မသိလိုက်တဲ့ ရောဂါတွေ
ဒီမှာက ပုံမှန်ဆေးစစ်နေတဲ့သူဆိုတာ ရှားပါတယ်။ တစ်ခုခုလက္ခဏာပြမှသာ ဆေးရုံဆေးခန်းသွားကြတာပါ။ ဒါကြောင့် ကိုယ်ထဲမှာ ကိုယ်မသိလိုက်ဘဲ ရောဂါ တစ်ခုခုရှိနေနိုင်ပါတယ်။ မစစ်လို့ မသိလိုက်တဲ့ ရောဂါတွေပေါ့။ ကိုဗစ်လည်း ဝင်လာရော ခံနိုင်ရည်မရှိဘဲ အသက်အန္တရာယ်ထိခိုက်တဲ့အထိ ဖြစ်သွားတာမျိုးလည်း ဖြစ်နိုင်ပါတယ်။
မြန်မာနိုင်ငံမှာ တီဘီရောဂါတွေ သိပ်ကို ပေါပါတယ်။ ရိုးရိုးတီဘီ၊ ဆေးယဉ်ပါး တီဘီ အစုံရှိပါတယ်။ နောက် တီဘီက ကိုဗစ်ထက်တောင် ကြောက်ဖို့ကောင်းပါတယ်။ လေထဲက ကူးတာပါ။ လေထဲမှာ အချိန်အတိုင်းအတာတစ်ခုအထိ နေနိုင်ပြီး ရှူမိရင် ကူးပါတယ်။ ဒါပေမယ့် လူတိုင်း လက္ခဏာမပြပါဘူး။ ခုခံအားကောင်းနေရင် ဖိနှိပ်ခံထားရလို့ အောင်းနေတတ်ပါတယ်။ ကိုဗစ်ကူးခံရပြီဆိုရင်တော့ ခုခံအားတွေထိ၊ အဆုတ်တွေထိတာကြောင့် တီဘီက ပြန်ကြွလာပြီး ဒုက္ခပေးတတ်ပါတယ်။
ဆက်စပ်ပြီး ပြောရရင် နောက်တစ်ခုက အဆုတ်ရောင်၊ အဆုတ်ပွပါ။ ဒီမှာက ဖျားတယ်၊ ချောင်းဆိုး၊ ချွဲကြပ်ဆို ဆေးရုံဆေးခန်းသွားပြီး စနစ်တကျကုတာထက်စာရင် စပ်ဆေးလောက်နဲ့ ပြီးသွားပါတယ်။ သေချာမကုတဲ့အတွက် လက္ခဏာလောက်သာ သက်သာပြီး အထဲက ပိုးတွေ မသေပါဘူး။ တစ်ခါတလေ အဆုတ်ထိခိုက်သွားတတ်ပါတယ်။ ကိုယ်ကတော့ လက္ခဏာတွေ သက်သာနေပေမယ့်ပေါ့။ တကယ်တမ်းကိုဗစ်လည်း ဝင်လာရော ကိုယ့်အဆုတ်က နဂိုပျက်စီးပြီးသားဆိုတော့ ခံနိုင်ရည် မရှိပါဘူး။
စပ်ဆေးအကြောင်းလေး ဆက်ပြောရရင် နေထိုင်မကောင်းလို့ ဆေးစပ်သောက်တယ်၊ အားမရှိလို့ ဆေးစပ်သောက်တယ် စသဖြင့် သောက်တတ်ကြပါတယ်။ တချို့များဆို စွဲတောင် သောက်ကြပါတယ်။ စပ်ဆေးမှာက အားလုံးသိတဲ့အတိုင်း စတီးရွိုက်တွေ ပါပါတယ်။ စတီးရွိုက်က ခုခံအားကို ကျစေပါတယ်။ ဒါကြောင့် ကိုယ်မသိလိုက်ဘဲ ကိုဗစ်ဝင်လာတယ်။ ခုခံအားကလည်း နည်းနေတော့ ပြန်မတိုက်နိုင်ဘဲ ဒုက္ခရောက်ရတာပါ။
မှတ်ချက်များ
သင့်အတွေးများကို ဝေမျှပါ။
သင့်ကျန်းမာရေးအတွေးများကို Hello Sayarwonနဲ့ ဝေမျှလိုက်ပါ။
ဆက်သွယ်ရန် သို့မဟုတ် ဝင်မည်။ နှင့် ဝင်ရောက်ဆွေးနွေးပါမည်။