Probenecid ကဘာလဲ။

ရေးသားသူ ဆေးပညာပိုင်းဆိုင်ရာတည်းဖြတ်သူ Dr. Kaung Thar

Generic Name: Probenecid Brand Name(s): Generics only. No brands available.

အသုံးပြုပုံများ

Probenecid ကို ဘာအတွက်အသုံးပြုကြသလဲ

Probenecidကိုအဆစ်အမြစ်ရောင်ရောဂါကာကွယ်ရန်အတွက်သုံးပါတယ်။၎င်းဟာရုတ်တရက်ထဖြစ်ပြီးပြင်းထန်တဲ့အဆစ်အမြစ်ရောင်ရောဂါကိုတော့ကုသပေးမှာမဟုတ်ဘဲရောဂါကိုပိုဆိုးစေမှာဖြစ်ပါတယ်။Probenecidဟာuricosuricsလို့ခေါ်တဲ့ဆေးအုပ်စုတစ်မျိုးထဲမှာပါဝင်ပါတယ်။၎င်းဟာကျောက်ကပ်တွေuric acidကိုစွန့်ထုတ်တာမြန်ဆန်အောင်ကူညီပေးခြင်းအားဖြင့်သင့်ခန္ဓါကိုယ်ထဲရှိuric acidပမာဏကိုလျှော့ချပေးပါတယ်။uric acidပမာဏတွေအလွန်များလာတဲ့အခါအဆစ်တွေထဲမှာပုံဆောင်ခဲတွေအနေနဲ့ဖြစ်လာပြီးအဆစ်အမြစ်ရောင်ရောဂါဖြစ်စေပါတယ်။uric acidပမာဏကိုလျှော့ချခြင်းဟာသင့်ကျောက်ကပ်တွေအတွက်လည်းအထောက်အကူဖြစ်စေပါတယ်။

Probenecidကိုပိုးသတ်ဆေးတွေ(ဥပမာ penicillins)နဲ့တွဲပေးလေ့ရှိပါတယ်။၎င်းဟာသွေးထဲရှိပိုးသတ်ဆေးရဲ့ပမာဏကိုမြင့်တက်စေပြီးပိုးသတ်ဆေးတွေကောင်းကောင်းအလုပ်လုပ်နိုင်အောင်ကူညီပေးပါတယ်။

Probenecidကိုအသက်နှစ်နှစ်အောက်ကလေးငယ်တွေမှာအသုံးမပြုသင့်ပါဘူး။

Probenecid ဘယ်လိုသောက်သုံးသင့်သလဲ

အဆစ်အမြစ်ရောင်ရောဂါကိုကာကွယ်ရန်အတွက်ယခုဆေးကိုဆရာဝန်ညွှန်ကြားတဲ့အတိုင်းအစာအိမ်ပြသနာတွေကိုလျှော့ချရန်အတွက်ဆေးကိုသောက်ဆေးအဖြစ်အစာသို့မဟုတ်antacidsဆေးတွေနဲ့တွဲပြီးတစ်နေ့နှစ်ကြိမ်သောက်ပါ။ ဆေးသောက်တိုင်းမှာရေတစ်ဖန်ခွက်နဲ့တွဲသောက်တာအကောင်းဆုံးဖြစ်ပြီးကျောက်ကပ်မှာကျောက်တည်ခြင်းကိုကာကွယ်ရန်အတွက်ယခုဆေးကိုသောက်နေစဉ်တစ်နေ့ကိုအနည်းဆုံးနောက်ထပ်ရေ၈ခွက်လောက်သောက်ပါ။ သင့်ကိုအရည်တွေသောက်တာကိုတားမြစ်ထားပါကအခြားနည်းလမ်းများအတွက်ဆရာဝန်ကိုတိုင်ပင်ပါ။ သင့်ဆရာဝန်ကကျောက်ကပ်မှာကျောက်တည်ခြင်းကိုကာကွယ်ရန်အတွက်သင့်ရဲ့ဆီးထဲမှာအက်ဆစ်ပမာဏလျော့နည်းအောင်ဘယ်လိုလုပ်ရမလဲဆိုတာကိုညွှန်ကြားပါလိမ့်မယ်(ဥပမာဗီတာမင်စီပမာဏအများကြီးသောက်တာကိုရှောင်ကြဉ်ခြင်း)။ သင့်ရဲ့ဆီးထဲမှာအက်ဆစ်ပါဝင်မှုကိုလျော့နည်းစေရန်အတွက်ဆရာဝန်အနေနဲ့သင့်ကိုအခြားဆေးတွေညွှန်ကြားပါလိမ့်မယ်။(ဥပမာ sodium bicarbonate,citrate)

ဆေးပမာဏသည်သင့်ရဲ့အခြေအနေနဲ့ဆေးကုသမှုအပေါ်တုံ့ပြန်မှုတွေပေါ်မူတည်ပါတယ်။ စစချင်းမှာတော့သင့်ဆရာဝန်ကသင့်ကိုဆေးပမာဏနည်းနည်းပဲသောက်ခိုင်းပါလိမ့်မယ်။ အဲနောက်မှာတော့uric acidပမာဏနဲ့သင့်ရဲ့ရောဂါလက္ခဏာတွေပေါ်မူတည်ပြီးဆေးပမာဏကိုထိန်းညှိပါလိမ့်မယ်။ သင့်မှာရောဂါလက္ခဏာတွေလအတော်ကြာမရှိတော့ဘဲuric acidပမာဏကလည်းပုံမှန်ရောက်သွားပြီဆိုရင်ဆရာဝန်အနေနဲ့probenecidပမာဏကိုထိရောက်မှုရှိတဲ့အနည်းဆုံးဆေးပမာဏအထိလျှော့ချပါလိမ့်မယ်။ သင့်ဆရာဝန်ရဲ့ညွှန်ကြားချက်တွေကိုသတိထားပြီးလိုက်နာပါ။

