ကလေးသူငယ် လိင်ပိုင်းဆိုင်ရာစော်ကားခံရမှုနဲ့ပတ်သက်တဲ့ မိဘတွေရဲ့အမြင်မှား (၇) ခု

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ဒီလိုကိစ္စမျိုးဆိုတာ ဘယ်သူမှမကြုံချင်ကြပါဘူး။ သတင်းတွေမှာ ဖတ်ရတာ၊ကြားရတာနဲ့တင် ရင်နာရတဲ့ ကိစ္စမျိုးပါပဲ။ အရွယ်မရောက်သေးတဲ့ကလေးလေးတွေကိုမှ အနိုင်ကျင့်ချင်၊စော်ကားချင်တာ လူမဆန်တဲ့လုပ်ရပ်မို့ လူတိုင်းရွံမုန်းကြပါတယ်။ ဒါပေမယ့် ဒီခံစားချက်လောက်နဲ့တင် မလုံလောက်ပါဘူး။ တကယ်တမ်းအရေးကြီးတာက ကိုယ့်သားသမီးလေးတွေကို ဒီအန္တရာယ်ကနေ ကာကွယ်နိုင်ဖို့ ကြိုးစားကြဖို့ပါ။ ဒီလိုဖြစ်လာမှာကြောက်တာပဲသိတယ်၊ ဘယ်လိုကာကွယ်ရမှန်းမသိဖြစ်နေတာ၊ အသိအမြင်မှားတွေရှိနေတာက တကယ်ကိုဆိုးပါတယ်။ ဒါ့ကြောင့် ခုချိန်ကစပြီး လေ့လာကြဖို့၊ စာဖတ်ကြဖို့ သတိပေးရင်းနဲ့ မိဘတွေအတွေးမှာ အဖြစ်များတဲ့ အသိအမြင်မှားတွေအကြောင်းပြောပြလိုက်ပါတယ်။

(၁) ကလေးသူငယ်လိင်ပိုင်းဆိုင်ရာစော်ကားခံရမှုဆိုတာဖြစ်ခဲတယ်

ကလေးကအရွယ်မှမရောက်သေးတာ စိတ်ပူဖို့မလိုပါဘူး။ ဒီအရွယ်လေးကို ဘယ်သူကဘာလုပ်မှာလဲလို့ မတွေးလိုက်ပါနဲ့။ အဖြစ်မနည်းပါဘူးနော်။ ဒီလိုအမှုအများစုက လူသိရှင်ကြားမဖြစ်ဘဲ တိုးတိုးတိတ်တိတ်ပြီးဆုံးသွားတာများလို့ ကမ္ဘာမှာအရေအတွက်အတိအကျရေတွက်ရခက်ခဲပါတယ်။ အမေရိကန်နိုင်ငံမှာဆို တစ်နှ်စ်ကို လိင်ပိုင်းစော်ကားခံရတဲ့ကလေးငယ် ၁ သိန်းကနေ ၅ သိန်းအတွင်းရှိပါတယ်။

(၂) ဒီလိုကိစ္စတွေအကြောင်း ကလေးကို အသိပညာပေးဖို့မလိုသေးဘူး။

ကလေးတွေကို သိတတ်တဲ့အရွယ်လောက်ဆို ကိုယ့်အန္တရာယ်ကာကွယ်နိုင်အောင် နည်းနည်းချင်းအသိပညာပေးထားသင့်ပါတယ်။ ကိုယ့်ကို ဒီလိုအန္တရာယ်ပြုလာနိုင်တဲ့အရိပ်အယောင်ရှိရင်ပြေးတတ်ဖို့၊ အကူအညီတောင်းတတ်ဖို့၊ပြန်ပြောပြဖို့ ကလေးအနေနဲ့ သိထားသင့်ပါတယ်။

(၃) လိင်ပိုင်းဆိုင်ရာစော်ကားမှုအန္တရာယ်အကြောင်းပြောလိုက်ရင် ကလေးလန့်သွားလိမ့်မယ်

ဒီလိုအကြောင်းအရာနဲ့ပတ်သက်ပြီး ဘာမှသိမထားတာကမှ ကလေးအတွက်ပိုပြီးကြောက်လန့်စရာကောင်းတာပါ။ ငယ်သေးလို့ မပြောချင်သေးဘူးဆိုရင်တောင် ဘယ်လိုအပြုအမူမျိုးဆို လက်မခံသင့်ကြောင်း၊ တခုခုဆိုမိဘတွေကိုပြောပြသင့်ကြောင်း ရှင်းပြထားပါ။ ရိုးရိုးသားသားချစ်ခင်မှုနဲ့ ထိတွေ့၊ရင်းနှီးတာနဲ့ မရိုးသားတဲ့ သတိထားသင့်တဲ့အပြုအမူမျိုးတွေကြားမှာ ခွဲခြားသိအောင်ပြောပြထားသင့်ပါတယ်။ ဘယ်နေရာ၊ ဘယ်အစိတ်အပိုင်းကိုလာထိတွေ့ရင် ချက်ချင်းငြင်းဆန်ဖို့၊ရှောင်ထွက်လာဖို့ သင်ပေးထားပါ။

