backup og meta

ရေနဲ့ထိတဲ့အခါ ဘာကြောင့် လက်ချောင်းတွေ ပဲကြီးရေခွံတွန့် တာလဲ။

ရေချိုးတာ ကြာတဲ့အခါ၊ ပန်းကန်ဆေးတာ ကြာတဲ့အခါ လက်ချောင်းတွေ ပဲကြီးရေခွံတွန့် တာကို ကြုံဖူးကြမှာပါ။ ခဏနေတော့လည်း သူ့အလိုလို ပြန်ပျောက်သွားတာပါပဲ။ ပဲကြီးရေခွံတွန့်တာက သာမန်အားဖြင့်တော့ ပြဿနာ မရှိပါဘူး။ တချို့သူတွေမှာ ‌ရေနဲ့လည်း မထိပါဘဲနဲ့ လက်ရေနူး ကြတာလည်း ရှိပါတယ်။

ရေနဲ့ထိတဲ့အခါ ဘာကြောင့် လက်ချောင်းတွေ ပဲကြီးရေခွံတွန့် တာလဲ။

ရေနဲ့ထိတဲ့အခါ ဘာကြောင့် လက်ချောင်းတွေ ပဲကြီးရေခွံတွန့် တာလဲ။

ဟိုးအရင်တုန်းကတော့ ရေတွေ လက်ချောင်းထိပ်ကို ဝင်သွားလို့ တွန့်တယ်လို့ ယူဆခဲ့ကြပါတယ်။ နောက်ပိုင်းသိပ္ပံပညာထွန်းကားလာတော့ ဒါက အာရုံကြောစနစ်ရဲ့ အချက်ပြမှုကြောင့် လက်ချောင်းထိပ်က သွေးကြောလေးတွေ ကျုံ့သွားတာ။ ဒါကြောင့် လက်ချောင်းထိပ်က အရေပြားတွေ တွန့်သွားတာလို့ သိလာကြပါပြီ။

ဘာကြောင့် ဒီလိုမျိုး တွန့်ရတာလဲဆိုတဲ့ အကြောင်းရင်းကိုတော့ သေချာ မသိကြသေးပါဘူး။ တချို့လေ့လာချက်တွေမှာ ဒါက ရေထဲက ပစ္စည်းတွေကို ကိုင်တွယ်တဲ့အခါ မြဲမြဲမြံမြံ ကိုင်တွယ်နိုင်အောင်လို့ ပြောကြပေမဲ့ တချို့ကလည်း ဒါနဲ့ မဆိုင်ဘူးလို့ ဆိုကြပါတယ်။

ဘာပဲဖြစ်ဖြစ် ရေနဲ့ ထိလို့ လက်ချောင်းတွေ ပဲကြီးရေခွံတွန့်တာက ကြီးမားတဲ့ ပြဿနာတော့ မဟုတ်ပါဘူး။

ရေနဲ့ မထိဘဲ လက်ချောင်းတွေ ပဲကြီးရေခွံတွန့်တာကရော ဘာကြောင့်များလဲ

တချို့လူတွေက ရေနဲ့လည်း မထိဘဲ လက်ချောင်းတွေ ပဲကြီးရေခွံတွန့်တယ်လို့ ပြောကြပါတယ်။ ဒါဆိုရင်တော့ ဖြစ်နိုင်တာတွေက

  • ရေဓာတ်ခမ်းခြောက်တာ

ရိုးရိုးရေဓာတ် ခမ်းခြောက်တာ မဟုတ်ဘဲ ခန္ဓာကိုယ်တွင်းမှာ ရေဓာတ်ဆုံးရှုံးလွန်းလို့ ရှော့ရခါနီးအခြေအနေတွေမှာ တွေ့ရပါတယ်။ သူတို့မှာဆိုရင် ခြေဖျားလက်ဖျားတွေ အေးစက်နေပြီး လက်ချောင်းထိပ်တွေပါ တွန့်နေတတ်ပါတယ်။

