အီဂျစ်နိုင်ငံံက ဝူဟန်ကိုရိုနာဗိုင်းရပ်စ် ကူးစက်ခံထားရသူအမျိုးသားဟာ ပြန်လည်ကျန်းမာလာနေပြီဖြစ်တယ်လို့ World Health Organization (WHO) က အတည်ပြုလိုက်ပါတယ်။
၁၈၊ ဖေဖော်ဝါရီ၊ ၂၀၂၀ – COVID-19 ဝေဒနာရှင်တွေကို ကုသပေးနေတဲ့ ဝူဟန်ဆေးရုံက ဒါရိုက်တာဖြစ်သူ ဒေါက်တာ လျူကျီမင်းဟာ အဆိုပါရောဂါကူးစက်ခံရပြီး ကွယ်လွန်သွားခဲ့ပါတယ်။ အသက် ၅၁ နှစ်အရွယ်သာရှိသေးတဲ့ ဒေါက်တာလျူဟာ ကျန်းမာရေးဝန်ထမ်း ၁၇၀၀ ကို ဦးဆောင်နေသူဖြစ်ပါတယ်။
ဂျပန်နိုင်ငံ ယိုကိုဟားမားမှာ သောင်တင်နေတဲ့ Diamond Princess သင်္ဘောပေါ်ကနေ လူနာသစ် ၈၈ ဦး ထပ်မံတွေ့ရှိခဲ့ပါတယ်။
ဖိလစ်ပိုင် ခရီးသွားလုပ်ငန်းအဖွဲ့ချုပ်က COVID-19 ရောဂါရဲ့ အကျိုးဆက်တွေကြောင့် ဖိလစ်ပိုင်ခရီးသွားလုပ်ငန်းအနေနဲ့ ပီဆို ဘီလီယံနဲ့ချီ နစ်နာမှုရှိနေတယ်လို့ ထုတ်ဖော်ကြေညာခဲ့ပါတယ်။ ဖိလစ်ပိုင်နိုင်ငံဟာ ရောဂါကပ်ဆိုးကြောင့် တရုတ်ခရီးသွားတွေကို ပြည်ဝင်ခွင့်ပိတ်ပင်ခဲ့သလို ခရီစဉ်အများအပြားကိုလည်း ဖျက်သိမ်းခဲ့ရပါတယ်။
နာမည်ကျော် နည်းပညာလုပ်ငန်း Apple ကလည်း တုပ်ကွေးကပ်ဆိုးကြောင့် ၂၀၂၀ ခုနှစ် ပထမ ၃ လပတ်အတွက် သူတို့ ပစ်မှတ်ထားနေတဲ့ ဝင်ငွေရရှိဖို့ မလွယ်ကူတော့ဘူးလို့ ကြေညာခဲ့ပါတယ်။ တခြားနည်းပညာကုမ္ပဏီတွေလိုပဲ Apple ဟာလည်း ဥရောပဈေးကွက်နဲ့ တရုတ်ဈေးကွက်တို့မှာ ဝင်ငွေသိသိသာသာ ကျဆင်းလာနေပါတယ်။
COVID-19 ကြောင့် သေဆုံးသူ ၉၈ ဦးတိုးလာခဲ့ပါတယ်။ သေဆုံးသူစုစုပေါင်း ၁၈၈၆ ဦးအထိ ရှိလာခဲ့ပါတယ်။ တရုတ်ကျန်းမာရေးဌာနရဲ့ ကြေညာချက်အရ စုစုပေါင်း လူနာအရေအတွက်ဟာလည်း ၇၂၄၃၆ ဦးအထိရှိလာခဲ့ပြီဖြစ်ပါတယ်။ တစ်ဖက်မှာလည်း ရောဂါဆိုးကနေ ပြန်လည်သက်သာပျောက်ကင်းလာသူ အရေအတွက်လည်း တိုးပွားလာနေပြီး ၁၂၀၀၀ အထိရှိလာပြီဖြစ်ပါတယ်။
ဟောင်ကောင်ဟာ COVID-19 ကာကွယ်ရေးနဲ့ ကုသရေးလုပ်ငန်းတွေအတွက် ဘက်ဂျက်ကို အမေရိကန်ဒေါ်လာ ၃.၀၆ ဘီလီယံအထိ တိုးမြှင့်သတ်မှတ်လိုက်ပါတယ်။
Singapore Airlines ဟာ နိုင်ငံတကာက အဓိကမြို့တော်ကြီးတွေဆီကို ပျံသန်းမယ့် ခရီးစဉ်တစ်ချို့ကို ရပ်နားလိုက်ပြီဖြစ်ပါတယ်။ ရောဂါပိုးပျံ့ပွားမှုကို တားဆီးနိုင်ဖို့ ခုလို ဆုံးဖြတ်လိုက်တာဖြစ်ပါတယ်။
