လေ့ကျင့်ခန်းမလုပ်ခင် လက်နဲ့အာသာဖြေတာမျိုး လုပ်သင့်လား

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ဒါကတော့ ကြွက်သားတက်ဖို့ Gym ကို သေချာကစားနေတဲ့ အမျိုးသားတွေ၊ အားကစားသမားတွေကြားမှာ မေးလေ့မေးထရှိတဲ့ မေးခွန်းတစ်ခုပါ။ တချို့တွေကျတော့လည်း လေ့ကျင့်ခန်း၊ အားကစားလုပ်နေတဲ့အချိန် အာသာဖြေပြီး သုက်လွှတ်လိုက်ရင် တကယ်ကစားတဲ့အခါ အားမရှိသလို နုံးချိနေတတ်တယ်။ ကျားဟော်မုန်းနည်းသွားနိုင်တယ်။ စွမ်းဆောင်ရည်ကျဆင်းသွားတတ်တယ်လို့ ထင်တတ်ကြပါတယ်။ တကယ်တမ်း လက်တွေ့မှာ သုက်လွှတ်ခြင်းနဲ့ စွမ်းဆောင်ရည်ကျခြင်းသည် ဘာမှသက်ဆိုင်မှုမရှိပါဘူး။

ဘာကြောင့် ဒီလိုထင်ကြတာလဲ။

အမျိုးသားတစ်ယောက်ရဲ့ ကြွက်သားထုတက်စေဖို့၊ တစ်နေ့တာအတွက် ခွန်အားတွေပြည့်ဝနေစေဖို့ တက်စတိုစတီရုန်းလို့ ခေါ်တဲ့ ကျားဟော်မုန်းက ကူညီပံ့ပိုးပေးပါတယ်။ သုက်လွှတ်လိုက်တဲ့အခါမှာ ကျားဟော်မုန်းပမာဏတချို့က သုက်ရည်နဲ့အတူ ပါသွားတယ်ဆိုတဲ့အချက်ကြောင့်ပဲ ဒီလိုအလွဲတွေဟာ အမျိုးသားတွေကြားမှာ ရေပန်းစားလာတာပဲဖြစ်ပါတယ်။

တကယ်တော့ လက်နဲ့အာသာဖြေတာဖြစ်စေ၊ လိင်ဆက်ဆံပြီး သုက်လွှတ်လိုက်တာဖြစ်စေ ကိုယ်ခန္ဓာက ကုန်ဆုံးသွားတယ်ဆိုတဲ့ ကျားဟော်မုန်းပမာဏဟာ ကိုယ့်ရဲ့ အားကစား၊ လေ့ကျင့်ခန်း၊ အလေးမတဲ့ စွမ်းဆောင်ရည်ကျဆင်းစေလောက်တဲ့အထိ မများပါဘူး။ သုက်လွှတ်ပြီး အားကစား၊ လေ့ကျင့်ခန်းလုပ်လို့ မောနေတဲ့သူတွေအများစုမှာ ဖြစ်နိုင်ခြေရှိတာကတော့ ညတုန်းက အိပ်ရေးမဝခဲ့တာ၊ အိပ်ရာဝင်ဖို့ နောက်ကျတာ၊ အရက်၊ ဆေးလိပ်သောက်သုံးတာ၊ ပရိုတင်း၊ ကစီဓာတ် ပြည့်ပြည့်ဝဝမစားသုံးတာကြောင့်ပါပဲ။

Gym ကစားနေရင် အာသာဖြေတာကို ရပ်ထားသင့်လား။

သုက်လွှတ်ခြင်းရှိသည်ဖြစ်စေ၊ မရှိသည်ဖြစ်စေ အမျိုးသားတစ်ယောက်ရဲ့ တစ်နေ့တာခွန်အားနဲ့ စွမ်းဆောင်ရည်သည် အတူတူပါပဲ။ တစ်ခုသတိထားရမှာကတော့ သုက်လွှတ်ပြီးပြီးချင်းမှာ မောပန်းတာ၊ ချွေးထွက်တာမျိုး ဖြစ်လေ့ဖြစ်ထရှိတာကြောင့် Gym မကစားခင် မိနစ်ပိုင်းအလို သို့မဟုတ် ကစားပြီးပြီးချင်း မိနစ်ပိုင်းအတွင်း သုက်လွှတ်တာမျိုးကိုတော့ တတ်နိုင်သလောက် ရှောင်ပေးပါ။ အနည်းဆုံး မဆော့ခင် သို့မဟုတ် ဆော့ပြီး တစ်နာရီမှ ၂နာရီထိ အနည်းဆုံး ခြားပေးနိုင်ရင် အကောင်းဆုံးပါပဲ။ ကိုယ်ခန္ဓာက သုက်လွှတ်ပြီး အားအင်ကုန်ခမ်းသွားခဲ့တယ်ဆိုရင်တောင် ဒီအချိန်အတိုင်းအတာအတွင်းမှာ အားအင်ပြန်ပြည့်နိုင်ပါတယ်။

နောက်တစ်ချက်ကတော့ ကြွက်သားထုတက်ဖို့ ကြိုးစားနေတဲ့အမျိုးသားတွေ လက်နဲ့အာသာဖြေတာကို မဖြစ်မနေ ရပ်ထားစရာမလိုပါဘူး။ ကိုယ်စိတ်မပါလို့ မလုပ်တာတော့ ရပါတယ်။ ဆော့ထားသမျှ ပြန်ကျသွားမလားဆိုတဲ့ စိုးရိမ်စိတ်နဲ့ ရပ်လိုက်လို့လည်း ဘာမှမထူးပါဘူး။

