backup og meta

အရိုးကျန်းမာ သန်စွမ်းအောင် ဘယ်လိုလုပ်ကြမလဲ


Dr. Khin Yin Kyay မှ ရေးသားသည်။ · 12/05/2020 တွင် အသစ်ဖြည့်စွက်ခဲ့သည်။

    အရိုးကျန်းမာ သန်စွမ်းအောင် ဘယ်လိုလုပ်ကြမလဲ

    ကျန်းမာသန်စွမ်းတဲ့ အရိုးတွေကို တည်ဆောက်ဖို့ရာ သင့်ရဲ့အစားအသောက်၊ ကိုယ်လက်လှုပ်ရှားမှုနဲ့ ဘဝနေထိုင်မှု ပုံစံ စတဲ့အဓိက အချက်ကြီး ၃ ချက်ကို အာရုံစိုက်ထားဖို့ လိုအပ်ပါတယ်။ သင့်ရဲ့ အရိုးတွေကျန်းမာ သန်စွမ်းဖို့ရာ လိုက်နာရမယ့် အချက်အချို့ရှိပါတယ်။ ပထမဦးစွာ သင့်ရဲ့ အရိုးတွေဟာ အလုပ် ဘယ်လို လုပ်တယ်ဆိုတာကို သိဖို့ရာ လိုအပ်ပါတယ်။

    သင့်ရဲ့အရိုးတွေဟာ ခန္ဓါကိုယ်မှာ ဘယ်လိုအလုပ်လုပ်ကြသလဲ။

    သင့်ရဲ့ အရိုးတွေဟာ ကိုယ်လက်လှုပ်ရှားမှု အတွက်သာ လုပ်ပေးတယ်လို့ သင်ထင်နေနိုင်ပါတယ်။ တကယ်တော့ သင့်ရဲ့အရိုးတွေဟာ အရေးကြီးတဲ့ လုပ်ငန်းဆောင်တာများစွာကို လုပ်ပေးနေပါတယ်။ သင့်ရဲ့ အရိုးတွေဟာ ခန္ဓါကိုယ် ပုံပန်းသွင်ပြင်ကို ပေါ်လွင်စေပြီး ဦးနှောက် အာရုံကြော စနစ်နှင့် အခြားသော ကလီစာတွေကို ထိခိုက်ဒဏ်ရာ ရခြင်းမှကာကွယ်ပေးထားတာ ဖြစ်ပါတယ်။ သင့်ရဲ့ အရိုးတွေဟာ ကယ်လ်စီယမ် နှင့် ဖော့စ်ဖောရပ်စ် ကဲ့သို့ သတ္တုဓါတ်တွေ သိုလှောင်ထားရာ နေရာအဖြစ်လည်း ဆောင်ရွက်ပေးပါတယ်။ ထို့နောက် သင့်ခန္ဓါကိုယ်က ၎င်းတို့ကို လိုအပ်လာတဲ့ အချိန်မှာ အရိုးတွေက ပြန်ထုတ်ပေးပါတယ်။ ဒီသတ္တု ဓါတ်တွေဟာ ကျွန်ုပ်တို့ရဲ့ အရိုးတွေကို သန်စွမ်းစေအောင် ပြုလုပ်ပေးပါတယ်။

    ကျွန်ုပ်တို့ဟာ ငယ်ရွယ်စဉ်မှာ ကျွန်ုပ်တို့ရဲ့ အရိုးတွေ တည်ဆောက်ပုံ နည်းလမ်းအကြောင်းကို လေ့လာသင်ကြားခဲ့ရပါတယ်။ အသက်ကြီးလာတဲ့ အခါမှာတော့ ဒီအရိုးတွေကို ဘယ်လို ကာကွယ်ရမယ်ဆိုတဲ့ အကြောင်းကို ကျွန်ုပ်တို့ဟာ သိရှိဖို့ရာ လိုအပ်ပါတယ်။ အသက်ကြီးလာတာနဲ့အမျှ ကျွန်ုပ်တို့ရဲ့ အရိုးတွေဟာ ကြွပ်ဆတ် လာပြီး အလွယ်တကူ ကျိုးပဲ့ နိုင်ပါတယ်။ အရိုးထိခိုက်ဒဏ်ရာ ရတဲ့အခါမှာ ၎င်းဒဏ်ရာကျက် စေဖို့ရာ အချိန်အကြာကြီးယူရနိုင်ပါတယ်။ ဒါ့အပြင် နာကျင်ခြင်းကိုလည်း ဖြစ်စေနိုင်ပြီး ကုသရတာ ခက်နိုင်ပါတယ်။

