Solmux Broncho (ဆောလ်မြူစ် ဘရွန်ခို)

အသုံးပြုပုံများ

Solmux Broncho (ဆောလ်မြူစ် ဘရွန်ခို)ကို ဘယ်လိုသောက်သုံးသင့်ပါသလဲ

ဆေးဘူးမှာပါတဲ့ အညွှန်းကို သေသေချာချာ ပြည့်ပြည့်စုံစုံ ဖတ်ပါ။ ဆေးရဲ့ ပါဝင်ပစ္စည်း အညွှန်းဇယားတွေနဲ့ ကုန်ဆုံးရက်တွေကို သေချာ ဖတ်ပါ။

ဆေးလုံးအနေနဲ့ သောက်သုံးမယ်ဆိုရင် ဆေးတစ်လုံးလုံးကို မျိုချပါ။ ဝါးမစားပါနဲ့၊ မချိုးပါနဲ့။ ရေနဲ့ပျော်အောင် ဖျော်တာမျိုး မလုပ်ပါနဲ့။ အစာနဲ့တွဲသောက်ရင် ပိုကောင်းပါတယ်။

ဆေးရည်အနေနဲ့ သောက်သုံးမယ်ဆိုရင် အိမ်မှာ သုံးတဲ့ ဇွန်းကို မသုံးရပါဘူး။ ဆေးသောက်ဖို့ ထည့်ပေးတဲ့ ဆေးချိန်ခွက်လေးနဲ့ပဲ ချိန်ပြီး တိုက်ပေးပါ။ ရေရောဖို့လိုရင် အညွှန်းအတိုင်း ရောပေးပါ။

Solmux Bronchoကို ဘယ်လိုသိုလှောင်သိမ်းဆည်းထားသင့်ပါသလဲ။

ကြိုတင်အသိပေးချက်နှင့် သတိပြုရန်အချက်များ

Solmux Broncho (ဆောလ်မြူစ် ဘရွန်ခို)ကို မသောက်သုံးခင်မှာ ဘယ်အချက်တွေကို သိထားသင့်သလဲ။

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေတဲ့အချိန်မှာ သောက်ဖို့ စိတ်ချရရဲ့လား။

ကိုယ်ဝန်ဆောင်နေချိန်

Salbutamol ကို သောက်သုံးတဲ့ ကိုယ်ဝန်ဆောင်မိခင်တွေရဲ့ ကလေးတွေမှာ မွေးရာပါချို့ယွင်းမှု ပါလာတယ်လို့ မှတ်တမ်းတွေရှိပါတယ်။ ဒါပေမယ့်လည်း အဆိုပါ မိခင်တွေက ဒီဆေးနဲ့အတူ အခြားဆေးတွေကိုပါ သောက်သုံးမှုတွေရှိနေတာကြောင့် ကလေးမှာ ချို့ယွင်းချက်ဖြစ်ရတာဟာ Salbutamol ​ကြောင့်လို့ အတိအကျ ပြောဖို့ ခက်ပါတယ်။ Salbutamol ကသားအိမ်ကျုံ့ဆန့်မှုအပေါ်မှာ သက်ရောက်မှုရှိနေတာကြောင့် မီးဖွားချိန်မှာ မသောက်သုံးသင့်ပါဘူး။

Carbocisteine အသုံးပြုမှုက ကိုယ်ဝန်ဆောင် မိခင်တွေမှာ ဘေးကင်းစိတ်ချရလားဆိုတာကို တိတိကျကျ ထုတ်ပြန်ထားတာ မရှိသေးပါဘူး။

ဒါကြောင့် ဆေးမသောက်သုံးမီမှာ ဖြစ်နိုင်တဲ့ ကောင်းကျိုး၊ ဆိုးကျိုး ချိန်ဆနိုင်ဖို့ ဆရာဝန်နဲ့ တိုင်ပင်ပါ။