၁၇၊ ဖေဖော်ဝါရီ၊ ၂၀၂၀ – ထိုင်းမှာ လူနာ ၃၅ ဦးအထိဖြစ်လာပြီး ဟောင်ကောင်မှာလည်း လူနာ ၆၀ ပြည့်သွားပါတယ်။ စင်ကာပူမှာတော့ လူနာ ၇၇ ဦးအထိ ရှိလာခဲ့ပါတယ်။ တောင်ကိုရီးယားမှာတော့ ၃၀ ဦးအထိရှိနေပြီဖြစ်ပါတယ်။
ဂျပန်မှာတော့ ရောဂါပိုးကူးစက်ခံထားရသူအရေအတွက် ၇ ဦးအထိ ထပ်မံတိုးတက်လာခဲ့ပြီး ပြည်တွင်းမှာ လူနာ ၆၆ ဦးအထိ ရှိလာပါတယ်။ Diamond Princess သင်္ဘောပေါ်က လူနာအရေအတွက်ကလည်း နေ့စဉ်ရက်ဆက် ဆက်လက်တိုးပွားနေခဲ့ပြီး စံချိန်တင် ၉၉ ဦးအထိ တွေ့ရှိခဲ့တာကြောင့် အဆိုပါသင်္ဘောပေါ်မှာ လူနာ စုစုပေါင်း ၄၅၄ ဦးအထိ ရှိသွားပါတယ်။
HSBC ဘဏ်က အာရှတိုက်ရဲ့ စီးပွားရေးဟာ မနှစ်ကထက် ၃၀% အထိကျဆင်းမယ်လို့ သုံးသပ်လိုက်ပါတယ်။ COVID-19 ရောဂါရဲ့ သက်ရောက်မှုတွေဟာ အာရှဈေးကွက်ကို သိသိသာသာထိခိုက်စေလိမ့်မယ်လို့ အဆိုပါဘဏ်ကသုံးသပ်ခဲ့တာပါ။
WHO ရဲ့ ထုတ်ပြန်ချက်အရ ကူးစက်ခံရသူတွေထဲက ၂၀% သာ စိုးရိမ်ရတယ်လို့ ဆိုထားပါတယ်။
ဂျပန်နိုင်ငံဟာ ဘုရင့်မွေးနေ့ပွဲကျင်းပဖို့ ရှိနေပေမယ့် COVID-19 ရောဂါကပ်ဆိုးကြောင့် အများနဲ့ဆိုင်တဲ့ ပွဲလမ်းတွေမလုပ်တော့ဘူးလို့ ကြေညာခဲ့ပါတယ်။ အပြေးသမားပေါင်း ၃၈၀၀၀ ပါဝင်မဲ့ တိုကျို မာရသွန်ပွဲကိုလည်း မကျင်းပတော့ဘူးလို့ ဆက်လက်ကြေညာခဲ့ပါတယ်။
မြန်မာ – မြန်မာနိုင်ငံမှာ COVID-19 ရောဂါ သံသယရှိလူနာအရေအတွက် တိုးပွားလာခြင်းမရှိဘူးလို့ ကျန်းမာရေးဝန်ကြီးဌာနက ထုတ်ပြန်လိုက်ပါတယ်။ လက်ရှိမှာ သံသယလူနာ ၈ ဦးရှိနေပြီး စိုးရိမ်ရတာမျိုးမရှိဘူးလို့လည်း ကြေညာချက်မှာ ဖော်ပြထားပါတယ်။ အပြည်ပြည်ဆိုင်ရာ လေဆိပ် (၃) ခုနဲ့ တရားဝင်နယ်စပ် ဝင်ပေါက်/ထွက်ပေါက် (၂၇) ခုမှာ အဖျားရောဂါ စောင့်ကြပ်ကြည့်ရှုမှုတွေ ဆက်လက်ပြုလုပ်နေပြီး သံသယ လူနာ/စောင့်ကြည့်လူနာသစ် ထပ်မတိုးလာဘူးလို့ အဆိုပါ ကြေညာချက်မှာ ဖော်ပြထားပါတယ်။
မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန -၂ မှာကျင်းပမယ့် e-Government ဆွေးနွေးပွဲမှာ အဖျားတိုင်းကိရိယာ (Thermal Scanner) တပ်ဆင်ထားမှာဖြစ်တယ်လို့လည်း အဆိုပါကြေညာချက်မှာ ထုတ်ပြန်ထားပါတယ်။