    အရိုးကျန်းမာစေဖို့ရာ နည်းလမ်းများ

    သင့်ရဲ့ အရိုးတွေ ကျန်းမာသန်စွမ်းခြင်းကို ထိန်းသိမ်းပေးထားနိုင်အောင် ကူညီပေးနိုင်တဲ့ နည်းလမ်းအချို့ကို အောက်မှာ ဖော်ပြပေးထားပါတယ်။

  • သင်နေ့စဉ်စားသောက်တဲ့ အစားအသောက်တွေထဲမှာ ကယ်လ်စီယမ်ဓါတ်နှင့် ဗီတာမင် ဒီဓါတ် ပမာဏများစွာ ပါဝင်ပါစေ။
  • သင်ကလေးဘဝတုန်းက အမေကသင့်ရဲ့ အရိုးတွေ ကျန်းမာသန်စွမ်းဖို့ရာ နို့သောက်သင့်တယ်လို့ အမြဲတမ်းပြောနေခဲ့ပါလိမ့်မယ်။ ဟုတ်ပါတယ်။ သင့်ရဲ့အမေပြောတာ မှန်ပါတယ်။ နို့မှာ ကယ်ဆီယမ်ဓါတ်နဲ့ ဗီတာမင်ဒီဓါတ်များစွာ ပါဝင်ပါတယ်။

    အသက်၁၉နှစ် နှင့် ၅၀ ကြား အရွယ်ရောက်ပြီး သူတွေ နဲ့ အသက် ၅၁နှစ်နှင့် ၇၀ ကြားရှိ အမျိုးသားများမှာ တစ်နေ့လျှင် ကယ်လ်စီယမ်ပမာဏ ၁၀၀၀ မီလီဂရမ်လောက် လိုအပ်တယ်လို့ ဆိုကြပါတယ်။ အသက် ၅၀ အထက် အမျိုးသမီးများနှင့် အသက် ၇၀ထက် အမျိုးသားများဟာ တစ်နေ့လျှင် ကယ်ဆီယမ်ဓါတ် ၁၂၀၀ မီလီဂရမ်လောက် စားသောက်သင့်တယ်လို့ အကြံပေးထားပါတယ်။

    သို့သော် ဗီတာမင် ဒီဓါတ် မရှိပဲ သင့်ခန္ဓါကိုယ်ဟာ ကယ်လ်စီယမ်ဓါတ်ကို ခန္ဓါကိုယ်က မစုပ်ယူ နိုင်ပါဘူး။ ဒါကြောင့် ဗီတာမင် ဒီဓါတ်ဟာ အရိုးကျန်းမာဖို့ရာ အရေးကြီးတယ်ဆိုတာကို တွေ့ရပါတယ်။ အသက် ၁၉ နှစ်မှ ၇၀ ကြား အရွယ်ရောက်ပြီး သူများအတွက် တစ်နေ့လျှင် လိုအပ်တဲ့ ဗီတာမင်ဒီ ဓါတ်ပမာဏဟာ ၆၀၀ international unit IUS ပမာဏ ရှိတယ်လို့ ယူဆပါတယ်။ အသက် ၇၁ နှစ် နှင့်အထက် လူကြီးများအတွက်ကတော့ ၁ရက်လျှင် ဗီတာမင်ဒီဓါတ် ၈၀၀ IUS ပမာဏ ထိမြင့်တက်ပြီး စားသုံးသင့်တယ်လို့ သတ်မှတ်ထားကြပါတယ်။

