကို ကြမ်းပြင်ကနေ လွတ်အောင် ကြွပြီး ခေါင်းကို မော့ထားပါ။

ပို့စ်ကို စမလုပ်ခင်မှာ အသက်ကို ဝအောင်ရှူပြီး ပို့စ်ကို စလုပ်ချိန်မှာ အသက်အောင့်ထားလို့ ပြန်ပြီး ပြေလျော့လိုက်ချိန်မှ အသက်ကို ရှူပါ။ ၇ ကျော့ – ၈ ကျော့လောက် လုပ်ပြီး ပုံမှန်လေး လုပ်ပေးပါ။

၅ – Bicycle crunch လုပ်ပါ

Bicycle crunchလုပ်တာက ဗိုက်ကြွက်သားတွေကို ကျစ်လျစ်စေပြီး ပေါင်နဲ့ တင်ပဆုံ ကြွက်သားတွေကို သန်မာစေနိုင်ပါတယ်။ ဒီလေ့ကျင့်ခန်းကို လုပ်တော့မယ်ဆိုရင်တော့ အရင်ဆုံး ပက်လက်လှဲလိုက်ပါ။ ပြီးရင် ခေါင်းနောက်ဖက်ကို လက်နှစ်ဖက်ထည့်ပါ။ ပြီးရင် ဗိုက်အားကို သုံး၊ ကိုယ်ကို ကြွပြီး ဘယ်တံတောင်နဲ့ ညာဘက်ဒူး၊ ညာတံတောင်နဲ့ ဘယ်ဘက်ဒူးကို ထိပေးပြီး တစ်လှည့်စီ လုပ်ပေးပါ။ အကြိမ် ၂၀ ကနေ ၃၀ လောက် လုပ်ပေးပါ။ 

ဒီလေ့ကျင့်ခန်းလေးတွေကို ပုံမှန်လေး လုပ်ပေးတာက လေဒီလေးတွေကို ဗိုက်အဆီကျစေပြီး အဆီပိုကင်းပြီး ကျစ်လျစ်လှပတဲ့ ခန္ဓာကိုယ်ကို ပိုင်ဆိုင်နိုင်စေမှာပါ။