backup og meta

အသည်းရောင်အသားဝါရောဂါရှိတဲ့သူတွေအတွက် ရှောင်ရမယ့်အစားအသောက်များ

မှ အချက်အလက် စစ်ဆေးထားပါသည်။ Dr. Thurein Hlaing Win


Hello Sayarwon Panel မှ ရေးသားသည်။ · 04/07/2022 တွင် အသစ်ဖြည့်စွက်ခဲ့သည်။

    အသည်းရောင်အသားဝါရောဂါရှိတဲ့သူတွေအတွက် ရှောင်ရမယ့်အစားအသောက်များ

    တချို့သော အစားအစာတွေက အသည်းကို ထိခိုက်နိုင်တာကြောင့် အသည်းရောင်အသားဝါရောဂါ ရှိရင် အစားအစာတွေကို ဂရုတစိုက်ရွေးချယ်စားသုံးသင့်ပါတယ်။ အသည်းရောဂါရှိရင် အလွန်အကျွံမစားသင့်တဲ့ အစားအစာနဲ့ ရှောင်ကြဉ်ရမယ့် အစားအစာတွေကို မှတ်သားနိုင်ရန် အောက်မှာ ဖော်ပြထားပါတယ်။

    အသည်းရောင်အသားဝါရောဂါရှိတဲ့သူတွေအတွက် ရှောင်ရမယ့်အစားအသောက်များ

    အာဟာရဖြစ်စေတဲ့ အစားအစာတွေအပြင် ကျန်းမာရေးကို ထိခိုက်စေသော၊ အသည်းကို ထိခိုက်နိုင်သော အစားအစာတွေလည်း ရှိပါတယ်။ အသည်းရောင်အသားဝါရောဂါရှိတဲ့သူတွေအတွက် ရှောင်ရမယ့်အစားအသောက်များ ကတော့

    အရက်ဖြတ်ပါ။

    အရက်က အသည်းကို အဆိပ်အတောက်ဖြစ်စေပြီး အူမှ အာဟာရဓာတ်များ စုပ်ယူခြင်းကို ဟန့်တားတာကြောင့် အသည်းရောင် အသားဝါရောဂါ ရှိသူများရှောင်ကြဉ်သင့်တဲ့ အစားအစာတွေဲမှာ ပါဝင်ပါတယ်။ ဘီယာ၊ ဝိုင်၊ ရှန်ပိန်၊ အရက်ပြင်းများသောက်ခြင်းကို ရှောင်ကြဉ်ပါ။

    ဆေးဆိုင်တွင် အလွယ်တကူရနိုင်သော ချောင်းဆိုးပျောက်ဆေးရည်တချို့မှာ အရက်ပါဝင်တတ်ပါတယ်။ ဒါကြောင့် ချောင်းဆိုးပျောက်ဆေးသောက်မယ်ဆို ဆရာဝန် ဒါမှမဟုတ် ဆေးဝါးပညာရှင်ကို အရင်မေးမြန်းသင့်ပါတယ်။

    ဆိုဒီယမ်ဓာတ် (ဆား) ပါဝင်သော အစားအစာများ အလွန်အကျွံ စားခြင်းကို ရှောင်ကြဉ်ပါ။

    ဆိုဒီယမ်ဓာတ်များပါက အသည်းရဲ့ လုပ်ငန်းဆောင်တာများကို ထိခိုက်စေနိုင်ပြီး သွေးတိုးတာလည်း ဖြစ်စေနိုင်ပါတယ်။ စည်သွတ်ထားတဲ့ အစားအစာများ၊ ကျပ်တင်ထားတဲ့ အစားအစာတွေက  ဆားနဲ့ သကြားဓာတ် ပါဝင်မှုများတာကြောင့် ဗိုက်တွင် ရေဖျင်းဆွဲခြင်းကို ဖြစ်စေနိုင်ပါတယ်။

    ဒါကြောင့် အစားအစာတွင် ပါဝင်သော အာဟာရပါဝင်မှု အညွှန်းကိုဖတ်ပါ။ ဆားပါဝင်မှုများသော အသားနှင့် အသားချောင်းများကို လျှော့စားပါ။ သွေးပေါင်ချိန်ကို ထိန်းညှိနိုင်ရန် ဆရာဝန်နှင့် တိုင်ပင်ပါ။

    ပြည့်ဝဆီများစားခြင်းကို ရှောင်ကြဉ်ပါ။

    အသည်းရောဂါဖြစ်ရင် အာဟာရချို့တဲ့ပြီး ကိုယ်အလေးချိန်ကျဆင်းနိုင်သောကြောင့် အဆီကို လုံးဝရှောင်တာမျိုး မလုပ်သင့်ပါဘူး။ သို့သော်လည်း အသည်းရောဂါဖြစ်နေချိန်မှာ အဆီကို အူမှစုပ်ယူနိုင်ရန်နဲ့ ခန္ဓာကိုယ်မှ ချေဖျက်နိုင်ရန်အတွက် လိုအပ်တဲ့ သည်းခြေရည်ထုတ်လုပ်မှုက နည်းလာနိုင်ပါတယ်။

