လေဒီဗိုက်တို့အတွက် အရေးပါတဲ့အာဟာရဓါတ်

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

မေမေ ဖြစ်ဖို့ အခွင့်အရေးရလာချိန်မှာ ကျန်းမာပျော်ရွှင်တဲ့ ဘေဘီလေးရဲ့ မေမေဖြစ်ဖို့ဆိုတာ မေမေတို့ရဲ့ ရွေးချယ်နိုင်တဲ့ အခွင့်အလမ်းတစ်ရပ်ပါ။ ဒီအခွင့်အရေးက မေမေတိုင်းမှာပိုင်ဆိုင်ခွင့်ရှိတာကြောင့် ဘေဘီလေးမွေးဖွားတော့မယ့် လေဒီဗိုက်လေးတို့ကို ဒီဆောင်းပါးလေးကနေ နည်းလမ်းကောင်းလေးတွေ ပြောပြပေးမယ်နော်။

လေဒီဗိုက်တို့ ကျန်းမာစေဖို့လိုအပ်တဲ့ အာဟာရဓါတ်တွေကဘာတွေများလဲ…………..

မွေးလာမယ့်ဘေဘီလေးရော ကိုယ်ဝန်ဆောင်နေချိန်မှာ ကိုယ်တိုင်ရောကျန်းမာစေဖို့ ဒီအာဟာရဓါတ်လေးတွေကို ပြည့်မီအောင် စားသုံးဖို့လိုပါမယ်။

ကယ်လ်ဆီယမ်အရိုးနဲ့သွားတွေ ကြံ့ခိုင်သန်မာစေဖို့ အရေးပါတဲ့ဓါတ်တစ်ခုပေါ့။ သွေးတိတ်စေနိုင်ပြီး အာရုံကြောတွေကို အကောင်းဆုံးစွမ်းဆောင်ရည်ရရှိစေနိုင်ပါတယ်။ နှလုံးခုန်နှုန်းမှန်စေပြီး မေမေရောဘေဘီလေးကိုပါကျန်းမာစေနိုင်ပါတယ်။ ကိုယ်ဝန်ဆောင်မေမေတစ်ယောက်အနေနဲ့ တစ်နေ့ကို ကယ်လ်ဆီယမ်ပမာဏ ၁၀၀၀ မီလီဂရမ်လိုအပ်မှာဖြစ်ပါတယ်။ ဒါကြောင့် ကယ်လ်ဆီယမ်ပြည့်ဝစေဖို့ နို့သောက်ပါ၊ နို့ထွက်ပစ္စည်းတွေစားသုံးတာ၊ ကယ်လ်ဆီယမ်ဖြည့်စွက်ထားတဲ့ ပေါင်မုန့်၊ ကွေကာအုတ်၊ လိမ္မော်ရည်တို့ကိုသောက်လို့ရသလို အစိမ်းရင့်ရောင် ဟင်းသီးဟင်းရွက်တွေ၊ အယ်လ်မွန်စေ့ နဲ့ နှမ်းတို့ကို စားသုံးပေးလို့ရပါတယ်။

ဖောလစ်အက်ဆစ် – ကိုယ်ဝန်ဆောင်ချိန်မျာ လိုအပ်တဲ့ သွေးပမာဏကိုရရှိစေဖို့ အကောင်းဆုံးထောက်ပံ့ပေးတယ်။ ကိုယ်ဝန်ဆောင်မေမေတစ်ယောက်က တစ်နေ့ကို ဖောလစ်အက်ဆစ် ၄၀၀ mcg လိုအပ်ပါတယ်။ ဘေဘီလေးရဲ့ ဦးနှောက်နဲ့အာရုံကြောဖွံ့ဖြိုးစေဖို့ အကောင်းဆုံးထောက်ပံ့ပေးနိုင်ပါတယ်။ ဒါကြောင့် ပဲနီလေး၊ ဗိုလ်စားပဲ၊ အစိမ်းရင့်ရောင်ဟင်းသီးဟင်းရွက်တွေ၊ အချဉ်ဓါတ်ပါတဲ့ အသီးတွေ၊ အခွံမာသီးနဲ့ ပဲအမျိုးမျိုးကိုစားပေးလို့ရပါတယ်။ ဟင်းနုနွယ်၊ ဆလတ်၊ ကိုက်လန်၊ ပန်းဂေါ်ဖီစိမ်းတို့ကိုလည်းစားသုံးပေးဖို့လိုပါမယ်။ ဖောလစ်အက်ဆစ်ဖြည့်စွက်ထားတဲ့ ဖြည့်စွက်အာဟာရတွေ၊ ပေါင်မုန့်၊ ကွေကာအုတ်၊ ဆန် နဲ့ ဂျုံတို့ကို စားပေးလို့ရပါတယ်။