ဒါ့အပြင် မန္တလေးတိုင်းဒေသကြီး၊ မန္တလေးမြို့ရှိ ကန်တော်နဒီဆေးရုံကို လူနာသီးခြား ထားရှိရန် (Designated Hospital) အဖြစ်သတ်မှတ်ပြီး လူနာသီးခြားထားရှိရန် အခန်းများ (Isolation Ward) နှင့် အထူးကြပ်မတ် ကုသဆောင် (Intensive Care Unit-ICU) တွေ ထားရှိသွားမယ်လို့ သိရပါတယ်။
အမျိုးသား ကျန်းမာရေး ဓာတ်ခွဲမှုဆိုင်ရာဌာနကို WHO၊ ထိုင်းတပ်မတော် သုတေသနဌာ၊ ဂျပန်သံရုံး၊ JICA တို့ရဲ့ ကူညီမှုနဲ့ အဆင့်မြှင့်တင်မှုပြုလုပ်နေပြီး လာမယ့် ၂၀ ရက်နေ့ကနေစတင်ပြီး ရောဂါပိုး စစ်ဆေးမှုတွေကို အဆိုပါဌာနမှာတင် ပြုလုပ်နိုင်တော့မှာဖြစ်တယ်လို့ သိရပါတယ်။
၁၆၊ ဖေဖော်ဝါရီ၊ ၂၀၂၀ – နောက်ထပ် လူနာ ၇၀ ဦး Diamond Princess သင်္ဘောပေါ်မှာ ထပ်မံတွေ့ရှိပါတယ်။ ဒါကြောင့် စုစုပေါင်း အရေအတွက်ဟာလည်း ၃၅၅ ဦးအထိ တိုးမြင့်လာခဲ့ပါတယ်။ ဂျပန်နိုင်ငံအနေနဲ့ တိုင်းပြည်အတွင်းမှာလည်း လူနာအရေအတွက် ၅၉ ဦးအထိရောက်အောင် ဆက်လက်တိုးလာနေတာမို့ ဖိအားများလာခဲ့ပါတယ်။
ထိုင်ဝမ်မှာ COVID-19 လူနာတစ်ဦး ပထမဆုံးအကြိမ် သေဆုံးမှုဖြစ်ပေါ်ခဲ့ပါတယ်။ အသက် ၆၀ အရွယ် အမျိုးသားတစ်ဦးဖြစ်ပါတယ်။ လူနာအရေအတွက်ဟာလည်း ၂၀ ဦးအထိရှိလာပါတယ်။
စင်ကာပူမှာ ၇၅ ဦးအထိရှိလာပြီး ဟောင်ကောင်မှာတော့ ၅၇ ဦးအထိရှိလာပါတယ်။ တောင်ကိုရီးယားမှာတော့ ၂၉ ဦးအထိ ဖြစ်ပွားနေပါတယ်။
မြန်မာ – ကျန်းမာရေးဝန်ကြီးဌာနဟာ ဝူဟန်မြို့အထိ အထူးလေယာဉ်နဲ့ သွားရောက်ခေါ်ဆောင်ခဲ့ပြီး မန္တလေးမြို့၊ ကန်တော်နဒီဆေးရုံမှာ ၁၄ ရက်ကြာ စောင့်ကြည့်မှု ပြုလုပ်ထားတဲ့ ကျောင်းသား၊ ကျောင်းသူ ၅၉ ဦးနဲ့ သွားရောက်ခေါ်ဆောင်ခဲ့သည့် ကျန်းမာရေးဝန်ထမ်း ၃ ဦးတို့ကို နေရပ်သို့ ပြန်ခွင့်ပြုခဲ့ပါတယ်။
၁၅၊ ဖေဖော်ဝါရီ၊ ၂၀၂၀ – မလေးရှားမှာ အမေရိကန်နိုင်ငံသား ခရီးသွားတစ်ဦးအပါအဝင် လူနာ သစ် ၃ ဦးတိုးလာခဲ့ပါတယ်။ ထိုင်းနိုင်ငံမှာလည်း လူနာအရေအတွက် ၃၄ ဦးအထိ ရှိလာခဲ့ပါတယ်။ စင်ကာပူမှာတော့ လူနာအရေအတွက် ဆက်လက်တိုးတက်နေခဲ့ပြီး ၇၂ ဦးအထိ ရှိလာပါတယ်။
ဥရောပမှာ ပထမဆုံး COVID-19 ရောဂါနဲ့ လူသေမှုဟာ ပြင်သစ်မှာ ဖြစ်ပွားခဲ့ပါတယ်။ ရောဂါပိုးကူးစက်ခံထားရကြောင့် ရှာဖွေတွေ့ရှိထားတဲ့ ခရီးသွားတစ်ဦးဖြစ်ပြီး အသက် ၈၀ အရွယ် တရုတ်လူမျိုးတစ်ဦးဖြစ်ပါတယ်။
Diamond Princess သင်္ဘောကနေ လူနာသစ် ၆၇ ဦးထပ်မံစမ်းသပ်တွေ့ရှိတယ်လို့ ဂျပန်အာဏာပိုင်တွေက အတည်ပြုလိုက်ပါတယ်။ သင်္ဘောပေါ်မှာ လူနာ ၂၈၅ ဦးအထိရှိလာခဲ့တာဖြစ်ပါတယ်။
