home

What are your concerns?

close
Inaccurate
Hard to understand
Other

သို့မဟုတ် လင့်ခ်ကူးယူမည်

မိခင်နို့ရည် အာဟာရကြွယ်စေမယ့် အစားအသောက် (၈) မျိုး

မိခင်နို့ရည် အာဟာရကြွယ်စေမယ့် အစားအသောက် (၈) မျိုး
နို့တိုက်နေပေမယ့် ပိုအာဟာရပြည့်အောင် ဘာအားဆေးတိုက်ရမလဲ ဆိုတာ ဘေဘီလေးတွေအတွက်မေမေတို့အမေးများဆုံးမေးခွန်းတွေထဲကတစ်ခုပါ။ ကလေးတွေအတွက်အကောင်းဆုံးအားဆေးက မိခင်နို့ရည်ပါပဲ။ မွေးလာတည်းက အားဆေးဖြည့်စွက်ဖို့ မတွေးလိုက်ပါနဲ့ဦး။ ဒါပေမယ့် အဲဒီနို့ရည်က အာဟာရတွေပါဝင်နေဖို့တော့လိုပါလိမ့်မယ်။ဥပမာမေမေက အစားနည်းတယ်၊ရှောင်တာများတယ် ဒါမှမဟုတ်ပြုပြင်ထားတာတွေ၊ အသင့်စားရယ်ဒီမိတ်တွေ၊ ကျန်းမာရေးနဲ့မညီတာတွေချည်းစားတယ်ဆိုရင် သူရဲ့နို့ချိုရည်က ကလေးအတွက်လိုအပ်သလောက် အာဟာရကိုဖြည့်တင်းပေးနိုင်မှာမဟုတ်ပါဘူး။ ဒီသဘာဝအားဆေးကို အားဆေးကောင်းတစ်လက်အဖြစ်ဖျော်စပ်နိုင်ဖို့မေမေတို့ဒါတွေစားပေးဖို့လိုပါတယ်။ ဆက်ပြီးဖတ်ကြည့်နော် –

(၁) အဆီနည်းတဲ့ နို့ထွက်ပစ္စည်း

ဒိန်ချဉ်၊ နွားနို့တို့လို နို့ထွက်ပစ္စည်းတွေက နို့တိုက်မိခင်တွေရဲ့ကျန်းမာရေးမှာ အရေးပါတဲ့နေရာက အထောက်အကူပြုနေပါတယ်။ နွားနို့က အရိုးသန်မာစေတဲ့ ဗီတာမင် ဒီကိုမြှင့်တင်ပေးနိုင်ပြီး ကယ်လ်စီယမ်၊ ပရိုတင်းနဲ့ဗီတာမင် ဘီတွေလည်းပါဝင်တယ်။ နို့တိုက်မိခင်တွေအတွက်တော့ မိခင်နို့ရည်မှာ ကလေးရဲ့အရိုးဖွံ့ဖြိုးမှုကိုအားပေးမယ့် ကယ်လ်စီယမ်တွေ ကြွယ်ဝစေဖို့ ဒါတွေကို အားကိုးလို့ရတာပေါ့။ တစ်နေ့တာအာဟာရမှာ နို့ထွက်ပစ္စည်းတစ်မျိုးမျိုးပါဝင်စေဖို့ ကြိုးစားကြည့်ပါ။

(၂) အမဲသား

အမဲသားမစားတဲ့မေမေတို့ကတော့ကျော်ဖတ်လိုက်ပါနော်။ အမဲသားက နို့တိုက်မိခင်တွေအတွက် သံဓါတ်ကြွယ်ဝတဲ့ ဓါတ်စာအဖြစ်နဲ့ ခွန်အားဖြည့်ပေးနိုင်ပါတယ်။ နို့ထွက်များချင်တဲ့မေမေတချို့ဆို နွားမြီးစွပ်ပြုတ်သောက်ရတယ်လို့ လူကြီးတွေပြောဖူးပါတယ်။ မေမေက သံဓါတ်အားနည်းနေမယ်ဆိုရင် ကလေးအတွက်လိုအပ်တဲ့ အာဟာရကို နို့ရည်မှာဘယ်ပါနိုင်ပါတော့မလဲ။ ဒါ့ကြောင့်မေမေတို့က အသားဓါတ်နဲ့ ဗီတာမင်ဘီ ကြွယ်ဝတဲ့အစားအစာတွေကို ပိုစားပေးသင့်တယ်။ ဒီနှစ်မျိုးလုံးကို အမဲသားမှာ ကြွယ်ဝနေတာကြောင့် ထည့်ပြီးဖော်ပြတာပါ။

(၃) ပဲ

သံဓါတ်ကြွယ်ဝတဲ့ ပဲတွေ၊ အထူးသဖြင့် ပဲကတ္တီပါ၊ ဘိုစားပဲ တို့လိုအရောင်ရင့်တဲ့ပဲတွေက နို့တိုက်မိခင်တွေအတွက် ဓါတ်စာတွေပါ။ အသားသိပ်မစားတဲ့သူတွေအတွက် ပိုအရေးကြီးတာပေါ့။ သူတို့မှာ အသားမဟုတ်တဲ့ အရည်အသွေးမြင့်ပရိုတင်းဓါတ်တွေ အများကြီးပါဝင်ပါတယ်။