သံဓါတ် – ကိုယ်တွင်းမှာ အောက်ဆီဂျင်ပြည့်ဝစေဖို့အတွက် အရေးပါတဲ့ ဓါတ်တစ်မျိုးပါ။ စိတ်ဖိစီးမှုကို ပြေလျော့စေနိုင်ပြီး ကိုယ်ဝန်ဆောင်ချိန်မှာ ခံစားရနိုင်တဲ့ ပင်ပန်းနွမ်းနယ်မှု၊ အားနည်းမှု၊ ခြေကုန်လက်ပမ်းကျတာ၊ စိတ်ဓါတ်ကျတာတွေ မဖြစ်အောင်လည်း ကာကွယ်ပေးပါတယ်။ ကိုယ်ဝန်ဆောင်မေမေတစ်ယောက်အနေနဲ့ တစ်နေ့ကို သံဓါတ် ၂၇ mg လိုအပ်ပါတယ်။ ဆန်၊ဂျုံ၊ အဆီမပါတဲ့ အမဲသား၊ ဝက်သား၊ သစ်သီးခြောက်တွေ၊ ပဲအမျိုးမျိုး၊ ဆာဒင်းငါး၊ အစိမ်းရင့်ရောင် ဟင်းသီးဟင်းရွက်တွေကို စားသုံးပေးသင့်ပါတယ်။

ဗီတာမင် A – ကိုယ်ခံအားကောင်းစေပြီး ဘေဘီလေးရဲ့ ဦးနှောက်နဲ့အမြင်အာရုံဖွံ့ဖြိုးမှုအတွက် အထောက်အကူပြုပေးပါတယ်။ ကိုယ်ဝန်ဆောင်မိခင်တစ်ယောက်အနေနဲ့ တစ်နေ့တာမှာ ဗီတာမင် A ၇၇၀ mcg လိုအပ်မှာဖြစ်ပါတယ်။ ဒါကြောင့် အစိမ်းရောင်ဟင်းသီးဟင်းရွက်တွေ၊ မုန်လာဥနီ၊ ကန်စွန်းဥတို့လိုမျိုး အဝါရောင်နဲ့လိမ္မော်ရောင်ရှိတဲ့အစားအသောက်တွေကို စားသုံးပေးဖို့လိုအပ်ပါမယ်။ နို့ နဲ့ အသည်းတို့ကိုလည်း စားသုံပေးလို့ရပါတယ်။

DHA – ကိုယ်ဝန်ဆောင်ချိန်မှာ လိုအပ်မယ့် အာဟာရဓါတ်တစ်ခုပါ။ မေမေ့အတွက်လိုအပ်သလို ဘေဘီလေးရဲ့ ဦးနှောက်နဲ့အမြင်အာရုံဖွံ့ဖြိုးမှုအတွက်လည်း အရေးပါပါတယ်။ ကိုယ်ဝန်ဆောင်နေချိန်မှာ မေမေတစ်ယောက်အနေနဲ့ တစ်နေ့ကို DHA ပမာဏ ၂၀၀ mg လိုအပ်ပါတယ်။ နို့တိုက်မိခင်တွေအတွက်လည်း လိုအပ်မယ့်ဓါတ်တစ်မျိုးပါ။ ဆယ်လ်မွန်၊ တူနာ၊ မက်ကာရယ်ငါးတွေကို စားသုံးပေးလို့ရပါတယ်။ မာကျူရီပါဝင်မှုမများစေဖို့တော့ ဂရုပြုရပါမယ်။

ဗီတာမင် D -ဘေဘီလေးရဲ့ အရိုး နဲ့ သွားတွေကြံ့ခိုင်သန်မာစေဖို့အတွက် ကယ်လ်ဆီယမ်ကိုစုပ်ယူနိုင်ဖို့ အကောင်းဆုံးထောက်ပံ့ပေးနိုင်ပါတယ်။ အရေပြားနဲ့မျက်လုံးကျန်းမာစေဖို့လည်း အကောင်းဆုံးထောက်ပံ့ပေးနိုင်ပါတယ်။ ကိုယ်ဝန်ဆောင်နေချိန်မှာ တစ်နေ့ကို ဗီတာမင် D ၆၀၀ iu လိုအပ်မှာပါ။ ဗီတာမင် D ဖြည့်စွက်ထားတဲ့နို့၊ Oatmeal၊ ဆယ်လ်မွန်ငါးတို့ကနေ ရရှိနိုင်ပါတယ်။ နေရောင်ခြည်ကနေလည်း ရရှိနိုင်ပါတယ်။

ပရိုတင်း – မေမေကျန်းမာဖို့ရော ဘေဘီလေးကြီးထွားဖွံ့ဖြိုးဖို့အတွက်ပါ လိုအပ်ပါတယ်။ ဦးနှောက် နဲ့ ကြွက်သားတွေဖွံ့ဖြိုးဖို့ အထောက်အကူပြုနိုင်သလို သွေးအားကောင်းစေပါတယ်။ မိခင်ရဲ့ ကိုယ်အလေးချိန်ကိုလိုက်ပြီး လိုအပ်မယ့် ပရိုတင်းပမာဏကလည်း ကွာခြားနိုင်ပါတယ်။ ပေါင် ၁၅၀ ရှိတဲ့ မေမေတစ်ယောက်အနေနဲ့ဆိုရင် တစ်နေ့ကို ပရိုတင်းပမာဏ ၇၅ ဂရမ်လိုအပ်မှာဖြစ်ပါတယ်။ ပင်လယ်စာတွေ၊ အဆီမပါတဲ့ အနီရောင်အသား၊ ကြက်သား၊ ဥအမျိုးမျိုး၊ ပဲအမျိုးမျိုး၊ ပဲနို့၊ အခွံမာသီးတွေ၊အစေ့အဆန်တွေလိုအပ်ပါတယ်။