Probenecidကိုရုတ်တရက်ထဖြစ်ပြီးပြင်းထန်တဲ့အဆစ်အမြစ်ရောင်ရောဂါဖြစ်နေစဉ်မသုံးသင့်ပါဘူး။ ယခုဆေးကိုစမသုံးခင်သင့်ရဲ့လက်ရှိရောဂါပျောက်အောင်စောင့်ပါ။ ယခုဆေးကိုစသောက်ပြီးတဲ့အခါခန္ဓါကိုယ်အနေနဲ့uric acidပမာဏအများကြီးကိုစွန့်ထုတ်နေစဉ်သင့်အနေနဲ့အဆစ်အမြစ်ရောင်ရောဂါအကြိမ်အရေအတွက်ပိုများလာတာကိုလပေါင်းများစွာခံစားရမှာဖြစ်ပါတယ်။Probenecidကိုသောက်နေစဉ်သင့်မှာအဆစ်အမြစ်ရောင်ရောဂါရလာပါကအဆစ်အမြစ်ရောင်ရောဂါရဲ့အနာသက်သာစေဖို့အတွက်ယခုဆေးကိုအခြားဆေးတွေနဲ့တွဲပြီးဆက်သောက်ပါ။

Probenecidဟာအနာသက်သာစေတဲ့ဆေးမဟုတ်ပါဘူး။ အဆစ်အမြစ်ရောင်ရောဂါရဲ့အနာသက်သာစေဖို့အတွက်ဆရာဝန်ညွှန်ကြားထားတဲ့အနာသက်သာဆေးတွေ(ဥပမာ colchicine,ibuprofen,indomethacin)ကိုဆက်သောက်ပါ။

သင်ဟာယခုဆေးကိုသင့်ခန္ဓါကိုယ်ထဲရှိပိုးသတ်ဆေးတွေရဲ့ပမာဏကိုမြှင့်တင်ဖို့အတွက်သောက်နေတယ်ဆိုရင်ပိုးသတ်ဆေးကိုဘယ်အချိန်သောက်သင့်ပြီးprobenecidကိုဘယ်အချိန်သောက်သင့်လဲဆိုတာနဲ့ပတ်သက်ပြီးဆရာဝန်ရဲ့ညွှန်ကြားချက်တွေကိုလိုက်နာပါ။

ဆေးရဲ့အကောင်းဆုံးအာနိသင်ကိုရရှိရန်အတွက်ယခုဆေးကိုပုံမှန်သောက်ပါ။ သင်ကောင်းကောင်းမှတ်မိနေစေရန်ဆေးကိုနေ့တိုင်းပုံမှန်အချိန်တစ်ခုမှာသောက်ပါ။

သင့်ရောဂါမသက်သာပါကသို့မဟုတ်ပိုဆိုးလာပါကဆရာဝန်ကိုအကြောင်းကြားပါ။

Probenecid ဘယ်လိုသိမ်းဆည်းရမလဲ

Probenecid ကိုအခန်းအပူချိန်မှာထားတာအကောင်းဆုံးပါ။ တိုက်ရိုက်နေရောင်ထိတွေ့နိုင်သောနေရာနှင့်စိုစွတ်နေတဲ့နေရာတွေကနေဝေးဝေးထားပါ။ ဆေးအာနိသင်မပျက်အောင်ဆေးကိုရေချိုးခန်းနဲ့ရေခဲသေတ္တာထဲကိုမထည့်ထားသင့်ပါ။Probenecidဆေးအမျိုးအစားပေါ်မူတည်ပြီးဆေးထိန်းသိမ်းပုံလည်းကွာခြားနိုင်ပါတယ်။ ဆေးကိုသိမ်းဆည်းဖို့အတွက်ဆေးထုပ်ပေါ်မှာရှိတဲ့ညွှန်ကြားချက်များကိုဖတ်ဖို့အရေးကြီးပါတယ်။ ဒါမှမဟုတ်သင့်ရဲ့ဆေးဝါးကျွမ်းကျင်ပညာရှင်ကိုလည်းမေးမြန်းနိုင်ပါတယ်။ ကလေးတွေနဲ့အိမ်မွေးတိရစ္ဆာန်တွေဘေးကင်းဖို့အတွက်ဆေးကိုသူတို့နဲ့ဝေးရာမှာထားသင့်ပါတယ်။

Probenecidကိုအိမ်သာထဲကိုပစ်ချတာနဲ့ရေထွက်ပေါက်တွေထဲကနေဆေးချတာမျိုးကိုမလုပ်သင့်ပါဘူး။ ဆေးဝါးတွေကိုမလိုအပ်တော့တဲ့အခါဒါမှမဟုတ်သက်တမ်းကုန်ဆုံးသွားတဲ့အခါတွေမှာစနစ်တကျစွန့်ပစ်ဖို့အရေးကြီးပါတယ်။ ဆေးဝါးများကိုစနစ်တကျဘယ်လိုစွန့်ပစ်ရမယ်ဆိုတာနဲ့ပတ်သက်လို့သင့်ရဲ့ဆေးဝါးကျွမ်းကျင်ပညာရှင်နဲ့တိုင်ပင်ပါ။

ကြိုတင်သတိပြုရန်များနှင့် အသိပေးချက်များ

Probenecid အသုံးမပြုခင် ဘာတွေသိသင့်သလဲ

Probenecidကိုအသုံးမပြုခင်သင့်မှာယခုဆေးနဲ့သို့မဟုတ်အခြားဆေးတွေနဲ့ဓါတ်မတည့်တာမျိုးတွေရှိရင်သင့်ရဲ့ဆရာဝန်သို့မဟုတ်ဆေးဝါးကျွမ်းကျင်သူကိုပြောပြပါ။ ယခုဆေးမှာဆေးနဲ့ဓါတ်မတည့်တာတွေသို့မဟုတ်တခြားဘေးထွက်ဆိုးကျိုးတွေဖြစ်စေနိုင်တဲ့ပစ္စည်းတွေပါတတ်ပါတယ်။ အသေးစိတ်အတွက်သင့်ရဲ့ဆေးဝါးကျွမ်းကျင်သူကိုပြောပြပါ။

သင့်မှာအချို့ရောဂါတွေရှိပါကယခုဆေးကိုမသုံးသင့်ပါဘူး။ ယခုဆေးကိုမသုံးခင်သင့်မှာသွေးဆဲလ်ပမာဏလျော့နည်းခြင်း(ဥပမာရိုးတွင်းခြင်ဆီကမထုတ်နိုင်သောကြောင့်သွေးအားနည်းသည့်ရောဂါ၊ရိုးတွင်းခြင်ဆီမကောင်းသည့်ရောဂါ)၊ကျောက်ကပ်မှာကျောက်တည်ခြင်း(uric acid)ရောဂါတွေရှိပါကဆရာဝန်သို့မဟုတ်ဆေးဝါးကျွမ်းကျင်ပညာရှင်ကိုတိုင်ပင်ပါ။