(၄) လိမ္မော်သီး

လိမ္မော်သီးတွေက ခွန်အားတိုးစေဖို့ အကောင်းဆုံးအာဟာရပါပဲ။ နို့တိုက်မိခင်တွေက ကိုယ်ဝန်ဆောင်ချိန်ကထက် ဗီတာမင် စီ ပိုပြီးလိုအပ်တာကြောင့် လိမ္မော်သီးနဲ့တခြားအရည်ရွှမ်းသီးတွေက အကောင်းဆုံးအရင်းအမြစ်ဖြစ်ပါတယ်။ တချို့ကတော့ အချဉ်တွေစားရင် နို့ရည်ကိုပျက်စေမယ်လို့ စိုးရိမ်ကြလို့ရှောင်ကြပါတယ်။ တစ်ခုရှိတာက အလွန်အကျွံမဖြစ်စေဖို့ပါပဲ။ လုံးလုံးရှောင်ဖို့မသင့်သလို အများကြီးလည်းမစားပါနဲ့။

(၅) ကြက်ဥ

ကြက်ဥက စွယ်စုံသုံးလို့ရတဲ့ ပရိုတင်းပြည့်အာဟာရတစ်မျိုးပါ။ တစ်နေ့တာအာဟာရမှာ ကြက်ဥကို တနည်းနည်းနဲ့ထည့်စားပေးပါ။

(၆) အသီးအရွက်

ဟင်းနုနွယ်၊ ပန်းဂေါ်ဖီစိမ်းတို့လို အစိမ်းရောင်ဟင်းသီးဟင်းရွက်တွေမှာ မေမေနဲ့ကလေးအတွက် လိုအပ်တဲ့ ဗီတာမင်အေ ပါဝင်ပါတယ်။ ဒီအသီးအရွက်တွေက နို့ထွက်ပစ္စည်းမဟုတ်တဲ့ ကယ်လ်စီယမ်အရင်းအမြစ်တွေဖြစ်ပြီး ဗီတာမင် စီနဲ့ သံဓါတ်တွေလည်းပါဝင်ပါတယ်။ အသီးအရွက်စိမ်းတွေမှာ ကယ်လိုရီနည်းပြီး ဓါတ်တိုးဆန့်ကျင်ပစ္စည်းတွေ ကြွယ်ဝပါတယ်။

(၇) ကွေကာအုတ်

မေမေတို့ဗိုက်ဆာတဲ့အချိန် အားဖြည့်ပေးမယ့်ကွေကာအုတ်ပါနော်။ အာဟာရဓါတ်တွေဖြည့်စွက်ထားတဲ့ကွေကာဆို ပိုကောင်းပါတယ်။ကွေကာအုတ်နဲ့ နွားနို့ဆိုရင်ပြီးပြည့်စုံတဲ့မနက်စာ သို့မဟုတ် အဆာပြေသရေစာတစ်ခုကိုရနိုင်မှာပါ။

(၈)ဖြည့်စွက်အာဟာရ

နို့တိုက်မေမေတို့အတွက် သီးသန့်ထုတ်လုပ်တဲ့ဖြည့်စွက်အာဟာရတွေ၊ နို့မှုန့်တွေလည်းသောက်လို့ရတယ်။မေမေ့အတွက်ရော၊ ကလေးအတွက်ပါ လိုအပ်မယ့် အာဟာရဓါတ်တွေကိုဖြည့်စွက်ပေးထားလို့ ပိုအဆင်ပြေလောက်ပါတယ်။

ရေ

နို့ရည်က အာဟာရပြည့်ပြည့်မပြည့်ပြည့် အဓိကလိုအပ်တာကရေဓါတ်ပြည့်ဝနေဖို့ပါပဲ။ အာဟာရပြည့်အောင်စားမယ်၊ရေများများသောက်မယ်ဆိုရင် အရည်အသွေးပြည့်တဲ့နို့ရည်လည်း အထွက်များမယ်။ ကလေးထွားမယ်၊ ကိုယ်ခံအားကောင်းမယ်။ ရေချည်းမဟုတ်ဘဲ စွပ်ပြုတ်၊ ဟင်းရည်၊ဖျော်ရည်၊ အာဟာရအချိုရည်တွေကိုလည်းသောက်လို့ရပါတယ်။

တစ်ခုရှိတာကကော်ဖီ၊လက်ဖက်ရည်တို့လို ကဖင်းတွေကို များများမသောက်မိဖို့ပါ။ ကဖင်းဓါတ်ရောစွက်သွားတဲ့မိခင်နို့ရည်က ကလေးအတွက် မကောင်းသလို ဖွံ့ဖြိုးမှုကိုလည်းအားမပေးတဲ့အပြင် အိပ်စက်မှုပြဿနာတွေလည်းဖြစ်စေနိုင်ပါတယ်။

Hello Health Groupသည် ဆေးပညာအကြံပြုချက်များ၊ရောဂါရှာဖွေအတည်ပြုချက်များနှင့်ကုသမှုများမပြုလုပ်ပေးပါ။

Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

စာရေးသူ ဓာတ်ပုံbadge
Yun Sandi Nan Mon မှ ရေးသားသည်။ 10/07/2020 တွင် ပြန်လည်ပြင်ဆင်ခဲ့သည်။
Dr. Thurein Hlaing Win မှ အချက်အလက် စစ်ဆေးထားပါသည်။