အဆီချ Diet နဲ့ပတ်သက်ပြီး မှားသိထားတဲ့အရာ (၉) ခု

အဆီချဖို့ Diet လုပ်တယ်ဆိုတာ အစားရှောင်မယ်၊ အစားလျှော့မယ်ပေါ့။ အဓိကတော့ ထမင်းမစားတော့ဘူး၊ အဆီတွေမစားဘူး၊ ကာဗိုဟိုက်ဒရိတ်ဖြတ်၊ အချိုဖြတ်ကြတယ်။ အသီးအရွက်၊ အသီးအနှံ၊ အသားတွေ ပုံစံချ စားတယ်၊ရေသောက်တယ်။ ဒါ Diet ပဲ။ ဒါပေမယ့် ဒီလိုလုပ်နေကြရင်းနဲ့ သိထားတာ မှားတတ်ကြတဲ့အချက်တွေရှိတယ်။ ဒီအချက်တွေက တကယ်လည်းအရေးပါနေတယ်။ ဘာလို့ဆို မှားပြီးလုပ်မိနေရင် အဆီကျမယ့်စီမံကိန်းမှာ အကုန်သဲထဲရေသွန်ဖြစ်ကုန်မှာပေါ့။ အများအားဖြင့် ကိုယ်သိထားတာ ဘာတွေမှားနေတတ်လဲ ဖတ်ကြည့်လိုက်ဦးနော်။

(၁) ညဘက်အစားစားရင် ဝတယ်

ညဘက်အစားစားတာက ကိုယ်အလေးချိန်တက်စေတယ်ဆိုတဲ့ခိုင်မာတဲ့ သက်သေပြချက်မရှိပါဘူး။ တကယ်က ကယ်လိုရီအများကြီးစားရင် ကိုယ်အလေးချိန်တက်နိုင်တယ်၊ ညဘက်စားတဲ့သူတွေက စားတာများသွားတတ်တယ်၊ ကယ်လိုရီများတာကိုရွေးမိတတ်တယ် ဆိုတာပဲပြဿနာပါ။ ညဘက်စားလို့ ဝတာမဟုတ်ဘဲ အဲဒီအချက်တွေနဲ့ ငြိလို့ပါ။နောက်ပြီး အိပ်ရာဝင်ခါနီးကျမှ စားတာက ရင်ပူနာနဲ့ အစာမကြေခြင်းကိုဖြစ်စေနိုင်တယ်။ ဒါ့ကြောင့်ဖြစ်နိုင်ရင်တော့ အစာစားချိန်ကိုပုံမှန်လေးသတ်မှတ်ပြီးစောစားပါ။

(၂) တချို့အချိုတွေက ပိုဆိုးတယ်

သကြား၊ ပျားရည်နဲ့ high-fructose corn syrup တို့မှာ ကယ်လိုရီတွေပါဝင်တယ်။ ခန္ဓာကိုယ်က ဒီအချိုဓာတ်အမျိုးမျိုးကို အတူတူပဲ စုပ်ယူတာဖြစ်တယ်လို့ သုတေသနတွေက ဆိုထားပါတယ်။ ဒီတစ်မျိုးကိုရှောင်ပြီး နောက်တစ်မျိုးကို စားနေလည်း diet ကသိပ်မထူးတော့ပါဘူး။

(၃) ကော်ဖီက မကောင်းဘူး

ကော်ဖီဆိုတာ ထိုက်သင့်တဲ့ပမာဏပဲသောက်မယ်ဆိုရင် ကျန်းမာတဲ့စားသောက်ပုံကိုထိန်းပေးနိုင်ပြီး ဓာတ်တိုးဆန့်ကျင်ပစ္စည်း phytochemicals ရရှိစေပါတယ်။ နောက်ပိုင်းသုတေသနတွေအရ ကော်ဖီက အမျိုးအစား၂ ဆီးချိုရောဂါ၊ သည်းခြေကျောက်တည်ခြင်း၊ ပါကင်ဆန်ရောဂါဖြစ်နိုင်ခြေတွေ နည်းစေနိုင်တယ်လို့ လေ့လာတွေ့ရှိထားပါတယ်။ လွန်တော့မလွန်ကဲစေနဲ့ပေါ့။

(၄) အဆီမစားလေ ကောင်းလေ

လူ့ခန္ဓာကိုယ်ဟာ ပရိုတင်း၊ ကာဗိုဟိုက်ဒရိတ်နဲ့ အဆီဓာတ်ဆိုတဲ့ အာဟာရဓာတ်သုံးမျိုးကို လိုအပ်ပါတယ်။ အဆီဆိုတာ အစေ့အဆန်တွေ၊ ငါး၊ ထောပတ်သီး၊ သံလွင်သီးနဲ့ အဆီလျှော့နို့ထွက်ပစ္စည်းတွေလို အစားအစာတွေဆီက ရတဲ့ အကျိုးပြုအဆီတွေပါ။ အကျိုးပြုအဆီတွေကိုတော့ ရှောင်တဲ့အထဲ မထည့်ရပါဘူး။ ထောပတ်၊ အဆီအဆိမ့်တွေ၊ အနီရောင်အသားတွေနဲ့ ပြုပြင်စီမံထားတဲ့ အစားအစာတွေကရတဲ့ပြည့်ဝဆီတွေ၊အသွင်ပြောင်းဆီတွေကိုတော့ လုံးဝရှောင်ရမှာဖြစ်ပါတယ်။

