တံတောင်ဆစ်ထဲက နာကျင်ကိုက်ခဲတာကို သက်သာစေမယ့် အိမ်တွင်းကုထုံးများ

တံတောင်ဆစ်ဆိုတာက လက်တွေ ကွေးဖို့ဆန့်ဖို့ ဟန်ချက်ထိန်းဖို့ အဓိက လုပ်ဆောင်ပေးနေတဲ့ အစိတ်အပိုင်းလေး တစ်ခုပါ။ တံတောင်ဆစ်က အလုပ်များသလို ထိခိုက်နိုင်ခြေလည်း များပါတယ်။ တံတောင်ဆစ် ထိခိုက်တာက အတော်လေး နေရခက်ပါတယ်။ ဒီတစ်ခေါက်တော့ မတော်တဆထိခိုက်မှု တစ်ခုခုကြောင့် တံတောင်ဆစ်ထဲက နာကျင်ကိုက်ခဲတာကို သက်သာစေမယ့် အိမ်တွင်းကုထုံးများကို ပြောပြပေးချင်ပါတယ်။

တံတောင်ဆစ် နာကျင်တယ်ဆိုတာ ဘာလဲ

တံတောင်ဆစ် နာကျင်တယ်ဆိုတာက တံတောင်ဆစ်ထဲကနေ တအိအိနဲ့ ကိုက်နေတာမျိုးပါ။ နာကျင်မှုကို အမြဲလိုလို ပြင်းပြင်းထန်ထန် ခံစားနေရတာမျိုးပါ။ တံတောင်ဆစ် နာကျင်တာက ထိခိုက်မိတာကြောင့် ဖြစ်နိုင်သလို အဆစ်လွဲတာ၊ အရွတ်ရောင်၊ အရိုးအက်တာလိုမျိုး ကျန်းမာရေး ပြဿနာတွေကြောင့်လည်း တံတောင်ဆစ်မှာ ထိခိုက်နာကျင်တာမျိုးတွေ ခံစားရနိုင်ပါတယ်။

ဘာတွေကြောင့် တံတောင်ဆစ်နာကျင်ရတာလဲ

တံတောင်ဆစ်ကို နာကျင်စေနိုင်တဲ့ အကြောင်းအရင်းတွေကတော့ အများကြီးပါ။ တံတောင်ဆစ်ကို အလွန်အကျွံ အသုံးပြုတာ၊ အဆစ်တွေ ထိခိုက်မိတာ၊ အလုပ်အကိုင်၊ အားကစား လုပ်တာ၊ မတော်တဆ ထိခိုက်မိတာတွေကြောင့် တံတောင်ဆစ် နာကျင်ကိုက်ခဲရတာပါ။

• တွယ်ဆက်တစ်ရှူးတွေ ရောင်ရမ်းတာ
• အရွတ်ရောင်တာ
• တံတောင်ဆစ် ရောင်ရမ်းတာ
• ကြွက်သားရောင်ရမ်းတာ
• ထိခိုက်မိတာ
• အာရုံကြောကို ဖိမိတာ
• အရိုးပွတာ
• အဆစ်ရောင်နာ
• အဆစ်လွဲတာ
• အရိုးအက်တာ
• အကျိတ်
• အရိုးပိုးဝင်တာတွေကြောင့် တံတောင်ဆစ်ထဲက နာကျင်ကိုက်ခဲနိုင်ပါတယ်။

တံတောင်ဆစ်ထဲက နာကျင်ကိုက်ခဲတာကို သက်သာစေမယ့် အိမ်တွင်းကုထုံးများ

တံတောင်ဆစ်ထဲက နာကျင်ကိုက်ခဲတာကို သက်သာစေမယ့် အိမ်တွင်းကုထုံးများ ကတော့

• အကြောလျှော့ပါ

တစ်ခါတစ်လေမှာ တံတောင်ဆစ် နာကျင်ကိုက်ခဲတာဟာ အကြောတွေနဲ့ ကြွက်သားတွေ တောင့်တင်းနေတာကြောင့် ဖြစ်နိုင်ပါတယ်။ ဒါကြောင့် တံတောင်ဆစ် နာကျင်တာကို သက်သာစေဖို့ဆိုရင် အရင်ဆုံး လက်တွေကို ဖြည်းဖြည်းချင်း ဆန့်ပြီး အကြောတွေကို ဖြေလျှော့ပါ။ ဒီလို အကြောလျှော့ပေးတာက တံတောင်ဆစ် နာကျင်တာကို သက်သာစေနိုင်ပါတယ်။