ရေဓာတ်ဆုံးရှုံးတာကြောင့်ဆိုရင်တော့ ဒီလက္ခဏာအပြင် ဆီးနည်းသွားတာ၊ အာခြောက်တာ၊ ခေါင်းကိုက်တာ၊ မူးဝေတာတွေပါ ခံစားရမှာပါ။

  • Raynaudရောဂါ

ဒါက အအေးဓာတ်ကို တုံ့ပြန်မှု များတဲ့ ရောဂါတစ်မျိုးပါ။ ခြေချောင်းလက်ချောင်းထိပ်က သွေးကြောတွေကို ထိခိုက်တဲ့ ရောဂါဖြစ်ပါတယ်။

ဒီရောဂါမှာဆိုရင် အေးတာတစ်ခုခုနဲ့ ထိတွေ့မိတဲ့အခါ လက်ချောင်းခြေချောင်းတွေက ဖြူလာမယ်၊ ပြာလာမယ်၊ နီလာမယ်၊ နာလာမယ်၊ ထုံလာမယ် စတာတွေပါ ခံစားရမှာ ဖြစ်ပါတယ်။

  • သိုင်းရွိုက်ရောဂါ

သိုင်းရွိုက်ဟော်မုန်း များလွန်း၊ နည်းလွန်းရင်လည်း လက်မှာ ပဲကြီးရေခွံတွန့်တတ်ပါတယ်။ သိုင်းရွိုက်ရောဂါကြောင့် ဆိုရင်တော့ ပဲကြီးရေခွံတွန့်တာအပြင် သိုင်းရွိုက်ဟော်မုန်း မမျှတတဲ့ တခြားလက္ခဏာတွေပါ ခံစားရမှာပါ။

ဥပမာ မျက်နှာဖောတာ၊ အပူမခံနိုင်တာ၊ အအေးမခံနိုင်တာ၊ အလိုလိုနေရင်း ဝလာတာ၊ ပိန်သွားတာ၊ အမျိုးသမီးတွေဆို ရာသီမမှန်တာ၊ ချွေးတစိုစို ဖြစ်နေတာ စတာတွေပါ ခံစားရနိုင်ပါတယ်။

  • ဗီတာမင် B12ချို့တဲ့တာ

ဗီတာမင် B12ချို့တဲ့တာက ဖြစ်ခဲပါတယ်။ နှစ်ရှည်လများ အသားကို လုံလောက်အောင်  မစားတဲ့သူတွေ၊ သက်သတ်လွတ်သမားတွေမှာဆိုရင်တော့ ချို့တဲ့တတ်ပါတယ်။ ဗီတာမင် B12က သွေးဆဲလ်တွေ၊ အာရုံကြောဆဲလ်တွေ ဖြစ်ပေါ်ဖို့ လိုအပ်တာကြောင့် B12ချို့တဲ့တဲ့အခါ လက်မှာ ပဲကြီးရေခွံတွန့်တာပါ။

ဗီတာမင် B12ချို့တဲ့တဲ့အခါ ပဲကြီးရေခွံတွန့်တာအပြင် သွေးအားနည်းတာ၊ မူးတာ၊ မောတာတွေပါ ခံစားရမှာ ဖြစ်ပါတယ်။

  • ပြန်ရည်‌ကြော အရည်စုတာ

အလွယ်ပြောရရင်တော့ ဖောတာပါပဲ။ ဖောတဲ့အခါ အရည်တွေက အရေပြားတစ်ရှူးအောက်ကို ရောက်ပြီး တစ်ရှူးတွေကို ပျက်စီးစေတာကြောင့် လက်ချောင်းလေးတွေက ရာဘာလို ခပ်တင်းတင်းနဲ့ ပဲကြီးရေခွံတွန့်လာပါတယ်။

