အလုပ်များသူတို့အတွက် ယောဂပုံစံ ၄မျိုး

ယောဂဆိုတာ ရှေးဟောင်းစိတ်နဲ့ ခန္ဓါလေ့ကျင့်ရေးကျင့်စဉ်ဖြစ်ပြီး ဒီထဲမှာ ရုပ်ပိုင်းဆိုင်ရာ လေ့ကျင့်မှုတွေ၊ အသက်ရှူခြင်းကို ထိန်းချုပ်မှုတွေနဲ့ တရားထိုင်ခြင်း သို့မဟုတ် အနားယူခြင်း စတာတွေ ပါဝင်ပါတယ်။ ယောဂဟာ ရုပ်ပိုင်းဆိုင်ရာရော၊ စိတ်ပိုင်းဆိုင်ရာနှစ်မျိုးလုံးအတွက် လေ့ကျင့်ပေးပြီး ဒါက သက်တောင့်သက်သာနဲ့ အနားရစေကာ ဖိအားတွေ၊ ေသောကတွေကို သက်သာစေပါတယ်။ ယောဂမှာ လူတိုင်းနဲ့ သင့်လျော်မယ့် စတိုင်လ်တွေ၊ ပုံစံတွေ ပြင်းအားတွေ အမျိုးမျိုးရှိပါတယ်။

ယောဂရဲ့ ကောင်းကျိုးတွေက ဘာတွေလဲ။

ယောဂရဲ့ ကောင်းကျိုးတွေကို လေ့လာထားတဲ့ သုတေသနတွေအများကြီးရှိပါတယ်။ ယောဂကို လေ့ကျင့်တဲ့သူတိုင်းနီးနီးကလည်း အစောကြီးတည်းက ကျင့်မိရင် ကောင်းသားလို့ တွေးဖူးကြတာချည်းပါပဲ။ ယောဂဟာ ဒီလိုကောင်းကျိုးတွေအများကြီးကို ယူဆောင်လာပေးနိုင်ပါတယ်။

– ဖိအားလျော့ကျစေခြင်း။ သုတေသနအများစုကတော့ ယောဂဟာ စိတ်ဖိစီးမှုတွေနဲ့ စိုးရိမ်သောကတွေကို လျော့ကျစေတယ်လို့ တွေ့ရှိကြပါတယ်။ ဒါဟာ သင့်ရဲ့ စိတ်ခံစားချက်တွေကို ပိုမိုကောင်းမွန်စေပြီး အခြားအရာတွေအားလုံးအတွက်လည်း အကျိုးဖြစ်စေပါတယ်။

– ကြံ့ခိုင်စေခြင်း။ ယောဂလေ့ကျင့်ခြင်းဟာ ခန္ဓါကိုယ်ကို ညီညွတ်မျှတစေခြင်း၊ ပျော့ပျောင်းစေခြင်း၊ လှုပ်ရှားဖို့ ပိုမိုလွယ်ကူစေခြင်းနဲ့ သန်မာခြင်းတွေကို ပိုပြီး ကောင်းမွန်လာစေပါတယ်။

– နာတာရှည်ကျန်းမာရေးပြဿနာတွေကို ထိန်းချုပ်ပေးနိုင်ခြင်း။ ယောဂဟာ နှလုံးရောဂါနဲ့ သွေးတိုးရောဂါ စတဲ့ နာတာရှည်ရောဂါတွေရဲ့ အန္တရာယ်ဖြစ်နိုင်မယ့် အခြေအနေတွေကို လျှော့ချပေးနိုင်ပါတယ်။ ယောဂဟာ စိတ်ဓါတ်ကျခြင်း၊ နာကျင်ခြင်း၊ စိုးရိမ်သောကများခြင်းနဲ့ အိပ်ရေးပျက်ခြင်းတို့လို ကာလကြာရှည်ခံစားနေရတဲ့ ဝေဒနာတွေကိုလည်း သက်သာစေနိုင်ပါတယ်။

အလုပ်မှာ ယောဂလေ့ကျင့်လို့ရနိုင်မလား။

စားပွဲခုံမှာပဲ တစ်နေကုန်ထိုင်ပြီး အလုပ်လုပ်ခြင်းဟာ ကျွန်တော်တို့ကျန်းမာရေးကို ထိခိုက်စေနိုင်တယ်ဆိုတာက အံ့အားသင့်စရာတော့ မကောင်းလှပါဘူး။ ဒါကြောင့် ဒီလိုအလုပ်ခုံမှာ တစ်နေကုန်ထိုင်နေမယ့်အစား ယောဂပုံစံအချို့ကို လေ့ကျင့်ကြည့်ပါ။ နေ့တစ်ဝက်လောက်မှာ အကြောတစ်ခါလျှော့တာပဲ ဖြစ်ဖြစ် လုပ်ကြည့်ပါ။ ဒါက သင့်ကို ဖိအားတွေလျော့စေပြီး စွမ်းအင်တွေပြည့်ဝစေမှာပါ။