    ဒါကြောင့် ကျန်းမာရေးနဲ့ မညီညွတ်တဲ့ ပြည့်ဝဆီ (ထောပတ်ဆီ၊ အဆီမထုတ်ထားသောနွားနို့၊ အသားမှရသောအဆီ) များကို ရှောင်ကြဉ်သင့်ပြီး ခန္ဓာကိုယ်အတွက် ကောင်းမွန်သော မပြည့်၀ဆီများ (သံလွင်ဆီ၊ ထောပတ်သီးအဆီ)ကို ရွေးချယ်စားသုံးသင့်ပါတယ်။

    ပရိုတင်းဓာတ် (အသားဓာတ်) အလွန်အကျွံစားသုံးခြင်းကို ရှောင်ကြဉ်ပါ။

    အသည်းရောင်နေချိန်မှာ အသည်းရဲ့ လုပ်ဆောင်ချက်များကို ထိခိုက်နေတာကြောင့် ခန္ဓာကိုယ်မှာ အမိုးနီးယားဓာတ်(ammonia) များ စုပုံနေနိုင်ပါတယ်။ ဒီဓာတ်သည် ဦးနှောက်ကို အဆိပ်အတောက် ဖြစ်စေနိုင်ပါတယ်။

    ကျွမ်းကျင်ပညာရှင်များက တစ်နေ့ကို ကိုယ်လေးချိန် ၁ကီလိုတွင် ပရိုတင်းဓာတ် ၁ဂရမ်နှုန်းထက် ပို၍မစားသင့်ကြောင်း ဆိုထားပါတယ်။ ပရိုတင်းဓာတ်ပါဝင်မှုများသော အစားအစာများမှာ အသား၊ ကြက်သား၊ ငါး၊ နို့ထွက်ပစ္စည်းများ၊ ပဲ၊ အစေ့အဆံများ ပါဝင်သည်။ ဒါပေမယ့် အသည်းရောင် အသားဝါ ရှိနေသူတွေက အာဟာရဓာတ်လည်း ချို့တဲ့နေနိုင်တာကြောင့် တစ်နေ့တာမှာ ပရိုတင်းဘယ်လောက် စားသင့်လဲဆိုတာကို အာဟာရဆရာဝန်နဲ့ တိုင်ပင်ပါ။

    ချိုတဲ့ အစားအစာတွေကို အလွန်အကျွံ မစားပါနဲ့။

    ချိုတဲ့ အစားအစာတွေက သကြားဓာတ် ပါဝင်မှု များတာကြောင့် ဆီးချိုရောဂါဖြစ်နိုင်ခြေကို မြင့်စေပြီး အသည်းကိုလည်း ထိခိုက်နိုင်ပါတယ်။ ကိတ်မုန့်၊ ပေါင်မုန့်ဖြူနှင့် သကြားပါသော အစားအစာများကို ရှောင်ကြဉ်သင့်ပါတယ်။

    သဘာဝ သကြားနဲ့ အမျှင်ဓာတ်ပါတဲ့ အစားအစာများ (စတော်ဘယ်ရီ၊ လိမ္မော်သီး၊ ပန်းသီး) တို့ကိုတော့ စားသင့်ပါတယ်။ အမျှင်ဓာတ် ပါတဲ့ အစားအစာတွေကခန္ဓာကိုယ်မှ သကြားစုပ်ယူမှုကို နှေးကွေးစေပြီး သွေးတွင်းသကြားဓာတ်ကို ထိန်းညှိပေးပါတယ်။

    အသည်းရောင်အသားဝါရောဂါ ရှိသူတွေအနေနဲ့ သင့်လျော်တဲ့ အစားအစာကို ရွေးချယ်ခြင်းက ရောဂါသက်သာစေဖို့ အထောက်အကူဖြစ်စေပါတယ်။ အစားအသောက်ကို သေချာရွေးချယ်စားသုံးလေ သင်ကျန်းမာလေ ဖြစ်ပါတယ်။

    ရေးသားသူ- Dr Sandar Lin

    မသက်ဆိုင်ကြောင်း ရှင်းလင်းချက်

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    မှ အချက်အလက် စစ်ဆေးထားပါသည်။

    Dr. Thurein Hlaing Win


    Hello Sayarwon Panel မှ ရေးသားသည်။ · 04/07/2022 တွင် အသစ်ဖြည့်စွက်ခဲ့သည်။

    advertisement iconadvertisement

    ဤဆောင်းပါးက အကူအညီဖြစ်ပါသလား။

    advertisement iconadvertisement
    advertisement iconadvertisement