မြန်မာ – ဖေဖော်ဝါရီလ ၉ ရက်နေ့တုန်းက မြန်မာနိုင်ငံကို ရောက်ရှိလာတဲ့ တရုတ်အမျိုးသားတစ်ဦးမှာ သံသယလက္ခဏာတွေ ပြသလာတာမို့ ဝေဘာဂီအထူးကုဆေးရုံကို ပို့ဆောင်ကာ ဓါတ်ခွဲစပ်သပ်စစ်ဆေးနေတယ်လို့ ဝန်ကြီးဌာနက ထုတ်ပြန်ပါတယ်။ လူနာဟာ ဖျားနေပေမယ့် လတ်တလောစစ်ဆေးချက်တွေအရ ပြင်းထန်အသက်ရှူလမ်းကြောင်းဆိုင်ရာရောဂါ လက္ခဏာတွေ မတွေ့ရှိသေးပါဘူး။ စောင့်ကြည့်ကုသနေတဲ့ သံသယ လူနာ (၉) ဦးအထိရှိနေပြီး ၎င်းတို့ရဲ့ ကျန်းမာရေးအခြေအနေတွေဟာ ကောင်းမွန်နေတယ်လို့ ကြေညာခဲ့ပါတယ်။
၁၄၊ ဖေဖော်ဝါရီ၊ ၂၀၂၀ – ဟောင်ကောင်မှာတော့ ရောဂါဖြစ်ပွားသူဦးရေဟာ ဆက်လက်တိုးတက်နေခဲ့ပြီး ၅၆ ဦးအထိ ဖြစ်လာပါတယ်။ စင်ကာပူမှာလည်း လူနာအရေအတွက် ၆၇ ဦးအထိ ဖြစ်လာပါတယ်။ ဂျပန်မှာတော့ ပြည်မမှာ အရေအတွက်တိုးလာခဲ့ပြီး ၃၇ ဦးအထိဖြစ်လာပါတယ်။
အာဖရိကမှာ ပထမဆုံးသော COVID-19 ရောဂါခံစားနေရသူကို အီဂျစ်နိုင်ငံမှာ သတင်တွေ့ရှိခဲ့ပြီး နိုင်ငံခြားသားတစ်ဦးဖြစ်ကြောင်း အာဏာပိုင်တွေက ကြေညာခဲ့ပါတယ်။
မြန်မာ – COVID-19 နဲ့ သက်ဆိုင်တဲ့ ရောဂါကျန်းမာရေးအသိပညာပေး အချက်အလက်တွေကို မြန်မာဘာသာနဲ့ သာမက တရုတ်ဘာသာနဲ့ပါ ဖြန့်ဝေဖို့ စီစဉ်နေတယ်လို့ ကျန်းမာရေးဝန်ကြီးဌာနက ကြေညာခဲ့ပါတယ်။
၁၃၊ ဖေဖော်ဝါရီ၊ ၂၀၂၀ – ဂျပန်နိုင်ငံအတွင်းမှာ လူနာ ၃၃ ဦးအထိ ရှိလာပြီး Diamond Princess သင်္ဘောပေါ်မှာတော့ လူနာ ၂၁၈ ဦးအထိ အရေအတွက်တိုးလာခဲ့ပါတယ်။ ဒါ့အပြင် ဂျပန်မှာ သေဆုံးမှုလည်း ဖြစ်ခဲ့ပါတယ်။
ဟောင်ကောင်က ၅၃၊ ဗီယက်နမ်က ၁၆ နဲ့ မလေးရှားက ၁၉ ဦးအသီးသီးရှိနေပြီလို့ သက်ဆိုင်ရာ အာဏာပိုင်တွေက ကြေညာခဲ့ပါတယ်။
စင်ကာပူမှာ လူနာအရေအတွက် ၅၈ ဦးအထိ ရှိလာခဲ့ပြီး ပရော်ဖက်ဆာတစ်ယောက် ရောဂါပိုးကူးစက်ခံထားရကြောင်း အတည်ပြုခဲ့တဲ့ စင်ကာပူ အမျိုးသား တက္ကသိုလ်က ဖေဖော်ဝါရီလ ၁၄ ရက်နေ့ကနေ ၂၁ ရက်နေ့အထိကို e-learning စနစ်နဲ့သာ သင်ကြားပေးတော့မယ်လို့ ကျောင်းသားတွေထံ အသိပေးလိုက်ပါတယ်။
အမေရိကန်မှာ ၁၅ ဦးမြောက်လူနာကို ထပ်မံတွေ့ရှိခဲ့ရပြီး တက္ကဆက်ပြည်နယ်က စစ်စခန်းတစ်ခုမှာဖြစ်ပါတယ်။
