ဝိတ်ချ နေရင်း ကြုံနေရမယ့် သင်သတိမထားမိတဲ့ ထောင်ချောက်တွေ

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win

ကိုယ်က သစ္စာရှိရှိနဲ့ ဝိတ်ချ နေပါတယ်။ စားချင်တာတွေကို အောင့်ထားရတယ်၊ အပင်ပန်းခံပြီး အားကစားလုပ်တယ်၊ လမ်းလျှောက်ထွက်တယ်၊ အရသာမရှိတဲ့ diet ပလန်တွေလည်း ကြိုးစားပြီး စားပါတယ်။ ဒါပေမယ့် ဝိတ်ကမကျတဲ့အပြင် ပိုတောင်တက်တက်လာလို့ စိတ်ညစ်နေရတာမျိုး သိပ်ဆိုးပါတယ်နော်။

ကိုယ်အလေးချိန်ထိန်းဖို့ လေ့ကျင့်ခန်းတွေနဲ့ diet တွေက အရေးပါတယ်ဆိုပေမယ့် တစ်ခါတစ်လေမှာ သတိမထားမိလိုက်တဲ့ထောင်ချောက်တွေ ရှိနေတတ်ပါတယ်။ အဲဒါတွေကြောင့် ကြိုးစားထားသမျှ အရာမထင်တာ၊ ဖတ်ခနဲ ဝိတ်ပြန်တက်တာတွေ ဖြစ်စေတာပေါ့။

အဲဒီထောင်ချောက်တွေက ဘာတွေများလဲ ဆက်ပြီးကြည့်ရအောင်…

ကျန်းမာရေးနဲ့ညီတဲ့ အစားအသောက်တွေ အစားများသွားတာ

ကျန်းမာရေးနဲ့ညီတာ ကောင်းတယ်ဆိုပေမယ့်လည်း ပမာဏကလည်း အရေးပါတယ်ဆိုတာ မမေ့သင့်ပါဘူး။ ဥပမာ ထောပတ်သီး၊ အုတ်ဂျုံ၊ ဆန်လုံးညို၊ အစေ့အဆန် စတဲ့ အာဟာရပြည့်အစားအစာတွေကို ဝိတ်ချပလန်မှာ အသုံးများပေမယ့် လိုတာထက်ပိုစားမိရင် ကယ်လိုရီများပြီး ဝိတ်တက်စေနိုင်ပါတယ်။

ရေလုံလောက်အောင် မသောက်တာ

ရေက ခန္ဓာကိုယ်ကို ခွန်အားဖြစ်စေနိုင်တဲ့အပြင် ကိုယ်အပူချိန်ကိုလည်း ထိန်းသိမ်းပေးတယ်၊ ဗိုက်ပြည့်တင်းတိမ်စေတယ်လို့လည်း ခံစားရစေတယ်။ ဒါ့ကြောင့် ရေကိုလုံလောက်အောင် မသောက်တဲ့အခါ ကယ်လိုရီတွေပိုစားမိစေတယ်။ ရေဓာတ်မလုံလောက်တဲ့အခါ ခန္ဓာကိုယ်က အရေးပါတဲ့ လုပ်ဆောင်ချက်တွေအတွက် ရေကိုအပိုသိမ်းဆည်းထားမှာဖြစ်လို့ အရည်စုခြင်း(ဖောခြင်း) ဖြစ်စေနိုင်တယ်။

အိပ်ရာထ နောက်ကျတာ၊ အိပ်ရေးပျက်တာ

အစားအသောက်လည်း နည်းမှန်တယ်၊ လေ့ကျင့်ခန်းလည်း သေချာလုပ်တယ်၊ ဒါပေမယ့် ညကျမအိပ်ဘဲ ဖုန်းပွတ်နေမယ်၊ ရုပ်ရှင်ကြည့်နေမယ်ဆိုရင် အလကားပါပဲ။ အိပ်ရေးပျက်ခြင်းက ဆာလောင်မှုဟော်မုန်း ghrelin ပိုထွက်စေပြီး ဗိုက်ပြည့်တင်းတိမ်မှုဟော်မုန်း leptin ကို လျော့နည်းစေနိုင်တယ်။ ဒါ့ကြောင့် အိပ်ရေးပျက်ထားရင် အာဟာရမဖြစ်တဲ့ ပေါက်ကရသရေစာတွေ ပိုစားချင်လာမယ်၊ ပမာဏချင့်ချိန် ထိန်းစားဖို့ ခက်လာမယ် ဆိုတာက ပြဿနာပါ။

