သင့်စိုးရိမ်မှုတွေက ဘာတွေလဲ။

close
မတိကျ
နားလည်ရခက်
အခြား

သို့မဟုတ် လင့်ခ်ကူးယူမည်

ask-doctor-icon

ဆရာဝန်အား အခမဲ့မေးမြန်းလိုက်ပါ။

Hello ဆရာဝန်မှာ သင့်အတွေးများကို အသိပေးနိုင်ပါတယ်။

သင့်ရဲ့အရေပြားမှာ အနာကိုအကျက်မြန်စေတဲ့ အစားအသောက်များ

    သင့်ရဲ့အရေပြားမှာ အနာကိုအကျက်မြန်စေတဲ့ အစားအသောက်များ

    လူတိုင်းဟာ သူတို့ရဲ့ဘဝမှာ အကြောင်းအရင်းများစွာကြောင့် ဒဏ်ရာရလေ့ရှိပါတယ်။ ကျွန်ုပ်တို့ ဘယ်လိုပဲဂရုစိုက်စိုက် ဒါကိုရှောင်ရှားနိုင်တဲ့ သူဆိုတာမရှိပါဘူး။ သင့်ရဲ့ဒီလိုဖြစ်လာတဲ့အနာတရတွေကို သန့်သန့် ရှင်းရှင်းထားခြင်း၊ ပိုးမဝင်အောင် ကာကွယ်ထားခြင်း သို့မဟုတ် ပိုဆိုးလာတဲ့ အနာတွေကို ဆေးဝါးကုသမှုခံယူခြင်း စတာတွေကို ပြုလုပ်ပေးရပါမယ်။ ဒါ့အပြင် သင့်ရဲ့ ဒဏ်ရာပိုပြီးမြန်မြန်ကျက်ဖို့ရာ လိုအပ်တဲ့ အာဟာရဓါတ်ကို သဘာဝအတိုင်း များလာစေဖို့အတွက် အစားအစာတွေရဲ့ အခန်းကဏ္ဍ ဟာလည်းအရေးကြီးတဲ့ နေရာမှာပါဝင်တယ်ဆိုတာ သင်သိပါသလား။ ဒီမှာ သင့်အတွက် နည်းလမ်းကောင်းလေးတွေ ညွှန်ပေးထားပါတယ်။

    ဗီတာမင်စီဓါတ် ကြွယ်ဝသော အစားအသောက်များ
    ဗီတာမင်စီဓါတ်များစွာ ပါဝင်တဲ့အစားအသောက်တွေဟာ သင်နေ့စဉ်စားတဲ့ အစားအစာထဲမှာ ဖြည့်စွက်ဖို့လိုအပ်တဲ့ အရာတစ်ခုအဖြစ် ပါဝင်ပါတယ်။ ဗီတာမင်စီဓါတ်ရဲ့ အကူအညီနှင့် သင့်ရဲ့အနာတွေကို ကျက်ဖို့ရာ အချိန်အနည်းငယ်သာ လိုအပ်စေပြီး အရေပြားအလွှာသစ်ဖြစ်စေမယ့် ကော်လဂျင်ဓါတ် ဖန်တီးပေးရာမှာလည်း ကူညီပေးနိုင်ပါတယ်။ အသားဓါတ်ဟာ ကော်လဂျင်ကို ပြုလုပ်ပေးသော်လည်းပဲ ကော်လဂျင်ထုတ်လုပ်မှုဟာ ဗီတာမင်စီဓါတ်ရှိခြင်းပေါ်မှာ မူတည်ပါတယ်။ ဗီတာမင်စီဓါတ် ကြွယ်ဝတဲ့အစားအသောက်များကို စားခြင်းဟာ ကော်လဂျင်အသားအမျှင်ဓါတ် ဖြစ်ခြင်းကို အားပေးပြီး ပြတ်ရှဒဏ်ရာရဲ့ အစွန်းတွေမှာရှိတဲ့ အရေပြားအသစ်တွေဟာ ကြီးထွားလာပြီး ကော်လဂျင်ရဲ့ အကူအညီကိုယူကာ အလယ်ခေါင်မှာ လာစုဆုံကာ အနာကျက်ရတာပဲ ဖြစ်ပါတယ်။ ဒါ့အပြင် ဗီတာမင်စီဓါတ်ဟာ အရေပြားအမာရွတ် တစ်ရှူးတွေ၊ အရွတ်တွေ၊ အရွတ်လုံးတွေနဲ့ သွေးကြောတွေ အတွက်လိုအပ်တဲ့ အသားဓါတ်အသစ် ဖြစ်ပေါ်လာအောင် တည်ဆောက်ပေးကာ အနာကျက်တဲ့ဖြစ်စဉ်မှာ ပါဝင်ကူညီပေးနေပါတယ်။