ဘေးထွက်ဆိုးကျိုးများ

Solmux Broncho က ဘယ်လိုဘေးထွက်ဆိုးကျိုးတွေ ရှိနိုင်လဲ။

တခြားဆေးတွေလိုပဲ သူ့မှာလည်း ဘေးထွက်ဆိုးကျိုး အနည်းငယ် ရှိနိုင်ပါတယ်။ ဖြစ်လာခဲ့ရင်တောင် များသောအားဖြင့် လက္ခဏာက ပြင်းထန်လေ့မရှိပါဘူး။ ဆေးရပ်လိုက်ရင် ဒါမှမဟုတ် ဆေးပမာဏလျှော့လိုက်ရင် သက်သာသွားပါတယ်။ တွေ့ရတတ်တဲ့ ဘေးထွက်ဆိုးကျိုးတွေကတော့

• အရေပြားမှာ အဖုအပိမ့်တွေ ထွက်တာ
• မအီမသာဖြစ်တာ
• ခေါင်းကိုက်တာ
• ကြွက်တက်တာ သို့မဟုတ် ကြွက်သားတွေ နာကျင်တာ
• မူးဝေတာ
• ဆီးမထိန်းနိုင်တာ
• တုန်တုန်ယင်ယင် ဖြစ်တာ
• စိုးရိမ်စိတ်များတာ
• နှလုံးခုန်မမှန်တာ
• Paradoxical bronchospasm လေပြွန်ကျဉ်းသွားတာ (အသက်အန္တရာယ်ထိခိုက်စေနိုင်တဲ့ အခြေအနေပါ။ ဒီလိုအခြေအနေဖြစ်မယ်ဆိုရင် ဆေးဆက်မသောက်ပါနဲ့။ ဆေးကို ချက်ချင်းရပ်ပစ်ပါ။)

ခုပြောတဲ့ ဘေးထွက်ဆိုးကျိုးတွေက လူတိုင်းမှာ ဖြစ်ချင်မှဖြစ်မှာပါ။ တစ်ဦးနဲ့တစ်ဦးလည်း ကွဲပြားခြားနားမှုရှိနိုင်ပါတယ်။ ဘေးထွက်ဆိုးကျိုးနဲ့ ပတ်သက်ပြီး စိုးရိမ်ပူပန်မှုများရှိနေမယ်ဆိုရင် ဆရာဝန် သို့မဟုတ် ဆေးဝါးကျွမ်းကျင်ပညာရှင်နဲ့ တိုင်ပင်ဆွေးနွေးပါ။

ဆေးဝါးဓာတ်ပြုမှုများ

ဘယ်ဆေးဝါးတွေက Solmux Broncho (ဆောလ်မြူစ် ဘရွန်ခို) ကို နဲ့ ဓာတ်ပြုမှုတွေ ဖြစ်နိုင်သလဲ။

Solmux Bronchoက လောလောဆယ် သောက်သုံးနေတဲ့ တခြားဆေးဝါးတွေနဲ့ ဓာတ်ပြုမှုတွေဖြစ်နိုင်ပြီး ဆေးဝါးတွေရဲ့ အာနိသင်ပြောင်းလဲတာ၊ ဘေးထွက်ဆိုးကျိုးတွေ ပိုခံစားရတာတွေ ဖြစ်နိုင်ပါတယ်။

မလိုလားအပ်တဲ့ ဆေးဝါးဓာတ်ပြုမှုတွေ ဖြစ်မလာအောင်လို့ သင်လက်ရှိသောက်သုံးနေတဲ့ ဆေးဝါးတွေ အားလုံးရဲ့ စာရင်းကို လုပ်ထားပြီး (စာရင်းလုပ်တဲ့အခါမှာ ဆရာဝန်ညွှန်ကြားထားတာတွေ၊ မညွှန်ကြားဘဲ သောက်သုံးနေတာတွေ၊ သဘာဝဆေးဖက်ဝင်ပစ္စည်းတွေ အားလုံးပါဝင်ပါတယ်) ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ပြောပြဖို့ လိုပါတယ်။

