backup og meta

အစာအိမ်အက်ဆစ်တွေ လျှံတက်ခြင်းကြောင့် ရင်ပူခြင်းကို သက်သာစေမယ့် နည်းလမ်းခြောက်သွယ်

မှ အချက်အလက် စစ်ဆေးထားပါသည်။ Dr. Kaung Thar


Dr. Thiha Phyo Myint မှ ရေးသားသည်။ · 11/05/2023 တွင် အသစ်ဖြည့်စွက်ခဲ့သည်။

    အစာအိမ်အက်ဆစ်တွေ လျှံတက်ခြင်းကြောင့် ရင်ပူခြင်းကို သက်သာစေမယ့် နည်းလမ်းခြောက်သွယ်

    သင့်မှာ ရင်ပူတဲ့ဝေဒနာ ခံစားနေရပါသလား။ ဘာအစာပဲ စားလိုက်စားလိုက် အက်ဆစ်တွေ ပြန်ဆန်တက်လာပြီး ရင်ပူမှာကို ကြောက်နေပါသလား။ တချို့အစားအစာတွေဟာ အစာအိမ်ကနေ အက်ဆစ်ထုတ်လုပ်မှုကို ပိုများစေတဲ့အတွက် ရင်ပူတဲ့ဝေဒနာကို ပိုမိုခံစားရစေနိုင်တယ်ဆိုတာ မှန်ပါတယ်။ အစားအသောက်ကို နည်းနည်းချင်းစီစားတာ၊ အစာစားပြီးပြီးချင်းမှာ အကုန်းအကွပြုလုပ်တာ ဒါမှမဟုတ် လဲလျောင်းတာတို့ကို ရှောင်ကျဉ်တာတွေအပြင် ရင်ပူခြင်းကို သက်သာစေမယ့် နည်းလမ်းခြောက်သွယ်ကို ဖော်ပြပေးထားပါတယ်။

    အစာအိမ်အက်ဆစ်တွေ လျှံတက်ခြင်းကြောင့် ရင်ပူခြင်းကို သက်သာစေမယ့် နည်းလမ်းခြောက်သွယ်

    (၁) အချိုနဲ့ ကာဘိုဟိုက်ဒရိတ်များတဲ့ အရည်တွေကို အများကြီးမသောက်ပါနဲ့။

    အချိုနဲ့ ကာဘိုဟိုက်ဒရိတ်ပမာဏ များပြားစွာ ပါဝင်တဲ့ အချိုရည်တွေဟာ ရင်ပူရခြင်းရဲ့ အဓိက အကြောင်းရင်းတွေ ဖြစ်ပါတယ်။ ဒါကြောင့် သင်ရေဆာပြေသောက်နေတဲ့ အချိုရည်တွေမှာ ပါဝင်တဲ့ ကာဘိုဟိုက်ဒရိတ်ပမာဏကို ထိန်းချုပ်လိုက်ခြင်းအားဖြင့် ရင်ပူတဲ့ ဝေဒနာကို အလွယ်တကူ သက်သာစေမှာ ဖြစ်ပါတယ်။

    ကာဘိုဟိုက်ဒရိတ်တွေဟာ အစာအိမ်ထဲမှာ အချဉ်ပေါက်ပြီး ဓာတ်ငွေ့တွေ ဖြစ်လာကာ အစာအိမ်တွင်းဖိအားကို များစေတဲ့အပြင် လေပွလေထတာ၊ ခံတွင်းနံ့နံတာနဲ့ အစာမကြေတာတွေကို ဖြစ်စေနိုင်ပါတယ်။

    ဒါ့အပြင် အူလမ်းကြောင်းမှာ ဖြစ်ပေါ်တတ်တဲ့ အခြားအစာခြေစနစ်ပြဿနာတွေကိုလည်း ပိုဆိုးစေပါတယ်။ ဟုတ်ပြီ၊ ဒါဆိုရင် သူတို့တွေအစား ဘာသောက်ရမလဲ။ ရိုးရိုးရေ၊ သစ်သီးဖျော်ရည် (အထူးသဖြင့် မချဉ်တဲ့အသီးတွေကနေ လုပ်ထားတဲ့ ဖျော်ရည်) တွေကို သောက်နိုင်ပါတယ်။

    (၂) အကျိုးရှိတဲ့ အဆီဓာတ်တွေနဲ့ ပရိုတင်းဓာတ်တွေကို ပိုစားပေးပါ။

    အဆိုပါ အစားအစာတွေဟာ အာဟာရဓာတ်တွေ ပြည့်ဝစွာ ပါဝင်တဲ့အပြင် အချိုဓာတ်နဲ့ ကာဘိုဟိုက်ဒရိတ်ဓာတ်တွေ စားလိုစိတ်ကိုလည်း နည်းပါးစေပါတယ်။ အဆီတွေဟာ အစာအိမ်နဲ့ အူလမ်းကြောင်းနံရံတွေ ရောင်ရမ်းမှုကို အံ့ဩလောက်အောင် သက်သာပျောက်ကင်းစေပြီး ပရိုတင်းကတော့ အစာချေဖျက်မှုကို အားပေးပါတယ်။

    ပရိုတင်းကို ချေဖျက်တဲ့ အင်ဇိုင်းမ်တွေအလုပ်လုပ်နိုင်အောင် ဟိုက်ဒရိုကလိုရစ်အက်ဆစ်က ပြုလုပ်ပေးပါတယ်။ ဒါကြောင့် ပရိုတင်းများများစားပေးမယ်ဆိုရင် သင့်အစာအိမ်ထဲမှာရှိတဲ့ ပိုလျှံအက်ဆစ်တွေဟာ အစာရေမြိုထဲကို ပြန်ဆန်တက်မယ့်အစား ပရိုတင်းဓာတ်တွေကို ချေဖျက်ရာမှာ အသုံးပြုလိုက်ရပါတော့တယ်။ ဘာတွေကို စားရမလဲဆို‌တော့

    • အသား၊ ငါးတွေ။
    • ဥတွေ။
    • အဆီလျှော့ထားတဲ့ နို့နဲ့ နို့ထွက်ပစ္စည်းတွေ။
    • အခွံမာသီးတွေ၊ အစေ့အဆန်တွေ။
    • အရည်အသွေးကောင်းမွန်တဲ့ ဆီတွေ  (ဥပမာ သံလွင်ဆီ) အစရှိသဖြင့်။

    (၃) သင့်အစားအစာထဲမှာ ပါတဲ့ gluten ပမာဏကို ကန့်သတ်ပါ။

    အထက်မှာ ဖော်ပြခဲ့တဲ့ အချက်လေးတွေနဲ့ မသက်သာသေးဖူးဆိုရင် gluten မပါတဲ့ အစားအသောက်တွေကို ရွေးချယ်စားသောက်ရပါမယ်။ Gluten ဆိုတာ ဂျုံအမျိုးမျိုးမှာ တွေ့ရတတ်တဲ့ အခြေခံပရိုတင်းတမျိုး ဖြစ်ပါတယ်။

    Gluten မှာပါဝင်တဲ့ ပရိုတင်းအချို့ဟာ ရှုပ်ထွေးလွန်းတာမို့ သင့်ခန္ဓာကိုယ်အနေနဲ့ အစာခြေဖို့ အခက်တွေ့ရပါတယ်။ Gluten ပါဝင်တဲ့ အစားအစာပုံစံတွေ အမျိုးမျိုးရှိပြီး သူတို့ဟာ ကျွန်တော်တို့ရဲ့ ခန္ဓာကိုယ်ကို ဆိုးကျိုးတွေ ဖြစ်စေတယ်လို့ ဆိုပါတယ်။

    သင့်အနေနဲ့ Gluten လုံးဝမပါဝင်တဲ့ အစားအသောက်တွေကို ရက်သတ္တပတ် နှစ်ပတ်လောက် စမ်းပြီး စားသုံးကြည့်နိုင်ပါတယ်။

    ဆိုလိုတာက အီကြာကွေး၊ ပေါင်မုန့်၊ ကိတ်မုန့်၊ ခေါက်ဆွဲ၊ ပီဇာ၊ ယိုသွပ်မုန့်လေးတွေ၊ ဒိုးနတ်၊ ဘီစကစ်နဲ့ ကွတ်ကီး စတဲ့ အစားအစာတွေကို မစားရဖူးလို့ ပြောချင်တာ ဖြစ်ပါတယ်။ သူတို့အစား ဘာစားရမလဲ။  Oatmeal (ကွေကာအုတ်) ဟာ သင့်အစာအိမ်အတွက် ပိုမို သင့်တော်ပါတယ်။ Oatmeal ဟာ Gluten ပါဝင်တဲ့ အစားအစာတွေနဲ့ ခပ်ဆင်ဆင်တူပြီး ဗိုက်လည်းဝစေပါတယ်။

    ဒီလို ရှောင်လိုက်လို့ သက်သာတယ်ဆိုရင် နောက်ပိုင်းမှာ Gluten ပါဝင်တဲ့ အစားအစာတွေကို ရှောင်ဖို့ ဒါမှမဟုတ် တတ်နိုင်သမျှ လျှော့စားဖို့ လိုပါတယ်။

    (၄) အချဉ်ဖောက်ထားတဲ့ အစားအသောက်တွေရဲ့ အကူအညီကို ယူပါ။

    အချဉ်ဖောက်ထားတဲ့ အစားအသောက်တွေ များများစားပေးမယ်ဆိုရင် သင့်အနေနဲ့ ပိုပြီး အစာကြေပါလိမ့်မယ်။ အစာချေခြင်းလုပ်ငန်းစဉ်ကို ကူညီပေးနိုင်တဲ့ ဘက်တီးရီးယားတွေ (Probiotics) ကျွန်တော်တို့ အစာအိမ်ထဲမှာ အများအပြားရှိနေပါတယ်။

    အဆိုပါ ကောင်းမွန်တဲ့ ဘက်တီးရီးယားတွေဟာ အချဉ်ဖောက်ထားတဲ့ အစားအစာတွေမှာ ဘီလျံနဲ့ချီပြီး ပါဝင်တာမို့ ကျွန်တော်တို့အစာအိမ်ထဲမှာ ရှိတဲ့ အစာတွေကို လွယ်ကူစွာ ချေပေးနိုင်ပါတယ်။ ဒါကြောင့် ဒီဘက်တီးရီးယားတွေဟာ ရင်ပူတဲ့ဝေဒနာအပါအဝင် အခြားသော အစာချေခြင်းဆိုင်ရာ ပြဿနာတွေကို ကူညီဖြေရှင်းပေးနိုင်ပါတယ်။

    ဘယ်လိုအစာမျိုးတွေမှာ ကောင်းမွန်တဲ့ ဘက်တီးရီးယားတွေ ပါဝင်သလဲ။

    • မုန်လာချဉ်၊ မုန်လာဥနီချဉ် အစရှိသဖြင့်။
    • အချဉ်ဖောက်ထားတဲ့ အရည်တွေ။
    • ကင်မ်ချီ။
    • သကြားမပါတဲ့ ဒိန်ချဉ်။

    (၅) အရိုးပြုတ်ရည်တွေကို သောက်ပါ။

    အစာအိမ်နဲ့ အူလမ်းကြောင်းနံရံတွေကို အကျိုးပြုတဲ့ အရိုးပြုတ်ရည်တွေကို အိမ်မှာပဲ အလွယ်တကူ လုပ်သောက်နိုင်ပါတယ်။ အရိုးတွေမှာ သတ္တုဓာတ်၊ရောင်ရမ်းခြင်းတွေကို သက်သာစေတဲ့ amino နဲ့ gelatin တို့ပါဝင်ပြီး ပရိုတင်းဓာတ်တွေလည်း ကြွယ်ဝပါတယ်။

    တကယ်လို့ သင့်အနေနဲ့ အဆီနဲ့ ပရိုတင်းတွေကို စားတဲ့အခါ အစာချေဖို့ အခက်အခဲရှိတယ်ဆိုရင် အရိုးပြုတ်ရည်တွေက ဒီပြဿနာကို ဖြေရှင်းပေးပါလိမ့်မယ်။ အရိုးတစ်ခုလုံး နူးနေအောင်  ပြုတ်ဖို့ လိုအပ်ပါတယ်။ ဒါမှ အရိုးထဲက အာဟာရတွေပါ ရမှာပါ။ ပိုပြီး အာဟာရပြည့်အောင် အရိုးပြုတ်ရည်နဲ့အတူ အသားကိုပါ စားပေးသင့်ပါတယ်။

    (၆) ပန်းသီးရည်ဗနီဂါ ကို စမ်းသောက်ကြည့်ပါ။

    အစာအိမ်အက်စစ်ပြယ်ဆေးနဲ့ ဓာတ်ပြုနိုင်တဲ့ ဆေးတွေကို သုံးစွဲနေရတာပဲ ဖြစ်ဖြစ် ဒါမှမဟုတ် ဆေးမသောက်ချင်လို့ပဲ ဖြစ်ဖြစ် ပန်းသီးရည်ဗနီဂါ မြည်းစမ်းကြည့်နိုင်ပါတယ်။ ဗနီဂါဟာ အက်ဆစ်ဓာတ်ဖြစ်တဲ့အတွက် အစာအိမ်ထဲကို ဘာလို့များ အက်ဆစ်ထပ်ထည့်ခိုင်းရတာလဲလို့ သင်တွေးကောင်းတွေးနေပါလိမ့်မယ်။ မှန်ပါတယ်၊

    ဗနီဂါဟာ အစာအိမ်ထဲမှာရှိတဲ့ အက်ဆစ်ပမာဏကို လျှော့ချမပေးနိုင်ပေမယ့် အစာအိမ်ညှစ်တာကို နည်းပါးစေတဲ့အတွက် အက်ဆစ်ဓာတ်တွေ အပေါ်ကို ပြန်ဆန်မတက်အောင် ထိန်းထားပေးနိုင်ပါတယ်။ ဗနီဂါလက်ဖက်ရည်ဇွန်း တဇွန်း ဒါမှမဟုတ် နှစ်ဇွန်းကို ရေနဲ့ ဆတူရောပြီး ထမင်းစားခါနီးတိုင်း သောက်ပါ။ တစ်ခုရှိတာက ဒီနည်းလမ်းက လူတိုင်းမှာ အလုပ်ဖြစ်ချင်မှ ဖြစ်မှာပါ။

    အစာအိမ်ကို တည်ငြိမ်စေတဲ့ အခြားသော အစားအစာတွေက ဘာတွေလဲ။

    ချင်း၊ ငှက်ပျောသီးနဲ့ ရေနွေးကြမ်း စတာတွေပဲ ဖြစ်ပါတယ်။ ရင်ပူတဲ့ ဝေဒနာ ခံစားနေရတဲ့အခါ အဆီအဆိမ့်တွေ၊ သကြား နဲ့ ကဖင်းတို့ကို ရှောင်ရှားရပါမယ်။

    အဆိုပါ အစားအစာတွေအစား အစာအိမ်တွင်း အက်ဆစ်စုပ်ယူမှု အားကောင်းစေပြီး အဆီပါဝင်မှု နည်းပါးကာ အမျှင်ဓာတ်ကြွယ်ဝတဲ့ အစားအစာတွေကို စားသုံးရပါမယ်။ အထက်ပါ အစားအစာတွေကို ဆေးဝါးတွေနဲ့ ပေါင်းစပ်သုံးစွဲတဲ့အခါ ရင်ပူခြင်းကို သိသာစွာ လျှော့ချသက်သာစေနိုင်ပါတယ်။

    မသက်ဆိုင်ကြောင်း ရှင်းလင်းချက်

    Hello Health Group သည် ဆေးပညာအကြံဉာဏ်များ၊ ရောဂါရှာဖွေမှုများနှင့် ကုသမှုများ မပြုလုပ်ပေးပါ။

    မှ အချက်အလက် စစ်ဆေးထားပါသည်။

    Dr. Kaung Thar


    Dr. Thiha Phyo Myint မှ ရေးသားသည်။ · 11/05/2023 တွင် အသစ်ဖြည့်စွက်ခဲ့သည်။

    advertisement iconadvertisement

    ဤဆောင်းပါးက အကူအညီဖြစ်ပါသလား။

    advertisement iconadvertisement
    advertisement iconadvertisement