အဓိက Gym ကစားနေတဲ့ အမျိုးသားတွေ၊ အားကစားအပြင်းအထန် လုပ်နေတဲ့အမျိုးသားတွေ၊ ကြွက်သားထုတက်စေဖို့၊ အဆီပိုတွေ၊ ကယ်လိုရီတွေ လောင်ကျွမ်းစေဖို့၊ စွမ်းဆောင်ရည်ပြည့်ဝပြီး အလေးနိုင်စေဖို့၊ အမောခံနိုင်စေဖို့ အအိပ်၊ အစားနဲ့ လေ့ကျင့်ခန်းကိုသာ သေချာဂရုစိုက်ဖို့ လိုပါတယ်။

အိပ်ချိန်ကတော့ မဖြစ်မနေ အနည်းဆုံး ၇နာရီမှ ၈နာရီထိ ရှိရပါမယ်။
• ညဘက်ကို စောစောအိပ်ရပါမယ်။ နောက်ကျမှ အိပ်ပြီး အိပ်ချိန်ပြည့်နေရင်လည်း လူကအိပ်ရေးမဝသလို ဖြစ်ပြီး ပင်ပန်းနုံးခွေနေမှာပါ။
• အစားကို သေချာစားရပါမယ်။ များများလည်း စားရပါမယ်။
• အဓိက ပရိုတင်းပါဝင်တဲ့ အသား၊ ငါး၊ ပဲ၊ ဥတွေကို များများစားပေးပါ။
• စားတဲ့အခါမှာ ပမာဏနည်းနည်းနဲ့ အကြိမ်ရေများများ ခွဲစားပေးနိုင်ရင် ပိုကောင်းပါတယ်။
• အားကစားသမားတွေမဟုတ်ဘဲ Gym ကစားတဲ့သူတွေအနေနဲ့ ကစီဓာတ်များတဲ့ အာလူး၊ ကန်စွန်းဥ၊ ဂျုံကြမ်းပေါင်မုန့်၊ ပိန်းဥ၊ ထမင်းစတာတွေကိုလည်း စားပေးနိုင်ပါတယ်။
• အာဟာရဓာတ်စုပ်ယူမှု အားကောင်းစေဖို့ ဟင်းသီးဟင်းရွက်၊ အစေ့အဆန်၊ အသီးအနှံ၊ အခွံမာသီးတွေကိုပါ အစုံအလင်စားပေးပါ။
• ပရိုတင်းမှုန့်သောက်တယ်ဆိုရင် တစ်နေ့ကို ၂ကြိမ်မှ ၃ကြိမ်ထိ၊ မနက် အစာစားပြီးတစ်ခါ၊ Gym မကစားခင်တစ်ခါ၊ Gym ကစားပြီးပြီးချင်း တစ်ခါ သောက်ပေးပါ။
• အရက်၊ ဆေးလိပ်ကို တတ်နိုင်သလောက်ဖြတ်ပါ။ တကယ်တမ်း အားကစား၊ လေ့ကျင့်ခန်းလုပ်လို့ အားမရှိဘူးဆိုတာ အာသာဖြေလို့ မဟုတ်ပါဘူး။ ဒီမကောင်းတဲ့အကျင့်ကြောင့် မောသလို အားမရှိသလို ဖြစ်နေတာပါ။

အချုပ်အားဖြင့် ပြောရမယ်ဆိုရင် ကြွက်သားဆုံးရှုံးမှာ၊ အမောမခံနိုင်မှာစိုးတဲ့ စိတ်တစ်ခုတည်းနဲ့ အာသာဖြေခြင်း၊ လိင်ဆက်ဆံခြင်း၊ သုက်လွှတ်ခြင်း၊ လိင်မှုကိစ္စတွေအကုန်လုံးကို ရပ်ထားစရာမလိုပါဘူး။ အားကစားလည်းလုပ်ပါ။ လိင်မှုဘဝမှာလည်း တက်ကြွပါ။ လိင်ဆက်ဆံတိုင်းလည်း ကွန်ဒုံးကို သုံးပါ။

Hello ဆရာဝန်ပရိတ်သတ်ကြီးလည်း ကျန်းမာပျော်ရွှင်ပြီး စိတ်ချမ်းသာစရာကောင်းတဲ့ နေ့ရက်တွေကို ပိုင်ဆိုင်ရပါစေလို့ ဆုတောင်းပေးရင်း ဒီမှာပဲ နိဂုံးချုပ်လိုက်ပါတယ်။

Hello Health Group သည် ဆေးပညာ အကြံပြုချက်များ၊ ရောဂါရှာဖွေအတည်ပြုချက်များနှင့် ကုသမှုများ မပြုလုပ်ပေးပါ။

Read also:

Share now :

တည်းဖြတ်သည့်နေ့ ဇန်နဝါရီ 21, 2020 | နောက်ဆုံးတည်းဖြတ်ခြင်း ဇန်နဝါရီ 21, 2020

သင်ဒါလည်း နှစ်သက်နိုင်ပါတယ်။