(၅) ဆိုဒီယမ်နည်းအောင် ပန်းရောင်ဆား ပြောင်းသုံးမယ်

Diet လုပ်ရင် အငန်လျှော့စားရမယ်ဆို ပန်းရောင် ပင်လယ်ဆားကိုပြောင်းသုံးတာနဲ့ ရပြီလား။ ဆားက ဆားပဲမို့ ဆိုဒီယမ်လည်းသိပ်မကွာသလို ပြုပြင်ထားတဲ့အစားအစာ၊ အသင့်စားတွေမှာ အငန်ကပါပြီးသားမို့ Diet လုပ်ချိန်မှာ အငန်ကိုလျှော့ထည့်ရမှာပဲဖြစ်ပါတယ်။

(၆) ရေပိုသောက်ရင် ဝိတ်ကျမယ်

ရေက လူ့ခန္ဓာကိုယ်အတွက် အရေးကြီးတယ်ဆိုတာသိကြပါတယ်။ ဒါပေမယ့် ဝိတ်ချတဲ့နေရာမှာတော့ သူ့ချည်းအားကိုးလို့ မဖြစ်နိုင်ပါဘူး။ ကယ်လိုရီများတဲ့ သောက်စရာ၊ အချိုရည်တွေအစား ရေကိုသောက်မယ်ဆို အထောက်အကူဖြစ်နိုင်ပေမယ့် စားတာသောက်တာ မပြောင်းလဲဘဲ ရေကိုပိုသောက်လို့တော့ အဆီမကျနိုင်ပါဘူး။

(၇) အားကစားလုပ်ရင် ပရိုတင်းအများကြီးလိုတယ်

ဂျင်မ်သွားမယ်၊ အားကစားလုပ်မယ်ဆို ကြွက်သားနဲ့ကျစ်လျစ်မှုအတွက် ပရိုတင်းများများလိုအပ်တယ်လို့ထင်ကြတယ်။ အားကစားလေးလုပ်တာနဲ့ Protein Shake ကို လိုအပ်တယ်လို့ ယူဆကြပါတယ်။ တကယ်က အားကစားလုပ်ရင် ကယ်လိုရီလုံလောက်ဖို့ လိုတယ်၊ ပရိုတင်းပါတဲ့ သရေစာ(Protein Shake) နဲ့လည်းရပါတယ်။Protein Shake ကို အလွန်အကျွံသောက်ဖို့မလိုပါဘူး။

(၈) သကြားအများကြီးစားရင် ဆီးချိုဖြစ်မယ်

ကိတ်မုန့်နဲ့ သကြားလုံးတွေစားလို့ ဆီးချိုဖြစ်မှာစိုးရိမ်နေတာလား။ ဒီလို စားတိုင်းဖြစ်တာမဟုတ်ပါဘူး။ ဆီးချိုအန္တရာယ်ကိုပိုများစေတာက ဝတာနဲ့ လှုပ်ရှားမှုနည်းတာကြောင့်ပါ။ ထိုက်သင့်သလောက်စား၊ပြန်လှုပ်ရှားလိုက်ပြီးတာပဲပေါ့။ Diet လုပ်ရင် အချိုလုံးဝဖြတ်တာက ကယ်လိုရီထိန်းနိုင်တယ်ဆိုပေမယ့် အစားကလျှော့၊ လေ့ကျင့်ခန်းလည်းလုပ် ဆိုတော့ သွေးတွင်းသကြားဓါတ်သိပ်ကျဆင်းသွားရင် မူးလဲနိုင်တယ်နော်။

(၉) ကာဗိုဟိုက်ဒရိတ်က ဝိတ်တက်တယ်

ကာဗိုဟိုက်ဒရိတ်တိုင်းက ဆိုးတာတော့မဟုတ်ပါဘူး။ ဒါပေမယ့် ကာဗိုဟိုက်ဒရိတ်လျှော့လိုက်ရင်တော့ ဝိတ်ကျသလို တွေ့ရတယ်မလား။ Dietတွေက ကယ်လိုရီတွေကို ကန့်သတ်တာပဲဆိုတော့ အဆီ၊ ပရိုတင်းနဲ့ ကာဗိုဟိုက်ဒရိတ်တွေကို လျှော့စရာမလိုဘဲ လုံလောက်အောင်စားမယ်ဆို ကယ်လိုရီလျှော့ရင် ကိုယ်အလေးချိန်လျော့တာပါပဲ။

အဆီကျကျစ်လျစ်ဖို့ဆိုတာ လျှို့ဝှက်ချက်မရှိပါဘူး။ အစားအသောက်ကို ကျန်းမာရေးနဲ့ညီအောင် မှန်ကန်စွာစားပြီး ကိုယ်လက်လှုပ်ရှားမှုလုပ်ဖို့သာ အဓိကပါ။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပေးပါ။

Hello Sayarwon Panel မှ အချက်အလက်များ စစ်ဆေးထားပါသည်။ Yun Sandi Nan Mon မှ ရေးသားသည်။ နောက်ဆုံးအသစ်ပြင်ဆင်သည့်ရက်စွဲမှာ 01/02/2022 ဖြစ်ပါသည်။

ဤဆောင်းပါးက အကူအညီဖြစ်ပါသလား။