အသည်းကင်ဆာအဖြစ်နိုင်ဆုံး အကြောင်းရင်းဖြစ်တဲ့ အသည်းရောင်အသားဝါ စီပိုးကူးစက်ခံရရင် ဘယ်လိုနည်းလမ်းတွေနဲ့ ပျောက်ကင်းအောင်ကုသလို့ရလဲဆိုတာ ပြောပြပေးသွားပါ့မယ်။
မှ အချက်အလက် စစ်ဆေးထားပါသည်။ Dr. Thurein Hlaing Win
အသည်းကင်ဆာအဖြစ်နိုင်ဆုံး အကြောင်းရင်းဖြစ်တဲ့ အသည်းရောင်အသားဝါ စီပိုးကူးစက်ခံရရင် ဘယ်လိုနည်းလမ်းတွေနဲ့ ပျောက်ကင်းအောင်ကုသလို့ရလဲဆိုတာ ပြောပြပေးသွားပါ့မယ်။
အသည်းရောင်အသားဝါ စီပိုးက ရောဂါပိုးရှိသူရဲ့ သွေးကနေတဆင့် အဓိက ကူးစက်ပါတယ်။ နောက်ပြီး ဆေးထိုးအပ်တွေ မျှဝေသုံးစွဲတာ၊ လိင်ဆက်ဆံမိရာကနေလည်း ကူးစက်ခံရနိုင်ပါသေးတယ်။ အသည်းရောင် အသားဝါ စီပိုးက ကြောက်စရာကောင်းပေမယ့် ကူးစက်ခံရတဲ့လူတိုင်းလည်း ကုသမှုခံယူစရာ မလိုအပ်တာကို တွေ့ရပါတယ်။ ဘာကြောင့်လဲဆိုရင် တချို့ကိုယ်ခံအားကောင်းတဲ့သူတွေမှာ စီပိုးကို ခန္ဓာကိုယ်က သူ့ဖာသာရှင်းထုတ်ပစ်လိုက်တဲ့အတွက် ဖြစ်ပါတယ်။ ဒါမျိုးက ရှားတော့ ရှားပေမယ့် ရှိတတ်ပါတယ်။
တကယ်လို့ ခုခံအားက မရှင်းပစ်ရင်ရော။ မရှင်းပစ်ရင်လည်း သိပ်မစိုးရိမ်ပါနဲ့။ ကံကောင်းတဲ့ အချက်က စီပိုးကို ပျောက်ကင်းအောင် ကုသလို့ရနေပါပြီ။
အသည်းရောင်အသားဝါ စီပိုးကို ဘယ်လိုကုသလဲ ဆိုတော့ အဓိကနည်းလမ်း (၂) ခုသုံးပြီး ကုသလို့ရပါတယ်။ ဗိုင်းရပ်စ်ပိုးတွေကို နှိမ်နင်းပစ်ပြီး ရောဂါပျောက်ကင်းအောင် ကုသတဲ့နည်းနဲ့ အသည်းအစားထိုး ကုသနည်းတို့ပဲ ဖြစ်ပါတယ်။
အရင်တုန်းက သုံးခဲ့တဲ့ အသည်းရောင်အသားဝါစီပိုး ကုသဆေးတွေက အခုလောက် ထိရောက်မှုမရှိသလို ဘေးထွက်ဆိုးကျိုးလည်းများပါတယ်။ ဒီဆေးတွေက ဗိုင်းရပ်စ်ကို နှိမ်နင်းတာမျိုးမဟုတ်ဘဲ ခန္ဓာကိုယ်ရဲ့ခုခံအားကို မြှင့်တင်ပေးပြီး ဗိုင်းရပ်စ်ကို ပြန်တိုက်ထုတ်နိုင်အောင် အားပေးတာ ဖြစ်ပါတယ်။
ဆေးသောက်သုံးသူရဲ့ တစ်ဝက်လောက်ပဲ ရောဂါပျောက်ကင်းတာကို တွေ့ရပြီး နှစ်နဲ့ချီပြီး ဆေးသောက်ဖို့လည်း လိုအပ်ပါတယ်။ ဒါပေမဲ့ အခုခေတ်မှာတော့ တိုးတက်လာတဲ့ ဆေးဝါးသုတေသနတွေနဲ့ နည်းပညာတွေကြောင့် လအနည်းငယ်လောက်နဲ့တင် ပျောက်ကင်းအောင်ကုသလို့ရနေပါပြီ။
အသည်းရောင်အသားဝါစီပိုး ကုသဆေးမျိုးစုံရှိပါတယ်။ ဘာကြောင့်လဲဆိုရင် အသည်းရောင်အသားဝါ စီပိုး အမျိုးအစားတွေ အများကြီးရှိတာကြောင့်ပါ။ အဖြစ်အများဆုံးကတော့ အသည်းရောင်အသားဝါစီပိုး Type-1 အမျိုးအစားဖြစ်ပါတယ်။