ကိုယ်ဝန်ဆောင်မေမေတစ်ယောက်အနေနဲ့ တစ်နေ့တာမှာ

  • အသီးအရွက် ၂ ပန်းကန်စာ၊
  • သစ်သီး ၂ ပန်းကန်စာ၊
  • ထမင်း ဒါမှမဟုတ် ပေါင်မုန့်ကို နှစ်ကြိမ်၊
  • ကွေကာအုတ် တစ်ကြိမ်၊
  • နို့နဲ့နို့ထွက်ပစ္စည်း တစ်ကြိမ် ကနေ နှစ်ကြိမ်
  • အသား၊ငါးတစ်မျိုးမျိုးကို ၂ ကြိမ်ကနေ ၃ ကြိမ်အထိစားလို့ရပါတယ်။

ဒါတွေကို ပြည့်ဝအောင်စားသုံးရုံနဲ့လုံလောက်ပြီလားဆိုတော့ မဟုတ်သေးပါဘူး။ ဒါလေးတွေကိုလည်းရှောင်ဖို့လိုပါမယ်။ ဒါမှ မေမေရော ဘေဘီလေးပါကျန်းမာမှာဖြစ်ပါတယ်။

အယ်လ်ကိုဟောရှောင်ပါ – အယ်လ်ကိုဟောက လမစေ့ဘဲ ကလေးမွေးဖွားတာ၊ ပေါင်မပြည့်တဲ့ ကလေးမွေးတာမျိုးတွေဖြစ်နိုင်သလို အရက်ကြောင့် သန္ဓေသားမှာထိခိုက်တာမျိုးတွေဖြစ်လာနိုင်ပါတယ်။ ဒါကြောင့် ကိုယ်ဝန်ဆောင်နေချိန်မှာ အယ်လ်ကိုဟောပါတဲ့ သောက်စရာတွေကိုရှောင်ပါ။

ကဖင်းလျှော့ပါ – ကိုယ်ဝန်ဆောင်နေချိန်မျာ ကဖင်းပါတဲ့ စားစရာသောက်စရာတွေကို ထင်တိုင်းမစားပါနဲ့။ လက်ဖက်သုပ်၊ ချောကလက်၊ ကော်ဖီ။ လက်ဖက်ရည်၊ ရေနွေးကြမ်းနဲ့ ကိုလာလိုမျိုး ကဖင်းပါတဲ့ အချိုရည်၊ အားဖြည့်အချိုရည်တွေကို ရှောင်ရပါမယ်။ အရမ်းကြိုက်ရင်တောင် လျှော့စားလျှော့သောက်ပါ။ ကဖင်းက သံဓါတ်စုပ်ယူနိုင်မှုကို အဟန့်အတားဖြစ်စေနိုင်ပြီး သွေးအားနည်းတာကိုဖြစ်စေနိုင်တာကြောင့်ပါ။

အငန်ကဲတာတွေ – အငန်ကဲတာ သွေးတိုးစေနိုင်သလို ဖောရောင်တာတွေကိုဖြစ်စေနိုင်ပါတယ်။ ဒါကြောင့် ကိုယ်ဝန်ဆောင်နေချိန်မှာ အငန်လျှော့စားပါ။

အစားမလျှော့ပါနဲ့ – ကိုယ်ဝန်ဆောင်နေချိန်မှာ Diet မလုပ်ပါနဲ့။ မေမေကျန်းမာပြီး ဘေဘီလေးကောင်းစွာဖွံ့ဖြိုးဖို့အတွက်က အာဟာရပြည့်ဝလုံလောက်ဖို့လိုပါတယ်။ ဒါကြောင့် ဝိတ်ချချင်ရင်တောင် ကိုယ်ဝန်ဆောင်နေချိန်နဲ့နို့ချိုတိုက်ကျွေးနေရချိန်တွေမှာ မလုပ်ပါနဲ့။

အာဟာရပြည့်ဝလုံလောက်အောင်စားလို့ ကျန်းမာပျော်ရွှင်တဲ့ ဘေဘီလေးမွေးဖွားနိုင်ကြပါစေကြောင်း……..

Hello Health Groupသည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Read also:

မျှဝေမည်

တည်းဖြတ်သည့်နေ့ အောက်တိုဘာ 3, 2019 | နောက်ဆုံးတည်းဖြတ်ခြင်း အောက်တိုဘာ 4, 2019

ရင်းမြစ်များ
သင်ဒါလည်း နှစ်သက်နိုင်ပါတယ်။