    သင်ဟာ အောက်ပါ အစားအသောက်တွေမှာ ကယ်လ်စီယမ်ဓါတ်နှင့် ဗီတာမင်ဒီဓါတ်ကို တွေ့နိုင်ပါတယ်။

  • နို့ထွက်ပစ္စည်းများ၊ အာဟာရဓါတ် ထည့်သွင်းထားသော နို့များ
  • ကြက်ဥအနှစ်၊
  • မက်မွန်စေ့ ကဲ့သို့ အစေ့အဆံများ၊ ပဲကြီး၊
  • ပန်းဂေါ်ဖီစိမ်း၊ ကိုက်လံ၊
  • ဆော်လမွန်ငါး၊ တူနာငါးနှင့် ဆာဒင်းငါး ကဲ့သို့ ငါးများ
  • တိုဟူး ကဲ့သို့ ပဲပိစပ်ထွက်ကုန်များ စတာတွေပဲ ဖြစ်ပါတယ်။
  • နေရောင်နှင့် ထိတွေ့ခြင်းအားဖြင့် သင့်ခန္ဓါကိုယ်ဟာ ဗီတာမင် ဒီဓါတ်ကို ရရှိနိုင်ပါတယ်။ သို့သော် နေလည်ခင်း နေရောင်နဲ့ ထိတွေ့ခြင်းကို ရှောင်ကြဉ်သင့်ပြီး နေရောင်ကာလိမ်းဆေးနှင့် သင့်ရဲ့ အရေပြားကို အမြဲတမ်းလိမ်းကာ ကာကွယ်ထားသင့်ပါတယ်။ တကယ်လို့ သင့်ရဲ့ အစားအသောက်တွေဟာ သင့်အတွက် လိုအပ်တဲ့ ကယ်လ်စီယမ်ဓါတ်တွေ နဲ့ ဗီတာမင် ဒီဓါတ်တွေကို ကောင်းစွာမပေးနိုင်ဘူးဆိုရင် ဖြည့်စွက်အားဆေးတွေ သောက်ပေးဖို့ရာ စဉ်းစားသင့်ပါတယ်။ ၎င်းဖြည့်စွက်အားဆေးများကို မသောက်သုံးခင် ဖြစ်နိုင်ခြေရှိတဲ့ ဆေးတွေရဲ့ အန္တရာယ်နဲ့ ဓါတ်ပြုမှုတွေ အကြောင်းကို သင့်ရဲ့ ဆရာဝန် သို့မဟုတ် ဆေးဝါးကျွမ်းကျင် ပညာရှင်နဲ့ တိုင်ပင်ပြီးမှ မှန်ကန်တဲ့ ဆေးပမာဏ ကိုသောက်သုံးပေးကြဖို့ရာ လိုအပ်ပါတယ်။

    • သင့်ရဲ့ နေ့စဉ်လုပ်ငန်းဆောင်တာတွေမှာ ကိုယ်လှုပ်ရှားမှုပြုခြင်း ကိုလည်း ထည့်သွင်းပေးရန် မမေ့ပါနဲ့။

