မျက်စိနာတာက ကြည့်ရုံနဲ့ ကူးစက်တတ်လား !

မျက်စိနာတာက ကိုယ်တိုင်အတွက် အတော်လေး နေရခက်သလို ပတ်ဝန်းကျင်ကသူတွေကိုလည်း စိုးထိတ်မှုတွေ ဖြစ်စေနိုင်ပါတယ်။ ငါ့ကိုများ ကူးလေမလားဆိုပြီးပေါ့။ လူကြီးတွေဆိုရင် မျက်စိနာတဲ့သူကို သွားမကြည့်နဲ့ ကူးတတ်တယ်ဆိုပြီး တားတတ်ကြပါတယ်။ မျက်စိနာတာက ကြည့်ရုံနဲ့ ကူးစက်တတ်လား ဆိုတာနဲ့ မျက်စိနာတာကို မကူးစက်အောင် ဘယ်လိုကာကွယ်ကြမလဲ ဆိုတာကို ပြောပြပေးချင်ပါတယ်။

မျက်စိနာတာက အဖြစ်များသလား!

မျက်စိနာတယ်ဆိုတာက အဖြစ်များတဲ့ မျက်လုံးပိုးဝင်ကူးစက်မှု တစ်ရပ်ဖြစ်ပြီး မျက်ခွံအတွင်းသားတစ်ရှူးတွေကို ရောင်ရမ်းစေနိုင်ပါတယ်။ မျက်စိနာတာက မျက်လုံး တစ်ဖက်တည်းမှာ ဖြစ်တာမျိုး ရှိနိုင်သလို မျက်လုံး နှစ်ဖက်စလုံးမှာ ဖြစ်တာမျိုးလည်း ရှိနိုင်ပါတယ်။

မျက်စိနာတာက ဓာတ်မတည့်မှုကြောင့် ဖြစ်နိုင်သလို ဘက်တီးရီးယား၊ ဗိုင်းရပ်စ်နဲ့ ပတ်ဝန်းကျင်က ညစ်ညမ်းတဲ့အရာတွေကြောင့်လည်း ဖြစ်စေနိုင်ပါတယ်။ 

မျက်စိနာတဲ့အခါ ဖြစ်တဲ့ အကြောင်းတရားပေါ်ကိုလိုက်ပြီး မျက်စဉ်းခတ်တာ၊ ဆေးသောက်တာ နဲ့ ရေသန့်သန့်နဲ့ သန့်စင်တာ၊ သက်သောင့်သက်သာဖြစ်အောင် ထားတာ စသဖြင့် နည်းအမျိုးမျိုးနဲ့ သက်သာအောင် လုပ်ဆောင်လို့ ရပါတယ်။

မျက်စိနာရင် ဘယ်လိုလက္ခဏာတွေ ခံစားရနိုင်လဲ!

မျက်စိနရင် အခုလို လက္ခဏာတွေကို ခံစားရနိုင်ပါတယ်။ 

• မျက်လုံး အဖြူသားတွေက နီနေမယ်
• မျက်ခွံအတွင်းသားတွေ ရောင်နေမယ်
• မျက်ရည်တွေ ထွက်နေမယ်
• အိပ်ရာနိုးလာချိန်မှာ မျက်ခွံနှစ်ခုက ခွာမရအောင် မျက်ဝတ်တွေနဲ့ ကပ်နေမယ်
• မျက်လုံးထဲက ကျိန်းစပ်စပ်ဖြစ်နေမယ်
• မျက်လုံးထဲက ယားယံနေမယ်
• အမြင်တွေ ဝါးနေမယ်
• အလင်းကို မခံနိုင်တာမျိုး ဖြစ်မယ်
• မျက်ခွံတွေရောင်တာမျိုး ဖြစ်မယ်
• အဖြူရောင် ဒါမှမဟုတ် အဝါရောင် မျက်ဝတ်တွေ ထွက်မယ်

ဘာတွေကများ မျက်စိနာစေတာလဲ! 

