ခြေမအဆစ်မှာ ဖြစ်တတ်တဲ့ ဘူနီယွန်

သူ့ရဲ့အထင်ရှားဆုံးလက္ခဏာက ခုနပြောသလို ခြေအဆစ်မှာ မာကျောတဲ့ဖုတစ်ခုဖြစ်လာတာပါ။ အဲဒီဖုက နာကျင်ရမယ်၊ နီပြီးရောင်ရမ်းလာတတ်တယ်။ တစ်ခါတလေ ခြေချောင်းတွေ၊ အထူးသဖြင့် ခြေမကို မလှုပ်ရှားနိုင်ဖြစ်စေနိုင်ပါတယ်။ ပြီးရင် –

• ခြေမ အဆစ်ပတ်လည်မှာ ရောင်ရမ်း၊နီမြန်း၊ နာကျင်ရတယ်
• ခြေမဖုကြောင့် စောင်းပြီး ခြေမနဲ့ခြေညှိုး ထိနေတဲ့နေရာမှာ အသားမာတွေဖြစ်လာမယ်
• အမြဲ သို့မဟုတ် ကြိုကြားကြိုကြား နာကျင်ကိုက်ခဲမယ်
• အဆစ်နာကျင်မှုကြောင့် ခြေချောင်းကိုထိခိုက်ပျက်စီးစေခဲ့ရင်ခြေမ လှုပ်ရှားလို့မကောင်းဖြစ်စေမယ်။

ဖိနပ်ပြောင်းစီးပါ – သက်တောင့်သက်သာဖြစ်မယ့် ဖိနပ်ကိုစီးခြင်းအားဖြင့် ခြေချောင်းတွေအတွက် ဝန်ပိသက်သာစေမယ်။ ဖိနပ်အမြင့်တွေစီးရင် ခြေထောက်အရှေ့ပိုင်းကို ဝိတ်ပိစေပြီး ဘူနီယွန်အပြင် တခြားပြဿနာတွေပါဖြစ်လာနိုင်ပါတယ်။ ကျပ်တဲ့ဖိနပ်တွေ၊ ခြေချောင်းထိပ်တွေကို စုပြီးစည်းထားတဲ့ဖိနပ်မျိုးတွေကို ရှောင်ပါ။

ရေခဲကပ်ပါ – နာကျင်ကိုက်ခဲမှုကို သက်သာအောင်လို့ ရေခဲတုံးကို အဝတ်စလေးပတ်ပြီး အဖုမှာ ကပ်ပေးပါ။ တစ်ကြိမ်မှာ မိနစ် ၂၀ ထက်ပိုမကြာဖို့တော့ သတိပြုပါ။ ခြေထောက်မှာက တခြားကိုယ်အစိတ်အပိုင်းတွေမှာထက် တစ်ရှူးနဲ့ကြွက်သားနည်းတာကြောင့် ရေခဲလောင်မှာစိုးရိမ်ရလို့ပါ။

ပတ်စည်းပါ – သူ့အတွက်သီးသန့်ထုတ်တဲ့ Special pads လေးတွေဖြစ်ဖြစ်၊ မရှိရင် အဝတ်တစ်ခုနဲ့ဖြစ်ဖြစ် ဘူနီယွန်ဖုရှိတဲ့နေရာကို ပတ်စည်းပါ။

ဆေးသောက်ပါ – acetaminophen၊ ibuprofen၊ naproxen တို့လို အကိုက်အခဲပျောက်ဆေးတွေ လွယ်လွယ်ဝယ်သောက်လို့ရပါတယ်။ တကယ်လို့ လေးဖက်နာလို အဆစ်ရောင်ရောဂါကြောင့်ဆိုရင်တော့ ဆရာဝန်က သက်ဆိုင်ရာအကိုက်အခဲပျောက်ဆေးတွေ ပေးပါလိမ့်မယ်။

ခွဲစိတ်ကုသမှုခံယူပါ – တခြားကုသနည်းတွေနဲ့ မသက်သာရင်တော့ ဆရာဝန်က ခွဲစိတ်ကုသပြီး ခြေမကို ပြန်ဖြောင့်တန်းအောင် လုပ်ပေးပါလိမ့်မယ်။

ဘူနီယွန်မဖြစ်အောင် ကြိုတင်ကာကွယ်မယ်ဆိုရင်တော့ –

• ဖိနပ်ရွေးတဲ့အခါ ဂရုတစိုက်ရွေးပါ။ ခြေမ၊ ခြေချောင်းတွေအတွက် လုံလောက်တဲ့နေရာ အံဝင်ခွင်ကျဖြစ်ရပါမယ်။ အတင်းစုစည်းထားတဲ့ ထိပ်စုပုံစံမဖြစ်တာကောင်းပါတယ်။ အရှည်ဆုံးခြေချောင်းထိပ်နဲ့ ဖိနပ်ထိပ်ဆုံးကြားမှာ နေရာလွတ်ကျန်ရပါမယ်။
• ဖိနပ်က ကိုယ့်ခြေထောက်ပုံစံနဲ့ အံဝင်ခွင်ကျဖြစ်ရပါမယ်။ စီးလိုက်တဲ့အခါ ခြေထောက်ရဲ့အစိတ်အပိုင်း တစ်ခုခုကို ညှစ်ထား၊ ဖိထားသလို မဖြစ်စေဖို့ သတိထားပါ။