သင့်ရဲ့ ရုံးကထိုင်ခုံက စိတ်အေးချမ်းမှုကို ရရှိစေနိုင်မယ့် မှန်ကန်တဲ့နေရာတစ်ခုမဟုတ်သလို သင်ထင်နေနိုင်ပါတယ်။ ဒါပေမဲ့ ခုံဆိုတာက ရုံးမှာရှိနေစဉ်မှာ သင့်ရဲ့ လုပ်ငန်းခွင်ကို ထင်ဟပ်နေစေတဲ့ အရာတစ်ခုပဲ မဟုတ်ပါလား။ ဒီထိုင်ခုံမှာပဲ သင်ပြုလုပ်နိုင်တဲ့ ယောဂလေ့ကျင့်ခန်းအချို့ကတော့

၁။ Chair tree pose : ညာဘက်ခြေထောက်ပေါ် အားယူလိုက်ခြင်းကနေ စကြရအောင်။ သင့်ရဲ့ ဘယ်ဘက်ဒူးကိုကွေးလိုက်ပြီး ဘယ်ခြေဖဝါးကို ညာဘက်ပေါင်ပေါ်တင်ထားပါ။ ပေါင်ထိ မရောက်နိုင်ဘူးဆိုရင်တော့ ခြေထောက်ကို ညာဘက် ဒူးပေါ်ဖြစ်စေ၊ ခြေသလုံးပေါ်ဖြစ်စေ လျှော့ထားရင်လည်း ရပါတယ်။ ဘယ်ဘက်ခါးကို အလွတ်ထားပါ။ (ဘယ်ဘက်လက်ကို မြှောက်ထားပါ)။ လက်တစ်ဘက်က ခုံကိုကိုင်ပြီး မယိုင်အောင် ထိန်းထားပါ။ ဒီအနေအထားကို လုပ်လို့ရသွားပြီဆိုရင်တော့ အသက်ကိုဖြည်းဖြည်းမှန်မှန်ရှူပါ။ ပုံမှန်ရှူပါ။ မိနစ်အနည်းငယ်လောက် လုပ်ပြီးပြီဆိုရင် ဘက်ပြောင်းလိုက်ပါ။

၂။ Seated Eagle : ဒီယောဂမှာတော့ သင်က ထိုင်ခုံပေါ်မှာ သက်တောင့်သက်သာထိုင်ပြီး လုပ်သင့်တဲ့ ယောဂပါ။ ညာဘက်တံတောင်ဆစ်ကို ဘယ်ဘက်တံတောင်ဆစ်အောက်မှာထားပြီး လက်ဖဝါးနှစ်ခုပူးနိုင်အောင်လုပ်ပါ။ နောက်တစ်ဆင့်ကတော့ ခြေထောက်တစ်ဘက်ကို ကြမ်းပေါ် တင်းတင်းချထားပြီး မရွေးစေဘဲ နောက်ခြေထောက်တစ်ဘက်ကို ချိန်ပါ။ ပေါင်နှစ်ဘက်ကို တင်းကြပ်စွာ ထိကပ်နေပါစေ။ အပေါ်တင်ထားတဲ့ခြေထောက်ဟာ ကြမ်းပေါ်ချထားတဲ့ခြေထောက်ရဲ့ နောက်ကို ထိနေရမှာပါ။ ပေါင်အတွင်းသားတွေမှာ ညှစ်အားတစ်ခုဖြစ်နေတာကို သင်ခံစားရပါလိမ့်မယ်။

၃။ Chair dancer pose : ဘယ်ဘက်ခြေထောက်ကို အားပြုပြီး ဘယ်ဘက်လက်က ခုံရဲ့နောက်ကျောဖြစ်စေ၊ စားပွဲခုံဖြစ်စေ၊ နံရံဖြစ်စေ တစ်ခုခုကို ဖြည်းဖြည်းကိုင်ထားပါ။ ဘယ်ဘက်ဒူးကိုကွေးပြီး ညာဘက်ခြေမဘေးကိုဖြစ်စေ၊ ခြေချင်းဝတ်ကိုဖြစ်စေ ကိုင်လိုက်ပါ။ ကိုယ်ကို အရှေ့ကို ဖြည်းဖြည်းချင်းကုန်းပြီး ကိုင်ထားတဲ့ခြေထောက်ကို နောက်ကို ဖြည်းဖြည်းကန်ထုတ်ပါ။ နောက်တစ်ဘက်ပြောင်းလုပ်ပါ။

