ကယ်လ်စီယမ်၏ အကျိုးကျေးဇူးများ

ကယ်လ်စီယမ်ဓါတ်အကြောင်း ဘာသိဖို့ လိုသလဲ

ကယ်လ်စီယမ်ဓါတ်ဟာ အရိုးတွေနဲ့ သွားတွေအတွက် မရှိမဖြစ်လိုအပ်ပါတယ်။ နှလုံး၊ အာရုံကြောများ၊ သွေးတိတ်စေတဲ့စနစ် စတာတွေမှာလည်း ကယ်လ်စီယမ်ဓါတ်ကို လိုအပ်ပါတယ်။ အရိုးတွေနဲ့ သွားတွေမှာ တကိုယ်လုံးရဲ့ ကယ်လ်စီယမ်ဓါတ် ၉၉% ကျော် ပါဝင်နေပါတယ်။

ကယ်လ်စီယမ်ဓါတ်ကို သွေး၊ ကြွက်သားများနဲ့ တခြားတစ်သျှူးတွေမှာလည်း တွေ့နိုင်ပါတယ်။ အရိုးတွေထဲက ကယ်လ်စီယမ်ဓါတ်ဟာ ကိုယ်ခန္ဓါက လိုအပ်ချိန်မှာ သုံးနိုင်ဖို့ အရန်ထားသိုခြင်း ဖြစ်ပါတယ်။

ကိုယ်ခန္ဓါထဲက ကယ်လ်စီယမ်ဓါတ်ရဲ့ သိပ်သည်းမှုဟာ အသက်ကြီးလာတာနဲ့အမျှ ကျဆင်းလာပါတယ်။ ကိုယ်ခန္ဓါကနေ ချွေး၊ အရေပြားဆဲလ်များ၊ အညစ်အကြေးများအနေနဲ့ ထွက်သွားလို့ ဖြစ်ပါတယ်။

ဒါ့အပြင် အမျိုးသမီးများဟာ အသက်ကြီးလာတာနဲ့အမျှ အီစထရိုဂျင်ဟော်မုန်း ကျဆင်းလာပြီး ကယ်လ်စီယမ်ဓါတ် စုပ်ယူမှုလည်း ကျဆင်းလာပါတယ်။

အရိုးများဟာလည်း အမြဲတမ်း ချေဖျက်ပြီး အသစ်များကို ပြန်လည်တည်ဆောက်နေတာကြောင့် ဒီလုပ်ငန်းစဉ်အတွက် ကယ်လ်စီယမ်ဓါတ်ကို လိုအပ်ပါတယ်။ ကယ်လ်စီယမ်ဓါတ်စုပ်ယူမှုဟာ လူမျိုး၊ ကျား/မကွဲပြားမှု၊ အသက်အရွယ် စတဲ့အချက်တွေပေါ်မှာ မူတည်ပါတယ်။

ကယ်လ်စီယမ်ဓါတ်ကို အပိုဆောင်း စားသုံးမှုဟာ အရိုးတွေကို ပြန်လည်တည်ဆောက်ဖို့၊ ခိုင်မာစေဖို့ အထောက်အကူပြုပါတယ်။

ကယ်လ်စီယမ်ဓါတ်ဘယ်လောက် စားသုံးသင့်သလဲ

ဆေးသိပ္ပံဌာနကနေ ကယ်လ်စီယမ်ဓါတ်အတွက် သင့်တော်တဲ့ စားသုံးမှုပမာဏ သတ်မှတ်ထားပါတယ်။ ဒီပမာဏကို ဖြည့်စွက်စာပါဝင်သည်ဖြစ်စေ မပါဝင်သည် ဖြစ်စေ နေ့စဥၤစားသုံးမှုပုံစံကနေ အရိုးများကျန်းမာစေဖို့ လိုအပ်တဲ့ပမာဏ ရရှိစေပါတယ်။ ပိုများတဲ့ပမာဏကို ဆရာဝန်တွေ ညွှန်ပေးနိုင်ပါတယ်။

အသက်အရွယ်သင့်တော်သော ကယ်လ်စီယမ်ဓါတ် စားသုံးမှု ပမာဏ

ဝ-၅ လတနေ့လျှင် ၂၁၀ မီလီဂရမ်

၇-၁၂ လတနေ့လျှင် ၂၇၀ မီလီဂရမ်

၁-၃ နှစ်တနေ့လျှင် ၇၀၀ မီလီဂရမ်

၄-၈ နှစ်တနေ့လျှင် ၁၀၀၀ မီလီဂရမ်

၉-၁၈ နှစ်တနေ့လျှင် ၁၃၀၀ မီလီဂရမ်

၁၉-၅၀ နှစ်တနေ့လျှင် ၁၀၀၀ မီလီဂရမ်

၅၁ နှစ်နှင့်အထက်-အမျိုးသမီးများ တနေ့လျှင် ၁၂၀၀ မီလီဂရမ်။ အမျိုးသားများ တနေ့လျှင် ၁၀၀၀ မီလီဂရမ်

ကိုယ်ဝန်ဆောင် အမျိုးသမီးများ၊ ကလေးနို့တိုက်နေသူများ ထောက်ခံထားတဲ့ ပမာဏထက် ကျော်လွန်ပြီး ကယ်လ်စီယမ်ဓါတ်ကို အပိုဆောင်း မလိုအပ်ပါဘူး။

ခံနိုင်ရည်ရှိတဲ့ စားသုံးမှုနှုန်းကတော့ လူအများစု ဘေးကင်းစွာ စားသုံးနိုင်မယ့် အမြင့်ဆုံးပမာဏပဲ ဖြစ်ပါတယ်။ ကယ်လ်စီယမ်ဓါတ်မှာဆိုရင် လူကြီးများနဲ့ အသက်တနှစ်ကျော်ကလေးများအတွက် တနေ့ကို ၂၅၀၀ မီလီဂရမ်ဖြစ်ပါတယ်။

ယေဘုယျအားဖြင့် ကယ်လ်စီယမ်ဖြည့်စွက်စာကို အစားအစာနဲ့အတူ စားသုံးတာ အကောင်းဆုံး ဖြစ်ပါတယ်။ စုပ်ယူမှုကောင်းအောင် တကြိမ်မှာ ၅၀၀ မီလီဂရမ်ထက် ပိုမစားတာ ကောင်းပါတယ်။

ဒီထက်ပိုများတဲ့ ပမာဏကို ခွဲပြီး စားသုံးနိုင်ပါတယ်။ ကိုယ်ခန္ဓါကနေ ကယ်လ်စီယမ်ဓါတ်ကို ကောင်းကောင်း အသုံးချနိုင်ဖို့အတွက် ဗီတာမင်ဒီနဲ့ မဂ္ဂနီဆီယမ်ဓါတ်တွေလည်း လုံလောက်စွာရရှိဖို့ လိုအပ်ပါတယ်။

ကယ်လ်စီယမ်ဖြည့်စွက်စာကို ဘယ်သူတွေ စားသုံးဖို့လိုသလဲ

ကျန်းမာရေးနဲ့ညီညွတ်ပြီး မျှတတဲ့ စားသုံးမှုပုံစံ ရှိနေရင်တောင် အောက်ပါအခြေအနေတွေမှာ ကယ်လ်စီယမ်ဓါတ်လုံလောက်စွာ ရရှိဖို့ ခက်ခဲပါတယ်။

• သက်သတ်လွတ်စားနေသူများ
• Lactose ခံနိုင်ရည်မရှိ၍ နို့ထွက်ပစ္စည်း မစားသုံးနိုင်သူများ
• ပရိုတိန်းနှင့် ဆိုဒီယမ် အသုံးချများပြီး ကယ်လ်စီယမ်ဓါတ်ကို ပိုမိုစွန့်ထုတ်သူများ
• အရိုးပွသူများ
• ကော်တီကိုစတီးရွိုက်ဆေးကို ရေရှည် သောက်နေရသူများ
• အစာအိမ် အူလမ်းကြောင်း ရောဂါများကြောင့် ကယ်လ်စီယမ်ဓါတ်ကို စုပ်ယူမှု အားနည်းသူများ

စသူတွေဟာ ကယ်လ်စီယမ်ဓါတ်ကို ပိုမိုလိုအပ်ပါတယ်။ ကယ်လ်စီယမ်ဓါတ် ဘယ်လောက်စားသုံးသင့်တယ်ဆိုတာ ဆရာဝန် ဒါမှမဟုတ် အာဟာရပညာရှင်များနဲ့ တိုင်ပင်ပါ။

Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။