ဓာတ်ပြုနိုင်တဲ့ ဆေးဝါးများ

• Sodium amoxicillin [အမောက်ဆလင် ပိုးသတ်ဆေး]
• Cimetidine [အစာအိမ် အနာအတွက်သောက်ဆေး]
• Salbutamol [ လေပြွန်ကျယ်ဆေး]

ဆေးဓာတ်ပြုတဲ့ လက္ခဏာတွေ ခံစားရရင် ဆရာဝန်နဲ့ ပြန်တိုင်ပင်ပါ။ ဆေးပမာဏပြန်ညှိတာ၊ တခြားဆေးနဲ့ အစားထိုးတာ၊ ဆေးရပ်တာတွေ လုပ်ရနိုင်ပါတယ်။

အစားအသောက် ဒါမှမဟုတ် အရက်သေစာတွေက Solmux Broncho (ဆောလ်မြူစ် ဘရွန်ခို) နဲ့ ဓာတ်ပြုနိုင်ပါသလား။

ဒီဆေးက အစားအစာတွေ ဒါမှမဟုတ် အယ်လ်ကိုဟောနဲ့ ဓာတ်ပြုနိုင်ပါတယ်။ ဒီလို ဓာတ်ပြုတာက ဆေးရဲ့ ဓာတ်ပြုမှု အာနိသင်နဲ့ ထိရောက်မှုကို ပြောင်းလဲစေနိုင်ပြီး ပြင်းထန်တဲ့ ဘေးထွက်ဆိုးကျိုးတွေ ဖြစ်နိုင်ပါတယ်။ ဆေးမသောက်မီမှာ ဖြစ်နိုင်ခြေရှိတဲ့ အစားအစာ၊ အယ်လ်ကိုဟောတို့နဲ့ ဓာတ်ပြုနိုင်ခြေကို ဆရာဝန် ဒါမှမဟုတ် ကျွမ်းကျင်သူတွေနဲ့ အရင်တိုင်ပင်ပါ။

ဘယ်လိုကျန်းမာရေးအခြေအနေတွေက Solmux Broncho (ဆောလ်မြူစ် ဘရွန်ခို) နဲ့ ဓာတ်ပြုမှုတွေရှိမလဲ။

Solmux Bronchoက သင့်ရဲ့ နဂိုကျန်းမာရေးအခြေအနေတွေအပေါ် သက်ရောက်မှုတွေ ရှိနိုင်ပါတယ်။ သင့်ရဲ့ ကျန်းမာရေးအခြေအနေကို ပိုဆိုးသွားစေတာ ဒါမှမဟုတ် ဆေးအာနိသင် ပြောင်းလဲသွားတာတွေ ဖြစ်နိုင်ပါတယ်။ ဒါ့ကြောင့် သင့်ရဲ့ကျန်းမာရေးအခြေအနေအကုန်လုံးကို သင့်ရဲ့ဆရာဝန် ဒါမှမဟုတ် ဆေးဝါးကျွမ်းကျင်ပညာရှင်ကို ကြိုတင်အသိပေးဖို့ အရေးကြီပါတယ်။

• နှလုံးသွေးကြောဆိုင်ရာ ကျန်းမာရေးပြဿနာရှိတာ
• အဆက်ရောဂါရှိတာ
• သိုင်းရွိုက်ဟော်မုန်း အထွက်များနေတာ
• ဆီးချို
• Sympathomimetics ဆေးတွေကို တုံ့ပြန်မှုများတာ
• အစာအိမ်နဲ့ အူအနာတွေ ရှိနေတာ
• အစာအိမ်နဲ့ အူလမ်းကြောင်း သွေးယိုစီးတဲ့ ကျန်းမာ​ရေးပြဿနာရှိနေတာ
• ပန်းနာရင်ကျပ်ရောဂါတွေ ရှိနေရင်ပါ။