၄။ Seated ankle to knee : ညာဘက်ခြေဖဝါးကို ကြမ်းပေါ်မှာ အဆင်ပြေသလိုချထားပြီး ဘယ်ဘက်ခြေချင်းဝတ်ကို ညာဘက်ဒူးပေါ်တင်ပါ။ အသက်ရှူပါ။ ဒူးအဆစ်ကို မထိခိုက်စေဖို့နဲ့ ဒဏ်ရာမရစေနိုင်တဲ့အထိ ခြေထောက်ကို ကွေးပါ။ နောက်တစ်ဘက်ပြောင်းလုပ်ပါ။

ခန္ဓါကိုယ်တစ်ခုလုံးက အကြောတွေပြေလျော့သွားစေဖို့ အခြားသော ယောဂပုံစံတွေဖြစ်တဲ့ Wrist Release နဲ့ Desk shoulder opener တို့လို ယောဂပုံစံတွေကိုလည်း ခုံတစ်ဝိုက်မှာပဲ လုပ်ယူနိုင်ပါသေးတယ်။

ယောဂမှာ သတိထားရမှာတွေရှိသေးလား။

ယောဂဟာ ယေဘုယျအားဖြင့်တော့ ကျန်းမာရေးကောင်းတဲ့သူတွေအတွက် လုံခြုံစိတ်ချရတယ်လို့ ယုံကြည်ရပါတယ်။ ဒီလူတွေကလည်း သေချာ လေ့ကျင့်ထားတဲ့ နည်းပြရဲ့လမ်းညွှန်မှုအောက်မှာ လေ့ကျင့်တယ်ဆိုရင်ပေါ့။ ဒါပေမဲ့ ယောဂကြောင့် အန္တရာယ်ဖြစ်နိုင်မယ့် အခြေအနေအချို့လည်း ရှိနေပါသေးတယ်။ ယောဂကို စပြီး မလေ့ကျင့်ခင်မှာ သင့်ရဲ့ ကျန်းမာရေး အကြံပေးကို တွေ့ကြည့်ပြီး သင့်မှာ အောက်ပါအခြေအနေတွေ၊ ကျန်းမာရေးပြဿနာတွေရှိနေသလားဆိုတာ မေးကြည့်ပါ။

– အရိုးကျီးပေါင်း

– သွေးခဲနိုင်ချေရှိခြင်း

– မျက်လုံးပြဿနာ၊ ရေတိမ်အပါအဝင်

– ကိုယ်ဝန်ဆောင်ခြင်း။ ယောဂဟာ ကိုယ်ဝန်ဆောင်အမျိုးသမီးတွေအတွက်တောင် ယေဘုယျအားဖြင့် သင့်လျော်သော်လည်း အချို့သော ယောဂပုံစံတွေကိုတော့ ရှောင်ရှားသင့်ပါတယ်။

– ပြင်းထန်တဲ့ ဘက်မညီခြင်းပြဿနာများ

– ပြင်းထန်တဲ့ အရိုးပွရောဂါ

– သွေးဖိအား ထိန်းချုပ်မရခြင်း

စတာတွေရှိနေရင်တော့ ဆရာဝန်နဲ့ တိုင်ပင်တာ အကောင်းဆုံးဖြစ်ပါလိမ့်မယ်။

တစ်နေ့လုံး သင့်ရဲ့ အလုပ်စားပွဲမှာ အလုပ်လုပ်နေရခြင်းဟာ ပျင်းရိငြီးငွေ့စရာကောင်းရုံတင်မကပါဘူး သင့်ကျန်းမာရေးကိုပါ ထိခိုက်စေနိုင်ပါတယ် ။ အလုပ်ချိန်တွေမှာ ပျော်ရွှင်ဖို့နဲ့ အလုပ်လုပ်နိုင်စွမ်း၊ အလုပ်ပြီးမြောက်နိုင်စွမ်းတွေ တိုးတက်လာစေဖို့ သင်နဲ့ သင့်ရဲ့လုပ်ဖော်ကိုင်ဘက်တွေပါ လေ့ကျင့်ခန်းလုပ်မယ်ဆိုရင်တော့ ယောဂဟာ အကောင်းဆုံး ရွေးချယ်မှုဖြစ်ပါလိမ့်မယ်။

Hello Health Group သည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့်ကုသမှုများမပြုလုပ်ပေးပါ။

[embed-health-tool-bmi]