ဆီးချိုရှိသူတွေအတွက် ကျန်းမာစေမယ့် ပေါ့ပေါ့ပါးပါး လေ့ကျင့်ခန်းများ

ဆီးချိုရှိနေမယ်ဆိုရင် လေ့ကျင့်ခန်း လုပ်ပါလို့ တိုက်တွန်းချင်ပါတယ်။ အကြောင်းကတော့ ဆီးချိုရှိသူတွေအနေနဲ့ လေ့ကျင့်ခန်း ပုံမှန် လုပ်ပေးတာက များစွာသော ကောင်းကျိုးတွေကို ရရှိစေနိုင်တာကြောင့်ပါ။ လေ့ကျင့်ခန်း လုပ်တာက စိတ်ဖိစီးမှုတွေကို လျော့ကျစေရုံမက သွေးတွင်းသကြားဓာတ်တွေကိုလည်း ထိန်းညှိပေးနိုင်သလို အင်ဆူလင် ဟော်မုန်းထွက်ရှိမှုကိုလည်း ကောင်းမွန်စေပါတယ်။

ဒီတစ်ခေါက်တော့ ဆီးချိုရှိသူတွေအတွက် ကျန်းမာစေမယ့် ပေါ့ပေါ့ပါးပါး လေ့ကျင့်ခန်းများ အကြောင်းကို ပြောပြပေးချင်ပါတယ်။

ဆီးချိုရှိသူတွေ နဲ့ လေ့ကျင့်ခန်း လုပ်ဆောင်ခြင်း

လေ့ကျင့်ခန်း လုပ်တာက ဆီးချိုရှိသူတွေ ကျန်းမာစေဖို့ တော်တော်လေး အရေးကြီးတဲ့ အချက်တစ်ရပ်ပါ။ ဆီးချိုရှိသူတွေအနေနဲ့ အေရိုးဗစ်လိုမျိုး ကိုယ်လက်လှုပ်ရှားမှုဖြစ်စေတဲ့ လေ့ကျင့်ခန်းကို တစ်ပတ်ကို မိနစ် ၁၅၀ လောက် လုပ်ဆောင်ပေးဖို့ လိုပါမယ်။ တစ်ပတ်ကို အနည်းဆုံး ၅ ရက်လောက်တော့ လုပ်ဆောင်ရပါမယ်။ တစ်နေ့ကို မိနစ် ၃၀ လောက်စီပေါ့။

ဆီးချိုအတွက် လေ့ကျင့်ခန်းလုပ်ဆောင်ဖို့လိုတယ်ဆိုတော့ အကောင်းဆုံးဖြစ်စေမယ့် လေ့ကျင့်ခန်းလေးတွေကို သိချင်နေလောက်မယ်ထင်ပါတယ်။ ဒီတော့ ဆီးချိုရှိသူတွေအတွက် ကျန်းမာစေမယ့် ပေါ့ပေါ့ပါးပါး လေ့ကျင့်ခန်းများ အကြောင်းကို အတူတူ ဆက်ကြည့်လိုက်ရအောင်နော်။

ဆီးချိုရှိသူတွေအတွက် ကျန်းမာစေမယ့် ပေါ့ပေါ့ပါးပါး လေ့ကျင့်ခန်းများ

ဆီးချိုရှိသူတွေအတွက် ကျန်းမာစေမယ့် ပေါ့ပေါ့ပါးပါး လေ့ကျင့်ခန်းများ ကတော့

• လမ်းလျှောက်ခြင်း

လမ်းလျှောက်တာက နေရာမရွေး၊ အချိန်မရွေး ပေါ့ပေါ့ပါးပါး လုပ်ဆောင်နိုင်မယ့် လေ့ကျင့်ခန်းပါ။ လူတွေ အများဆုံး လုပ်ဖြစ်တဲ့ လေ့ကျင့်ခန်းဆိုလည်း ဟုတ်ပါတယ်။ ဆီးချိုရှိသူတွေအတွက် အသင့်တော်ဆုံး လေ့ကျင့်ခန်း တစ်ရပ်လို့လည်း အသိအမှတ်ပြုထားတဲ့ လေ့ကျင့်ခန်းပါ။ လမ်းလျှောက်တာက ရုပ်ပိုင်းဆိုင်ရာ လှုပ်ရှားမှုကို တိုးတက်စေနိုင်သလို သွေးတွင်းသကြားဓာတ်ကိုလည်း ထိန်းညှိပေးနိုင်ပါတယ်။