    ချဉ်သောအသီးများ အစိမ်းရောင်အရွက်များနှင့် ဖျော်ရည်များဟာ ဗီတာမင်စီဓါတ် ပမာဏများစွာ ပါဝင်ပါတယ်။ အခြားအစားအသောက်တွေကတော့ စတော်ဘယ်ရီသီး၊ ခရမ်းချဉ်သီး၊ ငရုတ်ကောင်း၊ အာလူးမီးဖုတ်၊ ကီဝီသီး၊ ပန်းကော်ဖီစိမ်း၊ ဟင်းနုနွယ်ရွက်၊ ကော်ဖီထုပ်နှင့် ကော်ဖီထုပ်စိမ်း စတဲ့အစားအသောက်တွေပဲ ဖြစ်ပါတယ်။ နေ့စဉ်လိုအပ်တဲ့ ဗီတာမင်ဓါတ်ပမာဏဟာ ၂၀၀ မီလီဂရမ်အထိလို့ ယူဆထားပြီး အနည်းဆုံး အထက်ဖော်ပြပါအစားအသောက်များမှ တစ်မျိုးကို တစ်ရက်စီ စားသောက်ပေးခြင်းဟာ အာဟာရဓါတ် အလွယ်တကူ ရရှိနိုင်ပါတယ်။

    ဗီတာမင်အေ ကြွယ်ဝသောအစားအသောက်များ
    ဗီတာမင်အေဟာလည်း အရေပြား အနာကျက် မြန်စေဖို့ရာအတွက် မရှိမဖြစ်အရေးကြီးသော ဓါတ်တိုးဆန့်ကျင်ပစ္စည်းပါဝင်တဲ့ နောက်ထပ် ဗီတာမင်တစ်ခုပဲ ဖြစ်ပါတယ်။ ဗီတာမင် ဓါတ်တွေဟာ ပိုးဝင်ခြင်းကို ခုခံတိုက်ခိုက်ပြီး ရောင်ရမ်းခြင်းဆိုင်ရာ တုံ့ပြန်မှုများကို ထိန်းချုပ်ရမှာ ကူညီပေးပါတယ်။ ဒီလိုဖြစ်စဉ်တွေဟာ ခန္ဓါကိုယ်အတွက် အရမ်းအရေးကြီးပါတယ်။ ဘာကြောင့်လဲဆိုတော့ အန္တရာယ်ရှိသော လှုံ့ဆော်ပစ္စည်းတွေနဲ့ ဘတ်တီးရီးယားပိုးတွေကို ဖယ်ရှားခြင်းအားဖြင့် ပိုးမဝင်အောင် ပထမဆုံးကာကွယ်ပေးခြင်းဖြစ်စဉ်ဟာ ရောင်ရမ်းပေးခြင်းပဲ ဖြစ်ပါတယ်။ ကော်လဂျင်ဓါတ် ဖွဲ့စည်းမှုကို အားပေးခြင်းအားဖြင့် ဒဏ်ရာတွေဟာ ပိုပြီး ကောင်းလာခြင်းနှင့်အတူ သင့်ရဲ့အရေပြားဟာ အနာကျက် မြန်လာစေတဲ့ ရလဒ်ကိုခံစားရမှာ ဖြစ်ပါတယ်။ တကယ်လို့ သင့်ရဲ့ခန္ဓါကိုယ်ဟာ အနာကျက် စေဖို့အတွက် လုံလောက်တဲ့ ဗီတာမင်ဓါတ် မရှိဘူးဆိုရင် အနာကျက်ခြင်းဖြစ်စဉ်ဟာလည်း ကောင်းစွာအလုပ်လုပ်မှာ မဟုတ်ပါဘူး။ သို့သော် သင်ဟာ၎င်းဗီတာမင်တွေကို အလွန်အမင်း စားသောက်ပြီး အဆိပ်အတောက်ဖြစ်စေခြင်းကိုတော့ ရှောင်ကြဉ်ရပါမယ်။