တရုတ်အစိုးရဟာ ဟူဘေးပြည်နယ်ထဲက မရှိမဖြစ်မဟုတ်တဲ့ ကုမ္ပဏီလုပ်ငန်းတွေကို ဖေဖော်ဝါရီလ ၂၀ ရက်နေ့အထိ လုပ်ငန်းရပ်ဆိုင်းထားဖို့ ကြေညာချက်ထုတ်ပြန်လိုက်ပြီး ကုန်ထုတ်လုပ်ငန်းစက်ရုံ အများအပြား ပါဝင်နေခဲ့ပါတယ်။
အဆိုပါနေ့မှာပဲ ဟူဘေးပြည်နယ်ထဲက ရောဂါပိုး ကူးစက်ခံလူနာအရေအတွက်ကို ထုတ်ပြန်ကြေညာခဲ့ရာမှာ လူနာသစ် ၁၄၈၄၀ ဦးတိုးလာခဲ့ပါတယ်။ ဒါဟာ ၁၂ ရက်နေ့တုန်းက တိုးပွားလာတဲ့ လူနာသစ်အရေအတွက်ထက် ၁၀ ပိုများတဲ့ ပမာဏဖြစ်ပါတယ်။ သေဆုံးမှုဟာလည်း တစ်ရက်အတွင်း ၂၄၂ ဦးအထိရှိခဲ့ပြီး ရှေ့ရက်ကထက် ၂ ဆ တိုးလာတာဖြစ်ပါတယ်။
မြန်မာ – နိုင်ငံတစ်ဝှမ်းမှာ COVID-19 သံသယလူနာ ၁၈ ဦးတွေ့ရှိထားပြီး ၎င်းတို့ကို သက်ဆိုင်ရာ ဒေသဆေးရုံတွေမှာ စောင့်ကြပ်ကြည့်ရှုနေတယ်လို့ ကျန်းမာရေးဝန်ကြီးဌာနက ထုတ်ပြန်ခဲ့ပါတယ်။ လူနာတွေရဲ့ ဆေးစစ်ချက် ဓာတ်ခွဲအဖြေတွေကို စောင့်ဆိုင်းနေဆဲလို့လည်း ကြေညာချက်မှာ ဖော်ပြထားပါတယ်။
COVID-19 ရောဂါအခြေအနေနဲ့ ပတ်သက်ပြီး ကောလဟာလတွေကို မယုံကြဖို့ ဝန်ကြီးဌာနက တိုက်တွန်းထားပြီး သတင်းမှားတွေကို တားဆီးနိုင်ဖို့ Myanmar Facebook Team နဲ့ ပူးပေါင်းဆောင်ရွက်နေတယ်လို့ ဆိုခဲ့ပါတယ်။
၁၂၊ ဖေဖော်ဝါရီ၊ ၂၀၂၀ – Diamond Princess အပျော်စီးသင်္ဘောမှာ လူနာသစ် ၃၉ ဦး ထပ်မံတွေ့ရှိပါတယ်။ သင်္ဘောပေါ်က ခရီးသည်တွေအပြင် လူနာတွေကို စောင့်ရှောက်ပေးနေတဲ့ အရာရှိတစ်ဦးပါ ပါဝင်လာခဲ့ပါတယ်။ သင်္ဘောပေါ်မှာတင် လူနာ ၁၇၄ ဦးအထိရှိလာပြီး ဂျပန်ကုန်းမြေပေါ်မှာတော့ လူနာ ၂၉ ဦးအထိဖြစ်လာပါတယ်။
စင်ကာပူမှာတော့ လူနာ ၅၀ ဦးပြည့်မြောက်သွားပါတယ်။ DBS Bank က ဝန်ထမ်း ၃၀၀ ဟာ သူတို့ ရုံးတည်ရှိရာ Marina Bay Financial Centre Tower 3 မှာ ရောဂါပိုးရှာဖွေတွေ့ရှိခဲ့တာမို့ အလုပ်တွေကို ရပ်ဆိုင်းပေးဖို့ တောင်းဆိုခဲ့ကြပါတယ်။
ဟောင်ကောင်မှာလည်း လူနာ ၅၀ ပြည့်သွားခဲ့ပါတယ်။ ဗြိတိန်မှာ လူနာ ၉ ဦးအထိရှိလာပြီး အမေရိကန်မှာတော့ လူနာ ၁၄ ဦးဖြစ်လာပါတယ်။
မြန်မာ – ဖေဖော်ဝါရီလ ၅ ရက်နေ့မှာ စင်ကာပူနိုင်ငံက ပြန်လည်ရောက်ရှိလာတဲ့ မြန်မာအမျိုးသမီးတစ်ဦးဟာ Coronavirus Disease 2019 (COVID-19) ကူးစက်ခံထားရတဲ့ လူနာနဲ့ အနီးကပ်ထိတွေ့ခဲ့တာမို့ ဝေဘာဂီအထူးကုဆေးရုံကို ပို့ဆောင် စောင့်ကြပ်ကြည့်ရှုနေပြီး အခြေအနေကောင်းမွန်နေတယ်လို့ ဝန်ကြီးဌာနက ထုတ်ပြန်ကြေညာခဲ့ပါတယ်။ လူနာရဲ့ မိသားစုဝင်တွေကိုလည်း Home Quarantine ပြုုလပ်ထားပြီး ၎င်းတို့အနေဖြင့်လည်း ကျန်းမာရေးအခြေအနေ ကောင်းမွန်နေတယ်လို့ ဆိုထားပါတယ်။
