လေပွတာကို သက်သာစေမယ့် ယောဂပို့စ် ( ၅) ခု

လေပွတာက အတော်လေး ခံရခက်ပါတယ်။ ဒီလို လေပွရတာက နေ့စဉ် စားသုံးမှုမှာ ပါဝင်နေတဲ့ အချို့အချို့သော အစားအစာတွေကြောင့် ဖြစ်နိုင်သလို ပါးစပ်ကနေတဆင့် လေတွေကို မျိုချမိတာကြောင့်ပါ။ လေတွေက လေပွပြီး နေရထိုင်ရ မသက်မသာ ဖြစ်စေနိုင်သလို ဗိုက်အောင့်တာကို ဖြစ်စေနိုင်ပါတယ်။ ဒီလို လေပွတာကို သက်သာစေမယ့် ယောဂပို့စ် (၅) ခု ကို ဖော်ပြပေးလိုက်ပါတယ်။

ယောဂလုပ်တာက လေပွတာကို သက်သာစေမလား!

ယောဂလုပ်တာက လေပွတာကို သက်သာစေနိုင်သလို ကိုယ်လက်လှုပ်ရှားမှုလေး လုပ်တာ၊ လမ်းလျှောက်တာ၊ အိမ်မှုကိစ္စလေးတွေကို လှုပ်လှုပ်ရှားရှား လုပ်ပေးတာက အစာကြေစေပြီး လေပွတာကို သက်သာစေနိုင်ပါတယ်။ 

ဒါကြောင့် လေပွနေပြီဆိုရင် အရင်ဆုံး လမ်းလျှောက်တာမျိုး လုပ်ပေးလို့ ရသလို အောက်မှာ ပြောပြမယ့် ယောဂလေ့ကျင့်ခန်းလေးတွေကို လုပ်ပေးတာကလည်း နည်းလမ်းကောင်းပါ။ 

ကဲ …. လေပွတာကို သက်သာစေမယ့် ယောဂပို့စ်တွေက ဘာတွေ ဖြစ်မလဲဆိုတာကို အတူတူ ဆက်ကြည့်လိုက်ရ အောင်နော်။ 

လေပွတာကို သက်သာစေမယ့် ယောဂပို့စ် ( ၅) ခု

လေပွတာကို သက်သာစေမယ့် ယောဂပို့စ် ( ၅) ခု ကတော့ – 

၁ – Apanasana (ရင်ဘတ်ဆီကို ဒူးတွေကို ဆွဲပိုက်ထားတဲ့ ယောဂပို့စ်)

ဒီပို့စ်က အစာအိမ်ထဲကမှာ ဟိုထိုး ဒီထိုး ထိုးနေတဲ့ လေတွေကို လေတက်တာ ဒါမှမဟုတ် လေလည်တာကနေတဆင့် အပြင်ကို ထွက်လာအောင် လုပ်ဆောင်ပေးနိုင်ပါတယ်။ ဒီပို့စ်က ဝမ်းဗိုက်ပေါ်ကို ဖိအား နည်းနည်းပေးလိုက်ပြီး လေကို အပြင်ထုတ်ပေးတဲ့ သဘောပါ။ 

ဒီလေ့ကျင့်ခန်းကို လုပ်ဖို့အတွက် – 

• အရင်ဆုံး ကြမ်းပြင်ပေါ်မှာ ပက်လက်အနေအထား လှဲနေပြီး လက်နှစ်ဖက်ကို တစ်ဖက်တစ်ချက်ဆီမှာ ချထားပါ။
• ခြေထောက်တွေကို ဆန့်ဆန့်လေး ထားပေးပါ။
• ပြီးရင်တော့ ဒူးနှစ်ဖက်ကို ဗိုက်ဆီကို ကွေးပြီး ဒူးနှစ်လုံးကို လက်နဲ့ ဖိပိုက်ထားပေးပါ။ ၁၀ စက္ကန့်လောက်ပေါ့။ 
• ဒီလေ့ကျင့်ခန်းကို ၅ ခေါက် ကနေ ၇ ခေါက်လောက် လုပ်ပေးပါ။ လေ့ကျင့်ခန်း မစခင် (ဒူးတွေကို ရင်ဘတ်ဆီကို ကွေးပြီး မပိုက်ခင်မှာ) လေကို ဝအောင် ရှူပြီး ဒူးကို ပိုက်ထားတဲ့ အချိန်မှာ အသက်အောင့် ထားဖို့ မမေ့ပါနဲ့

၂ –  Ananda Balasana (ပက်လက်အနေအထားနဲ့ ခြေဖျားတွေကို လက်နဲ့ လှမ်းထိထားတဲ့ ပို့စ်)

ဒီပို့စ်က အစာအိမ်ထဲက လေတွေကို ထွက်စေနိုင်သလို ပေါင်တွင်းကြောတွေကိုလည်း ပြေလျော့စေနိုင်ပါတယ်။ အစာကြေစေပြီးကိုလည်း ပြေလျော့စေနိုင်ပါတယ်။ 

ဒီလေ့ကျင့်ခန်း လုပ်ဖို့အတွက် – 

• အရင်ဆုံး ကြမ်းပြင်ပေါ်မှာ ပက်လက်အနေအထားနဲ့ သက်သောင့်သက်သာလေး လှဲနေပါ။ ပြီးရင်တော့ ခြေထောက်လေးကို ဆန့်ဆန့်လေး ထားပေးပါ။
• ပြီးရင်တော့ ပက်လက်အနေအထားနဲ့ပဲ ခြေထောက်တွေကို ဒူးကွေးရင်း ရင်ဘတ်ဆီ ရောက်အောင် ဆွဲယူပါ။ ခြေထောက် ၂ ချောင်းကြားကနေ လက်နှစ်ဖက်ကို ထည့်လိုက်ပါ။
• ပြီးရင်တော့ ခြေဖျားလေးတွေကို ဘယ်ခြေကို ဘယ်လက်နဲ့ ညာခြေကို ညာလက်နဲ့ ကိုင်ထားပေးပါ။
• ခြေထောက်ကို ၉၀ ဒီဂရီ အနေအထား ရအောင် ဆန့်ထုတ်လိုက်ပါ။ ၁၀ စက္ကန့်လောက် တောင့်ထားပေးရင်း ၅ ကျော့ ကနေ ၇ ကျော့ လောက် လုပ်ပေးပါ။
• အသက်မှန်မှန် ရှူဖို့လည်း မမေ့ပါနဲ့။

၃ – Supta Matsyendrasana (ခန္ဓာကိုယ်ကို လိမ်ပြီး အကြောလျော့တဲ့ ပို့စ်)

ဒီပို့စ်က အစာအိမ်ထဲက လေတွေကို ထွက်စေနိုင်သလို ခါးကြောတွေကိုလည်း ပြေလျော့စေနိုင်ပါတယ်။ စိတ်ဖိစီးမှုကိုလည်း ပြေလျော့စေနိုင်သလို ကောင်းကောင်း အိပ်ပျော်စေဖို့လည်း ထောက်ကူပါတယ်။

ဒီလေ့ကျင့်ခန်း လုပ်ဖို့အတွက် – 

• အရင်ဆုံး ကြမ်းပြင်ပေါ်မှာ ပက်လက်အနေအထားနဲ့ သက်သောင့်သက်သာလေး လှဲနေပါ။ ပြီးရင်တော့ ခြေထောက်လေးကို ဆန့်ဆန့်လေး ထားပေးပါ။
• ပြီးရင်တော့ ပက်လက်အနေအထားနဲ့ပဲ ခြေထောက်တစ်ဖက်ကို ဒူးကွေးရင်း ရင်ဘတ်ဆီ ရောက်အောင် ဆွဲယူပါ။ 
• ပြီးရင်တော့ ဒူးကို လက်နဲ့ ဖိရင်း ဘယ်ခြေဆိုရင် ခြေထောက်ကို ညာဘက် ခါး အထက်ပိုင်းနဲ့ မျက်နှာကို ဘယ်ဘက်ဆီကို ရောက်အောင် ဆွဲယူလိုက်ပြီး ဒူးကို ဖိထားလို့ ၁၀ စက္ကန့်လောက် ထိန်းထားပါ။
• တစ်ဖက်ပြီး တစ်ဖက် လုပ်ပေးပါ။
• ၄ ကျော့ – ၅ ကျော့ လောက်လုပ်ပေးပါ။
• အသက်မှန်မှန် ရှူဖို့လည်း မမေ့ပါနဲ့။