သောက်သုံးရန်အညွှန်း

အခုအချက်အလက်များမှာ ဆေးပညာအကြံပေးမှုကို အစားထိုးရန်အတွက်မဟုတ်ပါ။ ဆေးဝါးများကို အသုံးမပြုခင် ဆရာဝန် သို့မဟုတ် ဆေးဝါးပညာရှင်နဲ့ အမြဲတမ်းတိုင်ပင်ဆွေးနွေးသင့်ပါတယ်။

အရွယ်ရောက်ပြီးများအတွက် ဆေးပမာဏ

တစ်ခါသောက်ရင် ဆေးတောင့် တစ်တောင့် ဒါမှမဟုတ် ဆေးရည် လက်ဖက်ရည်ဇွန်း ၁ ဇွန်း (5 mL) ၆ နာရီ ကနေ ၈ နာရီ ခြားပြီး သောက်ပါ။

သတိပြုရန် – ဆေးမသောက်ခင်မှာ ဆေးရည်ပုလင်းကို သေချာ လှုပ်ပြီးမှ သောက်ပါ။

ကလေးများအတွက် ဆေးပမာဏ

၁၂ နှစ်အထက်- လူကြီးတွေ သောက်တဲ့ ဆေးညွှန်းအတိုင်း တိုက်ပေးလို့ရပါတယ်။

၆ နှစ် ကနေ ၁၂ နှစ်- တစ်ခါ သောက်ရင် 2.5 ml [ လက်ဖက်ရည်ဇွန်း တဝက်] ကို ၆ နာရီ ကနေ ၈ နာရီခြားတစ်ခါ တိုက်ပေးပါ။

အသက် ၆ နှစ်အောက် ကလေးတွေကို မတိုက်သင့်ပါဘူး။

သတိပြုရန် – ဆေးမသောက်ခင်မှာ ဆေးရည်ပုလင်းကို သေချာ လှုပ်ပြီးမှ သောက်ပါ။

Solmux Broncho (ဆောလ်မြူစ် ဘရွန်ခို)ကို ဘယ်လိုပုံစံမျိုး၊ အချိုးအစားမျိုးတွေနဲ့ရရှိနိုင်မလဲ။

Solmux Broncho (ဆောလ်မြူစ် ဘရွန်ခို)ကို အောက်ဖော်ပြပါ ဆေးဝါးပုံစံများနဲ့ အချိုးအစားများဖြင့် ရရှိနိုင်ပါတယ်။

အရေးပေါ်အခြေအနေတွေ၊ ဆေးပမာဏလွန်သွားတဲ့ အခြေအနေတွေမှာ ဘာလုပ်သင့်သလဲ။

အရေးပေါ်အခြေအနေ သို့မဟုတ် ဆေးပမာဏလွန်သွားတဲ့ အခြေအနေတွေမှာ အရေးပေါ်ဆေးရုံဆေးခန်းများမှာ သွားရောက်ကုသမှုခံယူပါ။

ဆေးသောက်ဖို့ လွတ်သွားခဲ့ရင် (မေ့သွားခဲ့ရင်) ဘာလုပ်ရမလဲ။

Solmux Broncho ကို သောက်သုံးဖို့ လွတ်သွားခဲ့ပါက (မေ့ခဲ့ပါက) သတိရတဲ့အချိန်မှာ အမြန်ဆုံးသောက်သုံးပါ။ ဒါပေမယ့် နောက်တစ်ကြိမ်သောက်ရမယ့်အချိန်မှ သတိရတယ်ဆိုရင်တော့ လွတ်သွားတဲ့ဆေးကို ထားလိုက်ပါ။ ပုံမှန်အတိုင်းပဲ ဆက်သောက်ပါ။ ဆေးနှစ်ခါ သောက်တာမျိုး မလုပ်ပါနဲ့။