(၄) ကျူးလွန်သူတွေ အများစုက လူစိမ်းတွေဖြစ်တယ်၊ သူစိမ်းတွေကို သတိထားရမယ်။

အမှန်တော့ သက်ငယ်မုဒိမ်းမှုအပါအဝင် ကလေးသူငယ်လိင်ပိုင်းဆိုင်ရာနှောင့်ယှက်မှုတွေမှာ ကျူးလွန်သူတွေထဲ အနီးအနားက ရင်းနှီးသူ၊ သိကျွမ်းသူတွေနဲ့ဆွေမျိုးတွေတောင် ပါဝင်နေတာဖြစ်ပါတယ်။ ကလေးထိန်း၊ ယာဉ်မောင်း၊ အိမ်နီးချင်း စတဲ့ ကလေးနဲ့အမြင်မစိမ်းတဲ့ သိကျွမ်းသူတွေကို ပိုစိတ်ပူရပါတယ်။ သူစိမ်းဆို လူကြီးတွေမသိအောင် ကလေးအနားကပ်နိုင်တဲ့ အခွင့်အလမ်းနည်းတာကိုး။ မိဘတွေက ကလေးကို လူစိမ်းတွေရန်ကပဲစိုးရိမ်ပြီး သူစိမ်းတွေဆီက မုန့်ကျွေးရင်မစားနဲ့နော်၊ ကိုယ်မသိတဲ့လူခေါ်ရင် မလိုက်နဲ့နော် စသည်ဖြင့်မှာတတ်ကြတယ်။ လူစိမ်းကြောက်လို့ ရင်းနှီးသူတွေနဲ့ လိုက်ကာမှ အန္တရာယ်တွေ့ရတာမျိုး ပိုရင်နာရပါတယ်။ မိဘကိုယ်တိုင် ဒါမှမဟုတ် စိတ်ချရတဲ့လူတွေနဲ့သာနေဖို့ ကလေးကို ရှင်းပြထားပါ။

(၅) ကျူးလွန်သူတွေက နိမ့်ကျတဲ့အသွင်အပြင်နဲ့လူတွေဖြစ်နိုင်တယ်

လိင်ပိုင်းဆိုင်ရာအမြတ်ထုတ်သူတွေဟာ အရပ်ပုတယ်၊ရှည်တယ်၊ ဆင်းရဲတယ်၊ချမ်းသာတယ်၊ နိမ့်ကျတယ်၊ အဆင့်မြင့်တယ်၊ ရုပ်ဆိုးတယ်၊ ရုပ်ချောတယ် ဆိုတာတွေနဲ့မဆိုင်ပါဘူး။ ဘယ်သူမဆိုဖြစ်နိုင်ပါတယ်။ အပြင်ပန်းပုံသဏ္ဍာန်နဲ့ ခန့်မှန်းပြီး သံသယဝင်လို့ ၊ ယုံကြည်လို့မဖြစ်ပါဘူး။

(၆) ဒီအမှုတွေက ကလေး အနေအထိုင်မတတ်လို့ဖြစ်ရတာ

နစ်နာသူကို အပြစ်ပုံတဲ့ ဒီအတွေးမျိုးက ဆိုးဝါးပါတယ်။ အရင်းနှီးဆုံးလူတွေက ကျူးလွန်မိတဲ့အခါ ကလေးက အနေအထိုင်မတတ်လို့ဆိုပြီး အပြစ်တင်တာမျိုး၊ ကလေးရဲ့အပြစ်လို့ ဆိုတာမျိုး မလုပ်သင့်ပါဘူး။ စိတ်ဓါတ်ဖောက်ပြားကျူးလွန်သူရဲ့ အပြစ်သာဖြစ်ပါတယ်။

(၇) ကိုယ့်ထက် အကြီးက ပြောတာ နားထောင်ရမယ်

လူကြီးပြောရင် နားထောင်လေ၊ မရိုင်းရဘူး၊ လူကြီးက ချစ်လို့ကို ဆိုတဲ့စကားမျိုးနဲ့ ကလေးရဲ့ခေါင်းထဲရိုက်မသွင်းသင့်ပါဘူး။ မိဘတွေရဲ့အသိမိတ်ဆွေတွေက သမီးလေးလာပါဦးဆိုပြီးပေါင်ပေါ်တင်ထိုင်တာမျိုး ကလေးကငြင်းနေရင် အတင်းမပို့ပါနဲ့။ အကြီးတစ်ယောက်ယောက်က ကိုယ်မနှစ်သက်တဲ့ အပြုအမူတွေလုပ်လာခဲ့ရင် ကလေးကိုယ်တိုင်ငြင်းဆန်ရဲအောင်၊အော်ဟစ်ရဲအောင်၊ ထွက်ပြေးအကူအညီတောင်းတတ်အောင် ကျင့်ပေးပါ။ လူကြီးတွေပြုသမျှ ကြိတ်မခံစားပါစေနဲ့။

ယဉ်ကျေးမှုအရ လက်ခံယုံကြည်ထားကြတာတချို့နဲ့ယှဉ်ရင် အနည်းငယ်ဆန့်ကျင်နေမှာဖြစ်ပေမယ့် ဒါတွေဟာ ကလေးသူငယ် လိင်ပိုင်းဆိုင်ရာအနိုင်ကျင့်စော်ကားမှုနဲ့ပတ်သက်ပြီး လက်တွေ့ကျတဲ့အကြံပြုချက်တွေပါနော်။ဖြူစင်လင်းလက်တဲ့ ရတနာလေးတွေကိုစောင့်ရှောက်ပျိုးထောင်နိုင်ဖို့ဖေဖေမေမေတို့ သတိမလွတ်ဖို့တော့လိုပါလိမ့်မယ်။

Hello Health Groupသည်ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့် ကုသမှုများမပြုလုပ်ပေးပါ။

Read also:

Share now :

တည်းဖြတ်သည့်နေ့ ဇွန် 3, 2019 | နောက်ဆုံးတည်းဖြတ်ခြင်း ဇွန် 4, 2019

ရင်းမြစ်များ
သင်ဒါလည်း နှစ်သက်နိုင်ပါတယ်။