အမျိုးအစားအကုန်လုံးကို နှိမ်နင်းနိုင်တဲ့ဆေးရယ်လို့တော့ မရှိပါဘူး။ ကိုယ့်မှာဖြစ်နေတဲ့ အသည်းရောင်အသားဝါ စီပိုးအမျိုးအစားရယ်၊ အသည်း ဘယ်လောက်ထိပျက်စီးနေသလဲဆိုတာရယ် ဒီအချက် (၂) ချက်အပေါ်မူတည်ပြီး သောက်ရမယ့်ဆေးကို ဆရာဝန်က ရွေးပေးမှာဖြစ်ပါတယ်။
များသောအားဖြင့် ဒီဆေးတွေက သုံးစွဲသူ ၉၀% ကျော်မှာ ထိရောက်မှုရှိပြီး ဆေးစသောက်ချိန် ၁၂ ပတ်ကနေ ၂၄ ပတ်အတွင်းမှာတင် ကိုယ်ထဲက စီပိုးတွေကိုရှင်းထုတ်ပေးနိုင်တာ ကိုတွေ့ရပါတယ်။ ဆေးကိုသာ ပုံမှန်သောက်မယ်ဆိုရင် ကိုယ်ထဲမှာစီပိုးက မရှိသလောက်ဖြစ်သွားမှာပါ။ မရှိသလောက်လို့ ပြောရတာက ပိုးကောင်ရေ 0 ဖြစ်သွားတာမဟုတ်ဘဲ စစ်ဆေးလို့ မတွေ့နိုင်လောက်အောင် နည်းသွားတဲ့ ပမာဏဖြစ်နေတာကြောင့်ပါ။
လွန်ခဲ့တဲ့နှစ်တွေကတော့ စီပိုးကုပြီဆိုရင် ပိုက်ဆံတအားကုန်ပေမယ့် အခုချိန်မှာတော့ Generic ဆေးတွေပါ ထုတ်လုပ်ရောင်းချလာတဲ့အတွက် ကုန်ကျစရိတ်အတော်လေး သက်သာသွားပါပြီ။
အသည်းရောင်အသားဝါ စီပိုးကို ပျောက်ကင်းအောင် ကုသနိုင်ပေမယ့် လူတိုင်းအတွက် လက်လှမ်းမှီဖို့ ခက်ခဲနေဆဲပါ။ ၂၀၁၇ ခုနှစ်မှာတင် တစ်ကမ္ဘာလုံးမှာ စီပိုးကူးစက်ခံရသူ သန်း ၇၀ ကျော်ရှိပေမယ့် ဒီအထဲက ၂၀% လောက်ပဲ ကိုယ့်မှာစီပိုးရှိမှန်းသိတယ်လို့ ကမ္ဘာ့ကျန်းမာရေးအဖွဲ့က ထုတ်ပြန်ထားပါတယ်။
နောက်ပြီး ရောဂါရှိသူတွေထဲက ၅ သန်းလောက်ပဲ စီပိုးကိုပျောက်ကင်းသည်အထိ ကုသမှုခံယူခဲ့တယ်လို့လည်း ဆိုပါတယ်။ ဒါဟာ ကမ္ဘာ့ကျန်းမာရေးအဖွဲ့ကရည်ရွယ်ထားတဲ့ ခုနှစ် ၂၀၃၀ မှာ စီပိုးရောဂါရှိသူ ၈၀% လောက်ကို ရောဂါပျောက်ကင်းအောင် ကုသနိုင်ရေးဆိုတဲ့ ရည်မှန်းချက်နဲ့တော့ အတော်လေးဝေးကွာနေဆဲလို့ ဆိုရမှာပါပဲ။
စီပိုးရှိတိုင်းတော့ အသည်းအစားထိုးစရာမလိုပါဘူး။ စီပိုးကြောင့် နာတာရှည်အသည်းထိခိုက်မှုဖြစ်ပြီး အသည်းပျက်စီးနေရင်တဲ့တော့ အသည်းအစားထိုးဖို့ လိုလာနိုင်ပါတယ်။ အသည်းတစ်ခုလုံး အစားထိုးတာရှိသလို ကျန်းမာတဲ့အသည်းရဲ့ တစ်စိတ်တစ်ပိုင်းကိုပဲ ဖဲ့ပြီး အစားထိုးတာလည်းရှိပါတယ်။
တစ်ခုသိထားဖို့လိုတာက အသည်းအစားထိုးလိုက်ရုံနဲ့ အသည်းရောင်အသားဝါ စီပိုးကပျောက်မသွားပါဘူး။ စီပိုးကို သတ်နိုင်ဖို့ ဆေးတွေ ထပ်သောက်ဖို့ လိုအပ်ပါတယ်။ မဟုတ်ရင် အစားထိုးထားတဲ့ အသည်းအသစ်လေးပါ စီပိုးကြောင့်ပျက်စီးသွား နိုင်ပါတယ်။
ရေးသားသူ – Dr.Htoo Tint
မသက်ဆိုင်ကြောင်း ရှင်းလင်းချက်
Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။
မှ အချက်အလက် စစ်ဆေးထားပါသည်။
Dr. Thurein Hlaing Win
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။