တစ်နေ့ကို မိနစ် ၃၀ နှုန်းနဲ့ တစ်ပတ်ကို ၅ ကြိမ်လောက် လမ်းလျှောက်ပေးတာ ဒါမှမဟုတ် တစ်ခါလျှောက်ရင် ၁၀ မိနစ်လောက်နဲ့ တစ်နေ့ကို ၃ ကြိမ်ခွဲပြီး လမ်းလျှောက်တာကလည်း နည်းလမ်းကောင်း တစ်ရပ်ပါ။

• ထိုက်ချိ 

တရုတ်လူမျိုးတွေ လုပ်ဆောင်လေ့ရှိတဲ့ ကိုယ်လက်လေ့ကျင့်ခန်း တစ်မျိုးဖြစ်တဲ့ ထိုက်ချိ လေ့ကျင့်ခန်းက ဖြည်းဖြည်းချင်း လှုပ်ရှား လုပ်ဆောင်ရတဲ့ လေ့ကျင့်ခန်း ဖြစ်တာကြောင့် စိတ်ရောကိုယ်ပါ အနားရစေပါတယ်။ ထိုက်ချိလေ့ကျင့်တာက သွေးတွင်းသကြားဓာတ် ထိန်းညှိနိုင်စွမ်း တိုးစေနိုင်ပြီး ခန္ဓာကိုယ်မှာ အင်အား ပြည့်ဝစေနိုင်သလို စိတ်ပိုင်ဆိုင်ရာကိုလည်း ကျန်းမာစေဖို့ ထောက်ကူပေးနိုင်ပါတယ်။

• ယောဂ 

ယောဂ လေ့ကျင့်တာက ကိုယ်တွင်းက အရည်တွေ စီးဆင်းမှုကို ကောင်းမွန်စေပြီး အကြောတွေကိုပြေလျော့စေသလို ခန္ဓာကိုယ်ကို ကြံ့ခိုင်စေပြီး ဟန်ချက်ညီစေပါတယ်။ ဆီးချို အပါအဝင် နာတာရှည် ကျန်းမာရေး ပြဿနာ ရှိသူတွေအတွက် သင့်တော်တဲ့ လေ့ကျင့်ခန်း တစ်မျိုးပါ။

စိတ်ဖိစီးမှုကို ပြေလျော့စေပြီး အာရုံကြောတွေရဲ့ လုပ်ဆောင်မှုကို ကောင်းမွန်စေနိုင်ပါတယ်။ စိတ်ပိုင်းဆိုင်ရာ ကျန်းမာစေဖို့ ထောက်ကူပေးနိုင်ပါတယ်။ ကြွက်သား တက်စေပြီး သွေးတွင်းသကြားဓာတ်ကို ထိန်းညှိနိုင်စေဖို့ ထောက်ကူပေးပါတယ်။

• ကပါ

ကတာက ခန္ဓာကိုယ် တစ်ခုလုံး လှုပ်ရှားရတာပါ။ ခန္ဓာကိုယ်ကို ကျန်းမာစေသလို ဦးနှောက်စွမ်းဆောင်ရည် တိုးတက်စေပြီး မှတ်ဉာဏ်ကောင်းစေပါတယ်။ ဝိတ်ကျစေပြီး သွေးတွင်းသကြားဓာတ်ကို ထိန်းညှိပေးပါတယ်။ စိတ်ဖိစီးမှုကို ပြေလျော့စေပြီး အကြောတွေကို ပြေလျော့စေပါတယ်။ တစ်နေ့ကို မိနစ် ၃၀ လောက် ကပေးတာက ကယ်လ်လိုရီ ၁၅၀ လောက် လောင်ကျွမ်းစေနိုင်ပါတယ်။