  • ခုခံအား ကမောက်ကမ ဖြစ်တဲ့ရောဂါ

Lupusလို့ခေါ်တဲ့ အရေပြား လေးဖက်နာ၊ Scleroderma စတဲ့ရောဂါတွေမှာလည်း ခုခံအားစနစ်က ကိုယ့်ခန္ဓာကိုယ်ကို ပြန်တိုက်ခိုက်တာကြောင့် လက်ချောင်းထိပ်လေးတွေ တွန့်နေတတ်ပါတယ်။

ဘယ်လိုအချိန်မှာ ဆရာဝန်နဲ့ ပြသင့်သလဲ။

လက်ချောင်းမှာ ပဲကြီးရေခွံတွန့်တာက ကြီးမားတဲ့ ပြဿနာ မဟုတ်ပါဘူး။ ရေနဲ့ ထိရင် တွန့်တယ်။ ချွေးထွက်များရင်၊ စိုထိုင်းဆများတဲ့နေရာမှာနေရင် အစိုဓာတ်ကြောင့် တွန့်တယ်။ ဒါတွေအကုန်လုံးက လက်ချောင်းလေးတွေ ပြန်နွေးလာတဲ့အခါ အလိုလိုပျောက်သွားတာကြောင့် ဆေးကုစရာမလိုပါဘူး။

ဒါပေမဲ့ အပေါ်မှာ ပြောခဲ့တဲ့ ကျန်းမာရေးပြဿနာတွေကြောင့်ဆိုရင်တော့ ဆရာဝန်နဲ့ ပြဖို့ လိုပါတယ်။ အလွယ်ဆုံးကတော့ ဘာမှမလုပ်ဘဲနဲ့ လက်‌ချောင်းထိပ်မှာ ပဲကြီးရေခွံတွန့်လာရင်၊ တခြား ထူးခြားတဲ့ လက္ခဏာတွေပါ ရှိနေရင် ဆရာဝန်နဲ့ ပြသဖို့ လိုအပ်ပါတယ်။

[embed-health-tool-bmi]

မသက်ဆိုင်ကြောင်း ရှင်းလင်းချက်

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

Why Water Turns Fingers and Toes Into Prunes https://health.clevelandclinic.org/why-water-makes-your-skin-look-like-a-prune-and-not-a-plum/ Accessed date Aug 3, 2023

Wrinkled Pruney Skin https://www.anxietycentre.com/anxiety-disorders/symptoms/wrinkled-pruney-skin/ Accessed date Aug 3, 2023

Why Does My Skin Get Wrinkly in Water? https://kidshealth.org/en/kids/wrinkly-fingers.html Accessed date Aug 3, 2023

Raynaud’s https://www.nhs.uk/conditions/raynauds/ Accessed date Aug 3, 2023

B Vitamins: Your Secret to Good Skin Health https://www.tricitymed.org/2018/08/b-vitamins-secret-good-skin-health/ Accessed date Aug 3, 2023

ယခုပုံစံ

08/11/2023

Dr. Htet Htet Zaw Win မှ ရေးသားသည်။

မှ အချက်အလက် စစ်ဆေးထားပါသည်။ Dr. Htet Htet Zaw Win

Aye Thi Mon မှ ပြင်ဆင်ခဲ့ပါသည်။


ဆက်စပ် အကြောင်းအရာများ

သင့်လက်တွေက ပြောပြနေတဲ့ ကျန်းမာရေး လျှို့ဝှက်ချက်များ

ခန္ဓာကိုယ်ပေါ်က အရေပြား ဘာတွေများ လုပ်ပေးသလဲ!


Hello Sayarwon Panel မှ အချက်အလက်များ စစ်ဆေးထားပါသည်။ Dr. Htet Htet Zaw Win မှ ရေးသားသည်။ နောက်ဆုံးအသစ်ပြင်ဆင်သည့်ရက်စွဲမှာ 08/11/2023 ဖြစ်ပါသည်။

ad iconကြော်ငြာ

ဤဆောင်းပါးက အကူအညီဖြစ်ပါသလား။

ad iconကြော်ငြာ
ad iconကြော်ငြာ