မျိုးဆက်ပွားကျန်းမာရေးကို အခြေခံပညာကျောင်းတွေမှာ သင်ကြားပေးခြင်းအားဖြင့် မိမိတို့ရဲ့ ဘဝနေထိုင်မှုအပေါ်မှာ ‘လိင်မှုကိစ္စ’က ဘယ်လိုသက်ရောက်နေတယ်ဆိုတာကို ကလေးတွေ ပိုမိုသိရှိလာနိုင်ပြီး ကြားဖူးနားဝတွေ၊ ကာလသားကြီးတွေရဲ့ မဟုတ်တမ်းတရား ပုံပြင်တွေ၊ဇာတ်လမ်းတွေထဲမှာ နစ်မြောနေမှာ မဟုတ်တော့ပါဘူး။
ခုနှစ်တန်း၊ရှစ်တန်းအရွယ်ကစလို့ တွေ့ကြုံလာရတဲ့ ခန္ဓာကိုယ်အပြောင်းအလဲတွေ၊ လိင်အင်္ဂါပုံစံအနေအထား၊လုပ်ဆောင်နိုင်စွမ်း ပြောင်းလဲမှုတွေဟာ လူတိုင်းကြုံတွေ့ရမယ့် အဖြစ်အပျက်တခုမျှသာဖြစ်ပြီး ထိတ်လန့်စရာ၊ရှက်ရွံ့စရာမလိုကြောင်းကို သဘောပေါက်နားလည်လာပါလိမ့်မယ်။
ကလေးတွေဟာ စပ်စုတတ်ပါတယ်။ သိချင်စိတ်၊ လက်တည့်စမ်းချင်စိတ်တွေ များတတ်ပါတယ်။ ဒါကြောင့် ဆန့်ကျင်ဖက်လိင်အကြောင်းကို စိတ်ဝင်စား၊ သိချင်လာတတ်တာလည်း အဆန်းတော့ မဟုတ်ပါဘူး။ မျိုးဆက်ပွားကျန်းမာရေးကို အခြေခံပညာကျောင်းတွေမှာ ထိထိရောက်ရောက် သင်ကြားပေးခြင်းအားဖြင့် ဆန့်ကျင်ဖက်လိင်ရဲ့ ခန္ဓာကိုယ်ဖွဲ့စည်းတည်ဆောက်ပုံ၊ လုပ်ငန်းဆောင်ရွက်ပုံသဘောသဘာဝတွေကို (အရွယ်နဲ့လိုက်လျောညီထွေစွာ) သိရှိရမှာဖြစ်တဲ့အတွက် တလွဲဆံပင်ကောင်းလက်တည့်စမ်းခြင်းတွေကို ပြုလုပ်တော့မှာ မဟုတ်ပါဘူး။
ကျွန်တော်တို့နိုင်ငံမှာ တစထက်တစ များပြားလာတဲ့ သက်ငယ်မုဒိမ်းမှုတွေကို ကာကွယ်လျှော့ချဖို့အတွက်လည်း မျိုးဆက်ပွားကျန်းမာရေးပညာပေးခြင်းဟာ တစ်ထောင့်တစ်နေရာကနေ ပါဝင်နေပါတယ်။ ကလေးတွေအနေနဲ့ မိမိခန္ဓာကိုယ်ရဲ့ ဘယ်လိုအစိတ်အပိုင်းတွေကို ကိုင်တွယ်ခွင့်မပြုရဘူး၊ ဘယ်လိုအပြုအမူတွေလုပ်နေပြီဆိုရင် မိဘ/အုပ်ထိန်းသူနဲ့ ပြန်တိုင်ရမယ်၊ ဘယ်လိုအခြေအနေတွေမှာ ကိုယ်လွတ်ရုန်းထွက်ပြေးရမယ် စသဖြင့် ပိုမိုသိရှိနားလည်လာပါလိမ့်မယ်။
ကျွန်တော်တို့ သင်ပေးသည်ဖြစ်စေ၊ မသင်ပေးသည်ဖြစ်စေ ကလေးတွေကတော့ လိင်မှုကိစ္စတွေနဲ့ တစ်ချိန်ချိန်မှာ ထိတွေ့လာမှာပါပဲ။ ဒီခေတ်လို အင်တာနက်တွေ၊ဖုန်းတွေ အလွယ်တကူ ရနေတဲ့ခေတ်ကြီးမှာ ပိုလို့တောင် ဆိုးပါသေးတယ်။ ဒါကြောင့် လိင်ပညာပေး/မျိုးဆက်ပွားကျန်းမာရေးကို စနစ်တကျသတ်မှတ်ထားတဲ့ သင်ရိုးညွှန်းတမ်းတွေအသုံးပြုပြီး သင်ကြားပေးခြင်းအားဖြင့် အင်တာနက်ပေါ်က ပေါက်ကရရှစ်သောင်း ညစ်ညမ်းကိစ္စတွေရဲ့ရန်ကနေ သင့်ကလေးကို ကာကွယ်နိုင်ပါလိမ့်မယ်။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။