ယခုဆေးကိုမသုံးခင်ဆရာဝန်သို့မဟုတ်ဆေးဝါးကျွမ်းကျင်ပညာရှင်ကိုသင့်ရဲ့ရောဂါရာဇဝင်အကြောင်းအထူးသဖြင့်ကင်ဆာရောဂါကုသခြင်း၊G6PDအင်ဇိုင်းချို့တဲ့သောရောဂါ၊ကျောက်ကပ်ရောဂါများ(ဥပမာကျောက်ကပ်တွင်ကျောက်တည်ခြင်း၊ပိတ်ဆို့ခြင်း)၊အူမှာအနာဖြစ်ခြင်းတို့အကြောင်းကိုပြောပြပါ။

ယခုဆေးဟာသင့်ကိုမူးဝေစေပါတယ်။ အရက်နဲ့ဆေးခြောက်တွေသုံးမယ်ဆိုသင့်ကိုပိုပြီးမူးဝေစေမှာပါ။ အဲဒါကြောင့်သင့်အနေနဲ့ကောင်းကောင်းပြန်ပြီးအလုပ်မလုပ်နိုင်သေးသ၍ကားမမောင်းပါနဲ့။ စက်တွေကိုအသုံးမပြုပါနဲ့။ နောက်ပြီးအမြဲတမ်းနိုးကြားတက်ကြွနေရန်လိုအပ်တဲ့အလုပ်တွေကိုမလုပ်ပါနဲ့။ အရက်သေစာသောက်စားခြင်းကိုရှောင်ကြဉ်ပါ။ သင်ဆေးခြောက်တွေသုံးနေတယ်ဆိုရင်သင့်ဆရာဝန်ကိုပြောပြပါ။

ခွဲစိတ်ကုသမှုမခံယူခင်သင့်ရဲ့ဆရာဝန်သို့မဟုတ်သွားဆရာဝန်ကိုသင်ယခုဆေးကိုသုံးနေတဲ့အကြောင်းကိုပြောပြပါ။

သင်အသက်ကြီးလာတာနဲ့အမျှကျောက်ကပ်ရဲ့လုပ်ငန်းတာဝန်တွေလည်းလျော့ကျလာပါတယ်။ အဲအတွက်ကြောင့်ယခုဆေးကိုသုံးနေစဉ်အသက်ကြီးသူတွေအနေနဲ့ဆေးရဲ့ဘေးထွက်ဆိုးကျိုးတွေအထူးသဖြင့်အစာအိမ်ပြသနာတွေကိုရနိုင်ချေပိုများပါတယ်။

ကိုယ်ဝန်ဆောင်နေစဉ်မှာယခုဆေးကိုလိုအပ်မှသာသုံးသင့်ပါတယ်။ ဆေးရဲ့ကောင်းကျိုးနဲ့ဆိုးကျိုးတွေအကြောင်းကိုဆရာဝန်နဲ့ဆွေးနွေးပါ။

ယခုဆေးဟာမိခင်နို့ရည်ထဲကိုပါလာနိုင်သလားဆိုတာကိုမသိရပါဘူး။ အဲဒါကြောင့်ကလေးနို့မတိုက်ခင်ဆရာဝန်နဲ့တိုင်ပင်ပါ။

ကိုယ်ဝန်ဆောင်နေချိန် ဒါမှမဟုတ် ကလေးနို့တိုက်နေချိန်မှာ Probenecid ကိုသုံးစွဲဖို့ စိတ်ချရပါသလား

ယခုဆေးဝါးကိုကိုယ်ဝန်ဆောင်နေချိန်နှင့်ကလေးနို့တိုက်နေချိန်တွင်အသုံးပြုလျှင်ဆိုးကျိုးများရှိမရှိကိုဆုံးဖြတ်နိုင်ရန်အတွက်လုံလောက်သောလေ့လာစမ်းသပ်ချက်များမရှိပါ။ ဆေးမသောက်သုံးမီတွင်ဖြစ်နိုင်ချေကောင်းကျိုးများနှင့်ဆိုးကျိုးများအားလုံးကိုချိန်ဆနိုင်ရန်အတွက်သင့်ရဲ့ဆရာဝန်နဲ့တိုင်ပင်ဆွေးနွေးမှုပြုလုပ်ပါ။ အမေရိကန်နိုင်ငံအစားအသောက်နဲ့ဆေးဝါးစီမံကြီးကြပ်ရေးအဖွဲ့(FDA)ကProbenecidကိုကိုယ်ဝန်ဆောင်နေစဉ်ဆိုးကျိုးရနိုင်ခြေအဆင့်Bလို့သတ်မှတ်ထားပါတယ်။

FDAရဲ့ကိုယ်ဝန်ဆောင်နေစဉ်ဆိုးကျိုးရနိုင်ခြေအဆင့်တွေကတော့အောက်ပါအတိုင်းဖြစ်ပါတယ်။

A=ဆိုးကျိုးရနိုင်ခြေမရှိပါ

B=အချို့သောလေ့လာချက်တွေမှာဆိုးကျိုးရနိုင်ခြေမရှိပါ

C=ဆိုးကျိုးရနိုင်ခြေအနည်းငယ်ရှိသည်

D=ဆိုးကျိုးရရှိမည့်အထောက်အထားများရှိသည်

X=ဆေးကိုမသုံးသင့်ပါ

N=မသိပါ

ဘေးထွက်ဆိုးကျိုးများ

Probenecid ကိုအသုံးပြုခြင်းဖြင့် ဘယ်လိုဘေးထွက်ဆိုးကျိုးတွေဖြစ်နိုင်သလဲ

သင့်ခန္ဓါကိုယ်အနေနဲ့ဆေးကိုထိန်းညှိခြင်းကြောင့်ပျို့ခြင်း၊ခံတွင်းပျက်ခြင်း၊မူးဝေခြင်း၊အန်ခြင်း၊ခေါင်းကိုက်ခြင်း၊သွားဖုံးများနာခြင်း၊ဆီးမကြာခဏသွားခြင်းတွေဖြစ်နိုင်ပါတယ်။ အဲဒီဆိုးကျိုးတွေမပျောက်ပါကသို့မဟုတ်ပိုဆိုးလာပါကသင့်ဆရာဝန်သို့မဟုတ်ဆေးဝါးကျွမ်းကျင်ပညာရှင်ကိုပြောပြပါ။

