အသားပုပ်ခြင်း ဖြစ်ပွားစေသည့်အကြောင်းများ၊ လက္ခဏာများ၊ ကုသချက်များ

    အသားပုပ်ခြင်း ဖြစ်ပွားစေသည့်အကြောင်းများ၊ လက္ခဏာများ၊ ကုသချက်များ

    အသားပုပ်ခြင်းအကြောင်းကိုသေချာမသိရင် ကြောက်စရာကောင်းပါတယ်။ အသားပုပ်ခြင်းဟာကိုယ်ခန္ဓါ ဘယ်အစိတ်အပိုင်းကိုမဆိုထိခိုက်နိုင်တဲ့ ရောဂါဖြစ်ပါတယ်။ အဲ့ဒီရောဂါအကြောင်းသိထားရင် ကြိုတင်ကာကွယ်နိုင်ပါတယ်။ အကြောင်းရင်းများ၊ လက္ခဏာများ၊ ဖြစ်နိုင်ခြေကုသပုံများကိုလေ့လာကြည့်ပါစို့။

    ဘယ်အရာတွေကအသားပုပ်ခြင်းဖြစ်သလဲ

    သွေးဟာကိုယ်ခန္ဓါရဲ့ဆဲလ်တွေကလိုအပ်တဲ့ အောက်ဆီဂျင်၊ အာဟာရဓါတ်နဲ့ ကိုယ်ခံပစ္စည်းတွေကိုသယ်ပေးပါတယ်။ အဲဒီအခါ ဆဲလ်တွေဟာပုံမှန်ကြီးထွားနိုင်ပြီး ရောဂါပိုးဝင်ခြင်းကို ကာကွယ်ပေးနိုင်ပါတယ်။ သွေးစီးဆင်းမှုမှာ ပြသနာရှိရင်တော့ ဆဲလ်တွေဟာမရှင်သန်နိုင်တော့ပါဘူး။
    ရောဂါပိုးဝင်ခြင်းကြောင့် အသားစတွေပျက်စီးပြီးအသားပုပ်ခြင်းကို ဖြစ်ပေါ်စေပါတယ်။

    အသားပုပ်ခြင်းကို ဖြစ်နိုင်ခြေရှိတဲ့အရာတွေကဘာတွေလဲ

    အောက်ပါအချက်တွေရှိရင် ဖြစ်လာနိုင်ပါတယ်။
    • ဆီးချိုရှိတဲ့အခါ သကြားဓါတ်ကိုဖြိုခွဲမယ့် အင်ဆူလင်ကိုမထုတ်နိုင်တာ၊ လုံလောက်စွာမသုံးနိုင်တာတွေ ဖြစ်လာနိုင်ပါတယ်။ ဆီးချိုကို ထိရောက်စွာမကုရင် သွေးတွင်းသကြားဓါတ်ဟာ မြင့်တက်လာပြီးသွေးကြောတွေကို ပျက်စီးစေတဲ့အခါ အဲဒီသွေးကြောတွေနဲ့ ထောက်ပံ့ပေးထားတဲ့ သက်ဆိုင်ရာ ကိုယ်ခန္ဓါအစိတ်အပိုင်းတွေကို အကျိုးသက်ရောက်စေပါတယ်။
    • သွေးကြောပြသနာများဖြစ်တဲ့ သွေးကြောမာကျစ်၍ ကျဉ်းမြောင်းလာခြင်း၊ အရေပြားကိုသွားတဲ့ သွေးကြောကျဉ်းခြင်း၊ သွေးခဲခြင်းစတဲ့ပြသနာတွေဖြစ်ရင် သွေးစီးဆင်းမှုကို ပိတ်ဆို့စေပါတယ်။
    • ထိခိုက်ဒဏ်ရာရခြင်း၊ ခွဲစိတ်ကုသမှု ခံယူခြင်းစတာတွေကလည်း အသားပုပ်ခြင်းကို ဖြစ်စေနိုင်ပါတယ်။ တခါတရံမှာသွေးစီးဆင်းမှုကို ထိခိုက်ပြတ်တောက်စေလို့ ဖြစ်ပါတယ်။
    • အဝလွန်ခြင်း၊ ကိုယ်အလေးချိန်များခြင်း ဖြစ်တဲ့အခါ ဆီးချိုနဲ့ သွေးကြောရောဂါတွေကို ဖြစ်လာနိုင်စေပါတယ်။ ကိုယ်အလေးချိန်များလွန်းရင် သွေးလွှတ်ကြောတွေကိုဖိမိနိုင်ပြီး သွေးစီးဆင်းမှုကို ပြတ်တောက်စေနိုင်ပါတယ်။
    • ကိုယ်ခံအားနည်းတဲ့အချိန်တွေဖြစ်တဲ့ HIV ပိုးကူးစက်ခံရချိန်၊ ကင်ဆာဆေးသွင်းကုသချိန်၊ ဓါတ်ရောင်ခြည်ကုသမှု ခံယူနေချိန်တွေမှာ ရောဂါပိုးဝင်ခြင်းကိုမတွန်းလှန်နိုင်ပါဘူး။
    • ဆေးလိပ်သောက်ခြင်းဟာလည်းအသားပုပ်ခြင်းကို ဖြစ်ပေါ်စေနိုင်ပါတယ်။

    အသားပုပ်ခြင်းရဲ့ လက္ခဏာတွေကဘာတွေလဲ
    အောက်ပါအတိုင်း ဖြစ်ပါတယ်။
    • အရေပြားအရောင်ဟာပြောင်းလာပြီးအနီ၊ အပြာ၊ ခရမ်းနဲ့ အမည်းရောင်အဖြစ် ပြောင်းသွားပါတယ်။
    • ကောင်းတဲ့ အရေပြားနဲ့ အသားပုပ်တဲ့ အရေပြား ကြားနေရာမှာ ခြားနေတဲ့လိုင်းကိုကောင်းကောင်းမြင်နိုင်ပါတယ်။
    • ဖြစ်လာတဲ့နေရာမှာနာကျင်ခြင်း၊ ထုံခြင်းတေါ ဖြစ်လာပါတယ်။
    • အနာကနေအရည်တချို့ထွက်လာပြီးမကောင်းတဲ့အနံ့ပါ ရတတ်ပါတယ်။
    အရေပြားအောက်မှာရှိတဲ့ အသားပုပ်ခြင်းမှာတော့ အောက်ပါ လက္ခဏာတွေ တွေ့နိုင်ပါတယ်။
    • အသားပုပ်တဲ့နေရာမှာရောင်ပြီးနာနေခြင်း
    • အဖျားတက်ခြင်း
    ပုပ်နေတဲ့ အသားစတချို့ ကိုယ်ခန္ဓါထဲ ပြန့်သွားချိန်မှာသွေးဆိပ်တက်ပြီးသွေးလန့်တတ်ပါတယ်။ အဲဒီအခါ အောက်ပါအခြေအနေတွေ တွေ့နိုင်ပါတယ်။
    • သွေးပေါင်ကျခြင်း
    • ကိုယ်ပူချိန်တက်ခြင်း (သို့) ကျခြင်း
    • နှလုံးခုန်နှုန်းမြန်ခြင်း
    • အသက်ရှူမြန်လာခြင်း
    • သတိလစ်တတ်ခြင်း

    အသားပုပ်ခြင်းကိုဘယ်လိုကုမလဲ

    ပျက်စီးသွားတဲ့ အသားတွေ ပြန်မကောင်းတော့ပေမယ့်ကုသခြင်းဖြင့် ကောင်းသေးတဲ့အသားတွေကို ကာကွယ်နိုင်ပါတယ်။ ကုသတဲ့အပိုင်းမှာ ပုပ်သွားတဲ့အသားတွေ ဖယ်ထုတ်ခြင်း၊ အကြောင်းရင်းကိုကုသခြင်း၊ ရောဂါပိုးဝင်ခြင်းကို ကာကွယ်ခြင်းစတာတွေ ပါဝင်ပါတယ်။
    • ခွဲစိတ်ကုသခြင်း။ ခွဲစိတ်တဲ့အခါမှာမကောင်းတော့တဲ့ အသားတွေကိုဖယ်ထုတ်ပြီးပျက်စီးသွားတဲ့ သွေးကြောတွေကို ပြုပြင်ပါတယ်။ ပျက်စီးသွားတဲ့ အရေပြားတွေအတွက် ပြန်လည်ပြုပြင်တဲ့ ခွဲစိတ်မှု လိုအပ်ပါတယ်။ ဖြစ်ရပ်အများစုမှတော့ ခွဲစိတ်ဆရာဝန်များဟာ မကောင်းတော့တဲ့ နေရာတွေကိုဖယ်ထုတ်ပါတယ်။
    • ပဋိဇီဝဆေးများကို သွေးကြောမှတဆင့်ပေးပြီး ဘက်တီးရီးယားများကိုသေစေကာ ရောဂါပိုးဝင်ခြင်းကိုကုသပါတယ်။
    • အားမြှင့်အောက်ဆီဂျင် ပေးခြင်း။ ဒီကုသမှုမှာသွေးကြောတွေထဲကိုအောက်ဆီဂျင်ရောက်စေမယ့် နည်းလမ်းကိုအသုံးပြုပါတယ်။ အေက်ဆီဂျင်များတဲ့သွေးဟာကိုယ်ခန္ဓါကနေဘက်တီးရီးယားပိုးတွေကိုတိုက်ထုတ်ရာမှာအကူအညီပေးပါတယ်။
    ခန္ဓါကိုယ်ကိုဂရုစိုက်ပြီးအာဟာရဓါတ်များများနဲ့ အားဖြည့်ပေးဖို့ လိုအပ်ပါတယ်။ ဆရာဝန်ကနေ အနာသက်သာတဲ့ဆေးတွေ ပေးနိုင်ပါတယ်။

    အသားပုပ်ခြင်းဟာ သွေးရောက်ရှိမှုနည်းခြင်း၊ ရောဂါပိုးဝင်ခြင်းတို့ကြောင့် အသားများပျက်စီးတဲ့အခါ ဖြစ်ပေါ်ပါတယ်။ ကြောက်စရာကောင်းပေမယ့် ကြိုတင်ကာကွယ်လို့တော့ ရပါတယ်။ အသားပုပ်တယ်လို့ ထင်မိရင် ဆေးကုသမှုခံယူဖို့ အရေးကြီးပါတယ်။

    Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    စာရေးသူ ဓာတ်ပုံbadge
    Dr. Thant Zin မှ ရေးသားသည်။ 17/01/2022 တွင် ပြန်လည်ပြင်ဆင်ခဲ့သည်။