    သင်ကိုယ်တိုင် စားသောက်ပေးသင့်တဲ့ ဗီတာမင်အေဓါတ် ကြွယ်ဝသော အစားအသောက်တွေကတော့ ဥများ၊ နို့၊ ထူးကဲအောင် စီမံထားသောအဆီနည်း သည့် နို့ထွက်ပစ္စည်းများ၊ အဝါရောင်နှင့် လိမ္မော်ရောင်အရွက်များ၊ အနီရောင်အသီးများ၊ ငါး၊ အစိမ်းရင့်ရောင်အရွက်များ၊ နေကြာစေ့၊ မုန်လာဥနီ၊ ကန်စွန်းဥ၊ ရွှေဖရုံသီးမျိုးနွယ်များ၊ အနောက်တိုင်းအစားအစာတွင် သုံးသောအရွက်စိမ်းနှင့် ဟင်းနုနွယ်ရွက် စသည်တို့ ဖြစ်ပါတယ်။

    အသားဓါတ် ကြွယ်ဝသောအစားအသောက်များ
    အသားဓါတ်ဟာဆိုရင် သင့်ရဲ့အနာကြောင့် ပျက်စီးသွားတဲ့ အသားတစ်ရှူးတွေကို ပြန်လည်ပြုပြင်ရာမှာ မရှိမဖြစ်ပါဝင်ပါတယ်။ ၎င်းဟာပျက်စီးသွားတဲ့ အရေပြား ကော်လဂျင်အမျှင်နှင့် သွေးကြောတွေကို ပြန်လည်တည်ဆောက်ဖို့ရာ ကူညီပါတယ်။ တကယ်လို့သင့်ခန္ဓါကိုယ်မှာ လုံလောက်တဲ့ အသားဓါတ်ပမာဏ မရှိဘူးဆိုရင် အနာကျက်ခြင်းဟာ ပိုပြီးနှေးကွေး နိုင်ပါတယ်။ နှိုင်းယှဉ်ပြရမယ်ဆိုရင် လုံလောက်တဲ့ အသားဓါတ်ပမာဏ ရှိခြင်းဟာ သင့်ရဲ့ဒဏ်ရာအနာတရတွေကို အလျင်မြန်ဆုံး ကူညီဖာထေး ပေးနိုင်ပါတယ်။ ကြီးကြီးမားမားထိခိုက်မှုတွေမှာဆိုရင် သင့်ရဲ့အရေပြား ပြန်ပြီးဒဏ်ရာအကျက် မြန်စေဖို့အတွက် ပုံမှန်ထက်စာရင် အသားဓါတ်ကို ပိုပြီးစားသုံးပေးသင့်ပါတယ်။ သို့သော် သင့်ရဲ့ဆုံးဖြတ်ချက်ကို သင့်ဆရာဝန် သို့မဟုတ် ကျန်းမာရေးစောင့်ရှောက်သူနဲ့ အရင်ဆုံးတိုင်ပင်သင့်ပါတယ်။

    အဆီမပါသော အသား၊ ကြက်၊ ငှက်၊ ငါး
    ပဲပုတ်၊ ပဲကြီး၊ အဆီနည်းသော နို့ထွက်ပစ္စည်းများ၊ ငါးဥများ၊ အမဲသား၊ ကြက်သား၊ ကြက်ဆင်၊ ဂရိဒိန်ချဉ်၊ တိုဖူး၊ ပဲပိစပ် စတဲ့ အစားအသောက်တွေဟာ ပရိုတင်းဓါတ်အသားဓါတ် အများဆုံးပါဝင်ပါတယ်။

    ဇင့် ဓါတ်ကြွယ်ဝသော အစားအသောက်များ
    ဇင့် ဓါတ်ဆိုတာ သင့်ခန္ဓါကိုယ်ရဲ့ အသားတစ်ရှူးတစ်ခုစီတိုင်းမှာ ရှိနေပါတယ်။ ဒါကိုကြည့်ခြင်းအားဖြင့် ဇင့်ဟာဘယ်လိုထိခိုက်ဒဏ်ရာမျိုးမှာ မဆိုအနာကျက်တဲ့ ဖြစ်စဉ်အတွက် အရေးကြီးတယ် ဆိုတာကို တွေ့နိုင်ပါတယ်။ ဇင့်ဓါတ်ဟာ သင့်ရဲ့ခန္ဓါကိုယ်မှာ အသားဓါတ်တည်ဆောက်ခြင်း၊ အဆီများကို အသုံးပြုခြင်းနှင့် ကော်လဂျင်အမျှင်ဓါတ်များ ပိုတိုးလာကာ ပျက်စီးနေသော အသားတစ်ရှူးတွေကို ကြီးထွားပြီး အနာကျက်စေဖို့ရာ ကူညီပေးပါတယ်။ ဒါ့အပြင် ဗီတာမင်အေ ကဲ့သို့ပင် သင့်ရဲ့ခုခံအားစနစ်ကို ပိုပြီးအားကောင်းစေပါတယ်။ ဒီလိုအားကောင်းစေခြင်းဟာဆိုရင် သင့်ခန္ဓါကိုယ်ကို အခြားသောရောဂါပိုးဝင်ခြင်း သို့မဟုတ် virus ပိုးကူးစက်ခြင်းများမှ ကာကွယ်ပေးနိုင်ပါတယ်။ ဇင့်ဓါတ်ကို သင့်ရဲ့အစားအသောက်ထဲမှာ လုံလောက်စွာရရှိသင့်ပါတယ်။ သင့်ရဲ့ဆရာဝန် ညွှန်ကြားထားတဲ့ ဇင့်ပမာဏကတော့ တစ်နေ့လျှင် ၁၅ မီလီဂရမ်ကနေ ၅၀ မီလီဂရမ်အထိဖြစ်ပါတယ်။