သင့်ဆရာဝန်ကသင့်ကိုဒီဆေးပေးပြီဆိုတာသင့်အပေါ်မှာဒီဆေးရဲ့ကောင်းကျိုးတွေကဆိုးကျိုးရနိုင်ခြေတွေထက်ပိုများတယ်ဆိုတာကိုသုံးသပ်ပြီးမှပေးတယ်ဆိုတာကိုတော့သတိရပါ။ ယခုဆေးကိုသုံးနေတဲ့သူတော်တော်များများမှာပြင်းထန်တဲ့ဘေးထွက်ဆိုးကျိုးတွေမခံစားရပါဘူး။

ဖြစ်ခဲပြီးပြင်းထန်တဲ့အောက်ပါဘေးထွက်ဆိုးကျိုးတွေရပါကဆရာဝန်ကိုချက်ချင်းပြောပြပါ။ ကျောအောင့်ခြင်း၊ဆီးသွားရင်နာခြင်းသို့မဟုတ်ဆီးသွားရခက်ခဲခြင်း၊ဆီးပမာဏနဲ့အရောင်ပြောင်းလဲခြင်း။

ဖြစ်ခဲပြီးအလွန်ပြင်းထန်တဲ့အောက်ပါဘေးထွက်ဆိုးကျိုးတွေရပါကဆရာဝန်ကိုချက်ချင်းပြောပြပါ။ အလွယ်တကူအညိုအမည်းစွဲခြင်း၊သွေးထွက်ခြင်း၊ကူးစက်ရောဂါပိုးဝင်သောလက္ခဏာများ(ဥပမာ ဖျားခြင်း၊လည်ချောင်းနာခြင်း)၊ပြင်းပြင်းထန်ထန်ဗိုက်အောင့်ခြင်း၊ဝမ်းရောင်ဖျော့ခြင်း၊ပုံမှန်မဟုတ်သောပင်ပန်းနွမ်းနယ်ခြင်း၊ဆီးရေုင်ရင့်ခြင်း၊မျက်လုံးနဲ့အသားများဝါခြင်း။

ယခုဆေးနဲ့အပြင်းအထန်ဓါတ်မတည့်ခြင်းမျိုးကရှားပါတယ်။ ဒါပေမယ့်တကယ်လို့သင့်မှာဆေးနဲ့အပြင်းအထန်ဓါတ်မတည့်တဲ့လက္ခဏာတွေဖြစ်တဲ့အရေပြားမှာအနီကွက်များထွက်ခြင်း၊ယားယံခြင်း၊ဖောရောင်ခြင်း(အထူးသဖြင့်မျက်နှာ၊လျှာနဲ့လည်ချောင်း)၊အလွန်မူးဝေခြင်း၊အသက်ရှူရခက်ခဲခြင်းများရှိပါကဆေးကုသမှုချက်ချင်းခံယူပါ။

အထက်ပါဘေးထွက်ဆိုးကျိုးများကိုလူတိုင်းခံစားရတာတော့မဟုတ်ပါဘူး။ အထက်မှာမပါတဲ့အခြားဘေးထွက်ဆိုးကျိုးများလည်းရှိနိုင်ပါသေးတယ်။ သင့်ဆီမှာဘေးထွက်ဆိုးကျိုးတစ်ခုခုရှိတယ်ထင်ပြီးသံသယဝင်နေပါကသင့်ရဲ့ဆရာဝန်သို့မဟုတ်ဆေးဝါးကျွမ်းကျင်ပညာရှင်နဲ့တိုင်ပင်ပါ။

ဆေးဓါတ်ပြုမှုများ

ဘယ်ဆေးတွေက Probenecid နဲ့ ဓါတ်ပြုနိုင်သလဲ

ယခုဆေးနဲ့ဓါတ်ပြုနိုင်တဲ့ပစ္စည်းတွေကတော့ကင်ဆာရောဂါကုဆေးများ၊ketorolac,dyphylline,methotrexate,pyrazinamide,salicylates(ဥပမာaspirinဆေးပမာဏများများ),zidovudine,ကျောက်ကပ်မှတစ်ဆင့်စွန့်ထုတ်သောဆေးများ(ဥပမာ ceftazidime/avibactam,dapsone,heparin,fosfomycin)တို့ဖြစ်ကြပါတယ်။

အရက်သေစာတွေဟာယခုဆေးရဲ့ထိရောက်မှုအာနိသင်ကိုလျော့ကျစေနိုင်ပါတယ်။ ယခုဆေးကိုသောက်နေစဉ်အရက်သောက်ခြင်းကိုရှောင်ကြဉ်ပါ။

ယခုဆေးဟာအချို့သောဓါတ်ခွဲခန်းစမ်းသပ်ချက်တွေ(ဥပမာဆီးထဲရှိသကြားပမာဏစစ်ဆေးခြင်း)ကိုအနှောင့်အယှက်ပေးနိုင်ပြီးစမ်းသပ်ချက်ရလဒ်အမှားတွေထွက်စေနိုင်ပါတယ်။ သင်ယခုဆေးကိုသုံးနေတယ်ဆိုတာကိုဓါတ်ခွဲခန်းကျွမ်းကျင်ပညာရှင်တွေနဲ့သင့်ရဲ့ဆရာဝန်အားလုံးသိပါစေ။

Probenecidကသင်လက်ရှိသောက်နေတဲ့အခြားဆေးတွေနဲ့ဓါတ်ပြုပြီးဆေးရဲ့ထိရောက်မှုနဲ့ဘေးထွက်ဆိုးကျိုးရနိုင်ခြေကိုပြောင်းလဲနိုင်ပါတယ်။ မလိုလားအပ်တဲ့ဆေးဝါးဓါတ်ပြုမှုတွေမဖြစ်လာအောင်လို့သင်လက်ရှိသောက်သုံးနေတဲ့ဆေးဝါးတွေအားလုံးရဲ့စာရင်းကိုလုပ်ထားပြီး(စာရင်းလုပ်တဲ့အခါမှာဆရာဝန်ညွှန်ကြားထားတာတွေ၊မညွှန်ကြားဘဲသောက်သုံးနေတာတွေ၊သဘာဝဆေးဘက်ဝင်ပစ္စည်းတွေအားလုံးပါဝင်ပါတယ်)ဆရာဝန်ဒါမှမဟုတ်ဆေးဝါးကျွမ်းကျင်သူကိုအမြဲပြောပြပါ။ ဆေးဝါးတွေကိုဆရာဝန်ခွင့်ပြုချက်မပါဘဲသောက်သုံးခြင်း၊ရပ်ဆိုင်းခြင်း၊ပမာဏကိုပြောင်းလဲခြင်းတွေမပြုလုပ်ပါနဲ့။