၁၁၊ ဖေဖော်ဝါရီ၊ ၂၀၂၀ – ဗီယက်နမ်မှာ လူနာ ၁၅ ဦးအထိရှိလာပါတယ်။ ၃ လသားအရွယ်ကလေးငယ်လေးနဲ့ သူမရဲ့ အဘွားတို့ကူးစက်ခံထားရတာကို အာဏာပိုင်တွေက စစ်ဆေးတွေ့ရှိခဲ့တာပါ။
ဟောင်ကောင်မှာတော့ လူနာ ၇ ဦးထပ်တွေ့ပါတယ်။ ဒါဟာ နောက်ဆုံး ၃ ရက်အတွင်းမှာ ရောဂါပိုးကူးစက်ခံထားရသူ ၂၃ ဦးအထိ တွေ့ရှိခဲ့ရတာဖြစ်ပါတယ်။ စုစုပေါင်းအရေအတွက်ဟာလည်း ၄၉ ဦးအထိရှိလာပါတယ်။ စင်ကာပူမှာလည်း လူနာ ၄၇ ဦးအထိဖြစ်လာပါတယ်။
ဥရောပမှာတော့ ဂျာမနီဟာ အဆိုးဆုံးဖြစ်နေပြီး လူနာ ၁၆ ဦးအထိ ရှိနေခဲ့ပါတယ်။
ကမ္ဘာ့ကျန်းမာရေးအဖွဲ့ WHO က ရောဂါရဲ့ နာမည်ကို COVID-19 လို့ တရားဝင် အမည်သတ်မှတ်လိုက်ပါတယ်။ ဗိုင်းရပ်စ်ကိုတော့ SARS-CoV-2 လို့ ခေါ်ဝေါ်ဖို့ ဆုံးဖြတ်လိုက်ပါတယ်။
မြန်မာ – စောင့်ကြည့်လူနာ ၁၆ ဦးအထိရှိလာပြီလို့ မြန်မာဘက်က ကြေညာခဲ့ပါတယ်။
၁၀၊ ဖေဖော်ဝါရီ၊ ၂၀၂၀ – Diamond Princess ဇိမ်ခံသင်္ဘောကနေ လူနာသစ် ၆၅ ဦးအထိ ထပ်မံတွေ့ရှိခဲ့ရပါတယ်။ ဒါကြောင့် အဆိုပါသင်္ဘောမှာတင် လူနာ ၁၃၅ ဦးအထိ ရှိလာပါတယ်။
ဗြိတိန်မှာတော့ လူနာ ၄ ဦးတပြိုင်နက်တည်း ထပ်တိုးလာခဲ့ပြီး ပြင်သစ်ကနေတဆင့် ကူးစက်တယ်လို့ စွပ်စွဲပါတယ်။
စင်ကာပူမှာလည်း လူနာ အရေအတွက် ၄၅ ဦးအထိရောက်ရှိလာခဲ့ပြီး ကန့်သတ်နယ်မြေကို ဦးဆောင်စီမံနေတဲ့ အရာရှိတစ်ဦးပါ ရောဂါကူးစက်ခံခဲ့ရပါတယ်။
ဟောင်ကောင်မှာတော့ အစုလိုက်အပြုံလိုက်ကူးစက်မှုတွေ ဆက်လက်ဖြစ်ပွားနေခဲ့ပြီး တစ်ရက်တည်းမှာတင် လူနာသစ် ၆ ဦး ထပ်မံတိုးလာခဲ့ပါတယ်။ UAE မှာတော့ ရောဂါကူးစက်ခံထားရသူ ၈ ဦးအထိ ရှိလာခဲ့ပြီး တစ်ဦးဟာ အိန္ဒိယနိုင်ငံသားဖြစ်တယ်လို့ ဒေသခံအာဏာပိုင်တွေက ကြေညာခဲ့ပါတယ်။
အမေရိကမှာလည်း ၁၃ ဦးမြောက်ကူးစက်ခံရသူကို ကာလီဖိုးနီးယားပြည်နယ် ဆန်ဒီယေဂိုမှာ တွေ့ရှိခဲ့ရပြီး ဝူဟန်ကို သွားခဲ့ဖူးသူတစ်ဦးဖြစ်ပါတယ်။
၉၊ ဖေဖော်ဝါရီ၊ ၂၀၂၀ – တရုတ်ပြည်မမှာ ကူးစက်ခံထားရသူ ၄၀၂၁၃ ဦးအထိ ရှိလာခဲ့ပြီး ဟူဘေးပြည်နယ်တစ်ခုတည်းမှာတင် ၂၉၆၃၁ ဦးအထိ ကူးစက်ခံထားရပါတယ်။ သေဆုံးသူအရေအတွက်ဟာလည်း ၈၁၁ ဦးအထိဖြစ်လာတာမို့ ၂၀၀၂-၀၃ ခုနှစ်ကဖြစ်ပွားခဲ့တဲ့ SARS ရောဂါကပ်ဆိုးကာလမှာ သေဆုံးခဲ့တဲ့ ပမာဏကို ကျော်လွန်သွားခဲ့ပါတယ်။
Diamond Princess အပျော်စီးဇိမ်ခံသင်္ဘောပေါ်မှာ နောက်ထပ် လူနာသစ် ၆ ဦးထပ်မံတွေ့ရှိခဲ့တာမို့ အဆိုပါသင်္ဘောပေါ်ကနေ တွေ့ရှိရတဲ့လူနာ ၇၀ ဦးအထိရှိလာပါတယ်။ ဒါ့အပြင် ဂျပန်နိုင်ငံအနေနဲ့လည်း လူနာ ၉၆ ဦးအထိ လက်ခံထားရတဲ့တိုင်းပြည်ဖြစ်လာခဲ့ပါတယ်။
မလေးရှားနိုင်ငံမှာ လူနာ ၁၇ ဦးအထိတိုးတက်လာခဲ့ပြီး၊ စင်ကာပူမှာတော့ လူနာ အရေအတွက် ၄၃ ဦးအထိ ရောက်ရှိသွားပါတယ်။
ဟောင်ကောင်မှာလည်း မိသားစုတစ်စုတည်းကနေ လူနာ ၁၀ ဦးအထိရှိနေတာကို ရှာဖွေတွေ့ရှိခဲ့ရပြီး စုစုပေါင်းအရေအတွက် ၃၆ ဦးအထိ ဖြစ်သွားပါတယ်။ တောင်ကိုရီးယားမှာလည်း ၃ ဦးထပ်တွေ့ခဲ့တာမို့ လူနာ ၂၇ ဦးအထိ ရှိလာခဲ့ပါတယ်။
စပိန်မှာ ဒုတိယမြောက်လူနာတွေ့ခဲ့သလို ဗြိတိန်မှာလည်း စတုတ္ထမြောက်လူနာ တွေ့ရှိခဲ့ရပါတယ်။
မြန်မာ – ထိုင်းကနေပြန်လာတဲ့ အမျိုးသမီးလူနာတစ်ယောက် မကွေးဆေးရုံမှာ ကွယ်လွန်သွားခဲ့ပေမယ့် ဝူဟန်ကိုရိုနာရောဂါနဲ့ ဆက်နွယ်မှုမရှိဘူးလို့ ကျန်းမာရေးနဲ့ အားကစားဝန်ကြီးဌာနက ထုတ်ပြန်ကြေညာခဲ့ပါတယ်။
၈၊ ဖေဖော်ဝါရီ၊ ၂၀၂၀ – တရုတ်နိုင်ငံ ဟူဘေးပြည်နယ်ပြင်ပက တခြားပြည်နယ်တွေမှာ ရောဂါပိုး ကူးစက်ခံထားရသူအရေအတွက် ၁၀၀၀၀ ကျော်သွားခဲ့ပါတယ်။
Diamond Princess သင်္ဘောကနေ လူနာ ၃ ဦး ထပ်တွေ့ရကြောင်း ဂျပန်အစိုးရက ကြေညာပါတယ်။ တစ်နိုင်ငံလုံးမှာ လူနာ ၈၉ ဦးအထိ ရှိလာပါတယ်။
UAE နိုင်ငံမှာလည်း လူနာ ၇ ဦးအထိ ရှိလာပါတယ်။
ဝူဟန်မှာ တစ်နေ့တည်းနဲ့ သေဆုံးသူ ၆၃ ဦးအထိ တိုးပွားလာခဲ့ပြီး တစ်ကမ္ဘာလုံးအတိုင်းအတာနဲ့ သေဆုံးသူ အရေအတွက်ဟာလည်း ၆၀၈ ဦးအထိ ရှိလာပါတယ်။ ဂျပန်နိုင်ငံသားတစ်ဦးနဲ့ အမေရိကန်နိုင်ငံသားတစ်ဦးတို့လည်း အဆိုပါနေ့မှာ သေဆုံးခဲ့ကြပါတယ်။
ထိုင်းနိုင်ငံမှာ ရောဂါပိုးကူးစက်ခံရသူ ၇ ဦးတစ်ပြိုင်နက်တည်း တွေ့ရှိခဲ့တာမို့ စုစုပေါင်းအရေအတွက် ၃၂ ဦးအထိရှိလာခဲ့ပါတယ်။ စင်ကာပူမှာလည်း ၇ ဦး တွေ့ရှိရတာမို့ လူနာ ၄၀ ဦးအထိရှိလာပါတယ်။
မှုတ်ဆေး/ဖြန်းဆေးဘူးတွေဟာ ကူးစက်မှုရဲ့ ကြားခံဖြစ်နိုင်တယ်လို့ ပထမဆုံးအကြိမ် ထုတ်ပြန်လိုက်ပါတယ်။
