အသုံးပြုပုံများ

Imipenem + Cilastatin (အင်မီပီနမ် + စီလတ်စ်တတ်တင်) ကို ဘာအတွက်အသုံးပြုကြသလဲ

Imipenem + Cilastatinကို ဘက်တီးရီးယားပိုးဝင်ခြင်း မျိုးစုံကို ကုသရန်အတွက် အသုံးပြုပါတယ်။ carbapenem အမျိုးအစား ပဋိဇီဝဆေးဖြစ်ပါတယ်။ ဘက်တီးရီးယားပေါက်ပွားမှုကို တားဆီးနိုင်တဲ့ အာနိသင်ရှိပါတယ်။

Imipenem + Cilastatin (အင်မီပီနမ် + စီလတ်စ်တတ်တင်) ဘယ်လိုသောက်သုံးသင့်သလဲ

ဒီဆေးဟာ ကြွက်သားထဲ (သို့) သွေးပြန်ကြောထဲ ထိုးရတဲ့ဆေးဖြစ်ပြီး များသောအားဖြင့် ၆-၈နာရီမှာတကြိမ် ဒါမှမဟုတ် ဆရာဝန်ညွှန်တဲ့အတိုင်း ထိုးရပါတယ်။

ဆေးပမာဏဟာ ကျန်းမာရေးအခြေအနေနဲ့ကုသမှုကိုတုံ့ပြန်ခြင်းအပေါ် မူတည်ပါတယ်။

အိမ်မှာပဲ ကိုယ့်ဖာသာထိုးမယ်ဆိုရင် ဘယ်လိုပြင်ဆင် သုံးစွဲရတယ်ဆိုတာ နားလည်တတ်ကျွမ်းသူတွေဆီမှာ မေးမြန်းထားပါ။ မသုံးစွဲခင်မှာ ဆေးထဲမှာ အနည်အမှုန်များပါနေခြင်း၊ အရောင်ပြောင်းခြင်းရှိမရှိ စစ်ဆေးပါ။ အနည်ပါနေရင်၊ အရောင်ပြောင်းနေရင် မသုံးပါနဲ့။ ဆေးဝါးတွေကို ဘေးကင်းစိတ်ချရအောင် ဘယ်လိုသိမ်းဆည်းရမယ်ဆိုတာ၊ ဘယ်လိုစွန့်ပစ်ရမယ်ဆိုတာ လေ့လာထားပါ။

အာနိသင်အကောင်းဆုံးရအောင်အချိန်မှန်သုံးစွဲပါ။ မှတ်မိလွယ်အောင် နေ့စဉ် အချိန်တူညီစွာ သုံးစွဲသင့်ပါတယ်။

ဒီဆေးကို ထိုးပြီး ရက်အနည်းငယ်နဲ့ ရောဂါသက်သာသွားရင်တောင် သတ်မှတ်ထားတဲ့ အချိန်အတိုင်း ပြည့်ဝအောင် သုံးစွဲပေးပါ။ ဆေးဝါးသုံးစွဲခြင်းကို စောစီးစွာရပ်တန့်ခြင်းဟာ ရောဂါပိုးဝင်ခြင်းကို ထပ်မံဖြစ်ပွားစေတတ်ပါတယ်။

Imipenem + Cilastatin (အင်မီပီနမ် + စီလတ်စ်တတ်တင်) ဘယ်လိုသိမ်းဆည်းရမလဲ

ဆေးမှုန့်များကို ၂၀ ကနေ ၂၅ဒီဂရီ စင်တီဂရိတ် (၆၈-၇၇ ဒီဂရီဖာရင်ဟိုက်) မှာ သိမ်းဆည်းထားသိုသင့်ပါတယ်။

အိမ်မှာပဲသိမ်းဆည်းထားဖို့ လိုအပ်မယ်ဆိုရင်ဆရာဝန်၊ သူနာပြု၊ ဆေးဝါးကျွမ်းကျင်ပညာရှင်စသူတွေနဲ့ တိုင်ပင်ပါ။

ကြိုတင်သတိပြုရန်များနှင့် အသိပေးချက်များ

Imipenem + Cilastatin (အင်မီပီနမ် + စီလတ်စ်တတ်တင်) အသုံးမပြုခင် ဘာတွေသိသင့်သလဲ

Imipenem + Cilastatinမသုံးစွဲခင်မှာ သူနဲ့ဓါတ်မတည့်တာရှိရင်၊ penicillins (သို့) cephalosporinsနဲ့ ဓါတ်မတည့်ခြင်းတွေရှိရင်၊ တခြားဓါတ်မတည့်တာရှိရင် ဆရာဝန် (သို့) ဆေးဝါးကျွမ်းကျင်သူကို ဖွင့်ပြောပါ။ ဒီပစ္စည်းမှာ ဓါတ်မတည့်ခြင်းနဲ့ တခြားပြသနာတွေကို ဖြစ်စေတဲ့ ပစ္စည်းတွေ ပါဝင်ပါတယ်။ ပိုသိရအောင် ဆေးဝါးကျွမ်းကျင်သူနဲ့ ဆွေးနွေးပါ။

ဆေးမသုံးခင်မှာ မိမိရဲ့ ကျန်းမာရေးရာဇဝင်ကို (အထူးသဖြင့် ဦးနှောက်နဲ့ဆိုင်တဲ့ အတက်ရောဂါ၊ ဦးခေါင်းဒဏ်ရာ၊ ဦးနှောက်အကျိတ်၊ ကျောက်ကပ်ရောဂါ၊ အသည်းရောဂါ၊ အစာအိမ်အူလမ်းကြောင်းရောဂါ စတာတွေရှိရင်)ဆရာဝန် (သို့) ဆေးဝါးကျွမ်းကျင်ကို ဖွင့်ပြောပါ။ ဒီဆေးဟာ တိုက်ဖွိုက်ရောဂါ ကာကွယ်ဆေးလိုမျိုး သက်ရှိဘက်တီးရီးယားအသုံးပြု ကာကွယ်ဆေးတွေကို အာနိသင်လျော့နည်းစေပါတယ်။ ဒီဆေးသုံးစွဲနေချိန်မှာ ဆရာဝန်မညွှန်ဘဲ ကာကွယ်ဆေးထိုး/သောက်ခြင်း မပြုလုပ်ပါနဲ့။ အသက်ကြီးလာရင် ကျောက်ကပ်လုပ်ငန်း ကျဆင်းနိုင်ပါတယ်။ ဒီဆေးကို ကျောက်ကပ်ကနေ ဖယ်ထုတ်ရပါတယ်။ ဒါကြောင့် အသက်ကြီးသူတွေဟာ ဒီဆေးရဲ့ဘေးထွက်ဆိုးကျိုးကို ပိုပြီးကြုံတွေ့နိုင်ပါတယ်။

ကိုယ်ဝန်ရှိနေချိန်မှာ တကယ်လိုအပ်မှသာ သုံးသင့်ပါတယ်။ ကောင်းကျိုးဆိုးကျိုးများကို သိရအောင် ဆရာဝန်နဲ့ ဆွေးနွေးပါ။ ကိုယ်ဝန်ဆောင်သည် အမျိုးသမီးများ မွေးလာမယ့်ကလေးတွေကို ကာကွယ်ဆေးမထိုးခင် ဆရာဝန်နဲ့တိုင်ပင်ပါ။

ဒီဆေးဟာ မိခင်နို့ထဲကို ဖြတ်သန်းနိုင်ပါတယ်။ ကလေးကိုထိခိုက်မှုဖြစ်စေတဲ့ အထောက်အထား မတွေ့ရပေမယ့် ဆေးသုံးနေချိန် မိခင်နို့တိုက်ရတယ်ဆိုရင် ဆရာဝန်နဲ့ တိုင်ပင်ပါ။

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Imipenem + Cilastatin (အင်မီပီနမ် + စီလတ်စ်တတ်တင်) ကိုသုံးစွဲဖို့ စိတ်ချရပါသလား

Imipenem + Cilastatinကို ကိုယ်ဝန်ဆောင်နေချိန်နဲ့ ကလေးနို့တိုက်နေချိန်မှာ အသုံးပြုရင် ဆိုးကျိုးတွေ ရှိမရှိ ဆုံးဖြတ်နိုင်ဖို့ လုံလောက်တဲ့ လေ့လာ စမ်းသပ်ချက်တွေ မရှိပါဘူး။ ဆေးမသောက်သုံးခင်မှာ ဖြစ်နိုင်ခြေ ကောင်းကျိုးများနဲ့ ဆိုးကျိုးများအားလုံးကို ချိန်ဆနိုင်ဖို့ ဆရာဝန်နဲ့ တိုင်ပင်ဆွေးနွေးပါ။

Imipenem + Cilastatinဆေးဟာ အမေရိကန်ပြည်ထောင်စု အစားအသောက်နှင့် ဆေးဝါးကွပ်ကဲရေးအဖွဲ့ရဲ့ သတ်မှတ်ချက်အရ ကိုယ်ဝန်ဆောင်များမှာ ထိခိုက်နိုင်ခြေအဆင့် C ရှိတယ်လို့ သတ်မှတ်ထားပါတယ်။)အမေရိကန်ပြည်ထောင်စု အစားအသောက်နှင့် ဆေးဝါး ကွပ်ကဲရေးအဖွဲ့ရဲ့ ကိုယ်ဝန်ဆောင်များမှာ ထိခိုက်နိုင်ခြေ အဆင့် သတ်မှတ်ချက်တွေကတော့ အောက်ပါအတိုင်း ဖြစ်ပါတယ်။

A=ဆိုးကျိုးမရှိပါ။
B=လေ့လာမှုအချို့အရ ဆိုးကျိုးမရှိပါ။
C=ဆိုးကျိုးအချို့ရှိနိုင်ပါသည်။
D= ဆိုးကျိုးများရှိသည့် အထောက်အထားများရှိပါသည်။
X=သောက်သုံး၍မရပါ (လုံးဝမတည့်ပါ)။
N=အခြေအနေကို မသိရသေးပါ။

ဘေးထွက်ဆိုးကျိုးများ

Imipenem + Cilastatin (အင်မီပီနမ် + စီလတ်စ်တတ်တင်) ကိုအသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

ဆေးထိုးတဲ့နေရာမှာ ရောင်ရမ်းနီရဲခြင်း၊ နာကျင်ခြင်း၊ အနာဖြစ်ခြင်းများ ဖြစ်တတ်ပါတယ်။ အစာအိမ်အောင့်ခြင်း၊ ပျို့အန်ခြင်း၊ ဝမ်းပျက်ခြင်းတွေ ဖြစ်တာတော့ ရှားပါတယ်။

အဲဒီလက္ခဏာတွေ ပျောက်မသွားရင်၊ ပိုဆိုးသွားရင် ဆရာဝန်ပြပါ။

ဆရာဝန်အနေနဲ့ ဒီဆေးကို ပေးရခြင်းဟာ ဆိုးကျိုးထက် ကောင်းကျိုးက ပိုများတယ်လို့ ယူဆလို့ ဖြစ်ပါတယ်။ ဒီဆေးသုံးစွဲသူအများစုမှာတော့ ဆိုးရွားတဲ့ ဘေးထွက်ဆိုးကျိုးတွေ မကြုံရပါဘူး။ ဆိုးရွားတဲ့ ဘေးထွက်ဆိုးကျိုးတွေဖြစ်တဲ့ ဆီးအရောင်မည်းခြင်း၊ သွေးခြေဥလွယ် သွေးထွက်လွယ်ခြင်း၊ အကြားအာရုံပြောင်းလဲခြင်း (နားလေးခြင်း၊ နားအူခြင်း)၊ စိတ်ပိုင်းဆိုင်ရာ ပြောင်းလဲခြင်း (စိတ်ရှုပ်ထွေးခြင်း၊ အာရုံခြောက်ခြားခြင်း)၊ ဆက်တိုက် လည်ချောင်းနာခြင်း ဖျားခြင်း၊ ခြေလက်များကျင်ခြင်း၊ မျက်စိအသားဝါခြင်း၊ ကြွက်သားများ အကြောလိုက်ခြင်း စတာတွေဖြစ်ရင် ဆရာဝန်ပြသပါ။

ရှားပါးပေမယ့် ပြင်းထန်တတ်တဲ့ ဘေးထွက်ဆိုးကျိုးဖြစ်တဲ့ တက်ခြင်း၊ ပုံမှန်မဟုတ်ဘဲ အားနည်းခြင်း စတာတွေဖြစ်ရင် ဆေးဝါးကုသမှုချက်ချင်း ခံယူပါ။

ဒီဆေးဝါးဟာ ဆိုးရွားတဲ့ Clostridium difficile နဲ့ ဆက်စပ်နေတဲ့ ဝမ်းပျက်ခြင်းကို ဖြစ်စေနိုင်ပါတယ်။ ကုသနေစဉ်မှာ (သို့) ဆေးကိုရပ်လိုက်ပြီး အပတ်ပေါင်းလပေါင်းကြာလာတဲ့အခါ ဖြစ်တတ်ပါတယ်။

ဆက်တိုက်ဝမ်းပျက်ခြင်း၊ ဗိုက်အောင့်ခြင်း၊ ဝမ်းထဲ သွေး အမြှုပ်ပါခြင်း စတာတွေဖြစ်ချိန်မှာ ဝမ်းပျက်ပျောက်ဆေး၊ မူးယစ်ဆေးပါတဲ့ အကိုက်အခဲပျောက်ဆေးများ မသုံးစွဲပါနဲ့။ ပိုဆိုးလာတတ်ပါတယ်။ ဆရာဝန်နဲ့ပဲ ပြသပါ။

ဒီဆေးကို အချိန်ကြာကြာသုံးခြင်း၊ ထပ်တလဲလဲသုံးခြင်း စတာတွေကြောင့် ပါးစပ်မှာမှက္ခရုပေါက်ခြင်း၊ မိန်းမကိုယ် ပိုးဝင်ခြင်း စတာတွေဖြစ်တတ်ပါတယ်။ ပါးစပ်ထဲမှာ အဖြူဖတ်တွေတွေ့ရင်၊ မိန်းမကိုယ်ကနေ အဖြူဆင်းရင် ဆရာဝန်နဲ့ တိုင်ပင်ပါ။

ဒီဆေးကြောင့် ဆိုးရွားတဲ့ ဓါတ်မတည့်ခြင်းတွေဖြစ်တာ ရှားပါတယ်။ ဒါပေမယ့် အရေပြားအကွက်ဖြစ်ခြင်း၊ ယားယံခြင်း၊ ရောင်ရမ်းခြင်း (အထူးသဖြင့် မျက်နှာ လျှာ လည်ချောင်း)၊ ဆိုးရွားစွာ မူးဝေခြင်း၊ အသက်ရှူရခက်ခြင်း စတဲ့ လက္ခဏာတွေကြုံရရင် ဆေးဝါးကုသမှု ခံယူပါ။

ဖော်ပြပါ ဘေးထွက်ဆိုးကျိုးများကို ခံစားရချိန်မှာ တစ်ဦးနဲ့တစ်ဦး ကွဲပြားခြားနားမှု ရှိနိုင်ပါတယ်။ အထက်ဖော်ပြပါ ဘေးထွက်ဆိုးကျိုးများမှာ မပါဝင်တဲ့ ဘေးထွက်ဆိုးကျိုးများလည်း ရှိနိုင်ပါတယ်။ ဘေးထွက်ဆိုးကျိုးနဲ့ ပတ်သက်ပြီး စိုးရိမ်ပူပန်မှုများရှိရင် သင့်ရဲ့ဆရာဝန် (သို့) ဆေးဝါးကျွမ်းကျင်ပညာရှင်နဲ့ တိုင်ပင်ဆွေးနွေးမှုများ ပြုလုပ်ပါ။

ဆေးဓါတ်ပြုမှုများ

ဘယ်ဆေးတွေက Imipenem + Cilastatin (အင်မီပီနမ် + စီလတ်စ်တတ်တင်) နဲ့ ဓါတ်ပြုနိုင်သလဲ

ဒီဆေးနဲ့ ဓါတ်ပြုနိုင်ခြေရှိတဲ့ ဆေးတွေကတော့ ganciclovir, အခြားပဋိဇီဝဆေးများ, divalproate/valproic acid စတာတွေပဲ ဖြစ်ပါတယ်။

ပဋိဇီဝဆေးအများစုဟာ ဟော်မုန်းအသုံးပြုတဲ့ သန္ဓေတားဆေးတွေကို မထိခိုက်နိုင်ပေမယ့် အချို့ကတော့ တားဆေးတေါရဲ့ အာနိသင်ကို ကျဆင်းစေတတ်ပါတယ်။ ကိုယ်ဝန်ရသွားစေနိုင်ပါတယ်။ ဟော်မုန်းပါတဲ့ သန္ဓေတားဆေး အသုံးပြုနေရင် ဆရာဝန် (သို့) ဆေးဝါးကျွမ်းကျင်သူကို ဖွင့်ပြောပါ။

ဒီဆေးဟာ ဓါတ်ခွဲစမ်းသပ်ချက်အချို့ (ဥပမာ ဆီးမှတဆင့် ဆီးချီုစစ်ခြင်း)ကို အဖြေမှားစေတတ်ပါတယ်။ ဒီဆေးသုံးနေရတယ်ဆိုတာ ဆရာဝန်နဲ့ ဓါတ်ခွဲခန်းဝန်ထမ်းများကို ဖွင့်ပြောပါ။

Imipenem + Cilastatinဟာ သင်ယခု သောက်သုံးနေတဲ့ တခြားဆေးဝါးများနဲ့ ဓါတ်ပြုမှုတွေ ဖြစ်နိုင်ပြီး ဆေးဝါးများ အကျိုးသက်ရောက်မှုပုံစံနဲ့ ဘေးထွက် ဆိုးကျိုးများ ဖြစ်လာနိုင်ခြေ ပြောင်းလဲမှုများ ဖြစ်နိုင်ပါတယ်။ မလိုလားအပ်တဲ့ ဆေးဝါးဓါတ်ပြုမှုတွေ ဖြစ်မလာစေဖို့ သင်လက်ရှိသောက်သုံးနေတဲ့ ဆေးဝါးအားလုံး စာရင်း လုပ်ထားပြီး (စာရင်းလုပ်ရာတွင် ဆရာဝန် ညွှန်ကြားထားသော၊ မညွှန်ကြားဘဲ သောက်သုံးနေသော၊ သဘာဝဆေးဘက်ဝင်ပစ္စည်းများ အားလုံးပါဝင်သည်) ဆရာဝန် (သို့်) ဆေးဝါးကျွမ်းကျင်သူကို အမြဲပြောပြပါ။ ဆေးဝါးများကို ဆရာဝန်ခွင့်ပြုချက် မပါဘဲ သောက်သုံးခြင်း၊ ရပ်ဆိုင်းခြင်း၊ ပမာဏကို ပြောင်းလဲခြင်းများ မပြုလုပ်ရပါ။

အစားအသောက်တွေနဲ့ အရက်က Imipenem + Cilastatin (အင်မီပီနမ် + စီလတ်စ်တတ်တင်) နဲ့ ဓါတ်ပြုနိုင်သလား

Imipenem + Cilastatinဟာ အစားအသောက် ဒါမှမဟုတ် အရက်သေစာနဲ့ ဓါတ်ပြုမှုတွေဖြစ်ပြီး ဆေးဝါးများ အကျိုးသက်ရောက်မှု ပုံစံနဲ့ ဘေးထွက်ဆိုးကျိုးများ ဖြစ်လာနိုင်ခြေ ပြောင်းလဲမှုတွေ ဖြစ်နိုင်ပါတယ်။ မလိုလားအပ်တဲ့ ဓါတ်ပြုမှုတွေ ဖြစ်မလာစေဖို့ အစားအသောက်၊ အရက်သေစာများနဲ့ ဓါတ်ပြုနိုင်ခြေရှိမရှိ မေးမြန်းတိုင်ပင်ပါ။

ဘယ်ရောဂါအခြေအနေတွေက Imipenem + Cilastatin (အင်မီပီနမ် + စီလတ်စ်တတ်တင်) နဲ့ ဓါတ်ပြုနိုင်သလဲ

Imipenem + Cilastatin ဟာ သင့်ကျန်းမာရေး အခြေအနေနဲ့ ပေါင်းစပ်ဓါတ်ပြုမှုတွေ ဖြစ်နိုင်ပြီး ဆေးဝါးများ အကျိုးသက်ရောက်မှုပုံစံနဲ့ ဘေးထွက်ဆိုးကျိုးများ ဖြစ်လာနိုင်ခြေ ပြောင်းလဲမှုတွေ ဖြစ်လာနိုင်ပါတယ်။

လတ်တလောဖြစ်ပွားနေတဲ့ ရောဂါများရှိရင်ဆရာဝန်နဲ့ တိုင်ပင်ဆွေးနွေးပါ။

သောက်သုံးရန်အညွှန်း

ယခုအချက်အလက်များသည် ဆေးပညာအကြံပေးမှုကို အစားထိုးရန်အတွက်မဟုတ်ပါ။ သင်သည်သင့်ဆရာဝန်နှင့် အမြဲတမ်းတိုင်ပင်ဆွေးနွေးသင့်ပါသည်

အရွယ်ရောက်ပြီးသူတွေအတွက် Imipenem + Cilastatin (အင်မီပီနမ် + စီလတ်စ်တတ်တင်) ရဲ့ အသုံးပြုရမယ့်ပမာဏကဘယ်လောက်လဲ

လူကြီးများ အစာလမ်းကြောင်းမှ အရာတမျိုးမျိုးကို အဆုတ်ထဲရှူသွင်းမိရာမှ အဆုတ်ရောင်ခြင်း

သွေးပြန်ကြောမှတဆင့် ၂၅၀မီလီဂရမ်ကို ၆နာရီကြာတိုင်း (သို့) ၅၀၀မီလီဂရမ်ကနေ ၁ဂရမ်ကို ၆-၈နာရီကြာတိုင်း ရောဂါပိုးဝင်တဲ့အခြေအနေပေါ် မူတည်ပြီး ထိုးပေးရပါတယ်။