၄ –  Parivrtta Sukhasana (ထိုင်ရက်အနေအထားနဲ့ ခန္ဓာကိုယ်ကို လှည့်ပြီး အကြောလျှော့တဲ့ပို့စ်)

ဒီပို့စ်က အစာအိမ်ထဲက လေတွေကို ထွက်စေနိုင်သလို ခါးကြောတွေကိုလည်း ပြေလျော့စေနိုင်ပါတယ်။ စိတ်ဖိစီးမှုကိုလည်း ပြေလျော့စေနိုင်သလို ကောင်းကောင်း အိပ်ပျော်စေဖို့လည်း ထောက်ကူပါတယ်။

ဒီလေ့ကျင့်ခန်း လုပ်ဖို့အတွက် – 

• ထိုင်ခုံတစ်ခုပေါ်မှာ ခါးမတ်မတ်လေး ထိုင်ပြီး  ခန္ဓာကိုယ် အပေါ်ပိုင်းနဲ့ ခေါင်းကို ဘယ်ဘက်ကို လှည့်ရင်း ဘယ်ဘက်လက်နဲ့ ညာဘက်ဒူးကို ထိထားပေးပါ။
• ပြီးရင်တော့ ခန္ဓာကိုယ် အပေါ်ပိုင်းနဲ့ ခေါင်းကို ညာဘက်ကို လှည့်ရင်း ညာဘက်လက်နဲ့ ဘယ်ဘက်ဒူးကို ထိထားပေးပါ။
• တစ်ဖက်ပြီး တစ်ဖက် တစ်လှည့်စီ လုပ်ပေးပါ။ 
• ၇ ကျော့ ကနေ ၉ ကျော့ လောက် လုပ်ပေးပါ။

၅ – Prasarita Padottanasana (ခြေထောက်နှစ်ဖက်ကို ခွဲနိုင်သမျှ ခွဲပြီး ခန္ဓာကိုယ် အထက်ပိုင်းကို ဒူးနှစ်လုံးကြားကို ကွေးညွှတ်တဲ့ ပို့စ်)

ဒီပို့စ်က အစာအိမ်ထဲက လေတွေကို ထွက်စေနိုင်သလို ခါးကြောတွေကိုလည်း ပြေလျော့စေနိုင်ပါတယ်။ စိတ်ဖိစီးမှုကိုလည်း ပြေလျော့စေနိုင်သလို မျက်နှာဆီ သွေးစီးဆင်းမှု ကောင်းစေဖို့လည်း ထောက်ကူပါတယ်။

ဒီလေ့ကျင့်ခန်း လုပ်ဖို့အတွက် – 

• မတ်မတ်လေး ရပ်ပါ။ ပြီးရင် ခြေထောက် နှစ်ဖက်ကို ဘေးတစ်ဖက်ဆီကို ခွဲနိုင်သမျှ ခွဲလိုက်ပါ။ 
• ပြီးရင်တော့ ခန္ဓာကိုယ် အပေါ်ပိုင်းနဲ့ ခေါင်းကို အရှေ့ဘက်ကို ကိုင်းချနိုင်သမျှ ကိုင်းချပြီး လက်နှစ်ဖက်ကို ခြေထောက်နှစ်ခုကြား ကြမ်းပြင်ကို ထိပြီး လက်ကိုစုံချထားပါ။
• ခေါင်းကို ငုံနိုင်သမျှ ငုံပြီး ၁၀ စက္ကန့်လောက် ငြိမ်ထားပေးပါ။
• ၇ ကျော့ ကနေ ၉ ကျော့ လောက် လုပ်ပေးပါ။

လေပွနေတာကြောင့် အိပ်ရေးပျက်တာ နေရခက်တာတွေ မဖြစ်စေဖို့ ဒီယောဂပို့စ်လေးတွေ လုပ်ပြီး ဖြေရှင်းလိုက်ပါ။

[embed-health-tool-bmi]