မျက်စိနာရတာက အကြောင်းအရင်း အမျိုးမျိုးကြောင့် ဖြစ်နိုင်ပါတယ်။ 

ဗိုင်းရပ်စ်ကြောင့် – မျက်စိနာတာကို အများဆုံး ဖြစ်စေတဲ့ အကြောင်းအရင်းက ဗိုင်းရပ်စ်ကြောင့်ပါ။ ဗိုင်းရပ်စ်တွေမှာ အထူးသဖြင့် အအေးမိဖျားနာတာကို ဖြစ်စေတဲ့ ဗိုင်းရပ်စ်၊ ကိုဗစ်ဗိုင်းရပ်စ် စတဲ့ ဗိုင်းရပ်စ်တွေပါ။ 

ဘက်တီးရီးယားကြောင့် – ဘက်တီးရီးယားတွေထဲမှာမှ Staphylococcus aureus, Haemophilus influenzae, Streptococcus pneumonia နဲ့ Pseudomonas aeruginosa တို့က မျက်စိနာတာကို ဖြစ်စေနိုင်ပါတယ်။ 

ပတ်ဝန်းကျင်ကအရာတွေကြောင့် – ခေါင်းလျှော်ရည်တွေ၊ အလှကုန်တွေ၊ မျက်ကပ်မှန်တွေ၊ ဖုန်မှုန့်တွေ၊ မီးခိုးငွေ့နဲ့ ရေကူးကန်ထဲက ကလိုရင်းတွေ ကြောင့်လည်း မျက်စိနာနိုင်ပါတယ်။

ဓာတ်မတည့်မှု ဖြစ်စေနိုင်တဲ့ အရာတွေကြောင့် – မှိုတွေ၊ ပန်းဝတ်မှုံတွေနဲ့ အခြား ဓာတ်မတည့်မှုကို ဖြစ်စေနိုင်တဲ့အရာတွေကြောင့်လည်း မျက်စိနာနိုင်ပါတယ်။ 

ပြင်ပပစ္စည်း ဝင်ရောက်တာကြောင့် – မျက်လုံးထဲကို ပြင်ပပစ္စည်း ဝင်ရောက်တာကြောင့်လည်း မျက်စိနာနိုင်ပါတယ်။

မျက်ရည်ပြွန်ပိတ်ဆို့တာကြောင့် -ဘေဘီလေးတွေမှာ မျက်ရည်ပြွန်ပိတ်ဆို့တာကြောင့်လည်း မျက်စိနာနိုင်ပါတယ်။ 

လိင်ကတဆင့် ကူးစက်တဲ့ရောဂါတွေကြောင့် – လိင်ကတဆင့် ကူးစက်တဲ့ရောဂါတွေ ဖြစ်ကြတဲ့ ရေယုန်ဗိုင်းရပ်စ်၊ ဆီးပူညောင်းကျဖြစ်စေနိုင်တဲ့ ဘက်တီးရီးယားတွေကြောင့်လည်း မျက်စိနာတာကို ဖြစ်စေနိုင်ပါတယ်။ 

Autoimmune ရောဂါတွေကြောင့် – ကိုယ်ခံအားဆဲလ်အချင်းချင်း တုံ့ပြန်တိုက်ခိုက်မှု ပြင်းထန်တာကြောင့်လည်း မျက်စိနာတာဖြစ်နိုင်ပါတယ်။ ဖြစ်တော့ ဖြစ်ခဲပါတယ်။

မျက်စိနာတာက ကြည့်ရုံနဲ့ ကူးစက်တတ်လား !