ဘေဂျင်းအာဏာပိုင်တွေဟာ ရောဂါရဲ့ စိုးရိမ်ဖွယ်အဆင့်ကို ထုတ်ပြန်ကြေညာလိုက်ပါတယ်။ လူနာတစ်ဦးဟာ ၃ ကြိမ်အထိ Negative ပြခဲ့ပြီးမှာ ရောဂါ ရှာဖွေတွေ့ရှိခဲ့သလို ရှီကျန်းက တခြားလူနာတစ်ဦးဟာလည်း ၄ ကြိမ် Negative ပြခဲ့ပြီးမှ ၅ ကြိမ်မြောက် စစ်ဆေးတော့မှ ရောဂါပိုးကို ရှာဖွေတွေ့ရှိခဲ့တာကြောင့်ဖြစ်ပါတယ်။
၇၊ ဖေဖော်ဝါရီ၊ ၂၀၂၀ – ကွမ်တုန်ဒေသမှာလည်း ရောဂါပိုးကူးစက်ခံထားရသူ ၁၀၀၀ ပြည့်သွားပါတယ်။ ဒါ့အပြင် သေဆုံးမှုလည်း ရှိလာခဲ့ပါတယ်။ ဟူဘေးပြည်နယ်အပြင်ဘက်မှာ ရောဂါပိုးကူးစက်ခံရသူ ၁၀၀၀ ပြည့်သွားတဲ့ ဒုတိယမြောက်ဒေသဖြစ်လာပါတယ်။
ရောဂါရဲ့ မူလအစဖြစ်တဲ့ ဝူဟန်မြို့မှာတော့ သေဆုံးသူဦးရေ ၆၇ ဦးအထိ တိုးပွားလာပြီး ဟူဘေးပြည်နယ်ထဲက တခြားမြို့တွေမှာလည်း သေဆုံးသူ ဦးရေ ၁၄ ဦးအထိ ရှိလာပါတယ်။ ဟူဘေးပြည်နယ်တစ်ခုတည်းမှာတင် သေဆုံးသူ ၁၅၄ ဦးအထိရှိလာကာ တစ်ကမ္ဘာလုံးအတိုင်းအတာနဲ့ဆိုရင် သေဆုံးသူဦးရေ ၅၄၅ ဦးအထိ ရှိလာပါတယ်။
ဂျပန်နိုင်ငံ ယိုကိုဟားမားမှာ သောင်တင်နေတဲ့ Diamond Princess အပျော်စီးသင်္ဘောမှာ ရောဂါပိုး Positive ဖြစ်နေသူ ၄၁ ဦးအထိ တပ်မံစမ်းသပ်တွေ့ရှိခဲ့ပါတယ်။ ဂျပန်နိုင်ငံတစ်နိုင်ငံလလုံးအနေနဲ့ ရောဂါပိုးကူးစက်ခံရသူအရေအတွက်ဟာ ၈၆ ဦးအထိ ခုန်တက်လာပါတယ်။
ဟောင်ကောင်မှာလည်း ပိုးကူးစက်ခံရသူအရေအတွက် ဆက်တိုက်တိုးလာနေပြီး ၂၆ ဦးအထိ ဖြစ်လာပါတယ်။ ဂျာမနီမှာလည်း လူနာသစ် ၂ ဦးထပ်မံတွေ့ရှိတာမို့ ၁၅ ဦးဖြစ်လာပါတယ်။ ဗီယက်နမ်မှာလည်း ၁၃ ဦးအထိ တိုးလာပါတယ်။ မလေးရှားမှာလည်း လူနာတစ်ဦးတိုးလာခဲ့ပြီး စင်ကာပူကနေလာတဲ့ ခရီးသွားတစ်ဦးဖြစ်ကြောင်း သက်ဆိုင်ရာက ကြေညာခဲ့ပါတယ်။
စင်ကာပူမှာတော့ ရောဂါကူးစက်ခံရသူ အရေအတွက် ၃၃ ဦးအထိဖြစ်လာခဲ့ပြီး ဒီထဲက တစ်ချို့တွေဟာ ဘယ်ကနေ ကူးစက်ခံရတယ်ဆိုတဲ့ အရင်းအမြစ်ကို ရှင်းလင်းစွာမသိရှိနိုင်တာကြောင့် ရောဂါထိမ်းချုပ်ရေးနဲ့ အရေးပေါ်တုန့်ပြန်ရေးအဖွဲ့ (DORSCON) က တိုင်းပြည်ရဲ့ အခြေအနေကို လိမ္မော်ရောင်အဆင့်အထိ သတိပေးချက်ထုတ်ပြန်လိုက်ပါတယ်။
မြန်မာ – သံသယ လူနာ ၁ ဦး စောင့်ကြည့်လူနာ ၉ ဦးရှိတယ်လို့ ကျန်းမာရေးဝန်ကြီးဌာနက ထုတ်ပြန်ကြေညာပါတယ်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။