အစားအသောက်တွေနဲ့ အရက်က Probenecid နဲ့ ဓါတ်ပြုနိုင်သလား

Probenecidဟာအစားအသောက်ဒါမှမဟုတ်အရက်သေစာနဲ့ဓါတ်ပြုမှုတွေဖြစ်ပြီးဆေးဝါးတွေအကျိုးသက်ရောက်မှုပုံစံနဲ့ဘေးထွက်ဆိုးကျိုးတွေဖြစ်လာနိုင်ချေပြောင်းလဲမှုတွေဖြစ်နိုင်ပါတယ်။ မလိုလားအပ်တဲ့ဓါတ်ပြုမှုတွေမဖြစ်လာအောင်လို့အစားအသောက်၊အရက်သေစာတွေနဲ့ဓါတ်ပြုနိုင်ချေရှိမရှိကိုသင့်ရဲ့ဆရာဝန်သို့မဟုတ်ဆေးဝါးကျွမ်းကျင်သူနှင့်မေးမြန်းတိုင်ပင်ပါ။

ဘယ်ရောဂါအခြေအနေတွေက Probenecid နဲ့ ဓါတ်ပြုနိုင်သလဲ

Probenecidဟာသင့်ရဲ့နဂိုကျန်းမာရေးအခြေအနေများနဲ့သက်ရောက်ဓါတ်ပြုမှုတွေရှိနိုင်ပါတယ်။ သင့်ရဲ့ကျန်းမာရေးအခြေအနေကိုပိုဆိုးသွားစေတာဒါမှမဟုတ်ဆေးသက်ရောက်မှုပုံစံပြောင်းလဲသွားတာတွေဖြစ်နိုင်ပါတယ်။ ဒါ့ကြောင့်သင့်ရဲ့လက်ရှိကျန်းမာရေးအခြေအနေအကုန်လုံးကိုသင့်ရဲ့ဆရာဝန်ဒါမှမဟုတ်ဆေးဝါးကျွမ်းကျင်ပညာရှင်ကိုအသိပေးဖို့အရေးကြီးပါတယ်။

သောက်သုံးရန်အညွှန်း

ယခုအချက်အလက်များသည် ဆေးပညာအကြံပေးမှုကို အစားထိုးရန်အတွက်မဟုတ်ပါ။ သင်သည်သင့်ဆရာဝန်နှင့် အမြဲတမ်းတိုင်ပင်ဆွေးနွေးသင့်ပါသည်

အရွယ်ရောက်ပြီးသူတွေအတွက် Probenecid ရဲ့ အသုံးပြုရမယ့်ပမာဏကဘယ်လောက်လဲ

အဆစ်အမြစ်ရောင်ရောဂါအတွက်အရွယ်ရောက်ပြီးသူသောက်ရန်ဆေးပမာဏ

လက်ရှိခံစားနေရတဲ့အဆစ်အမြစ်ရောင်ရောဂါရုတ်တရက်ထဖောက်တာမသက်သာသရွေ့ဆေးကိုစမပေးသင့်ပါဘူး။

ပထမအကြိမ်အတွက်ဆေးပမာဏ:ဆေး၂၅၀မီလီဂရမ်ကိုသောက်ဆေးအဖြစ်တစ်နေ့နှစ်ကြိမ်နဲ့တစ်ပတ်သောက်ပါ။

ဆေးအာနိသင်ကိုဆက်ထိန်းရန်ပမာဏ:ဆေး၅၀၀မီလီဂရမ်ကိုသောက်ဆေးအဖြစ်တစ်နေ့နှစ်ကြိမ်သောက်ပါ။

-တကယ်လို့အဆစ်အမြစ်ရောင်ရောဂါရဲ့လက္ခဏာတွေမသက်သာရင်သို့မဟုတ်၂၄နာရီအတွင်းuric acid စွန့်ထုတ်တဲ့ပမာဏဟာ၇၀၀မီလီဂရမ်အထက်ကိုမရောက်ဘူးဆိုရင်၄ပတ်ကြာတိုင်းဆေး၅၀၀မီလီဂရမ်ကိုလူနာခံနိုင်ရည်ရှိသလောက်တိုးသောက်ရပါမယ်။ သွေးထဲရှိ uric acid ပမာဏပုံမှန်ပြန်ဖြစ်သွားတဲ့အထိဆေးကိုဆက်သောက်ပါ။

အမြင့်ဆုံးဆေးပမာဏ:တစ်နေ့ကိုဆေး၂ဂရမ်

ရှင်းလင်းအကြံပြုချက်များ

-ဆေးကုသနေစဉ်ရုတ်တရက်ရောဂါထဖြစ်ပါကယခုဆေးကိုတူညီတဲ့ဆေးပမာဏအတိုင်းဆက်ပေးသင့်ပြီးရုတ်တရက်ရောဂါထဖြစ်တာကိုထိန်းချုပ်ဖို့အတွက်အခြားသင့်တော်တဲ့ဆေးတစ်မျိုးမျိုးပေးရပါမယ်။

-uric acid တွေဆီးထဲမှာပုံဆောင်ခဲအနေနဲ့ပါလာတာကိုကာကွယ်ရန်အတွက်တစ်နေ့ကိုအရည်နှစ်လီတာသောက်ခြင်းနဲ့ဆီးထဲရှိအက်ဆစ်ပမာဏလျှော့ချခြင်းတို့ပြုလုပ်သင့်ပါတယ်။ ဆီးထဲရှိအက်ဆစ်ပမာဏလျှော့ချခြင်းကိုသွေးထဲမှာရှိတဲ့urateပမာဏပုံမှန်ပြန်ရောက်သွားပြီးပုံဆောင်ခဲဖြစ်ခြင်းတွေလည်းမရှိတော့တဲ့အခါမှရပ်သင့်ပါတယ်။

-ရုတ်တရက်ရောဂါထဖောက်တာတွေ၆လနဲ့အထက်လောက်မရှိတော့ဘဲသွေးထဲရှိurateပမာဏတွေလည်းပုံမှန်အဖြစ်ပြန်ရောက်သွားတဲ့အခါဆေးအာနိသင်ဆက်ထိန်းတဲ့ဆေးပမာဏကို၆လကြာတိုင်း၅၀၀မီလီဂရမ်စီလျှော့သွားရပါမယ်။ ဆေးအာနိသင်ဆက်ထိန်းတဲ့ဆေးပမာဏကိုသွေးထဲရှိurateပမာဏတွေပြန်များလာတဲ့အထိတော့မလျှော့ချသင့်ပါဘူး။

အသုံးပြုခြင်း:အဆစ်အမြစ်ရောင်ရောဂါနဲ့ဆက်စပ်နေတဲ့သွေးထဲရှိuric acid ပမာဏများခြင်းကိုကုသရန်အတွက်သုံးပါတယ်။

Gouty arthritis ရောဂါအတွက်အရွယ်ရောက်ပြီးသူသောက်ရန်ဆေးပမာဏ

လက်ရှိခံစားနေရတဲ့အဆစ်အမြစ်ရောင်ရောဂါရုတ်တရက်ထဖောက်တာမသက်သာသရွေ့ဆေးကိုစမပေးသင့်ပါဘူး။

ပထမအကြိမ်အတွက်ဆေးပမာဏ:ဆေး၂၅၀မီလီဂရမ်ကိုသောက်ဆေးအဖြစ်တစ်နေ့နှစ်ကြိမ်နဲ့တစ်ပတ်သောက်ပါ။

ဆေးအာနိသင်ကိုဆက်ထိန်းရန်ပမာဏ:ဆေး၅၀၀မီလီဂရမ်ကိုသောက်ဆေးအဖြစ်တစ်နေ့နှစ်ကြိမ်သောက်ပါ။

-တကယ်လို့အဆစ်အမြစ်ရောင်ရောဂါရဲ့လက္ခဏာတွေမသက်သာရင်သို့မဟုတ်၂၄နာရီအတွင်းuricacidစွန့်ထုတ်တဲ့ပမာဏဟာ၇၀၀မီလီဂရမ်အထက်ကိုမရောက်ဘူးဆိုရင်၄ပတ်ကြာတိုင်းဆေး၅၀၀မီလီဂရမ်ကိုလူနာခံနိုင်ရည်ရှိသလောက်တိုးသောက်ရပါမယ်။ သွေးထဲရှိuricacidပမာဏပုံမှန်ပြန်ဖြစ်သွားတဲ့အထိဆေးကိုဆက်သောက်ပါ။

အမြင့်ဆုံးဆေးပမာဏ:တစ်နေ့ကိုဆေး၂ဂရမ်

ရှင်းလင်းအကြံပြုချက်များ

-ဆေးကုသနေစဉ်ရုတ်တရက်ရောဂါထဖြစ်ပါကယခုဆေးကိုတူညီတဲ့ဆေးပမာဏအတိုင်းဆက်ပေးသင့်ပြီးရုတ်တရက်ရောဂါထဖြစ်တာကိုထိန်းချုပ်ဖို့အတွက်အခြားသင့်တော်တဲ့ဆေးတစ်မျိုးမျိုးပေးရပါမယ်။

-uricacidတွေဆီးထဲမှာပုံဆောင်ခဲအနေနဲ့ပါလာတာကိုကာကွယ်ရန်အတွက်တစ်နေ့ကိုအရည်နှစ်လီတာသောက်ခြင်းနဲ့ဆီးထဲရှိအက်ဆစ်ပမာဏလျှော့ချခြင်းတို့ပြုလုပ်သင့်ပါတယ်။ ဆီးထဲရှိအက်ဆစ်ပမာဏလျှော့ချခြင်းကိုသွေးထဲမှာရှိတဲ့urateပမာဏပုံမှန်ပြန်ရောက်သွားပြီးပုံဆောင်ခဲဖြစ်ခြင်းတွေလည်းမရှိတော့တဲ့အခါမှရပ်သင့်ပါတယ်။

-ရုတ်တရက်ရောဂါထဖောက်တာတွေ၆လနဲ့အထက်လောက်မရှိတော့ဘဲသွေးထဲရှိurateပမာဏတွေလည်းပုံမှန်အဖြစ်ပြန်ရောက်သွားတဲ့အခါဆေးအာနိသင်ဆက်ထိန်းတဲ့ဆေးပမာဏကို၆လကြာတိုင်း၅၀၀မီလီဂရမ်စီလျှော့သွားရပါမယ်။ ဆေးအာနိသင်ဆက်ထိန်းတဲ့ဆေးပမာဏကိုသွေးထဲရှိurateပမာဏတွေပြန်များလာတဲ့အထိတော့မလျှော့ချသင့်ပါဘူး။

အသုံးပြုခြင်း:အဆစ်အမြစ်ရောင်ရောဂါနဲ့ဆက်စပ်နေတဲ့သွေးထဲရှိuricacidပမာဏများခြင်းကိုကုသရန်အတွက်သုံးပါတယ်။

ပိုးသတ်ဆေးတွေကိုအထောက်အကူပြုပေးရန်အတွက်အရွယ်ရောက်ပြီးသူသောက်ရန်ဆေးပမာဏ

ဆေး၅၀၀မီလီဂရမ်ကိုသောက်ဆေးအဖြစ်တစ်နေ့လေးကြိမ်သောက်ပါ။

ရှင်းလင်းအကြံပြုချက်:ရောဂါထိန်းချုပ်ရေးနဲ့ကာကွယ်ရေးအဖွဲ့(CDC)ကgonococcalရောဂါပိုးဝင်ခြင်းကိုကုသတဲ့နေရာမှာယခုဆေးကိုcephalosporinsသို့မဟုတ်ampicillinဆေးတွေနဲ့တွဲမသောက်ဖို့ညွှန်ကြားထားပါတယ်။

အသုံးပြုခြင်း:ပိုးသတ်ဆေးတွေကိုမည်သည့်ပုံစံဖြင့်ပေးသည်ဖြစ်စေpenicillinသို့မဟုတ်ampicillin,methicillin,oxacillin,cloxacillin,ornafcillinစတဲ့ပိုးသတ်ဆေးတွေပမာဏမြင့်တက်စေရန်နဲ့သွေးထဲမှာအချိန်ကြာကြာဆက်ရှိနေနိုင်ရန်အထောက်အကူပြုဖို့အတွက်သုံးပါတယ်။

