ကိုယ်ဝန်ဆောင်ခြင်းဟာ သင်ထင်ထားတာထက် ပိုပြီး သင့်ခန္ဓါကိုယ်ကို ပြောင်းလဲပစ်နိုင်ပါတယ်။ ပုခုံးတွေ၊ ကျော်တွေ၊ ခြေထောက်တွေ နာကျင်မှုတွေကို ဖြစ်စေနေိုင်ပါတယ်။ သင့်ရဲ့ Center of gravity ကိုလည်း ပြောင်းလဲပစ်နိုင်တာကြောင့် ကိုယ်ဝန်ဆောင်အမျိုးသမီးတွေဟာ ချော်လဲလွယ်တာပေါ့။ ကိုယ်ဝန်ဆောင်ယောဂဟာ ဒီပြဿနာတွေအားလုံးအတွက် အဆင်ပြေနိုင်ပါတယ်။ ခန္ဓါကိုယ်ကို ပိုသန်မာစေပြီး မွေးဖွားမယ့်နေ့ထိ ပြင်ဆင်ထားနိုင်ပါတယ်။ ဒီဆောင်းပါးမှာတော့ ကိုယ်ဝန်ဆောင်အမျိုးသမီးတွေ ကြည့်သင့်တဲ့ ထိပ်တန်းယောဂကျင့်စဉ်တွေကို ဖော်ပြပေးထားပါတယ်။

၁။ The Standing Mountain

ဒါကတော့ ယောဂသင်တန်းအများစုရဲ့ စစချင်းကျင့်စဉ်ပါပဲ။ ဒါကသင့်ရဲ့ ကြွက်သားတွေကို အနားရစေပြီး နောက်ထပ် ပိုခက်ခဲတဲ့ လှုပ်ရှားမှုတွေအတွက် ခန္ဓါကိုယ်ကို အသင့်ပြင်ထားပေးနိုင်ပါတယ်။ ခါးအကျယ်ထက်ပိုကျယ်အောင် ခြေထောက်နှစ်ဘက်ကို ကားရပ်လိုက်ပါ။ ခြေမတွေကို တစ်ဖြောင့်တည်းထားပြီး ဒူးကို ဖြည်းဖြည်းချင်းကွေးပါ။ လက်တွေကိုတော့ နှလုံးပေါ်မှာတင်ထားပါ။ မျက်လုံးတွေမှိတ်လိုက်ပြီး အသက်ကို ပြင်းပြင်းရှူပါ။ အသက်ရှူလိုက်တဲ့အချိန်မှာ လက်မောင်းတွေကို ခေါင်းအပေါ်ဘက်နဲ့ နောက်ဘက်ကို ဆန့်ထုတ်လိုက်ပါ။ အသက်ပြန်ရှူထုတ်ပါ။ ပြီးတော့ လက်တွေကို နှလုံးပေါ် ပြန်တင်ထားလိုက်ပါ။ ဒီအနေအထားကိုပဲ ဆယ်ကြိမ်လုပ်ပါ။

၂။ The Supported Triangle

ဒီတြိဂံပို့စ်ကတော့ သင့်ခန္ဓါကိုယ်တစ်ခုလုံးကို သန်မာစေပါတယ်။ ခါးအကျယ်ထက် ခြေထောက်တွေကို ပိုကားလိုက်ပါ။ ညာဘက်ခြေချောင်းလေးတွေကို ရှေ့ကိုဦးတည်ပြီး ဘယ်ဘက်ခြေချောင်းတွေကိုတော့ အပြင်ဘက်လှည့်ထားပါ။ ဘယ်ဘက်ခြေထောက်ကိုကွေးပြီး ဘယ်ဘက်လက်ကို ပေါင်ပေါ်တင်ထားပါ။ မျက်လုံးကတော့ ကြမ်းပေါ်သာ အာရုံစိုက်ပါ။ အသက်ရှူသွင်းပါ။ ပြီးရင်တော့ ပြန်ရှူထုတ်ပြီး ညာက်လက်မောင်းကို အပေါ်ဆွဲတင်လို့ ခေါင်းကိုလှည့်ပြီး အပေါ်ကို ကြည့်ပါ။ ပိုပြီး အထောက်အကူဖြစ်စေဖို့ ဘယ်ဘက်လက်မောင်းကိုပါ ပေါင်ပေါ်တင်ထားပါ။ ညာဘက်လက်မောင်းကိုပြန်ချတဲ့အခါ အသက်အောင့်ပြီး ခြေထောက်ကိုပြန်ဖြောင့်ပါ။ ပြီးရင်တော့ နဂိုပုံစံကိုပြန်သွားပါ။ ဘက်ပြောင်းလုပ်ပါ။ ဟိုဘက်ဒီဘက်ကို အားလုံး ၅ကြိမ်လေ့ကျင့်ပါ။

၃။ The supported Squat

ဒီအနေအထားအတွက်တော့ ခေါင်းအုံးတွေလိုပါလိမ့်မယ်။ ခေါင်းအုံးပေါ်မှာ ခြေထောက်ကို ခါးအကျယ်ထက် ပိုကျယ်အောင် ခွထားပါ။ ဒူးကို Low squat အနေအထားနဲ့ ကွေးချပြီး ခေါင်းအုံးပေါ်ထိုင်နိုင်တဲ့အထိကွေးပါ။ လက်ဖဝါးတွေကို နှလုံးအလယ်မှာ ဖိထားပါ။ မျက်လုံးကိုမှိန်ပြီး နှာခေါင်းကတစ်ဆင့် အသက်ပြင်းပြင်းရှူကာ မိန်းမကိုယ်တစ်ဝိုက်က ကြွက်သားတွေကို ဖြေလျော့လိုက်ပါ။ ဒီအနေအထားကို အသက်ဆယ်ကြိမ်ရှူပြီးတဲ့ထိနေပါ။ ဒီအနေအထားဟာ တင်ပါးဆုံကြမ်းပြင်ကို သန်မာစေတဲ့အတွက် လမစေ့ဘဲမွေးနိုင်တဲ့ လက္ခဏာတွေကို ခံစားနေရတဲ့ မိခင်လောင်းတွေအတွက် အထောက်အကူဖြစ်စေပါတယ်။

ကိုယ်ဝန်ဆောင်ယောဂဟာ ကိုယ်ဝန်ဆောင်အမျိုးသမီးတွေအတွက် ဘယ်တုန်းကမှ ယောဂကို မလေ့ကျင့်ခဲ့ဖူးရင်တောင်မှအန္တရာယ်ကင်းတယ်လို့ဆိုပါတယ်။ ယောဂဟာ မိခင်တွေအတွက် စိတ်ပိုင်းဆိုင်ရာရော၊ ရုပ်ပိုင်းဆိုင်ရာကိုပါ ကြံ့ခိုင်အောင် ပြင်ဆင်ပေးပါတယ်။ ယောဂကို ပုံမှန်လေ့ကျင့်တဲ့ ကိုယ်ဝန်ဆောင်အမျိုးသမီးတွေဟာ ပိုပြီးလွယ်လွယ်ကူကူ မွေးဖွားနိုင်တယ်လို့ ဆိုပါတယ်။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့်ကုသမှုများမပြုလုပ်ပေးပါ။