အသည်းရောဂါ ကူးစက်နိုင်ခြေများတဲ့အရာတွေ သင်ဘယ်နှမျိုး လုပ်မိနေသလဲ

အသည်းရောင် ရောဂါအများစုက ဗိုင်းရပ်စ်ပိုးတွေကူးစက်ခံရလို့ ဖြစ်လာတာပါ။ အသည်းရောင်စေတဲ့ ဗိုင်းရပ်စ်ပေါင်းအများကြီးရှိပေမယ့် အဓိကအားဖြင့် အသည်းရောင် အေဗိုင်းရပ်စ်၊ ဘီဗိုင်းရပ်စ်နဲ့ စီဗိုင်းရပ်စ်တို့ကို အဖြစ်များ ပါတယ်။ အဲဒီအထဲက အသည်းရောင် အေပိုးကတော့ အစားအသောက်တွေကနေတဆင့် ကူးစက်တတ်ပါတယ်။ ဘယ်အမျိုးအစားပဲ ဖြစ်ဖြစ် သေချာ မကုသရင် နောက်ဆုံးမှာ နာတာရှည် အသည်းရောဂါ ဖြစ်လာနိုင်ပြီး အသည်း ခြောက်ခြင်း၊ အသည်းကင်ဆာ အထိ ဖြစ်လာနိုင်ပါတယ်။ အသည်းရောဂါ ကူးစက်နိုင်ခြေများတဲ့အရာတွေ သင်ဘယ်နှမျိုး လုပ်မိနေသလဲ ဆိုတာကို ဆန်းစစ်ကြည့်ကြရအောင်။

အသည်းရောင်ရောဂါပိုးတွေက ဘယ်လိုကူးစက်တတ်သလဲ

အသည်းရောင် အသားဝါ အေ ရောဂါက ရောဂါပိုးပါနေတဲ့ အစားအသောက်တွေကတဆင့် ကူးစက် ပြန့်ပွားတာ ဖြစ်ပါတယ်။ ဘီပိုးနဲ့ စီပိုးကနေ သွေးနဲ့ ခန္ဓာကိုယ်က ထွက်တဲ့ အရည်တွေကြောင့် ကူးစက်တတ်ပါတယ်။

အသည်းရောဂါ ကူးစက်နိုင်ခြေများတဲ့အရာတွေ သင်ဘယ်နှမျိုး လုပ်မိနေသလဲ

အသည်းရောဂါ ကူးစက်နိုင်ခြေများတဲ့အရာတွေ သင်ဘယ်နှမျိုး လုပ်မိနေသလဲ ဆိုတာ ဆန်းစစ်လိုက်ပါ။

အသီးအနှံတွေ သေချာမဆေးတာ၊ရေမသန့်တာ

အသည်းရောင်အသားဝါအေပိုးက အသီးအနှံတွေရဲ့ အပြင်ခွံတွေ၊ အသုပ်တွေ စတဲ့ စားစရာတွေကနေ ပါလာတတ်လို့ မစားခင် သေချာစင်အောင် ဆေးပါ။ ရေကိုလည်း ရေသန့် သောက်ပါ၊ ကျိုချက် သောက်ပါ။

အခွံမာငါးတွေ အစိမ်းစားတာ

အခွံမာငါးတွေ နဲ့ ပင်လယ်စာတွေဟာ ညစ်ညမ်းနေတဲ့ ရေတွေထဲ နေလာတာ ဖြစ်လို့ ကမာ၊ ဂုံး၊ ခရုတွေကို မချက်မပြုတ်ဘဲ အစိမ်းစားရင် ဒီရောဂါပိုး ရရှိနိုင်ပါတယ်။ သေချာ ချက်ပြုတ်ပြီး စားတာ အကောင်းဆုံးပါ။

လက်မသန့်တာ

အသည်းရောင် အသားဝါအေ ဗိုင်းရပ်စ်က ခန္ဓာကိုယ်ပြင်ပမှာ အချိန်အတော်ကြာ ရှင်သန်နိုင်ပါတယ်။ အိမ်သာကအထွက် လက်ဆေးတာ၊ လက်သန့်ဆေးရည်သုံးတာ၊ အစာမစားခင်လက်ဆေးတာ အပါအဝင် တစ်ကိုယ်ရည်သန့်ရှင်းမှုရှိမှ အသည်းရောင်အေရောဂါပိုးကူးစက်မှုကို ကာကွယ်နိုင်မှာပါ။

မသန့်တဲ့သွေးနဲ့ ထိတွေ့မိတာ

ရောဂါပိုးရှိတဲ့ သွေးနဲ့ ခန္ဓာကိုယ် အရည်တွေက အသည်းရောင် အသားဝါ ဘီနဲ့ စီကို ကူးစက်ပြန့်ပွားစေနိုင်ပါတယ်။ ကိုယ်ဝန်ဆောင်ချိန်နဲ့ မီးဖွားနေစဉ်အတွင်းမှာ မိခင်ကနေ ကလေးကို ကူးစက်နိုင်သလို လိင်ဆက်ဆံတာ၊ မကျက်သေးတဲ့ အနာကနေတဆင့်လည်း ကူးနိုင်ပါတယ်။

သေချာ ပိုးသတ်မထားတဲ့ သွားကျန်းမာရေးသုံး ပစ္စည်းတွေကနေလည်း ကူးနိုင်ပါတယ်။ ရောဂါပိုး ရှိတဲ့ လူရဲ့ သွေးကို သွင်းမိရင်လည်း ဘီရော စီပါ ကူးစက်နိုင်ပါတယ်။

တက်တူးထိုးတာ နဲ့ နားဖောက်တာ

တက်တူး ထိုးတာ၊ နားဖောက်တာတွေက လုပ်လို့ရပါတယ်။ ဒါပေမဲ့ အသည်းရောင် အသားဝါ ဘီနဲ့စီ ကူးစက်နိုင်ခြေ နည်းချင်တယ် ဆိုရင် သန့်ရှင်းမှုနဲ့ ပိုးသတ် လုပ်ငန်းစဉ်ကို ဂရုစိုက်တဲ့ အလှပြင်ဆလွန်းတွေနဲ့ တက်တူးဆိုင်တွေကို ရွေးပါ။

အပ်တွေနဲ့ ကိရိယာ၊ အသုံးအဆောင်တွေကနေ တစ်ယောက်နဲ့ တစ်ယောက် ရောဂါ မကူးစက်စေဖို့ အသုံးပြုသမျှ အရာအားလုံး ပိုးသတ်သန့်စင်ထားမှ ဖြစ်မှာပါ။

တစ်ကိုယ်ရည်သုံးပစ္စည်းတွေကို မျှသုံးတာ

သွားပွတ်တံ၊ မုတ်ဆိတ်ရိတ်ဓား အပါအဝင် တစ်ကိုယ်ရည်သုံး ပစ္စည်းတွေ၊ အသုံးအဆောင်တွေကို အတူ မျှသုံးခြင်း ကနေ အသည်းရောင်ရောဂါတွေ ကူးစက်နိုင်ခြေ များပါတယ်။ ဘလိတ်ဓါး၊ လက်သည်းညှပ်၊ အပ် စတဲ့ ပစ္စည်းတွေလည်း ပါဝင်ပါတယ်။