• ရေကူးပါ

ရေကူးတာက အကြောတွေကို ပြေလျော့စေပြီး ကြွက်သားတွေကို ပြေလျော့စေပါတယ်။ အဆစ်တွေအပေါ်မှာ ဖိအား သက်ရောက်မှု ကင်းတာကြောင့် ဆီးချိုရှိူတွေနဲ့ အထူးသင့်တော်တဲ့ လေ့ကျင့်ခန်း တစ်ရပ်ပါ။ ဆီးချိုရှိသူတွေမှာ သွေးတွင်းသကြားဓာတ် ကျဆင်းအောင် ထောက်ကူပေးသလို ဆီးချိုမဖြစ်အောင်လည်း ကာကွယ်ပေးပါတယ်။ သွေးတွင်းက အကျိုးပြု ကိုလက်စထရောပမာဏကို တိုးစေပြီး ကယ်လ်လိုရီတွေ လောင်ကျွမ်းစေသလို စိတ်ဖိစီးမှုလည်း ပြေလျော့စေပါတယ်။ တစ်နေ့ကို အနည်းဆုံး ၁၀ မိနစ်နှုန်းလောက်နဲ့ တစ်ပတ်ကို ၃ ကြိမ် လောက်ကူးပေးရင်ကို လုံလောက်ပါတယ်။ နောက်ပိုင်းမှ ဖြည်းဖြည်းချင်း တိုးသွားပေးရုံပါ။

ဆီးချိုရှိသူတွေ ဘေးကင်းကင်းနဲ့ လေ့ကျင့်ခန်းလုပ်ဆောင်နိုင်စေဖို့ 

ဆီးချိုရှိသူတွေ အနေနဲ့ ဘေးကင်းကင်းနဲ့ လေ့ကျင့်ခန်း လုပ်ဆောင်နိုင်စေဖို့ဆိုရင် လေ့ကျင့်ခန်း မလုပ်ခင်မှာ

• အသင့်တော်ဆုံးဖြစ်မယ့် လေ့ကျင့်ခန်းကို ဆရာဝန်နဲ့ တိုင်ပင်ပြီး ရွေးချယ်ပါ။
• လေ့ကျင့်ခန်း စလုပ်တဲ့အခါ နည်းနည်းချင်း စလုပ်ပါ။ နိုင်သလောက် ဖြည်းဖြည်းချင်း စလုပ်ပေးပါ။
• လေ့ကျင့်ခန်း မလုပ်ခင် နဲ့ လုပ်ပြီးချိန်မှာ သွေးချိုတိုင်းတာပါ။
• အမျိုးအစား – ၂ ဆီးချိုရှိသူတွေရော အမျိုးအစား -၁ ဆီးချိုရှိသူတွေရော လေ့ကျင့်ခန်း မလုပ်ခင်မှာ သွေးတွင်းသကြားဓာတ် 250 mg/dl အောက်ရှိနေစေဖို့ သတိထားပါ။
• လေ့ကျင့်ခန်း မလုပ်ခင် ၅ မိနစ် သွေးပူလေ့ကျင့်ခန်း လုပ်ပြီး လေ့ကျင့်ခန်း လုပ်ပြီးရင်လည်း ၅ မိနစ်လောက် အကြောလျှော့ပါ။

• လေ့ကျင့်ခန်း မလုပ်ခင်၊ လုပ်နေစဉ် နဲ့ လေ့ကျင့်ခန်း လုပ်ပြီးချိန်တွေမှာ ရေများများသောက်ပါ။ ဒါမှ ရေဓာတ်ခမ်းခြောက်မှုကို ကာကွယ်နိုင်မှာပါ။
• သွေးချိုကျနိုင်တဲ့ အခြေအနေအတွက် သကြားလုံး၊ ဂလူးကို့စ်ဆေးပြားလေးတွေ ဒါမှမဟုတ် သစ်သီးဖျော်ရည် ၄ အောင်စလောက် အဆင်သင့်ဆောင်ထားပေးပါ။
• သွားလေရာကို ဖုန်းယူသွားပါ။ အရေးပေါ် ဆက်သွယ်မှု လုပ်နိုင်ဖို့ပါ။
• ရာသီဥတု အရမ်းပူနေချိန် နဲ့ အရမ်းအေးနေချိန်တွေမှာ လေ့ကျင့်ခန်းလုပ်တာမျိုး မလုပ်ပါနဲ့။
• လေ့ကျင့်ခန်း လုပ်နေစဉ် ခြေထောက်ထိခိုက်မှု ကင်းစေဖို့ ခြေထောက်တွေကို ခြေအိတ်စွပ်ထားပါ။