အစားကို မဆင်ခြင်ဘဲ လေ့ကျင့်ခန်းတွေပဲလုပ်တာ

စားလိုက်တဲ့ကယ်လိုရီကို ပြန်လောင်ကျွမ်းအောင် လှုပ်ရှားပေးရင် ရပြီလို့ တွေးတတ်ကြတယ်။ တကယ်တော့ အစားမဆင်ခြင်ဘဲ အားကစားချည်းဖိလုပ်နေမယ်ဆိုရင် ကျန်းမာတဲ့ဝက်ကြီး ဖြစ်လာလိမ့်မယ် ဆိုတဲ့စကား မမှားပါဘူးနော်။ အားကစားလုပ်ရတာ ပင်ပန်းပြီး ပိုစားမိရင်လည်း ကိုယ့်ဒေါသနဲ့ကိုယ်ပါပဲ။ ဒီနှစ်ခုကြားမှာ ထိန်းညှိနိုင်ဖို့ကတော့ ကိုယ်ကြိုးစားရမယ့်အပိုင်းပါ။

အငန်ကို ထည့်မစဉ်းစားမိတာ

ကိုယ်အလေးချိန်ထိန်းဖို့အတွက် အဆီနဲ့အချိုကိုပဲ အာရုံစိုက်မိနေမယ် ဒါပေမယ့် အငန်ကိုတော့ မေ့မထားသင့်ပါဘူး။ အငန်ဓာတ်များတာတွေစားရင် ရေဓာတ်စုခြင်းကြောင့် ကိုယ်အလေးချိန်ကို တိုးစေပါတယ်။

အဆီလျှော့ အစားအစာ (low- fat) စားတာ

ဝိတ်မတက်အောင်လို့ အဆီလျှော့ အစားအစာ (low- fat) တွေတော့ ရွေးပြီးစားတာပဲ။ အဆီနည်းတယ်ဆိုပြီး ပိုစားမိရင် ပြဿနာရှိပါတယ်။ ဒါ့အပြင် မုန့်ထုတ်လုပ်တဲ့ကုမ္ပဏီတချို့က အဆီလျှော့ထားပေမယ့် စားရတာ အချိုနဲ့ ဖြည့်စွက်အရသာတွေ အပြည့်ထည့်သွင်းထားတယ်၊ ကိုယ်က မတင်းတိမ်လို့ ပိုစားမိတယ်၊ ထပ်စားချင်မယ်။ မတွက်ချက်ဘဲ စားတဲ့အခါ ကိုယ်အလေးချိန်ကမကျတဲ့အပြင် ပိုတက်လာနိုင်တယ်။

ကျန်းမာရေးနဲ့ညီတာပဲစားဖို့ အတင်းကြိုးစားလွန်းတာ

အစားအသောက်ထိန်းတဲ့နေရာမှာ ကျန်းမာရေးနဲ့ညီတာတွေပဲစားဖို့ ကိုယ့်ကိုယ်ကို ချုပ်တည်းလွန်းတဲ့အခါ ဝိတ်တက်စေမယ့်အစားအစာတွေကို စားချင်စိတ်က ပိုပြီးကြီးထွားလာနိုင်ပါတယ်။ သတိတစ်ချက်လွတ်တာနဲ့ ပိုစားမိသွားပါလိမ့်မယ်။

ဝိတ်ချနေပြီဆို၊ Gym ကစားနေပြီဆို၊ အစားလျှော့နေပြီဆို ဝိတ်ကျတော့မယ် ပုံသေတွက်မထားနဲ့နော်။ ဒီထောင်ချောက်တွေကို ရအောင် ရှောင်ပါလို့။

Hello Health Groupသည် ဆေးပညာဆိုင်ရာ အကြံပေးချက်များ၊ ရောဂါရှာဖွေခြင်းနှင့် ကုသခြင်းများ မပြုလုပ်ပါ။

Read also:

Share now :

တည်းဖြတ်သည့်နေ့ ဇန်နဝါရီ 13, 2020 | နောက်ဆုံးတည်းဖြတ်ခြင်း ဇန်နဝါရီ 13, 2020

သင်ဒါလည်း နှစ်သက်နိုင်ပါတယ်။