ကျောက်ကပ်အတွက်ဆေးပမာဏထိန်းညှိခြင်း

အဆစ်အမြစ်ရောင်ရောဂါအတွက်

-နာတာရှည်ကျောက်ကပ်ရောဂါ(CrCl 30mL/minအောက်):ယခုဆေးကိုသုံးရင်ထိရောက်မှုမရှိသောကြောင့်ဆေးကိုသုံးရန်ညွှန်ကြားထားခြင်းမရှိပါ။

-ကျောက်ကပ်လုပ်ငန်းမကောင်းခြင်းအတွက်:ကျောက်ကပ်လုပ်ငန်းမကောင်းတဲ့အချို့လူနာတွေမှာဆေးကိုသတိနဲ့သုံးရပါမယ်။ ဆေးပမာဏလိုအပ်မှုတွေလည်းမြင့်နေနိုင်ပါတယ်။

Penicillin အတွက်အထောက်အကူအဖြစ်သုံးခြင်းအတွက်

-ကျောက်ကပ်လုပ်ငန်းမကောင်းပါကယခုဆေးကိုpenicillinနဲ့တွဲပြီးမသုံးသင့်ပါ။

-ကျောက်ကပ်လုပ်ငန်းမကောင်းတဲ့အသက်ကြီးလူနာတွေမှာယခုဆေးကိုသုံးတဲ့အခါသတိနဲ့သုံးရပါမယ်။ ဆေးပမာဏလျှော့ချခြင်းတွေလည်းလိုအပ်ပါတယ်။ အသေးစိတ်ညွှန်ကြားထားတာမျိုးတော့မရှိပါဘူး။

ဆေးပမာဏထိန်းညှိခြင်း

ဆီးထဲရှိအက်ဆစ်ပမာဏကိုလျှော့ချခြင်း

-uric acid တွေကိုစွန့်ထုတ်မှုပမာဏများနေတဲ့အခါတစ်နေ့ကိုအရည်နှစ်လီတာသောက်ခြင်းနဲ့ဆီးထဲရှိအက်ဆစ်ပမာဏလျှော့ချခြင်းတို့ပြုလုပ်သင့်ပါတယ်။ ဆီးထဲရှိအက်ဆစ်ပမာဏလျှော့ချခြင်းကိုသွေးထဲမှာရှိတဲ့urateပမာဏပုံမှန်ပြန်ရောက်သွားပြီးပုံဆောင်ခဲဖြစ်ခြင်းတွေလည်းမရှိတော့တဲ့အခါမှရပ်သင့်ပါတယ်။

-ဆီးထဲရှိအက်ဆစ်ပမာဏလျော့နည်းနေတာကိုဆက်ထိန်းရန်အတွက်တစ်နေ့ကိုsodium bicarbonate ၃ဂရမ်မှ၇.၅ဂရမ်သို့မဟုတ် potassium bicarbonate ၇.၅ဂရမ်ပေးသင့်ပါတယ်။

-ဆားတွေကိုပေးတဲ့အခါမှာအက်ဆစ်နဲ့ဆားပမာဏမျှခြေမှာရှိနေဖို့အတွက်သတိရှိရှိစောင့်ကြည့်သင့်ပါတယ်။

ပိုးသတ်ဆေးကိုအထောက်အကူပြုရန်အတွက်သုံးခြင်း

Penicillinဆေးစွန့်ထုတ်ခြင်းကိုတားဆီးခြင်းနဲ့ဆေးပမာဏကိုထိန်းသိမ်းတဲ့နေရာမှာprobenecidရဲ့ထိရောက်မှုကိုစစ်ဆေးရန်အတွက်Phenolsulfophthalein(PSP)စွန့်ထုတ်မှုကိုစစ်ဆေးခြင်းပြုလုပ်သင့်ပါတယ်။Probenecidဆေးပမာဏလုံလောက်တဲ့အခါPSPကိုကျောက်ကပ်မှရှင်းထုတ်တဲ့နှုန်းဟာပုံမှန်ထက်ငါးပုံတစ်ပုံလောက်လျော့နည်းသွားပါတယ်။

အခြားရှင်းလင်းအကြံပြုချက်များ

ဆေးသောက်ခြင်းနဲ့ပတ်သက်၍အကြံပြခြက်

ဆေးကိုသောက်ဆေးအဖြစ်သောက်ပါ။

အဆစ်အမြစ်ရောင်ရောဂါအတွက်

-ရေပမာဏကိုလုံလောက်အောင်ထိန်းပါ။(တစ်နေ့ကိုအနည်းဆုံးနှစ်လီတာသောက်ပါ)။sodium bicarbonate နဲ့potassium citrate ကိုသုံးပြီးဆီးထဲရှိအက်ဆစ်ပမာဏကိုလျှော့ချခြင်းလည်းလိုအပ်ပါတယ်။

ဆေးထိန်းသိမ်းဖို့အတွက်လိုအပ်ချက်များ

-ဆေးကိုအလင်းရောင်နဲ့မထိတွေ့အောင်ထားပါ။

ယေဘုယျအားဖြင့်

-ဆေးဒဏ်ကိုအစာအိမ်ကမခံနိုင်ခြင်းဟာဆေးဝါးအဆိပ်သင့်မှုကိုညွှန်ပြနေတာဖြစ်ပြီးဆေးပမာဏကိုလျှော့ချခြင်းအားဖြင့်ကုသလို့ရပါတယ်။

-လက်ရှိခံစားနေရတဲ့အဆစ်အမြစ်ရောင်ရောဂါရုတ်တရက်ထဖောက်တာမသက်သာသရွေ့ဆေးကိုစမပေးသင့်ပါဘူး။ ဆေးကုသနေစဉ်ရုတ်တရက်ရောဂါထဖြစ်ပါကယခုဆေးကိုတူညီတဲ့ဆေးပမာဏအတိုင်းဆက်ပေးသင့်ပြီးရုတ်တရက်ရောဂါထဖြစ်တာကိုထိန်းချုပ်ဖို့အတွက်အခြားသင့်တော်တဲ့ဆေးတစ်မျိုးမျိုးပေးရပါမယ်။

-ယခုဆေးဟာကျောက်ကပ်မှတစ်ဆင့်penicillinဆေးစွန့်ထုတ်ခြင်းကိုတားဆီးပေးပြီးသွေးထဲရှိpenicillinဆေးပမာဏကို၂ဆမှ၄ဆအထိမြင့်တက်စေပါတယ်။

စောင့်ကြည့်လေ့လာခြင်း

အဆစ်အမြစ်ရောင်ရောဂါအတွက်

-ဆေးကုသခြင်းထိရောက်မှုရှိမရှိကိုစစ်ဆေးရန်အတွက်သွေးထဲရှိurtaeပမာဏကိုစစ်ဆေးဖို့လိုအပ်ပါတယ်။

-ဆားအသုံးပြုနေတဲ့လူနာတွေမှာအက်ဆစ်နဲ့ဆားပမာဏမျှချေမှာရှိနေလားဆိုတာကိုစောင့်ကြည့်သင့်ပါတယ်။

လူနာအတွက်အကြံပြုချက်

-လူနာကိုရေလုံလောက်စွာသောက်ရန်၊ဆီးထဲရှိအက်ဆစ်ပမာဏကိုလျှော့ချရန်နဲ့အစားအသောက်ဆိုင်ရာထိန်းချုပ်မှုတွေပြုလုပ်ဖို့ညွှန်ကြားပေးပါ။

-salicylatesဆေးတွေဟာယခုဆေးကြောင့်ဆီးထဲမှာuric acid တွေပါလာတဲ့အာနိသင်ကိုလျော့ကျစေပါတယ်။ အဲဒါကြောင့်အပျော့စားအကိုက်အခဲပျောက်ဆေးတစ်မျုးလိုအပ်ပါကacetaminophenကိုသုံးသင့်ပါတယ်။

ကလေးတွေအတွက် Probenecid ရဲ့ အသုံးပြုရမယ့်ပမာဏကဘယ်လောက်လဲ

ပိုးသတ်ဆေးတွေကိုအထောက်အကူပြုရန်အတွက်ကလေးသောက်ရန်ဆေးပမာဏ

အသက်နှစ်နှစ်မှဆယ့်လေးနှစ်ဖြစ်ပြီးကိုယ်အလေးချိန်၅၀ကီလိုဂရမ်အောက်ကလေးများအတွက်

ပထမအကြိမ်အတွက်ဆေးပမာဏ:ဆေး25mg/kg (0.7g/m2)ကိုသောက်ဆေးအဖြစ်တစ်ကြိမ်သောက်ပါ၊

ဆေးအာနိသင်ကိုဆက်ထိန်းခြင်း:ဆေး40mg/kg(1.2g/m2)ကိုသောက်ဆေးအဖြစ်တစ်နေ့လျှင်လေးကြိမ်အညီအမျှခွဲသောက်ပါ။

ကိုယ်အလေးချိန်၅၀ကီလိုဂရမ်အထက်ကလေးများအတွက်

ဆေး၅၀၀မီလီဂရမ်ကိုသောက်ဆေးအဖြစ်တစ်နေ့လေးကြိမ်သောက်ပါ။

ရှင်းလင်းအကြံပြုချက်:ရောဂါထိန်းချုပ်ရေးနဲ့ကာကွယ်ရေးအဖွဲ့(CDC)ကgonococcalရောဂါပိုးဝင်ခြင်းကိုကုသတဲ့နေရာမှာယခုဆေးကိုcephalosporinsသို့မဟုတ်ampicillinဆေးတွေနဲ့တွဲမသောက်ဖို့ညွှန်ကြားထားပါတယ်။

အသုံးပြုခြင်း:ပိုးသတ်ဆေးတွေကိုမည်သည့်ပုံစံဖြင့်ပေးသည်ဖြစ်စေpenicillinသို့မဟုတ်ampicillin,methicillin,oxacillin,cloxacillin,ornafcillinစတဲ့ပိုးသတ်ဆေးတွေပမာဏမြင့်တက်စေရန်နဲ့သွေးထဲမှာအချိန်ကြာကြာဆက်ရှိနေနိုင်ရန်အထောက်အကူပြုဖို့အတွက်သုံးပါတယ်။

သတိပြုရမည့်အရာများ

အသက်နှစ်နှစ်အောက်ကလေးငယ်တွေမှာဆေးအသုံးပြုခြင်းကိုတားမြစ်ထားပါတယ်။

Probenecid ကိုဘယ်လိုရရှိနိုင်သလဲ

Probenecid ကိုအောက်ပါပုံစံပြင်းအားများနဲ့ရရှိနိုင်ပါတယ်။

  • သောက်ဆေးပြားပုံစံ

အရေးပေါ်အခြေအနေ ဒါမှမဟုတ် ဆေးပမာဏလွန်သွားချိန်မှာ ဘာလုပ်သင့်သလဲ။

အရေးပေါ်အခြေအနေသို့မဟုတ်ဆေးပမာဏလွန်သွားတဲ့အခြေအနေတွေမှာအရေးပေါ်ဆေးရုံဆေးခန်းများသို့သွားရောက်ကုသမှုခံယူပါ။

ဆေးသောက်ရမယ့်အချိန်လွတ်သွားခဲ့ရင် ဘာလုပ်ရမလဲ။

Probenecidဆေးကိုသောက်ဖို့လွတ်သွားခဲ့ပါက(မေ့ခဲ့ပါက)သတိရတဲ့အချိန်မှာအမြန်ဆုံးသောက်ပါ။ သို့သော်လည်းနောက်တစ်ကြိမ်ဆေးသောက်ရမယ့်အချိန်နဲ့နီးကပ်နေပြီဆိုရင်တော့လွတ်သွားတဲ့အကြိမ်ကိုကျော်ပြီးပုံမှန်အချိန်မှာပဲသောက်လိုက်ပါ။ ဆေးပမာဏကိုနှစ်ဆတိုးသောက်တာမျိုးမလုပ်ပါနဲ့။

Hello Health Group သည် ဆေးပညာအကြံပြုချက်များ၊ ရောဂါရှာဖွေမှုများနှင့် ကုသမှုများကို မပြုလုပ်ပေးပါ

တည်းဖြတ်သည့်နေ့ နိုဝင်ဘာ 26, 2018 | နောက်ဆုံးတည်းဖြတ်ခြင်း မေ 20, 2019

သင်ဒါလည်း နှစ်သက်နိုင်ပါတယ်။