    အချိန်အကြာကြီး ကိုယ်လက်လှုပ်ရှားမှု လုံးဝမရှိပဲ နေမယ်ဆိုရင် သင့်ရဲ့အရိုးတွေဟာ အန္တရာယ် ရှိလာနိုင်ပါတယ်။ ဒီလိုကိုယ်လှုပ်ရှားမှု မရှိခြင်းဟာ အရိုးပွခြင်း၊ အရိုးပါးခြင်းကို ဖြစ်စေနိုင်ပါတယ်။ အရိုးပွခြင်း၊ အရိုးပါးခြင်း ဆိုတာကတော့ အရိုးရဲ့ သိပ်သည်းဆနည်းလာတဲ့ အတွက်ကြောင့် အရိုးတွေဟာ ကြွပ်ဆတ်လာတဲ့ အခြေအနေကို ခေါ်ပါတယ်။ လေ့ကျင့်ခန်း လုပ်ခြင်းဟာ သင့်ရဲ့ အရိုးတွေကို ကျန်းမာသန်စွမ်းအောင် ပြုလုပ်ပေးရုံသာမကပဲ သင့်ရဲ့ ခန္ဓါကိုယ် တစ်ခုလုံးကို အားအင်ပြည့်ဝလာအောင် လုပ်ဆောင်ပေးပါတယ်။ သင်ဟာ ယောဂ ကစားခြင်း၊ ပြေးခြင်းနှင့် တင်းနစ်ကစားခြင်း စတာတွေကို လုပ်ပေးနိုင်ပါတယ်။ ဒါမှမဟုတ် သင့်မှာအချိန်မရှိဘူး ဆိုရင်လည်း လှေကားထစ်အသေးလေးတွေကို တက်ခြင်း သို့မဟုတ် အလုပ်ကို လမ်းလျှောက်သွားခြင်း စတာတွေကို လုပ်ပေးနိုင်ပါတယ်။

    • ဆေးလိပ် သောက်ခြင်းနှင့် အရက်သောက်ခြင်းကို ရှောင်ကြဉ်ရပါမယ်။

    ဆေးလိပ်သောက်ခြင်းဟာဆိုရင် အမျိုးမျိုးသော ကျန်းမာရေး ပြဿနာတွေ ဖြစ်စေနိုင်ပါတယ်။ တကယ်လို့ သင်ဟာ ဆေးလိပ်သောက်ခဲ့ရင် ဖြတ်ဖို့စဉ်းစားခြင်းဟာ အကောင်းဆုံး စဉ်းစားခြင်းပဲဖြစ်ပါတယ်။ စီးကရက် သောက်ခြင်းဟာ ကယ်လ်စီယမ်ဓါတ်စုပ်ယူခြင်းကို တားမြစ်လိုက်ပါတယ်။ ဆိုလိုတာကတော့ သင့်ရဲ့ ခန္ဓါကိုယ်ထဲမှာ သိုလှောင်ထားတဲ့ ကယ်ဆီယမ်ဓါတ်တွေကို အလဟဿ ဖြုန်းတီးပစ်သလို ဖြစ်သွားနိုင်ပါတယ်။ ဒီအခါမှာ သင့်ရဲ့ အရိုးဟာလည်း အလုပ်ကောင်းကောင်း မလုပ်နိုင်တော့ပါဘူး။ ဆေးလိပ်သောက်တဲ့ အမျိုးသမီးတွေဟာ မသောက်တဲ့ သူတွေထက်စာရင် သွေးဆုံးပြီးနောက် ကျန်းမာရေး ပြဿနာတွေကို ပိုပြီး ကြုံတွေ့ရလေ့ရှိပါတယ်။ အရက်သောက်ခြင်းဟာလည်း သင့်ရဲ့ အရိုးတွေအတွက် အရမ်းကို ဆိုးရွားနိုင်ပါတယ်။ အရက်အလွန်အကျွံ သောက်တဲ့ သူတွေဟာ အရိုးပါးခြင်း အရိုးပွခြင်း ပိုပြီးဖြစ်နိုင်ခြေ ရှိတယ်လို့ သက်သေ ပြနိုင်ပါတယ်။

    Hello Health Group သည်ဆေးပညာအကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

    မသက်ဆိုင်ကြောင်း ရှင်းလင်းချက်

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။


    Dr. Khin Yin Kyay မှ ရေးသားသည်။ · 12/05/2020 တွင် အသစ်ဖြည့်စွက်ခဲ့သည်။

    advertisement iconadvertisement

    ဤဆောင်းပါးက အကူအညီဖြစ်ပါသလား။

    advertisement iconadvertisement
    advertisement iconadvertisement