• နှိပ်နယ်ပါ

တံတောင်ဆစ်က ပြင်းပြင်းထန်ထန် ထိခိုက်မိတာ၊ အရိုးကျိုးတာတွေကြောင့် နာကျင်ကိုက်ခဲတာမျိုး မဟုတ်တဲ့ အခြားသော တံတောင်ဆစ် နာကျင်ကိုက်ခဲမှုကို သက်သာစေဖို့အတွက် နာကျင်နေတဲ့ နေရာတဝိုက်ကို ခပ်ဖွဖွလေး နှိပ်ပေးပါ။

• အနားယူပါ

တံတောင်ဆစ် နာကျင်တာမှ မဟုတ်ပါဘူး။ ဘာကြောင့်ပဲ နာနာ ကြွက်သားနဲ့ အရိုးတွေ နာကျင်ကိုက်ခဲမှုကို သက်သာစေဖို့ဆိုရင် ပြည့်ပြည့်ဝဝ အနားယူဖို့ လိုပါမယ်။ နာကျင်နေတဲ့ တံတောင်ဆစ်ကို လှုပ်ရှားတာမျိုး အားစိုက်လုပ်ရတာမျိုးတွေကို မလုပ်ဘဲ အနားပေးလိုက်ပါ။

• ရေခဲဝတ် ကပ်ပါ

နာတာသိပ်မကြာသေးဘူးဆိုရင် ရောင်ရမ်းနေတဲ့ တံတောင်ဆစ်ကို ရေခဲဝတ် ကပ်တာကလည်း တံတောင်ဆစ် နာကျင်ကိုက်ခဲတာကို သိသိသာသာ သက်သာစေနိုင်ပါတယ်။ ဒါကြောင့် တံတောင်ဆစ်အရောင်ကျစေဖို့ဆိုရင် နာကျင်နေတဲ့ နေရာကို ရေခဲဝတ် ကပ်ပေးပါ။ နာရီပိုင်းလောက်ခြားပြီး ၁၀ မိနစ်ခန့် ရေခဲဝတ် ကပ်ပေးပါ။

• ရေနွေးဝတ် ကပ်ပါ

တံတောင်ဆစ် ကိုက်တာကို သက်သာစေနိုင်တဲ့ နောက်ထပ်နည်းလမ်း တစ်ခုကတော့ ရေနွေးဝတ် ကပ်ပေးပါ။ နာတာ ၂-၃ရက်‌လောာက်ကြာသွားရင် ရေနွေးအိတ် ကပ်ပေးတာလည်း လုပ်ပေးလို့ ရပါတယ်။ ရေနွေးအိတ်ကို ၁၀ မိနစ်လောက်ကပ်ပြီးတိုင်း နာရီပိုင်းလောက် ခြားပြီး ထပ်ကပ်ပေးပါ။

• နနွင်း

နနွင်းက အရောင်ကျစေနိုင်ပြီး နာကျင်ကိုက်ခဲမှုကို သက်သာစေနိုင်ပါတယ်။ ဒါကြောင့် တံတောင်ဆစ် နာကျင်ကိုက်ခဲလာပြီဆိုရင် နနွင်းကို ရေနွေးပူပူနဲ့ ရောဖျော်ပြီး ဖြစ်ဖြစ် နွားနို့ပူပူထဲကို ထည့်ပြီးပဲ ဖြစ်ဖြစ် သောက်ပေးလို့ ရပါတယ်။ တစ်နေ့ကို တစ်ခွက်လောက်ပဲ သောက်ပေးပါ။

• ချင်း ( ဂျင်း) ရေနွေးကြမ်း

နာကျင်ကိုက်ခဲမှုတွေကို သက်သာစေဖို့ဆိုရင် ချင်း (ဂျင်း) လက်တစ်ဆစ်စာကို ထုပြီး ရေနွေးဆူဆူထဲမှာ ၁၅ မိနစ်လောက် စိမ်ထားပြီး ခပ်နွေးနွေးအနေအထားမှာ သောက်ပေးပါ။ တစ်နေ့ကို တစ်ခွက်လောက် သောက်ပေးရင် လုံလောက်ပါတယ်။

ဒီနည်းလမ်းတွေကို သုံးကြည့်ပေမယ့် ၅ ရက် ကြာတဲ့အထိ မသက်သာဘူးဆိုရင် တံတောင်ဆစ် နာကျင်တာကို သက်သာစေဖို့အတွက် လိုအပ်တဲ့ ကုသမှုကို ခံယူဖို့ အကြံပြုပါရစေ။