ဗိုင်းရပ်စ်နဲ့ ဘက်တီးရီးယားကြောင့် ဖြစ်တဲ့ မျက်စိနာ‌တာတွေက ကူးစက်တတ်ပါတယ်။ ဓာတ်မတည့်တာတို့၊ ပတ်ဝန်းကျင်က ညစ်ညမ်းစေတဲ့ အရာတွေကြောင့် ဖြစ်တဲ့ မျက်စိနာတာကတော့ မကူးစက်တတ်ပါဘူး။

ဒါပေမဲ့ မျက်စိနာတာက ကြည့်ရုံနဲ့တော့ မကူးတတ်ပါဘူး။ ဘာကြောင့်ပဲ မျက်စိနာနာ မျက်စိနာတဲ့ သူနဲ့ အကြည့်ချင်းဆုံမိရုံနဲ့ ကူးတာမျိုး မဟုတ်ပါဘူး။

မျက်စိနာတာက ဘယ်လို ကူးစက်သလဲဆိုရရင် 

မျက်စိနာတာ သက်သာစေဖို့

မျက်လုံးနာတာက ပုံမှန်အားဖြင့် ရက်သတ္တပတ် အနည်းငယ်ကြာမှာ သက်သာသွားတတ်ပါတယ်။ မျက်စိနာတဲ့အချိန်မှာ

• မျက်စိကို အနားပေးပါ။ ဖုန်းသုံးတာ၊ TVကြည့်တာကို လျှော့ပါ။
• မျက်ဝတ်ထွက်ရင်  တစ်ရှူးသန့်သန့်နဲ့ သုတ်ပြီး လွှင့်ပစ်၊ ပြီးတာနဲ့ လက်ဆေးပါ။
• မကြာခဏ လက်ဆေးပါ။ မျက်လုံးကို လက်နဲ့ ခဏဏ မကိုင်ပါနဲ့။
• မျက်ရည်တု မျက်စဉ်းခတ်ပါ။ ရေခဲဝတ်ကပ်ပေးလည်း ရပါတယ်။ ရေခဲဝတ်ကပ်တဲ့အခါ အဝတ်သန့်သန့်ကို သုံးပါ။ မျက်စိနာတဲ့ဘက်ကို ကပ်ပြီး ကောင်းတဲ့ ဘက်ကို ထပ်မကပ်ပါနဲ့။
• ပိုးသတ်ဆေးပါတာ၊ စတီးရွိုက်ပါတဲ့ မျက်စဉ်းတွေကို ဆရာဝန်ညွှန်ကြားချက်နဲ့မှ အသုံးပြုပါ။
• မျက်စိတစ်ဖက်ကနာပြီး နောက်တစ်ဖက်က ကောင်းနေတဲ့အခါ ကောင်းတဲ့ဘက်ခြမ်းကို ပိုးမကူးအောင် သတိပြုပါ။
• ရက်အနည်းငယ်ကြာလို့မှ သက်သာတဲ့ အရိပ်အယောင်မပြရင် နီးစပ်ရာဆရာဝန်နဲ့ ပြသပါ။
• မျက်စိနာနေချိန်မှာ မျက်ကပ်မှန်တပ်တာ၊ မျက်စိနားတစ်ဝိုက်ကို ခြယ်သတာ ရှောင်ပါ။

မျက်စိနာတာကို မကူးစက်အောင် ဘယ်လိုကာကွယ်ကြမလဲ!

ကိုယ်ပတ်ဝန်းကျင်မှာ မျက်စိနာတဲ့သူရှိရင် ကိုယ့်ကို မကူးစက်စေဖို့ 

• မျက်လုံးကို လက်နဲ့ ပွတ်တာ၊ လက်ချောင်းတွေနဲ့ ကိုင်တွယ်ထိတွေ့တာမျိုး‌ ရှောင်ပါ
• လက်တွေကို မကြာခဏ ရေနဲ့ ဆပ်ပြာသုံးပြီး သေချာလေး သန့်စင်ဆေးကြောပါ
• တစ်ကိုယ်ရေသုံးပစ္စည်းတွေကို မျှဝေ သုံးစွဲတာမျိုး ရှောင်ပါ
• မျက်ကပ်မှန်တွေ၊ မျက်လုံးခြယ်သတဲ့ ပစ္စည်းတွေကို အခြားသူနဲ့ မျှသုံးတာမျိုး ရှောင်ပါ 

ဒီနည်းလမ်းလေးတွေနဲ့ မျက်စိနာတာကို ကာကွယ်လို့ ရပါတယ်။