    ပြည်ကြီးငါး၊ မြေပဲ နှင့် အစေ့အဆံများ၊ ဖြည့်စွက်ထားသော ထူးကဲသည့် မူရောစပါးဓါတ်များ၊ အနီရောင်အသားများ၊ ပင်လယ်စာများ၊ ကြက်သား၊ ဂျုံအစေ့အဆံများနှင့် ပေါင်မုန့်စတာတွေဟာ ဇင့်ဓါတ် ကြွယ်ဝစေသော အစားအသောက်များဖြစ်ပါတယ်။

    တကယ်လို့ သင့်ရဲ့ခန္ဓါကိုယ်ဟာ ဒီလိုမှန်ကန်တဲ့ အစားအသောက်တွေကိုစားပြီး ကောင်းမွန်တဲ့အာဟာရဓါတ် ရရှိနိုင်မယ်ဆိုရင် သင့်ရဲ့အရေပြားမှာရှိတဲ့ အနာကျက်နှုန်းဟာလည်း လျင်မြန်လာစေပါတယ်။ သင့်ရဲ့အစားအသောက်ဟာ အနာကျက်ခြင်းကို ပိုပြီးလျင်မြန်အောင် ကူညီပေးပြီး သင့်ရဲ့အနာဝန်းကျင်က အသားတစ်ရှူးတွေရဲ့ အင်အားကိုလည်း တက်စေပါတယ်။ ဒါ့အပြင် အချိန်တိုတိုအတွင်းမှာ ပြန်ကောင်းလာစေပြီး နောက်ဆုံးမှာတော့ ပိုးဝင်ခြင်းတွေကိုလည်း ခန္ဓါကိုယ်က တိုက်ထုတ်နိုင်မှာဖြစ်ပါတယ်။ တကယ်လို့သင်ဟာ အစားအသောက်နှင့် ပတ်သက်ပြီး တစ်ခုခု သံသယရှိတယ်၊ စိုးရိမ်ပူပန်တယ်ဆိုရင် အကောင်းဆုံးအကြံဉာဏ်ရရှိ ဖို့ရာအတွက်သင့်ဆရာဝန်နှင့် ဆွေးနွေးတိုင်ပင်သင့်ပါတယ်။

    health-tool-icon

    ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ။

    ခန္ဓာကိုယ် ထုထည်ညွှန်းကိန်း တွက်ချက်ခြင်း (BMI) ကို အသုံးပြုပြီး ကျန်းမာတဲ့ ကိုယ်အလေးချိန် ရှိရဲ့လားဆိုတာကို တွက်ချက်ပါ။ ဒီကျန်းမာရေး ကိရိယာကို အသုံးပြုပြီး ကလေးရဲ့ (BMI) ကိုလည်း တွက်ချက်လို့ ရပါတယ်။

    အမျိုးသား

    အမျိုးသမီး

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    ရင်းမြစ်များ

    Can specific foods help heal cuts and scars?
    http://www.livestrong.com/article/32828-foods- eat-heal- cuts-scars/ Accessed Jun 28 2016

    How your diet can aid in wound healing
    http://www.woundcarecenters.org/article/living-with- wounds/how-your- diet-can- aid-in-wound-healing Accessed Jun 28 2016

    How to recover faster: 27 of the best foods for healing
    https://runnersconnect.net/running-nutrition- articles/diet-for- injured-runner/ Accessed Jun 28

    စာရေးသူ ဓာတ်ပုံbadge
    Dr. Khin Yin Kyay မှ ရေးသားသည်။ 12/05/2020 တွင် ပြန်လည်ပြင်ဆင်ခဲ့သည်။
    Hello Sayarwon Panel မှ အချက်အလက် စစ်ဆေးထားပါသည်။
    Next article: